NAGPAHINGALO si Jesus sa gilid nin bubon sa Samaria. Nagduman sa banwa an mga disipulo niya ’nganing magbakal nin kakanon. An babaying kaulay ni Jesus nagsasakdo nin tubig. Sinabi niya sa babayi: ‘Puwedeng makiinom?’

Nabigla an babayi. Ta’no daw? Judio kaya si Jesus, asin siya Samaritana. An kadaklan na Judio habo sa mga taga Samaria. Dai ngani sinda nakikipag-ulay sa mga ini! Pero padaba ni Jesus an gabos na tawo. Kaya sinabi niya: ‘Kun midbid mo ining nakikiinom, mahagad ka saiya asin tatawan ka niya nin tubig nin buhay.’

Nagsabi an babayi: ‘Hararom po an bubon, saka dai kamong pansakdo. Sain nindo kukuanon an tubig na iyan?’

‘Kun mainom ka nin tubig sa bubon na ini, mapapaha ka giraray,’ an paliwanag ni Jesus. ‘Alagad an tubig hali sako matao nin buhay na daing katapusan.’

‘Tawi tabi ako kan tubig na iyan para dai na ako mapaha!’ an sabi kan babayi. ‘Dai ko na man kaipuhan magbalik-balik digdi para magsakdo.’

An paghuna kan babayi totoong tubig an buot sabihon ni Jesus. Pero an pigsasabi ni Jesus iyo an katotoohan manungod sa Diyos asin sa Kahadian niya. Garo ini tubig na nagtataong buhay. Puwede iyan magtao nin buhay na daing katapusan.

Sinabi ngunyan ni Jesus sa babayi: ‘Magpuli ka asin iiba mo digdi an agom mo.’

‘Mayo akong agom,’ an simbag kan babayi.

Sinabi ni Jesus: ‘Tama ka. Pero lima na an nagin agom mo, asin bako mong agom an kaibanan mo ngunyan sa harong.’

Napangalas an babayi, dahil gabos ini totoo. Paano ini naaraman ni Jesus? Siya kaya an ipinanugang sugo nin Diyos, asin an Diyos an nagsabi saiya kan impormasyon na ini. Kan magbaralik an mga disipulo ni Jesus, nagkabirigla sinda na may kaulay siyang Samaritana.

Ano an manunudan ta digdi? Ipinapahiling kaini na mabuot si Jesus sa gabos na tawo ano man an lahi ninda. Kaya dapat na arog man kita kaiyan. Dai niyato pag-isipon na maraot an ibang mga tawo dahil sana sa lahi ninda. Gusto ni Jesus na maaraman kan gabos na tawo an katotoohan na matao nin buhay na daing katapusan. Kaya, dapat ta man tabangan an mga tawo na manudan an katotoohan na ini.