HILINGA an solteritong ini na nakikipag-ulay sa mga may edad. Mga paratukdo sinda sa templo nin Diyos sa Jerusalem. Solterito na si Jesus kaya medyo dakula na siya. Dose anyos na siya ngunyan.

Ngalason an mga paratukdo ta kadakul aram si Jesus manungod sa Diyos asin sa mga nakasurat sa Bibliya. Pero ta’no ta mayo digdi si Jose asin si Maria? Hain daw sinda? Aramon ta.

Taon-taon, pigdadara ni Jose sa Jerusalem an pamilya niya para sa espesyal na selebrasyon na inaapod na Paskuwa. Halawig na pagbaklay iyan hali sa Nazaret. Wara pa kaidtong awto asin tren. An kadaklan na tawo naglalakaw, asin inaabot nin mga tulong aldaw an pagpa-Jerusalem.

Dakula na an pamilya ni Jose. May mga tugang si Jesus na lalaki asin babayi na kaipuhan atamanon. Ngunyan na taon, kaiba ni Jose asin Maria an mga aki ninda sa pagbaklay pauli sa Nazaret. An paghuna kan duwa, kaiba si Jesus kan dakul na nagbabaraklay. Pero kan magpundo sinda para magpahingalo, dai ninda siya makua. Pigparahanap ninda siya sa mga paryente asin amigo ninda, pero mayo siya! Kaya nagbalik sinda sa Jerusalem tanganing hanapon siya duman.

Natagbuan man giraray ninda siya digdi kaiba kan mga paratukdo. Nagdadangog siya sainda asin naghahapot. Ngalason an mga tawo sa kadunungan ni Jesus. Pero sinabi ni Maria: ‘Nonoy, ta’no ta ginibo mo ini samo? Haditon na kami ni Papa mo sa kakahanap saimo.’

‘Ta’no ta kaipuhan nindo akong hanapon?’ an simbag ni Jesus. ‘Dai nindo aram na dapat nasa harong ako kan sakuyang Ama?’

Iyo, gustuhon ni Jesus na yaon siya pirmi sa lugar na makakanuod siya manungod sa Diyos. Bako daw na iyan man an dapat mamatian ta? Sa Nazaret, surusemanang nag-aatender si Jesus sa mga pagtiripon para sumamba. Dahil pirmi siyang nagdadangog na marhay, dakul siyang nanunudan sa Bibliya. Arugon ta man si Jesus asin sunudon an halimbawa niya.