ARAM mo kun ta’no ta namimibi ki Jehova an lalaking ini? Ano daw an dahilan ta ibinugtak niya an mga surat na ini sa atubangan kan altar ni Jehova? Siya si Hezekias, an hadi kan duwang tribong kahadian nin Israel sa timog. Grabe an problema niya. Ta’no daw?

Pinabagsak na kaya kan Asiria an sampulong tribong kahadian sa norte. Itinugot ini ni Jehova ta marauton an mga tawo duman. Ngunyan, an duwang tribong kahadian na an isusunod kan Asiria.

Kapapadara pa lang kan hadi nin Asiria nin mga surat ki Hading Hezekias. Ini su ibinugtak ni Hezekias sa atubangan kan altar. Sa mga surat na ini, pigparatuya-tuya si Jehova asin pigsabihan si Hezekias na sumuko na. Kaya namibi siya: ‘Diyos na Jehova, iligtas mo po kami sa hadi nin Asiria, tanganing maaraman kan gabos na nasyon na ika sana an Diyos.’ Dadangugon daw ni Jehova si Hezekias?

Maray na hadi si Hezekias. Bako siyang arog kan maraot na mga hadi kan sampulong tribong kahadian, o kan ama niyang si Ahaz. Maingat na pigsusunod ni Hezekias an gabos na pagbuot ni Jehova. Kaya pakapamibi niya, ipinadara saiya ni propeta Isaias an mensaheng ini ni Jehova: ‘Dai makakalaog sa Jerusalem an hadi nin Asiria. Dai ngani makakarani an mga suldados niya. Dai man sinda makakapalayog maski sarong pana sa siyudad.’

Hilinga an ritrato digdi. Aram mo kun sairisay an gadan na mga suldados na ini? Mga Asiriano sinda. Isinugo ni Jehova an anghel niya asin sa sarong banggi sana, ginadan kaini an 185,000 na Asiriano. Kaya napiritan na umuli an hadi nin Asiria.

Nakaligtas an duwang tribong kahadian, asin nagin tuninong iyan nin pirang panahon. Pero pagkagadan ni Hezekias, an aki niyang si Manases an naghadi. Si Manases saka an aki kaining si Amon parehong marauton na hadi. Kaya napano na naman nin krimen asin kadahasan an nasyon. Kan gadanon si Amon kan mga lingkod niya, an aki niyang si Josias an nagin hadi.