TIN-EDYER pa sana si Solomon kan magin hadi. Namumutan niya si Jehova, asin sinusunod niya an tugon kan saiyang ama na si David. Naugma si Jehova ki Solomon, kaya sarong banggi sinabi Niya saiya sa pangaturugan: ‘Solomon, anong gusto mong itao ko saimo?’

Nagsimbag si Solomon: ‘Diyos na Jehova, akion pa ako, dai ako tataong mamahala. Tawan mo po ako nin kadunungan para mapamahalaan ko nin maray an banwaan mo.’

Ikinaugma iyan ni Jehova. Kaya sinabi niya: ‘Dahil kadunungan an hinagad mo asin bakong halawig na buhay o kayamanan, tatawan taka nin urog na kadunungan kisa si’say man na nabuhay. Tatawan taka man kan dai mo pighagad—kayamanan asin kabantugan.’

Dai nahaloy, duwang babaying may magabat na problema an nagrani ki Solomon. ‘Kaiba ko sa harong an babaying ini,’ an paliwanag kan saro. ‘Nangaki ako nin lalaki. Pakalihis nin duwang aldaw nangaki man siya nin lalaki. Dangan sarong banggi, nagadan an aki niya. Pero kan turog ako, ilinaag niya sa kataning ko su gadan niyang aki tapos kinua su aki ko. Pagmata ko, gadan na aki an kataid ko, pero aram kong bako idto sako.’

Sinabi kan saro pang babayi: ‘Dai! Sakuya an buhay na aki, saiya su gadan!’ Nagsimbag an inot na babayi: ‘Bako! Saimo su gadan, sakuya an buhay!’ Arog kaiyan an simbagan ninda. Ano daw an gigibuhon ni Solomon?

Nagpakua siya nin espada, dangan sinabi niya: ‘Bangaon sa duwa an buhay na aki. Tawan an duwang babayi nin tigkabanga.’

‘Dai po!’ an kurahaw kan tunay na ina. ‘Dai tabi nindo siya paggadanon. Itao na lang nindo saiya!’ Pero sinabi kan ikaduwa: ‘Dai nindo siya itao sa si’say man samo; sige, bangaon an aki.’

Nagtaram si Solomon: ‘Dai paggadanon an aki! Itao siya sa inot na babayi. Siya an tunay na ina.’ Aram ini ni Solomon huling padabaon kan tunay na ina an aki kaya handa kaining itao sa ikaduwang babayi an aki basta dai sana ini magadan. Kan madangog kan banwaan kun paano sinolusyunan ni Solomon an problema, ugmahon sinda na igwa sindang madunungon na hadi.

Sa paghadi ni Solomon, binendisyunan nin Diyos an banwaan. Abunda an trigo asin sebada, ubas saka igos, pati iba pang kakanon. Magagayon an bado asin harong kan mga tawo. Mayo lamang nin kakulangan sa pangangaipo kan gabos.