1, 2. Ano an pinakamarahay na imbitasyon na puedeng maako nin saro, asin ano an puede niatong ihapot sa satong sadiri?

 ANO an pinakamarahay na imbitasyon na naako nindo kasuarin man? Tibaad isipon nindo an panahon na inimbitaran kamong umatender sa sarong espesyal na okasyon, tibaad sa kasal nin duwang tawo na mahal na marhay nindo. O tibaad nagigirumdoman nindo an aldaw na inimbitaran kamo na akoon an sarong importanteng trabaho. Kun natawan kamo nin siring na mga imbitasyon, daing duwa-duwa na napalukso an puso nindo, na nakamate pa ngani kamo nin onra, na akoon iyan. Pero, an totoo nakaako kamo nin orog nanggad karahay na imbitasyon. An lambang saro sa sato nakaako kaiyan. Asin an paagi nin pagdesisyon niato na simbagon an imbitasyon na iyan igwa nin hararom na epekto sa sato. Iyan an pinakaimportanteng desisyon na gigibohon niato sa buhay.

² Ano an imbitasyon na iyan? Hale iyan ki Jesu-Cristo, an bugtong na Aki kan Makakamhan sa Gabos na Dios, si Jehova, asin iyan nakasurat sa Biblia. Sa Marcos 10:21, mababasa niato an mga tataramon ni Jesus: “Madia magin parasunod taka.” Garo man sana iyan imbitasyon ni Jesus sa lambang saro sa sato. Marahay na ihapot niato sa satong sadiri, ‘Ano daw an magigin simbag ko?’ Tibaad garo baga malinaw na an simbag. Siisay an masayuma sa marahayon na imbitasyon na iyan? Makangangalas nanggad, an kadaklan talagang nagsasayuma. Taano?

3, 4. (a) Ano an tibaad ibilang na nakakaara manongod sa lalaking duminolok ki Jesus tanganing maghapot manongod sa buhay na daing katapusan? (b) Anong marahay na mga kualidad an tibaad naheling ni Jesus sa mayaman na hoben na namamahala?

³ Estudyare bilang halimbawa an sarong tawo na nakaako mismo kan imbitasyon na iyan mga 2,000 na taon na an nakaagi. Sia  iginagalang na marhay na tawo. Nasa saiya an kisuerra tolong bagay na ibinibilang nin mga tawo na kawiliwili, nakakaara pa ngani—pagkahoben, kayamanan, asin kapangyarihan. An rekord sa Biblia nagsasabi na sia sarong “hoben na lalaki,” “mayamanon,” asin “namamahala.” (Mateo 19:20; Lucas 18:18, 23) Minsan siring, may saro pang bagay na mas importante manongod sa hoben na lalaking ini. Nabaretaan nia an manongod sa Dakulang Paratokdo, si Jesus, asin nagustohan nia an saiyang nadangog.

⁴ An kadaklan na namamahala kan panahon na idto dai itinao ki Jesus an respeto na maninigo sa saiya. (Juan 7:48; 12:42) Alagad laen an ginibo kan namamahalang ini. An Biblia nagsasabi sa sato: “Mantang paluwas [si Jesus], may sarong lalaki na nagdalagan sa saiya asin luminuhod sa atubangan nia patin naghapot sa saiya: ‘Marahay na Paratokdo, ano an dapat kong gibohon tanganing magmana nin buhay na daing katapusan?’” (Marcos 10:17) Mangnohon kun gurano kainteresado an lalaking ini na makipag-olay ki Jesus, na nagdadalagan pasiring sa saiya na naheheling kan publiko, arog kan tibaad ginibo kan siisay man na dukha asin hamak na tawo. Dugang pa, may paggalang na luminuhod sia sa atubangan ni Cristo. Kaya minsan paano sia mapakumbaba asin nakakaaram kan saiyang espirituwal na pangangaipo. Pinapahalagahan ni Jesus an siring na marahay na mga kualidad. (Mateo 5:3; 18:4) Kun siring, bakong makangangalas na “si Jesus nagheling sa saiya asin nakamate nin pagkamoot para sa saiya.” (Marcos 10:21) Ano an simbag ni Jesus sa hapot kan hoben na lalaki?

5. Ano an isinimbag ni Jesus sa mayaman na hoben na lalaki, asin paano niato naaaraman na bako an kadukhaan an “sarong bagay” na kulang sa saiya? (Helingon man an nota sa ibaba.)

⁵ Ipinaheling ni Jesus na nagtao na an saiyang Ama nin impormasyon dapit sa mahalagang marhay na hapot manongod sa pagkamit nin buhay na daing katapusan. Sinambit nia an Kasuratan, asin kinompirmar kan hoben na lalaki na maimbod niang kinukuyog an Ley ni Moises. Minsan siring, naheling ni Jesus, paagi sa saiyang ekstraordinaryong pakarorop, kun ano an nasa puso. (Juan 2:25) May narisa siang espirituwal na problema sa namamahalang ini—sarong seryosong problema. Huli kaini, si Jesus nagsabi:  “Sarong bagay an kulang sa saimo.” Ano an “sarong bagay” na iyan? Si Jesus nagsabi: “Lakaw, ipabakal mo an mga bagay na nasa saimo asin itao mo sa mga dukha.” (Marcos 10:21) Boot daw sabihon ni Jesus na an saro dapat na mayo ni sarong sentabo tanganing makapaglingkod sa Dios? Dai man. * May ihinahayag si Cristo na sarong bagay na dakulaon an halaga.

6. Anong imbitasyon an inalok ni Jesus, asin an simbag kan mayaman na hoben na namamahala naghayag nin ano manongod sa saiyang puso?

⁶ Tanganing ihayag kun ano an kulang, inalok ni Jesus sa lalaki an sarong marahayon na oportunidad: “Madia magin parasunod taka.” Imahinara na sana—an Aki kan Kaharohalangkaweng Dios personal na iniimbitaran an lalaking iyan na sumunod sa saiya! Pinanugaan man sia ni Jesus nin balos na dai maimahinar. Sia nagsabi: “Magkakaigwa ka nin kayamanan sa langit.” Inako daw tolos kan mayaman na hoben na namamahala an oportunidad na ini, an mamuraway na imbitasyon na ini? An salaysay nagsasabi: “Ikinamondo nia an sinabing ini asin naghale siang mamondo, ta dakol siang rogaring.” (Marcos 10:21, 22) Kaya an dai linalaoman na mga tataramon ni Jesus naghayag nin sarong problema sa puso kan lalaking ini. Sia bangkag na marhay sa saiyang mga rogaring asin, daing duda, sa kapangyarihan asin prestihio na kaiba dian. Makamomondo, an saiyang pagkamoot sa siring na mga bagay mas matimbang kisa sa ano man na pagkamoot nia ki Cristo. Kun siring, an “sarong bagay” na kulang iyo an bilog na puso, mapagsakripisyong pagkamoot ki Jesus asin ki Jehova. Huling an hoben na lalaki mayo kan siring na pagkamoot, sinayumahan nia an daing kaagid na imbitasyon! Pero, paano kamo napapalabot?

7. Taano ta nakakasierto kita na kaiba kita ngonyan sa iniimbitaran ni Jesus?

⁷ An imbitasyon ni Jesus bakong limitado sana sa tawong iyan; ni para sa nagkapira sanang tawo. Si Jesus nagsabi: ‘Kun an siisay man boot na sumunod sa sako, padagos siang sumunod sa sako.’  (Lucas 9:23) Mangnohon na an “siisay man” puedeng magin parasunod ni Cristo kun talagang “boot” nia. Dinadagka nin Dios sa saiyang Aki an siring na mga sadiosan an puso. (Juan 6:44) Bako sanang an mga mayaman, bako sanang an mga dukha, bako sanang an mga hale sa sarong rasa o nasyon, asin bako sanang an mga nabubuhay kan panahon na idto kundi an gabos tinatawan nin oportunidad na akoon an imbitasyon ni Jesus. Kaya an mga tataramon ni Jesus na “Madia magin parasunod taka” talagang aplikado saindo. Taano ta maninigo nindong booton na sumunod ki Cristo? Asin ano man nanggad an kalabot dian?

8. May anong pangangaipo an gabos na tawo, asin taano?

⁸ May katotoohan na maninigo niatong akoon: Kaipuhan niatong marhay an marahay na pamomoon. Bakong gabos na tawo maadmitir na igwa sinda kan pangangaipong iyan, alagad talagang kaipuhan iyan. An propeta ni Jehova na si Jeremias pinasabngan na isurat an daing sagkod na katotoohan na ini: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jeremias 10:23) An mga tawo mayo kan abilidad ni deretso na pamahalaan an sadiri ninda. Sa katunayan, an kasaysayan nin tawo pano nin rekord nin maraot na pamomoon. (Eclesiastes 8:9) Kan panahon ni Jesus, an mga tawo inaapi, inaabuso, asin dinadaya kan mga namomoon. May kadonongan na sinabi ni Jesus na an ordinaryong mga tawo ‘garo mga karnero na mayo nin pastor.’ (Marcos 6:34) Totoo man iyan sa katawohan ngonyan. Bilang grupo asin bilang mga indibiduwal, kaipuhan niato an pamomoon na puede niatong pagtiwalaan asin igalang. Napapanigoan daw ni Jesus an pangangaipong iyan? Estudyare an nagkapirang dahelan kun taano ta iyo an simbag dian.

9. Ano an nagpapagin laen ki Jesus sa gabos na ibang namomoon?

⁹ Enot, si Jesus pinili ni Jehova Dios. An kadaklan na namomoon pinili kan saindang kapwa bakong sangkap na mga tawo, na sa parate nadadaya asin may tendensiang mapasala sa paghusgar. Si Jesus laen na klaseng namomoon. Iyan an sinasabi sa sato kan mismong titulo nia. An terminong “Cristo,” arog kan terminong “Mesiyas,” nangangahulogan nin “Linahidan.” Iyo, daing iba kundi  an Soberanong Kagurangnan kan uniberso an naglahid ki Jesus, o espesyalmenteng nagnombra sa saiya sa sagrado niang katongdan. Si Jehova Dios nagsabi manongod sa saiyang Aki: “Uya! An sakong lingkod na sakong pinili, an sakong namomotan, na naooyonan kan sakong kalag! Ibubugtak ko an sakong espiritu sa saiya.” (Mateo 12:18) Mayo nin siisay man na mas nakakaaram kisa sa satong Kaglalang kun anong klase nin namomoon an kaipuhan niato. Dai marorop an kadonongan ni Jehova, kaya igwa kita nin bastanteng dahelan na magtiwala sa saiyang pinili.—Talinhaga 3:5, 6.

10. Taano ta an halimbawa ni Jesus an pinakamarahay na sunodon nin mga tawo?

¹⁰ Ikaduwa, si Jesus nagtao nin sangkap asin nakakainspirar na halimbawa para sa sato. An pinakamarahay na klase nin namomoon igwa nin mga kualidad na puedeng hangaan asin arogon kan saiyang mga nasasakopan. Sia nangengenot paagi sa halimbawa, na nagtatao nin inspirasyon sa iba na magin mas marahay na mga tawo. Anong mga kualidad an pinakaigagalang nindo sa sarong namomoon? Kosog nin boot? Kadonongan? Pagmalasakit? Kumusta an pagmamaigot kun napapaatubang sa kasakitan? Mantang pinag-aadalan nindo an rekord kan buhay ni Jesus digdi sa daga, maaaraman nindo na yaon sa saiya an mga kualidad na iyan​—asin dakol pa. Bilang sangkap na ladawan kan saiyang langitnon na Ama, yaon ki Jesus an gabos na kualidad nin Dios sa lubos na paagi. Sia totoo nanggad na sangkap na tawo sa gabos na aspekto. Kaya sa gabos na ginibo nia, sa gabos na sinabi nia, sa gabos na saboot na ihinayag nia, may maheheling kita na maninigo niatong arogon. An Biblia nagsasabi na nagtao sia nin “modelo tanganing sunodon nindo nin estrikto an saiyang mga lakad.”​—1 Pedro 2:21.

11. Paano si Jesus nagin “an marahay na pastor”?

¹¹ Ikatolo, lubos na inotob ni Cristo an saiyang sinabi: “Ako an marahay na pastor.” (Juan 10:14) An pananaram na iyan na may piguratibong kahulogan pamilyar sa mga tawo kan mga panahon kan Biblia. An mga pastor nagpapagal tanganing atamanon an mga karnero na nasa saindang pangangataman. An sarong “marahay na pastor” ineenot an kaligtasan asin ikakarahay kan aripompon kisa sa sadiri nia. Halimbawa, an apoon ni Jesus na si David sarong pastor kan sia hoben pa, asin bako sanang sa sarong pangyayari na  isinapeligro nia an saiyang buhay tanganing labanan an maisog na layas na hayop na nagsalakay sa saiyang mga karnero. (1 Samuel 17:34-36) Labi pa ngani dian an ginibo ni Jesus para sa mga parasunod niang tawo. Itinao nia an saiyang buhay para sa sainda. (Juan 10:15) Pira daw na mga namomoon an igwa kan siring na espiritu nin pagsakrispisyo?

12, 13. (a) Sa anong paagi midbid nin sarong pastor an saiyang mga karnero, asin sa anong paagi midbid sia kan mga ini? (b) Taano ta gusto nindong magin sakop kan pamomoon kan Marahay na Pastor?

¹² Si Jesus “an marahay na pastor” sa saro pang paagi. Sia nagsabi: “Midbid ko an sakong mga karnero patin midbid ako kan sakong mga karnero.” (Juan 10:14) Isip-isipa an paglaladawan ni Jesus. Para sa nagmamasid sana, an sarong aripompon nin mga karnero tibaad garo sarong grupo sana nin mabalukag na mga linalang. Minsan siring, midbid kan pastor an kada saro sa mga karnero. Aram nia kun arin na mga babaeng karnero an madali nang mangaipo kan saiyang tabang kun an mga ini mag-ogbon, kun arin na mga kordero an nangangaipo pa man giraray na kargahon huli ta saditon pa asin maluyahon pa an mga ini tanganing maglakaw nin harayo na sinda sana, asin kun arin na mga karnero an kasuarin pa sana nagkahelang o nalugadan. Midbid man kan mga karnero an saindang pastor. Midbid ninda an saiyang tingog, na dai noarin man mamamaluan na tingog iyan nin siisay man na ibang pastor. Kun may pagkahandal o pagkaapurado an tono kan saiyang pag-apod, tolos sindang minahiro. Kun saen nia sinda giyahan, sinda minasunod. Asin aram nia nanggad kun saen sinda gigiyahan. Aram nia kun saen an matubang asin berdeng doot, kun saen an presko asin malinaw na mga sapa, kun saen an ligtas na sabsaban. Mantang binabantayan nia sinda, an mga karnero nakakamate na sinda ligtas.​—Salmo 23.

¹³ Dai daw nindo minamawot an pamomoon na arog kaiyan? Daing kapareho an rekord kan Marahay na Pastor sa pagtratar sa saiyang mga parasunod sa arog nanggad kaiyan na paagi. Nanunuga sia na gigiyahan kamo pasiring sa sarong maogma asin nakakakontentong buhay ngonyan asin sagkod sa ngapit na daing sagkod! (Juan 10:10, 11; Kapahayagan 7:16, 17) Kun siring, kaipuhan niatong maaraman kun ano man nanggad an kalabot sa pagsunod ki Cristo.

14, 15. Tanganing magin parasunod ni Cristo, taano ta bakong igo an maghingako sana na an saro Kristiano o magkaigwa sana nin emosyonal na pagkadayupot ki Jesus?

¹⁴ Ginatos na milyon na tawo ngonyan an posibleng marhay na naniniwala na inako na ninda an imbitasyon ni Cristo. Total, pinili nindang apodon sinda na mga Kristiano. Tibaad kabilang sinda sa iglesia na dian sinda pinabunyagan kan saindang mga magurang. O tibaad sabihon ninda na igwa sinda nin emosyonal na pagkadayupot ki Jesus asin inaako sia ninda bilang saindang personal na Paraligtas. Alagad huli daw kaiyan sinda parasunod na ni Cristo? Iyan daw an nasa isip ni Jesus kan imbitaran nia kita na magin mga parasunod nia? Orog pa dian an kalabot.

¹⁵ Estudyare an kinaban nin Kakristianohan​—mga nasyon na an kadaklan kan mga siudadano naghihingako na mga parasunod ni Cristo. Ipinapabanaag daw kan Kakristianohan an mga katokdoan ni Jesu-Cristo? O naheheling daw niato sa mga nasyon na iyan an pagkaongis, pan-aapi, krimen, asin inhustisya na kapareho nanggad kan naheheling sa ibang kabtang kan kinaban? An iginagalang na namomoon na Hindu na si Mohandas Gandhi sarong beses nagsabi: “Mayo akong namidbid na siisay man na nakagibo nin mas dakol para sa katawohan kisa ki Jesus. Sa katunayan, mayo nin diperensia sa Kristianismo.” Idinugang nia: “An problema yaon sa saindo na mga Kristiano. Dai nindo sinusunod an mga itinotokdo nindo.”

16, 17. Ano sa parate an kulang sa naghihingakong mga Kristiano, asin paano namimidbid an tunay na mga parasunod ni Cristo?

¹⁶ Sinabi ni Jesus na an tunay na mga parasunod nia mamimidbid bako sanang sa saindang sinasabi o sa apod ninda sa saindang sadiri kundi sa pangenot sa saindang mga gibo. Halimbawa, sia nagsabi: “Bakong gabos na nagsasabi sa sako, ‘Kagurangnan, Kagurangnan,’ makakalaog sa kahadean kan kalangitan, kundi idtong naggigibo kan kabotan kan sakong Ama na nasa kalangitan.” (Mateo 7:21) Taano an kadakol na naghihingako na si Jesus an Kagurangnan ninda ta dai nagigibo an kabotan kan saiyang Ama? Girumdoma an mayaman na hoben na namamahala.  Parateng marhay, “sarong bagay an kulang” sa naghihingakong mga Kristiano​—an bilog na kalag na pagkamoot ki Jesus asin sa Saro na nagsugo sa saiya.

¹⁷ Paano nagin siring? Bako daw na an minilyon na nagsasabing sinda mga Kristiano naghihingako man na namomotan ninda si Cristo? Daing duda. Alagad bako nanggad na mga tataramon sana an kalabot sa pagkamoot ki Jesus asin ki Jehova. Si Jesus nagsabi: “Kun an siisay man namomoot sa sako, ootobon nia an sakong tataramon.” (Juan 14:23) Asin sa giraray nagtataram bilang sarong pastor, sia nagsabi: “An sakong mga karnero naghihinanyog sa sakong tingog, asin midbid ko sinda, patin sinda nagsusunod sa sako.” (Juan 10:27) Iyo, an tunay na pagbalo sa satong pagkamoot ki Cristo bako sanang paagi sa satong mga tataramon o saboot kundi sa pangenot paagi sa satong mga gibo.

18, 19. (a) Ano an maninigong magin epekto sa sato kan pag-adal manongod ki Jesus? (b) Ano an katuyohan kan librong ini, asin paano makikinabang digdi an mga haloy nang ibinibilang an sadiri ninda na mga parasunod ni Cristo?

¹⁸ An tunay na pagkatawo niato sa laog talagang nababanaag paagi sa satong mga gibo. Iyan an dapat niatong paoswagon. Si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Kun ilalaog niato sa isip asin hohorophoropon niato an tamang kaaraman manongod ki Jesus, may epekto iyan sa satong puso. Lalong maorog an pagkamoot niato sa saiya asin lalo pang mapapakosog an satong pagmawot na padagos na sumunod sa saiya.

¹⁹ Iyan an katuyohan kan librong ini. An intension kaini, bakong magtao nin kompletong sumaryo kan buhay asin ministeryo ni Jesus, kundi tabangan kita na masabotan nin mas malinaw kun paano masunod sa saiya. * Dinisenyo ini na tabangan kitang magheling sa arog sa salming na Kasuratan asin hapoton an satong sadiri, ‘Ako daw talagang nagsusunod ki Jesus?’ (Santiago 1:23-25) Tibaad haloy na nindong ibinibilang an saindong  sadiri na karnero na ginigiyahan kan Marahay na Pastor. Pero, bako daw na maoyon kamo na pirme kitang makakanompong nin mga paagi na umoswag? Sinasadol kita kan Biblia: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) Bawi an gabos na paghihingoa niato na seguradohon na kita ginigiyahan nanggad kan satong mamomoton na Marahay na Pastor, si Jesus, na ninombrahan mismo ni Jehova na maggiya sa sato.

20. Ano an eestudyaran niato sa sunod na kapitulo?

²⁰ Logod na an pag-adal nindo sa librong ini makatabang sa saindo na mapakosog an saindong pagkamoot ki Jesus asin ki Jehova. Mantang an siring na pagkamoot naggigiya sa saindo sa buhay, maeeksperyensiahan nindo an nakakalabi sa gabos na katoninongan asin pagkakontento na posible sa daan na kinaban na ini, asin mabubuhay kamo tanganing omawon si Jehova sagkod lamang huli sa pagtao nia sa sato nin Marahay na Pastor. Siempre, an satong pag-adal manongod ki Cristo dapat na nakabasar sa tamang pundasyon. Kun siring, angay na sa Kapitulo 2 sisiyasaton niato an kabtang ni Jesus sa unibersal na katuyohan ni Jehova.