1. Anong bantog na pamibi an pag-uulayan ta ngunyan?

MILYON-MILYON an nakakaaram kan bantog na pamibi na inaapod na Ama Niyamo, o Pamibi kan Kagurangnan. Ginamit ni Jesus an pamibing ini tanganing tukduan an saiyang mga disipulo kun paano mamibi. Ano an mga ipinamibi niya? Asin taano ta importante sa sato ngunyan an pamibing ini?

2. Ano an tulong importanteng bagay na itinukdo sa sato ni Jesus na ipamibi?

² Sinabi ni Jesus: “Kun siring, mamibi kamo nin arog kaini: ‘Ama niyamo na nasa langit, pakangbanalon an ngaran mo. Dumatong lugod an Kahadian mo. Mangyari lugod an buot mo, kun paano sa langit, siring man sa daga.’” (Basahon an Mateo 6:9-13.) Taano ta tinukduan kita ni Jesus na ipamibi an tulong bagay na iyan?—Hilingon an Dagdag na Impormasyon 20.

3. Ano an kaipuhan niyatong maaraman manungod sa Kahadian nin Diyos?

³ Nanudan na niyato na Jehova an pangaran nin Diyos. Naaraman ta man kun ano an gusto nin Diyos para sa mga tawo asin sa planetang Daga. Pero ano an buot sabihon ni Jesus kan sabihon niya: “Dumatong lugod an Kahadian mo”? Aramon ta ngunyan kun ano an Kahadian nin Diyos, kun ano an gigibuhon kaiyan, asin kun paano kaiyan papakangbanalon an pangaran nin Diyos.

4. Ano an Kahadian nin Diyos, asin siisay an Hadi kaiyan?

⁴ Naggibo si Jehova nin sarong gobyerno sa langit asin si Jesus an pinili niya na magin Hadi kaiyan. Inaapod kan  Bibliya an gobyernong iyan na Kahadian nin Diyos. Si Jesus “an Hadi kan mga namamahala bilang hadi asin Kagurangnan kan mga namamahala bilang kagurangnan.” (1 Timoteo 6:15) Mas dakul an magigibong karahayan ni Jesus kisa sa siisay man na tawong tagapamahala, asin dawa pag-iribanon pa an gabos na tawong tagapamahala, mas makapangyarihan man giraray si Jesus kisa sainda.

5. Hali sain mamamahala an gobyerno nin Diyos? Ano an papamahalaan kaiyan?

⁵ Kuwarentang aldaw pagkatapos na buhayon liwat si Jesus, nagbalik siya sa langit. Pag-abot nin panahon, pinatukaw siya ni Jehova bilang Hadi kan Kahadian. (Gibo 2:33) Hali sa langit, papamahalaan kan gobyerno nin Diyos an bilog na daga. (Kapahayagan 11:15) Kaya inaapod kan Bibliya an Kahadian nin Diyos na sarong “langitnon na Kahadian.”—2 Timoteo 4:18.

6, 7. Taano ta nakakalabi si Jesus kisa sa siisay man na tawong hadi?

⁶ Sinasabi kan Bibliya na mas nakakalabi si Jesus kisa sa siisay man na tawong hadi huling siya “an solamenteng igwa nin imortalidad.” (1 Timoteo 6:16) An gabos na tawong tagapamahala magagadan pag-abot nin panahon, pero si Jesus dai nuarin man magagadan. An gabos na karahayan na gigibuhon ni Jesus para sa sato magdadanay nin daing katapusan.

⁷ Sinasabi kan propesiya sa Bibliya na si Jesus magigin patas saka mapagmalasakit na Hadi: “Magdadanay sa saiya an espiritu ni Jehova, an espiritu nin kadunungan asin nin pakasabot, an espiritu nin konseho asin nin kakusugan, an espiritu nin kaaraman asin kan pagkatakot ki Jehova. Asin magkakaigwa siya nin kaugmahan sa pagkatakot ki Jehova. Dai siya mahusgar base sa nahihiling kan saiyang mga mata, ni masagwi base sana sa nadadangog kan saiyang mga talinga. Maghahatol siyang may katanusan sa  mga dukha.” (Isaias 11:2-4, NW) Gusto mo daw nin arog kaiyan na hadi?

8. Paano ta naaraman na may kaibang mamamahala si Jesus bilang hadi?

⁸ May mga tawo na pinili nin Diyos tanganing mamahala kaiba ni Jesus sa gobyerno sa langit. Halimbawa, sinabi ni apostol Pablo ki Timoteo: “Kun padagos kitang magtatagal, mamamahala man kitang magkairibanan bilang mga hadi.” (2 Timoteo 2:12) Pira an makakaibanan ni Jesus na mamamahala bilang mga hadi?

9. Pira an mamamahala kaiba ni Jesus? Kasuarin nagpuon an Diyos sa pagpili sa sainda?

⁹ Arog kan naaraman ta sa Kapitulo 7, tinawan nin bisyon si apostol Juan na diyan nahiling niya si Jesus bilang Hadi sa langit kaiba an 144,000 na iba pang hadi. Sairisay an kabilang sa 144,000 na iyan? Sinabi ni Juan na ‘sa saindang mga angog nakasurat an ngaran ni Jesus asin an ngaran kan saiyang Ama.’ Asin sinabi pa niya: “An mga ini idtong padagos na nagsusunod sa Kordero [buot sabihon, si Jesus] sain man siya magduman. Binakal an mga ini hali sa katawuhan.” (Basahon an Kapahayagan 14:1, 4.) An 144,000 mga maimbod na Kristiyano na pinili nin Diyos na ‘mamahala sa daga bilang mga hadi’ kaiba ni Jesus. Pag nagadan sinda, bubuhayon sinda sa langit. (Kapahayagan 5:10) Puon pa kan panahon kan mga apostol, nagpipili na si Jehova nin maimbod na mga Kristiyanong magigin kabilang sa grupong iyan nin 144,000 na mga hadi.

10. Taano ta sarong patunay kan pagkamuot sa sato ni Jehova an pagpili niya ki Jesus asin sa 144,000 para mamahala sa mga tawo?

¹⁰ Padangaton kita ni Jehova kaya nagpili siya nin mga tawong makakaibanan ni Jesus sa paghadi. Magigin marahay na tagapamahala si Jesus huling naiintindihan niya kita. Nagin tawo siya asin nag-agi man nin mga kasakitan. Sinabi ni Pablo na aram ni Jesus an namamatian ta, ‘nasasabutan niya an satong mga kaluyahan,’ asin ‘inagihan  niya an gabos na pagbalo na arog kan inaagihan niyato.’ (Hebreo 4:15; 5:8) Mga tawo man dati an 144,000. Aram man ninda kun gurano kasakit magin bakong perpekto asin magkahilang. Kaya makakasigurado kita na maiintindihan ni Jesus asin kan 144,000 bako sana an namamatian niyato kundi pati man an mga problemang inaagihan ta.

11. Taano ta tinukduan ni Jesus an saiyang mga disipulo na ipamibi na lugod mangyari an kabutan nin Diyos sa langit?

¹¹ Tinukduan ni Jesus an saiyang mga disipulo na ipamibi na lugod mangyari an kabutan nin Diyos sa langit. Taano? Nanudan ta sa Kapitulo 3 na nagrebelde ki Jehova si Satanas na Diyablo. Pagkatapos magrebelde ni Satanas, tinugutan siya ni Jehova pati an bakong maimbod na mga anghel, o mga demonyo, na mag-istar pa sa langit sa laog nin pirang panahon. Kaya bakong gabos na nasa langit kaidto naggigibo kan kabutan nin Diyos. Sa Kapitulo 10, dakul pa kitang maaaraman manungod ki Satanas asin sa mga demonyo.

12. Anong duwang mahalagang pangyayari an mababasa ta sa Kapahayagan 12:10?

¹² Ipinapaliwanag kan Bibliya na dai mahahaloy pagkatapos na patukawon si Jesus bilang Hadi kan Kahadian nin Diyos, makikigiyera siya ki Satanas. (Basahon an Kapahayagan 12:7-10.) Mababasa sa bersikulo 10 an duwang mahalagang marhay na pangyayari—an pagpuon kan pamamahala kan Kahadian nin Diyos na an Hadi iyo si Jesu-Cristo, asin an paghulog ki Satanas digdi sa daga hali sa langit. Arog kan maaaraman ta, nangyari na an mga ini.

13. Ano an nangyari sa langit kan palayason na duman si Satanas?

¹³ Mababasa ta sa Bibliya kun gurano kaugma kan maimbod na mga anghel pagkatapos na palayason sa langit si Satanas asin an saiyang mga demonyo. Sinabi diyan: “Mag-ugma an langit asin kamo na nag-iirok diyan!” (Kapahayagan  12:12) May lubos nang katuninungan asin pagkasararo sa langit dahil an gabos nang yaon duman naggigibo kan kabutan nin Diyos.

14. Ano an nangyari sa daga kan iapon digdi si Satanas hali sa langit?

¹⁴ Pero ibang-iba an nagin buhay sa daga. Marauton an mga nangyayari sa mga tawo “huli ta buminaba na [sa daga] an Diyablo” asin “grabe an [saiyang] kaanggutan, palibhasa aram niyang halipot na sana an saiyang panahon.” (Kapahayagan 12:12) Angguton si Satanas huling pinalayas siya sa langit, saka aram niyang madali na siyang paraon. Ginigibo niya an gabos para magdara nin kariribukan, kulog, asin kasakitan sa bilog na daga.

15. Ano an katuyuhan nin Diyos para sa daga?

¹⁵ Pero dai nagbago an katuyuhan nin Diyos para sa daga. Gusto pa man giraray niyang mag-istar nin daing sagkod sa paraisong daga an perpektong mga tawo. (Salmo 37:29) Tanganing mangyari ini, ano an gigibuhon kan Kahadian nin Diyos?

16, 17. Ano an sinasabi sa sato kan Daniel 2:44 mapadapit sa Kahadian nin Diyos?

¹⁶ An propesiya sa Daniel 2:44 nagsasabi: ‘Sa mga aldaw kan mga hading idto mapatindog an Diyos sa langit nin sarong kahadian na dai nuarin man malalaglag. Asin an kahadian na ini dai itatao sa ibang banwaan, iyan an marunot asin matapos kan gabos na mga kahadian na ini, asin magdadanay iyan sagkod nuarin pa man.’ Ano an itinutukdo kaini sa sato mapadapit sa Kahadian nin Diyos?

¹⁷ Inot, sinasabi kaiyan sa sato na an Kahadian nin Diyos mapuon na mamahala ‘sa mga aldaw kan mga hading idto.’ Buot sabihon, may namamahala pang ibang mga gobyerno sa daga pag nagpuon nang mamahala an Kahadian. Ikaduwa, sinasabi kaiyan sa sato na an Kahadian nin Diyos magdadanay nin daing sagkod asin dai nuarin man sasalidahan  nin ibang gobyerno. Asin ikatulo, magkakaigwa nin giyera sa pag-ultanan kan Kahadian nin Diyos asin kan mga gobyerno sa kinaban na ini. Manggagana an Kahadian nin Diyos asin iyan na sana an gobyernong mamamahala sa bilog na kinaban. Dangan magkakaigwa na an mga tawo kan pinakamarahay na gobyerno.

18. Ano an apod sa pangultimong giyera sa pag-ultanan kan Kahadian nin Diyos asin kan mga gobyerno sa kinaban na ini?

¹⁸ Paano sasalidahan kan Kahadian nin Diyos an pamamahala nin tawo digdi sa daga? Bago an pangultimong giyera, na inaapod na giyera nin Armagedon, dadayaon kan mga demonyo “an mga hadi sa bilog na daga, tanganing tiripunon an mga ini sa ralaban kan dakulang aldaw kan Diyos na Makakamhan sa Gabos.” Iyo, an mga gobyerno nin tawo makikilaban sa Kahadian nin Diyos.—Kapahayagan 16:14, 16; hilingon an Dagdag na Impormasyon 10.

19, 20. Taano ta kaipuhan niyato an Kahadian nin Diyos?

¹⁹ Taano ta kaipuhan niyato an Kahadian nin Diyos? May tulong panginot na dahilan. Inot, makasalan kita, kaya nagkakahilang asin nagagadan kita. Pero sinasabi kan Bibliya na sa pamamahala kan Kahadian nin Diyos, mabubuhay kita nin daing katapusan. Sa katunayan, sinasabi kan Juan 3:16: “An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.”

²⁰ Ikaduwa, kaipuhan niyato an Kahadian nin Diyos huling napapalibutan kita nin maraot na mga tawo. Dakul an nagpuputik, nandadaya, saka mga imoral. Dai kaya kan tawo na halion an mga ini, pero iyan an gigibuhon nin Diyos. An mga tawong padagos na naggigibo nin maraot paparaon sa Armagedon. (Basahon an Salmo 37:10.) Ikatulo, kaipuhan niyato an Kahadian nin Diyos ta an mga gobyerno nin tawo maluya, daing hirak, saka korapto. Dai  sinda interesado sa pagtabang sa mga tawo na magsunod sa Diyos. Sinasabi kan Bibliya na ‘an tawo nagsasakop sa tawo sa saiyang ikakaraot.’—Parahulit 8:9.

21. Paano sisiguraduhon kan Kahadian na mangyari an kabutan nin Diyos digdi sa daga?

²¹ Pagkatapos kan Armagedon, sisiguraduhon kan Kahadian nin Diyos na mangyari an kabutan nin Diyos digdi sa daga. Halimbawa, hahalion kaiyan si Satanas asin an saiyang mga demonyo. (Kapahayagan 20:1-3) Asin maabot an panahon na dai na nin magkakahilang o magagadan. Huli sa pantubos, an gabos na maimbod na tawo mabubuhay nin daing katapusan sa Paraiso. (Kapahayagan 22:1-3) Papakangbanalon kan Kahadian an pangaran nin Diyos. Ano an buot sabihon kaiyan? Nangangahulugan iyan na pag namahala na digdi sa daga an gobyerno nin Diyos, gabos na tawo mataong onra sa pangaran ni Jehova.—Hilingon an Dagdag na Impormasyon 21.

22. Paano ta naaraman na dai pa nagin Hadi si Jesus kan yaon siya digdi sa daga o pagkatapos tulos na buhayon siya?

²² Tinukduan ni Jesus an saiyang mga disipulo na ipamibi: “Dumatong lugod an Kahadian mo.” Kaya malinaw na dai pa kaidto nag-aabot an gobyerno nin Diyos. Magibo nguna si Jehova nin sarong gobyerno asin si Jesus an ibubugtak  niyang Hadi. Nagin Hadi daw tulos si Jesus pagkabalik niya sa langit? Dai, naghalat pa siya. Mga taon pakalihis kan pagkabuhay liwat ni Jesus, lininaw iyan ni Pedro asin ni Pablo kan sambiton ninda an propesiya sa Salmo 110:1 na an pinapanungdan iyo si Jesus. Sinabi diyan ni Jehova: “Tumukaw ka sa tuo ko sagkod na ibugtak ko an saimong mga kaiwal na magin tungtungan kan saimong mga bitis.” (Gibo 2:32-35; Hebreo 10:12, 13) Gurano kahaloy naghalat si Jesus bago siya pinatukaw ni Jehova bilang Hadi?

23. (a) Kasuarin nagpuon na mamahala si Jesus bilang Hadi sa gobyerno nin Diyos? (b) Ano an maaaraman niyato sa sunod na kapitulo?

²³ Dakul na taon bago an 1914, nasabutan kan sarong grupo nin sinserong mga Kristiyano na magigin mahalagang taon iyan sa propesiya kan Bibliya. An mga pangyayari sa kinaban puon kan 1914 nagpatunay na tama sinda. Nagpuon nang mamahala si Jesus bilang Hadi kan taon na iyan. (Salmo 110:2) Dai nahaloy pagkatapos kaiyan, ihinulog si Satanas sa daga, asin ngunyan “halipot na sana an saiyang panahon.” (Kapahayagan 12:12) Sa sunod na kapitulo, maaaraman ta an dakul pang ebidensiya na nabubuhay na kita sa panahon na iyan. Maaaraman ta man na dai na mahahaloy, sisiguraduhon kan Kahadian nin Diyos na mangyari an kabutan ni Jehova digdi sa daga.—Hilingon an Dagdag na Impormasyon 22.