ANONG nangyayari digdi? May enggrandeng kapiyestahan. Inimbitaran kan hadi kan Babilonya an sangribong importanteng bisita. Piggagamit ninda an bulawan asin plata na mga kopa saka mangko na hali sa templo ni Jehova sa Jerusalem. Bigla na sana, may naglataw na mga muro nin kamot asin nagpuon ining magsurat sa lanob. Nanggirirabo an gabos.

An hadi ngunyan iyo an makuapo ni Nabucodonosor na si Belsasar. Dali-dali niyang ipinaapod an madudunong na lalaki. ‘An si’say man na makabasa kan surat na ini asin makatao sako kan kahulugan kaiyan,’ an sabi kan hadi, ‘tatawan nin dakul na regalo asin magigin tagapamahala na ikatulo sa kahadian.’ Pero mayo ni saro sa madudunong na lalaki an makagibo kaiyan.

Nadangog kan ina kan hadi an ribok kaya naglaog ini sa lugar kan karakanan. ‘Dai ka matakot,’ an sabi niya sa hadi. ‘May sarong lalaki sa kahadian na pinagdiyodiyosan. Kan panahon kan lolo mong si Nabucodonosor, ginibo siya kan hadi na panginot sa gabos na madudunong na lalaki. Daniel an ngaran niya. Ipaapod mo siya, asin sasabihon niya saimo an kahulugan kaini gabos.’

Kaya, tulos na ipinaapod si Daniel. Inalukan siya nin mga regalo pero dai niya iyan inako. Sinabi ni Daniel ki Belsasar na hinali kaidto ni Jehova si Nabucodonosor sa pagkahadi. ‘Hambugon siya, kaya pinadusahan siya ni Jehova,’ an sabi ni Daniel.

‘Alagad ika,’ an sabi ni Daniel ki Belsasar, ‘aram mo ini gabos, pero halangkawon pa man giraray an hiling mo sa sadiri mo arog niya. Kinua mo an mga kopa asin mangko na hali sa templo ni Jehova asin ininuman iyan. Inumaw mo an mga diyos na kahoy asin gapo, saka dai mo tinawan nin onra an satong Kaglalang. Kaya ipinadara nin Diyos an kamot para isurat an mga tataramon na ini.

‘Iyo ini an nakasurat,’ an sabi ni Daniel: ‘MENE, MENE, TEKEL asin PARSIN.’

‘An MENE nangangahulugan na binilang na nin Diyos an mga aldaw kan kahadian mo asin tinapos iyan. An TEKEL nangangahulugan na tinimbang ka sa timbangan asin nasumpungan na kulang. An PARSIN nangangahulugan na an kahadian mo itinao sa mga Medo asin Persiano.’

Mantang nagtataram pa si Daniel, sinasalakay na kan mga Medo asin Persiano an Babilonya. Nasakop ninda an siyudad asin ginadan si Belsasar. Nautob kan mismong bangging iyan an surat-kamot sa lanob! Pero ano na daw an mangyayari sa mga Israelita? Madali ta nang maaraman, pero hilingon ta nguna kun anong nangyari ki Daniel.