Namomotan na Nagbabasa:

“Madia magin parasunod taka.” (Marcos 10:21) Paagi sa mga tataramon na iyan, garo man sana inaagda kita ni Jesu-Cristo na sumunod sa saiya. Naghihimate daw kamo sa saiyang pag-agda? An paggibo kaiyan magkakaigwa nin hararom na epekto sa buhay nindo. Taano man?

Isinugo ni Jehova an saiyang bugtong na Aki digdi sa daga tanganing itao an saiyang buhay bilang pantubos. (Juan 3:16) Apuera sa saiyang kagadanan para sa sato, ipinaheling sa sato kan Aking iyan kun paano kita mabubuhay. Sa gabos na ginibo nia, pinagdanay nia an saiyang integridad asin nagtao sia nin kagayagayahan sa puso kan saiyang Ama. Ipinaheling man sa sato ni Jesus kun paano kita magigin arog kan saiyang Ama. An mga paagi nin paghiro asin an kabotan kan Ama lubos na nabanaag sa mga tataramon asin gibo kan Aki.​—Juan 14:9.

Si Jesus sarong “modelo,” an sabi kan Biblia, “tanganing sunodon [niato] nin estrikto an saiyang mga lakad.” (1 Pedro 2:21) Kun gusto niatong magin mas dayupot ki Jehova, kun gusto niatong magkaigwa nin totoong makahulogan na buhay ngonyan, asin kun gusto niatong magdanay sa dalan pasiring sa buhay na daing katapusan, dapat na maingat niatong sunodon an gira ni Cristo.

Tanganing ponan an pagbaklay na ini, kaipuhan na magin pamilyar kita sa buhay ni Jesus digdi sa daga. Kaya an pagkaladawan dapit ki Jesus na isinurat sa Biblia maninigo na maingat niatong pag-adalan. An paghorophorop sa mga sinabi asin ginibo ni Jesus saka an pag-isip kun paano niato sia maaarog sa tataramon asin gibo matabang sa sato na maheling nin mas malinaw kun paano kita masunod sa saiya.

Logod na an publikasyon na ini makatabang sa saindo na tumalubo an pagkamoot nindo ki Jesus asin ki Jehova. Asin logod na an pagkamoot na iyan magpahiro sa saindo na maingat na sunodon an gira ni Jesus tangani na makatao kamo nin kagayagayahan sa puso ni Jehova ngonyan asin sagkod lamang.