GARO angguton digdi si Jesus ano? Aram mo daw an dahilan? Makikuwartahon pa’no an mga lalaking ini sa templo nin Diyos sa Jerusalem. Gusto nindang makadilensiya nin dakul sa mga tawong nagdidigdi para sumamba sa Diyos.

Nahihiling mo an mga baka, karnero asin salampati? Pigpapabakal iyan kan mga lalaking ini digdi mismo sa templo. Aram mo kun ta’no? Kaipuhan kaya kan mga Israelita an mga hayop asin gamgam tanganing iatang sa Diyos.

Uyon sa pagbuot nin Diyos, pag nagkasala an sarong Israelita, kaipuhan niyang magtao nin atang sa Diyos. Apuwera kaiyan, may iba pang mga pagkakataon na kaipuhan nin mga Israelita na mag-atang. Pero sain nagkukua nin mga gamgam asin hayop an sarong Israelita para iatang sa Diyos?

May mga Israelita na may ataman na mga bayong asin hayop, kaya puwede nindang iatang iyan. Pero an dakul mayo. An iba man harayuon sa Jerusalem an istaran kaya dai ninda madadara sa templo an mga ataman ninda. Kaya sa Jerusalem na sinda nagbabakal kan kaipuhan nindang bayong o hayop. Pero sobra-sobrang magpresyo an mga parapabakal. Pigdadaya ninda an mga tawo. Saro pa, digdi mismo sinda sa templo nagpapabakal. Sala iyan.

Angguton kaini si Jesus. Itinuwal niya an mga lamesa kan mga lalaki kaya nagkawararak an mga sinsilyo ninda. Nagkua man siya nin lubid na panglatigo asin pinaruluwas sa templo an gabos na hayop. Tinaraman niya an mga nagtitinda nin salampati: ‘Iluwas nindo an mga ini! Dai nindo paggibuhon na lugar nin negosyo an harong kan sakuyang Ama.’

Kaiba ni Jesus sa templo an nagkapira sa mga disipulo niya. Nabigla sinda sa ginibo ni Jesus. Dangan nagirumduman ninda an sinabi sa Bibliya manungod sa Aki nin Diyos: ‘An pagkamuot sa harong nin Diyos maglalaad sa puso niya na garo kalayo.’

Miyentras na nasa Jerusalem si Jesus para sa pagselebrar kan Paskuwa, naggibo siya nin dakul na milagro. Pagkatapos, naghali na siya pabalik sa Galilea. Pero nag-agi nguna siya sa distrito nin Samaria. Hilingon ta kun anong nangyari duman.