OTSO anyos pa sana si Josias kan magin hadi siya kan duwang tribo nin Israel. Akion pa siya kaya kan primero tinabangan siyang mamahala nin mga mas gurang saiya.

Kan pitong taon na siyang hadi, hininguwa ni Josias na aramon an mga pagbuot ni Jehova. Sinunod niya an halimbawa kan maray na mga hadi arog ni David, Jehosafat asin Hezekias. Miyentras tin-edyer pa siya, nagpahiling siya nin kusog nin buot.

Haluyon nang marauton an ginigibo kan dakul na Israelita. Nagsasamba sinda sa mga diyos-diyosan. Nagduduko sinda sa mga rebulto. Kaya linibot ni Josias an nasyon kaiba kan mga tawuhan niya ’nganing halion an arog kaining pagsamba. Dipisil ini ta dakulon kaidto an nagsasamba sa mga diyos-diyosan. Mahihiling mo sa ritrato si Josias asin an mga tawuhan niya na pigpaparasâ an mga rebulto.

Pagkatapos, nagpili si Josias nin tulong lalaki para panginutan an paghirahay kan templo ni Jehova. Nagkolekta nin kuwarta sa banwaan asin itinao iyan sa tulong lalaking ini bilang panggastos sa trabaho. Miyentras na nagtatrabaho sa templo, may nadiskubre duman an halangkaw na saserdoteng si Hilkias na importanteng marhay na bagay. Iyan an mismong libro kan pagbuot na ipinasurat ni Jehova ki Moises haluyon nang panahon an nakaagi. Dakul na taon na nawara ini.

Dinara ki Josias an libro, asin ipinabasa niya ini. Kan madangog iyan, napag-isip-isip niyang dai sinusunod kan banwaan an pagbuot ni Jehova. Munduon siya kaya pinaknit niya an saiyang bado, arog kan mahihiling mo. Sinabi niya: ‘Anggot sato si Jehova. Dai sinunod kan mga henerasyon na nainot sato an mga pagbuot sa librong ini.’

Sinabi ni Josias ki Hilkias na aramon kun anong gigibuhon ni Jehova sainda. Naghapot si Hilkias sa propetisang si Hulda. Sinabi saiya kan propetisa an mensaheng ini ni Jehova para ki Josias: ‘An Jerusalem asin an mga nakaistar diyan papadusahan dahil sa saindang mararaot na gibo saka sa pagsamba sa mga diyos-diyosan. Pero dahil maray an gibo mo Josias, mangyayari sana ini pagkagadan mo.’