PAG nagbabasa ka nin diyaryo, naghihiling nin TV, o nagdadangog sa radyo, dakul kang mababaretaan na krimen, giyera, asin terorismo. Tibaad ika mismo nasasakitan huli sa hilang o pagkagadan nin mahal sa buhay.

Haputon an saimong sadiri:

• Ini daw an gusto nin Diyos para sa sako saka sa pamilya ko?

• Sain ako makakakua nin tabang para makayanan ko an mga problema?

• Magkakaigwa pa daw nin tunay na katuninungan?

May nakakakumbinsir na simbag an Bibliya sa mga hapot na iyan.

• An mga tawo dai nang mamamatian na mga kulog, dai na magurang o magagadan.—Kapahayagan 21:4

• ‘An mga pilay marulukso na garo usa.’—Isaias 35:6

• ‘An mga mata kan mga buta magkakamuruklat.’—Isaias 35:5

• Bubuhayon an mga gadan.—Juan 5:28, 29

• Mayo nang magkakahilang.—Isaias 33:24

• Magigin abunda an kakanon para sa gabos.—Salmo 72:16

Tibaad isipon mo na sa pangaturugan sana puwedeng mangyari an mga nabasa mo sa inot na mga pahina kan librong ini. Pero nangangako an Diyos na madali na niyang gibuhon an mga pagbabagong iyan sa daga, asin ipinapaliwanag kan Bibliya kun paano niya iyan gigibuhon.

Pero bako lang iyan an maitatabang saimo kan Bibliya. Sinasabi kaiyan kun ano an kaipuhan tang maaraman para magin tunay na maugma an satong buhay ngunyan. Isipon an mga bagay na ikinakahadit mo. Puwedeng problema iyan sa kuwarta o sa pamilya, hilang, o pagkagadan nin mahal sa buhay. Makakatabang saimo an Bibliya para makayanan an mga iyan, asin igwa iyan nin nakakaugma saka nakakakontentong simbag sa mga hapot na arog kan:

• Taano ta nagsasakit kita?

• Paano ta makakayanan an satong mga problema?

• Puwede daw magin maugma an satong pamilya?

• Ano an nangyayari sa sato pag nagadan kita?

• Mahihiling ta pa daw an mga mahal ta sa buhay na nagadan?

• Taano ta makakapagtiwala kita na gigibuhon nin Diyos an gabos na ipinanuga niya?

 An pagbasa mo sa librong ini nagpapahiling na gusto mong maaraman an itinutukdo kan Bibliya. Matatabangan ka kan librong ini. May mahihiling kang mga hapot sa ibaba kan mga parapo na matabang sa saimo na mas masabutan an Bibliya. Dakul an nauugmang makipag-ulay sa mga Saksi ni Jehova manungod sa Bibliya. Lugod na iyo man ika. Bendisyunan lugod nin Diyos an paghihinguwa mong maaraman an mga itinutukdo kan Bibliya!