HILINGA an lalaking pigngingisihan kan mga tawo. Bisto mo siya? Siya si Jeremias, sarong importanteng propeta nin Diyos.

Dai nahaloy pagkatapos ubuson ni Josias an mga diyos-diyosan sa Israel, sinugo ni Jehova si Jeremias na magin propeta Niya. Pero pagmati ni Jeremias hobenon pa siya para magin propeta. Alagad sinabi saiya ni Jehova na tatabangan Niya siya.

Sinabi ni Jeremias sa mga Israelita na pumundo na sa maraot nindang gibo. ‘Bakong totoo an mga diyos na pigsasamba kan mga nasyon,’ an sabi niya. Pero mas gusto pa kan dakul na Israelita na sumamba sa mga diyos-diyosan imbes na sa tunay na Diyos na si Jehova. Kan sabihon ni Jeremias sainda na papadusahan sinda nin Diyos, pigngisihan lang ninda siya.

Nag-agi an mga taon. Nagadan si Josias, asin pakalihis nin tulong bulan, an aki niyang si Jehoiakim an nagin hadi. Padagos si Jeremias sa pagpatanid sa mga tawo: ‘Gagabaon an Jerusalem pag dai kamo nagbago.’ Ginabring siya kan mga saserdote asin kinurahawan: ‘Dapat kang gadanon sa pigsasabi mong ini.’ Sinabi ninda sa mga prinsipe nin Israel: ‘Dapat gadanon si Jeremias, ta sige siyang tabil laban sa siyudad niyato.’

Ano na an gigibuhon ni Jeremias? Bako siyang takot! Tinaraman niya sinda: ‘Sinugo ako ni Jehova para sabihon ini. Kun dai kamo magbago sa maraot nindong gibo, gagabaon ni Jehova an Jerusalem. Pero tandaan nindo: Pag ginadan nindo ako, inosenteng tawo an ginadan nindo.’

Dai ginadan kan mga prinsipe si Jeremias, alagad dai man nagbago an mga Israelita. Dai nahaloy, sinalakay an Jerusalem kan hadi nin Babilonya na si Nabucodonosor. Dinara niyang bihag sa Babilonya an ribo-ribong Israelita para magin uripon. Ano daw an mamamatian mo kun kuanon ka nin mga dai mo bisto tapos darahon ka sa harayuon na lugar na dai mo aram?