HILINGA si Jesus na nakatukaw. Pigtutukduan niya an mga tawo sa gilid nin sarong bukid sa Galilea. An mga pinakaharani saiya iyo an mga disipulo niya. Nagpili siya nin 12 tanganing magin mga apostol. Sinda an espesyal na mga disipulo ni Jesus. Aram mo an mga pangaran ninda?

Kabilang sainda si Simon Pedro asin an tugang niyang si Andres. Kabali man an magtugang na si Santiago asin Juan. May saro pang apostol na Santiago an ngaran, saka may saro pa na inaapod man na Simon. Duwang apostol an may ngaran na Judas, si Judas Iscariote asin si Judas na bisto man sa ngaran na Tadeo. Kaiba man si Felipe saka Natanael (inaapod man na Bartolome), pati na si Mateo asin Tomas.

Pakabalik ni Jesus hali sa Samaria, pinunan niyang ipahayag an mensaheng ini: ‘Harani na an kahadian kan langit.’ Aram mo daw kun ano an kahadian na iyan? Iyan tunay na gobyerno nin Diyos, na si Jesus an hadi. Mamamahala siya hali sa langit asin magdadara nin katuninungan sa kinaban. An bilog na daga gigibuhon na paraiso kan kahadian nin Diyos.

Sa ritrato, tinutukduan ni Jesus an mga tawo manungod sa kahadian. ‘Arog kaini kamo dapat mamibi,’ an paliwanag niya. ‘Ama niyamo sa langit, pakangbanalon an ngaran mo. Dumatong lugod an kahadian mo. Gibuhon an kabutan mo sa daga, kun paanong iyo man sa langit.’ An apod diyan kan dakul ‘Ama Niyamo,’ an iba man, ‘Pamibi kan Kagurangnan.’ Kaya mo daw sabihon an bilog na pamibi?

Tinukduan man ni Jesus an mga tawo kun paano pakikiibanan an kada saro. ‘Gibuha sa iba an gusto nindong gibuhon ninda saindo,’ an sabi niya. Bako daw na maugma ka pag mabuot saimo an iba? Kaya, dapat mabuot kita sainda. Sa maabot na paraiso, maugmahon nanggad ta an gabos na tawo arog na kaiyan!