1, 2. Taano ta magigin imposible an pagdolok ki Jehova kun kita sana, asin ano an ginibo ni Jesu-Cristo para sa sato mapadapit digdi?

 NALAGALAG na daw kamo? Tibaad nagigirumdoman nindo na may panahon na nagbibiahe kamo tanganing bisitahon an sarong katood o paryente asin dai nindo makua an dalan. Mantang nagpapadagos kamo sa sarong bakong pamilyar na tinampo, nagpondo daw kamo asin ihinapot sa sarong tawo an direksion? Imahinara kun ano an mamamatean nindo kun, imbes na sabihon sana sa saindo an direksion, an sarong maboot na indibiduwal nagsabi: “Sumunod ka sana sa sako. Gigiyahan taka duman.” Nakaginhawa nanggad kamo!

² Sa sarong paagi, may ginigibong arog kaiyan si Jesu-Cristo para sa sato. Kun kita sana, imposible na makadolok kita sa Dios. Huli sa minanang kasalan asin pagkabakong sangkap, an kinaban nin katawohan nalagalag, “siblag sa buhay na gikan sa Dios.” (Efeso 4:17, 18) Kaipuhan niato an tabang tanganing makua an dalan. Si Jesus, an maboot na Arogan niato, dai sana nagtatao nin sadol asin direksion; orog pa dian an ginigibo nia. Arog kan nasabotan niato sa Kapitulo 1, iniimbitaran kita ni Jesus, na nagsasabi: “Madia magin parasunod taka.” (Marcos 10:21) Minsan siring, tinatawan man nia kita nin mapuersang dahelan na akoon an imbitasyon na iyan. Sa sarong pangyayari, si Jesus nagsabi: “Ako iyo an dalan asin an katotoohan patin an buhay. Mayo nin makakaduman sa Ama kundi paagi sa sako.” (Juan 14:6) Pag-olayan niato an nagkapirang dahelan kun taano ta an pagdolok sa Ama posible sana paagi sa Aki. Dangan nasa isip an mga dahelan na iyan, eestudyaran niato kun paanong si Jesus tunay nanggad na iyo “an dalan asin an katotoohan patin an buhay.”

3. Taano ta paagi ki Jesus an pagdolok sa Dios?

³ Enot sa gabos, paagi ki Jesus an pagdolok sa Dios huli ta pinagmarhay ni Jehova na itao sa saiyang Aki an pinakamahalagang papel. * Ginibo sia kan Ama na pangenot na personahe sa pag-otob kan gabos na katuyohan Nia. (2 Corinto 1:20; Colosas 1:18-20) Tanganing masabotan an mahalagang marhay na papel kan Aki, kaipuhan na estudyaran niato an nangyari sa hardin nin Eden, kun saen an enot na mag-agom na tawo uminayon ki Satanas sa pagrebelde tumang ki Jehova.​—Genesis 2:16, 17; 3:1-6.

4. An pagrebelde sa Eden nagpalataw nin anong isyu, asin nagdesisyon si Jehova na gibohon an ano tanganing resolberan an isyu?

⁴ An pagrebelde sa Eden nagpalataw nin sarong isyu na may unibersal na importansia: Pinapamahalaan daw ni Jehova Dios sa tamang paagi an saiyang mga linalang? Tanganing maresolberan an mahalagang marhay na isyung ini, nagdesisyon si Jehova na sarong sangkap na espiritung aki an kaipuhan na magdigdi sa daga. An misyon na gigibohon kan aking ini igwa nin dakulaon na halaga​—an pagtao kan saiyang buhay tanganing ibindikar an soberaniya ni Jehova asin magserbing pantubos tanganing iligtas an katawohan. Paagi sa pagdadanay na maimbod sagkod sa kagadanan, gigibohon na posible kan piniling aki na resolberan an gabos na problema na naglataw huli sa pagrebelde ni Satanas. (Hebreo 2:14, 15; 1 Juan 3:8) Alagad si Jehova igwa nin milyon-milyon na sangkap na espiritung aki. (Daniel 7:9, 10) Siisay an pinili nia na magsagibo kan pinakamahalagang asignasyon na ini? Pinili ni Jehova an saiyang “Aking bugtong,” an saro na kan huri namidbid bilang si Jesu-Cristo.—Juan 3:16.

5, 6. Paano ipinaheling ni Jehova na igwa sia nin kompiansa sa saiyang Aki, asin sa ano nakabasar an kompiansang ini?

⁵ Maninigo daw na magngalas kita sa pinili ni Jehova? Dai nanggad! An Ama may lubos na kompiansa sa saiyang bugtong  na Aki. Dakol na siglo antes pang mag-abot digdi sa daga an saiyang Aki, ihinula ni Jehova na an Aking ini magdadanay na maimbod sa ibong nin gabos na klaseng pagsakit. (Isaias 53:3-7, 10-12; Gibo 8:32-35) Isipa an kahulogan kaiyan. An Aki, kapareho kan gabos na iba pang madonong na linalang, may sadiring boot, na kayang pumili kan sadiri niang gigibohon. Pero, kanigoan an kompiansa ni Jehova kaya ihinula nia an kaimbodan kan saiyang Aki. Sa ano nakabasar an kompiansang ini? Sa simpleng pagtaram, iyan nakabasar sa kaaraman. Midbid nin lubos ni Jehova an saiyang Aki asin aram nia kun gurano kagusto kan saiyang Aki na paogmahon Sia. (Juan 8:29; 14:31) Namomotan kan Aki an saiyang Ama, asin namomotan man ni Jehova an Saiyang Aki. (Juan 3:35) An pagkamoot kan Ama asin Aki sa lambang saro nagpadayupot sa sainda sa dai mapapatod na bogkos nin pagkakasaro asin pagtitiwala.—Colosas 3:14.

⁶ Huli sa mahalagang papel kan Aki, sa kompiansa kan Ama sa saiya, asin sa pagkamoot na nagbobogkos sa Ama asin Aki, makangangalas daw na an pagdolok sa Dios posible sana paagi ki Jesus? Pero, may saro pang dahelan kun taano ta an Aki sana an makakagiya sa sato pasiring sa Ama.

7, 8. Taano ta masasabi nin tama ni Jesus na mayo nin siisay man na lubos na nakakamidbid sa Ama “kundi an Aki”?

⁷ May mga kahagadan na dapat maabot tanganing makadolok kita ki Jehova. (Salmo 15:1-5) Siisay an mas nakakaaram kisa sa Aki kun ano an kaipuhan tanganing maabot an mga pamantayan nin Dios asin kamtan an Saiyang pag-oyon? Si Jesus nagsabi: “An gabos na bagay itinao na sa sako kan sakong Ama, asin dai nin siisay man na lubos na nakakamidbid sa Aki kundi an Ama, ni na an siisay man lubos na nakakamidbid sa Ama kundi an Aki asin an siisay man na boot kan Aki na pahayagan dapit sa saiya.” (Mateo 11:27) Helingon niato kun taano ta makakapagsabi si Jesus, nin tama asin daing pagpasobra, na mayo nin lubos na nakakamidbid sa Ama “kundi an Aki.”

⁸ Bilang “an panganay sa gabos na linalang,” an Aki may daing  kaagid na kadayupotan ki Jehova. (Colosas 1:15) Imahinara an dayupot na relasyon kan Ama asin Aki na nagtalubo sa laog nin dai mabilang na lawig nin panahon kan sinda pa sanang duwa an nag-eeksister—poon sa kapinonan nin paglalang sagkod na lalangon an iba pang espiritung mga linalang. (Juan 1:3; Colosas 1:16, 17) Isip-isipa na sana an mahalagang marhay na oportunidad kan Aki na makaibanan an saiyang Ama, na ilinalaog sa isip an mga kaisipan kan Ama dapit sa mga bagay-bagay asin nanonodan an Saiyang kabotan, mga pamantayan, asin paagi nin paghiro. Totoo nanggad, bakong sobra man na sabihon na mas midbid ni Jesus an saiyang Ama kisa siisay pa man. An kadayupotan na ini seguradong nagpangyari ki Jesus na ikahayag an saiyang Ama sa mga paagi na mayo nin ibang makakagibo.

9, 10. (a) Sa anong mga paagi ihinayag ni Jesus an saiyang Ama? (b) Tanganing kamtan an pag-oyon ni Jehova, ano an kaipuhan niatong gibohon?

⁹ An mga katokdoan ni Jesus nagpapabanaag kan saiyang malinaw na pakaaram sa kun ano an kaisipan asin saboot ni Jehova asin kun ano an mga kahagadan Nia sa Saiyang mga parasamba. * Ihinayag ni Jesus an saiyang Ama sa saro pang hararom na paagi. Si Jesus nagsabi: “Sia na nakaheling sa sako nakaheling man sa Ama.” (Juan 14:9) Inarog ni Jesus sa sangkap na paagi an saiyang Ama sa gabos na sinabi asin ginibo nia. Kaya kun nababasa niato sa Biblia an manongod ki Jesus​—an mapuersa asin nakakaakit na mga tataramon na ginamit nia sa saiyang pagtotokdo, an pagmalasakit na nagpahiro sa saiya na paomayan an iba, asin an empatiya na nagpangyari sa saiya na humibi—​maiimahinar nanggad niato si Jehova na sinasabi asin ginigibo an mismong mga bagay na iyan. (Mateo 7:28, 29; Marcos 1:40-42; Juan 11:32-36) An paagi nin paghiro asin kabotan kan Ama nahahayag sa sangkap na paagi sa mga tataramon asin ginibo kan Aki. (Juan 5:19; 8:28; 12:49, 50) Sa siring, tanganing makamit an pag-oyon ni Jehova, kaipuhan niatong himateon an mga katokdoan ni Jesus asin sunodon an saiyang halimbawa.—Juan 14:23.

 ¹⁰ Huling midbid nin lubos ni Jesus si Jehova asin inaarog nia sia sa sangkap na paagi, bakong makangangalas na nagdesisyon si Jehova na an Aki iyo an paagi sa pagdolok sa Ama. Bilang basehan sa pagsabot kun taano ta makakadolok kita ki Jehova paagi sana ki Jesus, pag-olayan niato ngonyan an kahulogan kan mga tataramon ni Jesus: “Ako iyo an dalan asin an katotoohan patin an buhay. Mayo nin makakaduman sa Ama kundi paagi sa sako.”—Juan 14:6.

11. (a) Taano ta makakamit niato an inooyonan na relasyon sa Dios paagi sana ki Jesus? (b) Paano idinodoon kan mga tataramon na nakasurat sa Juan 14:6 an pagigin daing kaagid kan katongdan ni Jesus? (Helingon an nota sa ibaba.)

¹¹ Naaraman na niato na dai kita makakadolok sa Dios kun dai maagi ki Jesus. Sa mas espesipikong paagi, isipon nindo kun ano an kahulogan kaini para sa sato. Si Jesus “an dalan” sa dahelan na paagi sana sa saiya na magkakaigwa kita nin inooyonan na relasyon sa Dios. Taano ta siring kaiyan? Paagi sa pagigin maimbod sagkod sa kagadanan, itinao ni Jesus an saiyang buhay bilang atang na pantubos. (Mateo 20:28) Kun mayo an probisyon na ini na pantubos, imposible na makadolok kita sa Dios. An kasalan nagin olang sa pag-oltanan nin mga tawo asin nin Dios, huling si Jehova banal asin kun siring dai nia noarin man ooyonan an kasalan. (Isaias 6:3; 59:2) Alagad hinale kan atang ni Jesus an olang; iyan an nagin kinakaipuhan na pantakop, o pambayad, sa kasalan. (Hebreo 10:12; 1 Juan 1:7) Kun aakoon niato an probisyon nin Dios paagi ki Cristo asin matubod dian, makakamit niato an pabor ni Jehova. Mayo na nanggad nin ibang paagi tanganing kita ‘makipag-ulian sa Dios.’ *—Roma 5:6-11.

12. Sa anong paagi na si Jesus “an dalan”?

¹² Si Jesus “an dalan” kun dapit sa pamibi. Paagi sana ki Jesus na kita makakadolok ki Jehova sa pamibi na may garantiya na an satong odok sa pusong mga kahagadan dadangogon na may  pag-oyon. (1 Juan 5:13, 14) Si Jesus mismo nagsabi: “Kun humagad kamo sa Ama nin ano man itatao nia iyan sa saindo sa ngaran ko. . . . Humagad kamo asin kamo mag-aako, tanganing an saindong kagayagayahan malubos.” (Juan 16:23, 24) Angay nanggad, sa ngaran ni Jesus, makakadolok kita ki Jehova sa pamibi asin maaapod niato Sia na “Ama.” (Mateo 6:9) Si Jesus “an dalan” sa saro pang paagi—paagi sa saiyang halimbawa. Siring sa nasabi na, inarog ni Jesus an saiyang Ama sa sangkap na paagi. Sa siring, ipinapaheling sa sato kan halimbawa ni Jesus kun paano mamumuhay tanganing mapaogma si Jehova. Kun siring, tanganing makadolok ki Jehova, dapat na sumunod kita sa gira ni Jesus.​—1 Pedro 2:21.

13, 14. (a) Paanong si Jesus nagtataram nin totoo? (b) Tanganing si Jesus magin “an katotoohan,” ano an kinaipuhan niang gibohon, asin taano?

¹³ Si Jesus pirmeng nagtataram kan katotoohan manongod sa makahulang tataramon kan saiyang Ama. (Juan 8:40, 45, 46) Mayo nin nakuang kadayaan sa ngoso ni Jesus kasuarin man. (1 Pedro 2:22) Dawa an mga nagkokontra sa saiya nag-admitir na itinokdo nia “an dalan nin Dios kaoyon kan katotoohan.” (Marcos 12:13, 14) Minsan siring, kan sabihon ni Jesus na “Ako iyo . . . an katotoohan,” an sinasabi nia bako sanang an bagay na ipinaaram nia an katotoohan paagi sa saiyang pagtaram, paghuhulit, asin pagtotokdo. Labi pa nanggad sa pagtaram an kalabot.

¹⁴ Tandaan na dakol na siglo antes pa, pinasabngan ni Jehova an mga kagsurat kan Biblia na isurat an dakol na hula manongod sa Mesiyas, o Cristo. Sinabi kan mga hulang ini an mga detalye manongod sa saiyang buhay, ministeryo, asin kagadanan. Dugang pa, an Ley ni Moises igwa nin mga anino, o makahulang mga arogan, na nagtotokdo sa Mesiyas. (Hebreo 10:1) Si Jesus daw magigin maimbod sagkod sa kagadanan, na paagi kaiyan inootob an gabos na hula manongod sa saiya? Pakatapos sana kaiyan na mabibindikar si Jehova bilang an Dios nin totoong hula. An dakulaon na paninimbagan na iyan nasa abaga ni  Jesus. Paagi sa saiyang pamumuhay​—gabos na sinasabi nia asin gabos na ginigibo nia—​pinatunayan ni Jesus na totoo an makahulang mga arogan. (2 Corinto 1:20) Sa siring, si Jesus iyo “an katotoohan.” An katotoohan kan makahulang tataramon ni Jehova naotob kan umabot si Jesus.—Juan 1:17; Colosas 2:16, 17.

15. Ano an boot sabihon kan pagtubod sa Aki, asin sa ano puedeng maggiya an paggibo kaiyan?

¹⁵ Si Jesus iyo “an buhay,” huli ta paagi sana sa saiya na puede kitang magkamit nin buhay​—an boot sabihon, an “tunay na buhay.” (1 Timoteo 6:19) An Biblia nagsasabi: “An nagtutubod sa Aki igwa nin buhay na daing katapusan; an nakikisuway sa Aki dai makakaheling nin buhay, kundi magdadanay sa saiya an grabeng kaanggotan nin Dios.” (Juan 3:36) Ano an boot sabihon kan magtubod sa Aki nin Dios? Nangangahulogan iyan na marigon kitang naniniwala na dai kita magkakamit nin buhay kun mayo sia. Orog pa dian, nangangahulogan iyan na ipinapaheling niato an satong pagtubod paagi sa mga gibo, padagos kitang nakakanood ki Jesus, asin ginigibo niato an satong pinakamakakaya na sunodon an saiyang mga katokdoan asin halimbawa. (Santiago 2:26) Sa siring, an pagtubod sa Aki nin Dios minagiya pasiring sa buhay na daing katapusan—imortal na buhay bilang espiritu sa langit para sa “sadangoton na aripompon” nin linahidan nin espiritung mga Kristiano asin sangkap na buhay bilang tawo sa sarong daganon na paraiso para sa “dakulang kadaklan” nin “ibang mga karnero.”—Lucas 12:32; 23:43; Kapahayagan 7:9-17; Juan 10:16.

16, 17. (a) Paano si Jesus magigin “an buhay” dawa para sa mga nagadan na? (b) Puede kitang magkaigwa nin anong kompiansa?

¹⁶ Kumusta man an mga nagadan na? Si Jesus iyo man “an buhay” para sainda. Dai nahaloy bago nia buhayon an saiyang katood na si Lazaro, sinabihan ni Jesus si Marta, an tugang ni Lazaro: “Ako iyo an pagkabuhay liwat asin an buhay. An nagtutubod sa sako, minsan pa sia magadan, mabubuhay.” (Juan 11:25) Ipinagkatiwala ni Jehova sa saiyang Aki an “mga liabe nin kagadanan asin nin Hades,” na itinatao sa saiya an  kapangyarihan na magbuhay liwat. (Kapahayagan 1:17, 18) Paagi sa mga liabeng iyan, bubuksan kan pinamuraway na si Jesus an mga tata nin Hades asin sa siring papaluwason an gabos na yaon sa pangkagabsan na lolobngan nin katawohan.​—Juan 5:28, 29.

¹⁷ “Ako iyo an dalan asin an katotoohan patin an buhay”​—paagi sa simpleng mga tataramon na ini, sinumaryo ni Jesus an obheto kan saiyang buhay asin ministeryo sa daga. An mga tataramon na iyan pano nin kahulogan para sa sato ngonyan. Tandaan na sinundan ni Jesus an mga tataramon na ini paagi sa pagsabi: “Mayo nin makakaduman sa Ama kundi paagi sa sako.” (Juan 14:6) An mga tataramon ni Jesus may halaga ngonyan kun paanong may halaga iyan kan panahon na sabihon nia iyan. Kun siring, puede kitang magkaigwa nin lubos na kompiansa na kun susunodon niato si Jesus, dai kita noarin man malalagalag. Sia, asin sia sana, an makakatokdo sa sato kan dalan pasiring “sa Ama.”

18. Ano an kalabot sa pagigin tunay na mga parasunod ni Jesus?

¹⁸ Huli sa mahalagang marhay na papel ni Jesus asin sa saiyang lubos na kaaraman dapit sa Ama, may marahay kitang dahelan na sumunod sa Aki. Siring sa nasabotan niato sa naenot na kapitulo, an pagigin tunay na mga parasunod ni Jesus may kalabot na mga gibo, bako sanang mga tataramon o saboot. Kalabot sa pagsunod ki Cristo an pag-oyon kan satong buhay sa saiyang mga katokdoan asin halimbawa. (Juan 13:15) An pantabang sa pag-adal na binabasa nindo ngonyan makakatabang saindo sa paghihingoang ini.

19, 20. Ano an yaon sa pantabang na ini sa pag-adal na makakatabang saindo sa paghihingoa nindong sumunod ki Cristo?

¹⁹ Sa masunod na mga kapitulo, pag-aadalan niato nin maingat an buhay asin ministeryo ni Jesus. An mga kapitulong ini nababanga sa tolong kabtang. Enot, magkakaigwa kita nin sumaryo kan saiyang mga kualidad asin paagi nin paghiro. Ikaduwa, sisiyasaton niato an saiyang maigot na halimbawa sa paghuhulit asin pagtotokdo. Ikatolo, eestudyaran niato kun paano sia nagpaheling  nin pagkamoot. Poon sa Kapitulo 3, igwa nin kahon sa pagtotokdo na may titulong “Paano Nindo Masusunod si Jesus?” An mga teksto asin hapot na yaon dian dinisenyo na tabangan kitang horophoropon kun paano niato maaarog si Jesus sa tataramon asin sa gibo.

²⁰ Sa tabang ni Jehova Dios, dai na kamo kaipuhan na malagalag, na siblag sa saiya huli sa minanang kasalan. May dakulaon na pagsakripisyo sa sadiri, mamomoton na isinugo ni Jehova an saiyang Aki tanganing ipaheling sa sato an dalan pasiring sa pagkaigwa nin inooyonan na relasyon sa Dios. (1 Juan 4:9, 10) Logod na kamo mapahiro, iyo, itulod, na maghimate sa dakulaon na pagkamoot na iyan paagi sa pag-ako asin paghiro sono sa imbitasyon ni Jesus: “Magin parasunod taka.”​—Juan 1:43.