HILINGA an kadena sa kamot ni Pablo, saka an Romanong suldados na nagbabantay saiya. Preso si Pablo sa Roma asin pighahalat niya an magigin desisyon saiya kan Romanong tagapamahala na si Cesar. Mantang nakapreso, puwede siyang bisitahon.

Tulong aldaw pakaabot ni Pablo sa Roma, inimbitaran niya an Judiong mga lider duman na dalawon siya. Kaya dakul na Judio sa Roma an nagduman saiya. Ipinahayag ni Pablo sainda an manungod ki Jesus asin sa kahadian nin Diyos. May mga nagtubod asin nagin Kristiyano, pero an iba dai.

Nagpahayag man si Pablo sa mga suldados na nagbabantay saiya. Sa duwang taon na pagkapreso niya, ipinahayag ni Pablo an maugmang bareta sa gabos na nakakaulay niya. Pati ngani an pamilya ni Cesar nakadangog kan maugmang bareta kan Kahadian, asin an nagkapira sainda nagin Kristiyano.

Pero si’say ining bisita niya na nagsusurat? Bisto mo? Iyo, si Timoteo. Napreso man siya dahil sa pagpahayag manungod sa Kahadian, pero libre na giraray siya. Nagdigdi siya ’nganing tabangan si Pablo. Aram mo daw an pigsusurat niya? Isihon ta.

Narurumduman mo an mga siyudad nin Filipos asin Efeso sa Istorya 110? Nagtabang si Pablo na mabilog an mga kongregasyon sa mga lugar na idto. Ngunyan, mantang nakapreso siya, sinuratan niya an mga Kristiyano duman. Nasa Bibliya an mga surat na iyan, na inaapod na Efeso asin Filipos. Sa ritrato, ipinapasurat ni Pablo ki Timoteo an gusto niyang sabihon sa mga amigo nindang Kristiyano sa Filipos.

Mabuuton an mga taga Filipos ki Pablo. Nagpadara sinda nin regalo saiya digdi sa presuhan, kaya gusto niyang pasalamatan sinda. Si Epafrodito an nagdara kan regalo. Pero nagkahilang siya asin haros magadan. Alagad rahay na siya asin handa nang magpuli. Dadarahon niya an surat ni Pablo asin Timoteo pagbalik niya sa Filipos.

Sa presuhan, may duwa pang ginibong surat si Pablo na nagin parte kan Bibliya. An saro para sa mga Kristiyano sa siyudad nin Colosas. Inaapod iyan na Colosas. An saro pa personal na surat niya sa amigo niyang si Filemon na nakaistar man sa Colosas. Manungod iyan sa suruguon ni Filemon na si Onesimo.

Nagdulag si Onesimo ki Filemon asin nagpasiring sa Roma. Naisihan ni Onesimo na nakapreso palan digdi si Pablo. Nagbisita siya ki Pablo, asin tinukduan siya kaini. Dai nahaloy, nagin Kristiyano man si Onesimo. Inako niya na sala an pagdulag niya sa saiyang amo. Aram mo daw an sinabi ni Pablo sa surat niya ki Filemon?

Nakiulay si Pablo na patawadon ni Filemon si Onesimo. ‘Pinapabalik ko siya saimo,’ an sabi ni Pablo. ‘Pero ngunyan bako lang siyang suruguon mo, kundi saro nang mahusay na Kristiyanong tugang.’ Pagbalik ni Onesimo sa Colosas, dara-dara niya an duwang surat, saro para sa mga taga Colosas asin saro para ki Filemon. Isip-isipa na sana an kaugmahan ni Filemon kan maaraman niyang nagin Kristiyano an suruguon niya.

Kan suratan ni Pablo an mga taga Filipos asin si Filemon, may maugma talaga siyang bareta. ‘Papadiyanon ko si Timoteo,’ an sabi ni Pablo sa mga taga Filipos. ‘Pero madiyan man tulos ako.’ Ki Filemon, isinurat niya: ‘Pakihanda kan madadagusan ko diyan.’

Kan makaluwas si Pablo sa presuhan, dinalaw niya an mga Kristiyanong tugang niya sa dakul na lugar. Pero paghaloy-haloy, napreso giraray siya sa Roma. Sa pagkakataon na ini, aram niyang gagadanon na siya. Kaya nagsurat siya ki Timoteo na magduman tulos saiya. ‘Nagin maimbod ako sa Diyos,’ an sabi ni Pablo sa surat. ‘Tatawan niya ako nin balos.’ Pirang taon pakatapos gadanon si Pablo, ginaba giraray an Jerusalem. Pero, mga Romano na an naggibo kaiyan.

Dakul pang bagay an nasa Bibliya. Ipinasurat ni Jehova ki apostol Juan an huring mga libro kaiyan, kaiba na an libro nin Kapahayagan. Sinasabi sa librong ini an manungod sa mga mangyayari sa maabot na panahon. Aramon ta kun ano iyan.