HILINGA an anghel na pigbubukasan an pinto kan presuhan. An mga lalaking pinapaluwas niya mga apostol ni Jesus. Ano daw an dahilan ta napreso sinda?

Ibinubo pa sana kaidto an banal na espiritu sa mga disipulo ni Jesus. Sarong hapon, nagduman sa templo sa Jerusalem si Pedro asin Juan. Naagihan ninda an sarong lalaking pilay puon pagkaaki. Aroaldaw siyang nasa may pinto ’nganing makilimos sa mga nagduduman sa templo. Kan mahiling niya si Pedro asin Juan, nakimahirak siyang limusan ninda siya. Ano daw an gigibuhon kan mga apostol?

Nagpundo sinda asin naghiling sa lalaki. ‘Mayo akong kuwarta,’ an sabi ni Pedro, ‘pero tatawan taka kan igwa ako. Sa ngaran ni Jesus, magtindog ka asin maglakaw!’ Kinaputan ni Pedro an tuong kamot kan lalaki, asin bigla ining luminukso asin luminakaw. Kan mahiling ini kan mga tawo, ngalason asin ugmahon sinda.

‘Nagibo mi ini dahil sa kapangyarihan nin Diyos, na nagbuhay liwat ki Jesus,’ an sabi ni Pedro. Miyentras na nagtataram pa sinda ni Juan, nag-arabot an mga lider nin relihiyon. Anggot sinda ta sinasabi ni Pedro asin Juan na binuhay si Jesus hali sa mga gadan. Kaya dinakop ninda an mga apostol asin iprineso.

Kan sunod na aldaw, nagtiripon an mga lider nin relihiyon. Dinara sa atubangan ninda si Pedro asin Juan, pati na su pinaumayan ninda. ‘Si’say an nagtao saindo nin kapangyarihan na gibuhon an milagrong ini?’ an hapot kan mga lider nin relihiyon.

Sinabi ni Pedro na dahil idto sa kapangyarihan nin Diyos. Dai aram kan mga saserdote an gigibuhon, ta dai ninda manigaran na nangyari talaga an milagro. Kaya pinatanidan ninda an mga apostol na dai na magtaram manungod ki Jesus, asin pinalibre sinda.

Alagad padagos na nagpahayag an mga apostol manungod ki Jesus asin nagpaumay nin mga may hilang. Naglakop an bareta manungod digdi, kaya dakul hali sa mga banwa sa palibot kan Jerusalem an nagdara nin mga may hilang para paumayan kan mga apostol. Lalong nauri an mga lider nin relihiyon, kaya ipinapreso ninda an mga apostol. Pero dai sinda naghaloy duman.

Kan banggi, binuksan kan anghel nin Diyos an presuhan, arog kan mahihiling mo. Sinabi kan anghel: ‘Magduman kamo sa templo. Padagos kamong magpahayag sa mga tawo.’ Kinaagahan, kan an mga lider nin relihiyon magsugo nin mga lalaki para kuanon an mga apostol, wara na an mga ini. Paghaloy-haloy, nahiling kan mga lalaki an mga apostol na nagtutukdo sa templo asin dinara an mga ini sa Sanhedrin.

‘Bakong sinabihan mi na kamo na dai na magtukdo manungod ki Jesus?’ an sabi kan mga lider nin relihiyon. ‘Pero sige kamong tukdo sa bilog na Jerusalem.’ Nagsimbag an mga apostol: ‘Dapat ming sunudon an Diyos imbes na mga tawo.’ Kaya padagos sindang nagtukdo kan ‘maugmang bareta.’ Magayunon na arugon niyato iyan, bako daw?