KABTANG 5
Pagkabihag sa Babilonya Sagkod sa Pagtugdok Liwat kan Lanob kan Jerusalem
Mantang bihag sa Babilonya, an mga Israelita nag-agi nin dakul na pagbalo sa pagtubod ninda. Si Sadrac, Mesac asin Abednego inapon sa mainiton na hurno, pero ilinigtas sinda nin Diyos. Pag-abot nin panahon, pagkatapos daugon kan mga Medo asin Persiano an Babilonya, hinulog si Daniel sa lungib nin mga leon, pero iningatan man siya nin Diyos paagi sa pagtikom sa nguso kan mga leon.
Kan huri, pinalibre ni Hading Ciro kan Persia an mga Israelita. Nagbalik sinda sa saindang sadiring lugar 70 taon pagkatapos sindang darahon na bihag sa Babilonya. An saro sa mga inot nindang ginibo pagkabalik sa Jerusalem iyo an pagtugdok kan templo ni Jehova. Pero dahil sa pakana nin mga kaiwal, naatraso iyan. Kaya inabot nin 22 na taon puon kan magbalik sinda sa Jerusalem bago ninda natapos an templo.
Maaaraman man niyato an manungod sa pagbaklay ni Esdras pa-Jerusalem tanganing pagayunon an templo. Mga 47 taon ini pagkahaman kan templo. Dangan, 13 taon puon kan umabot si Esdras sa Jerusalem, nagtabang si Nehemias tanganing maitugdok liwat an gabang mga lanob kan siyudad. Gabos-gabos, 152 na taon nin kasaysayan an laog kan Kabtang SINGKO.
SA SEKSIYON NA INI
ISTORYA 77
Habo Nindang Sumamba sa Imahen
Ililigtas daw nin Diyos an tulong masinunod na hoben na lalaking ini sa nagkakalayong hurno?
ISTORYA 78
An Surat-Kamot sa Lanob
Tinawan ni propeta Daniel nin kahulugan an apat na misteryosong tataramon.
ISTORYA 79
Si Daniel sa Lungib nin mga Leon
Sinentensiyahan si Daniel nin kagadanan, pero puwede daw kutanang nalikayan niyang mangyari iyan sa saiya?
ISTORYA 80
Naghali sa Babilonya an Banwaan nin Diyos
Inutob ni Hading Ciro nin Persia an sarong hula kan sakupon niya an Babilonya, asin ngunyan may inuutob pa siya.
ISTORYA 81
Pagtitiwala sa Tabang nin Diyos
Sinuway kan mga Israelita an mga pagbuot nin tawo tanganing sunudon an Diyos. Bebendisyunan daw sinda nin Diyos?
ISTORYA 82
Si Mardokeo Asin Esther
Magayon si Reyna Vasti, pero isinalida sa saiya ni Hading Ahasuero si Esther bilang an bago kaining reyna. Taano?
ISTORYA 83
An mga Lanob kan Jerusalem
Miyentras na pigtitindog giraray an mga lanob, pighahanda man dapat aldaw-banggi kan mga trabahador an saindang mga espada asin budyak.