1-3. (a) Ano an ginigibo nin sarong paraoma kun an anihon abundang marhay kaya dai nia kayang anihon nin solo? (b) Anong problema an napaatubang ki Jesus kan tigsoli nin 33 C.E., asin paano nia rinesolberan iyan?

 AN SARONG paraoma napapaatubang sa dakulang problema. Nagkapirang bulan bago kaini, inarado nia an saiyang oma asin sinabwagan nin mga banhi. Maingat niang marhay na pinagmasdan kan lumuwas an enot na mga dahon, asin sia naggayagaya kan magtalubo an mga pananom. Ngonyan binalosan an gabos na pagpapagal nia, huli ta nag-abot na an panahon nin pag-ani. An saiyang problema iyo ini: An anihon abundang marhay kaya dai nia kayang anihon nin solo. Tanganing maresolberan an problemang ini, may kadonongan na nagdesisyon siang magtangdan nin nagkapirang trabahador asin isinugo sinda sa saiyang oma. Total, limitado sana an panahon tanganing matipon an saiyang mahalagang marhay na aanihon.

 ² Kan tigsoli nin 33 C.E., an binuhay liwat na si Jesus napaatubang sa kaagid na problema. Durante kan saiyang ministeryo digdi sa daga, sia nagsabwag nin mga banhi nin katotoohan. Ngonyan igwa nin dapat na anihon, asin abunda an aanihon. Dakol na naghihimate an kaipuhan na tiponon bilang mga disipulo. (Juan 4:35-38) Paano rinesolberan ni Jesus an problemang ini? Sa sarong bukid sa Galilea, dai nahaloy bago sia sumakat sa langit, isinugo nia an saiyang mga disipulo na maghanap nin dugang pang mga trabahador, na sinasabi: “Kun siring, paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda . . . , na tokdoan nindo sinda na otobon an gabos na bagay na ipinagboot ko sa saindo.”​—Mateo 28:19, 20.

³ An sugong iyan an pinakaubod kan kahulogan nin pagigin tunay na parasunod ni Cristo. Kun siring, siyasaton niato an tolong hapot. Taano ta nagsugo si Jesus na maghanap nin dugang pang mga trabahador? Paano nia sinanay an saiyang mga disipulo na hanapon an mga trabahador? Paano kita kalabot sa sugong ini?

4, 5. Taano ta dai matatapos ni Jesus an gibohon na pinonan nia, asin sairisay an kaipuhan na magpadagos kan gibohon pakabalik nia sa langit?

⁴ Kan ponan ni Jesus an saiyang ministeryo kan 29 C.E., aram nia na pinoponan nia an sarong gibohon na dai nia matatapos na sia sana. Sa halipot na panahon niang natatada sa daga, limitado sana an lugar na mahuhulitan nia asin an kabilangan nin mga tawo na mapapaabotan nia kan mensahe kan Kahadean. Totoo, an pangenot niang hinulitan iyo an mga Judio asin proselito, an “nalagalag na mga karnero kan kamag-anakan nin Israel.” (Mateo 15:24) Minsan siring, an “nalagalag na mga karnero” na idto nakawararak sa bilog na Israel, sarong nasyon na rinibong kilometro kuadrado an hiwas. Apuera kaiyan, pag-abot nin panahon an ibang kabtang kan kinaban kaipuhan na mapaabotan kan maogmang bareta.​—Mateo 13:38; 24:14.

⁵ Aram ni Jesus na kadakol pa kan dapat gibohon pagkagadan nia. Sa saiyang 11 maimbod na apostol, sia nagsabi: “Totoong-totoo na sinasabi ko sa saindo, An minatubod sa sako, an saro  man na iyan magibo kan mga gibo na ginigibo ko; asin magibo sia nin mga gibo na orog pa kaini, huli ta ako maduman sa Ama.” (Juan 14:12) Huling an Aki mabalik sa langit, an paghuhulit asin pagtotokdo kaipuhan na ipadagos kan saiyang mga parasunod​—bako sanang kan mga apostol kundi pati kan gabos na magigin disipulo. (Juan 17:20) Mapakumbabang inadmitir ni Jesus na an saindang mga gibo magigin “orog pa” kan sa saiya. Taano man? Huli sa tolong paagi.

6, 7. (a) Sa anong mga paagi na an mga gibo na ginibo kan mga parasunod ni Jesus magigin orog pa kan sa saiya? (b) Paano niato ikakapaheling na dai napasala an kompiansa ni Jesus sa saiyang mga parasunod?

⁶ Enot, mas dakol na teritoryo an huhulitan kan mga parasunod ni Jesus. Ngonyan an saindang paghuhulit nakaabot na sa kaporoporohi kan daga, na lampas na marhay sa linderos kan nasyon na hinulitan mismo ni Jesus. Ikaduwa, mas dakol na tawo an huhulitan ninda. An sadit na grupo nin mga disipulo na nawalat ni Jesus tolos na duminakol sagkod sa rinibo. (Gibo 2:41; 4:4) Ngonyan minilyon na an kabilangan ninda, asin ginatos na ribong bagohan an nababautismohan kada taon. Ikatolo, sinda maghuhulit sa mas halawig na peryodo nin panahon​—sagkod sa panahon na ini, haros 2,000 na taon na pagkatapos kan tolo may kabangang taon na ministeryo ni Jesus.

⁷ Nagpapahayag si Jesus nin kompiansa sa saiyang mga parasunod kan sabihon nia na sinda magibo nin “mga gibo na orog pa kaini.” Ipinagkakatiwala nia sa sainda an gibohon na pinakaimportante sa saiya, an paghuhulit asin pagtotokdo kan “maogmang bareta kan kahadean nin Dios.” (Lucas 4:43) Kombensido sia na maimbod nindang isasagibo an asignasyon na iyan. Ano an kahulogan kaini para sa sato ngonyan? Kun maigot asin bilog na puso niatong ginigibo an ministeryo, ipinapaheling niato na dai napasala an kompiansa ni Jesus sa saiyang mga parasunod. Bako daw na sarong pambihirang pribilehio ini?​—Lucas 13:24.

8, 9. Anong halimbawa an itinao ni Jesus sa ministeryo, asin paano niato maaarog an saiyang halimbawa sa satong ministeryo?

⁸ Itinao ni Jesus sa saiyang mga disipulo an pinakamarahay na magigibong pagsasanay sa ministeryo. Orog sa gabos, nagtao  sia nin sangkap na halimbawa para sa sainda. (Lucas 6:40) Sa sinundan na kapitulo, pinag-olayan niato an saiyang saboot dapit sa ministeryo. Isip-isipa nguna nin kadikit an mga disipulo na uminiba ki Jesus sa saiyang mga biahe sa paghuhulit. Naobserbaran ninda na sia naghulit saen man may manonompongan na mga tawo​—sa mga baybayon nin danaw asin bakilid nin bulod, sa mga siudad asin saod, asin sa pribadong mga harong. (Mateo 5:1, 2; Lucas 5:1-3; 8:1; 19:5, 6) Naheling ninda na sia mahigos, na nagmamata nin amay asin naglilingkod sagkod sa matangang banggi. An ministeryo bakong palihisan sana nin oras para sa saiya! (Lucas 21:37, 38; Juan 5:17) Daing duda na narisa ninda na an hararom an pagkagamot na pagkamoot sa mga tawo an nagmomotibar sa saiya. Tibaad nababanaag ninda sa saiyang lalauogon an pagmalasakit na namamatean nia sa saiyang puso. (Marcos 6:34) Ano sa paghona nindo an nagin epekto kan halimbawa ni Jesus sa saiyang mga disipulo? Ano daw kutana an nagin epekto sa saindo?

⁹ Bilang mga parasunod ni Cristo, inaarog niato an saiyang halimbawa sa satong ministeryo. Huli kaini, ginigibo niato an gabos niatong makakaya kun dapit sa “lubos na pagpatotoo.” (Gibo 10:42) Arog ni Jesus, dinadalaw niato an mga tawo sa saindang harong. (Gibo 5:42) Ibinabagay niato an satong iskedyul, kun kinakaipuhan, tanganing madalaw niato sinda sa panahon na mas posibleng nasa harong sinda. Hinahanap man niato an mga tawo asin mapagmansay na hinuhulitan sinda sa pampublikong mga lugar​—sa mga tinampo, sa mga parke, sa mga tindahan, asin sa pinagtatrabahohan. Kita padagos na “nagpapagal asin naghihingoa” sa ministeryo, huli ta sineseryoso niato an gibohon na ini. (1 Timoteo 4:10) An hararom asin odok sa pusong pagkamoot sa iba an nagmomotibar sa sato na padagos na maghanap nin mga oportunidad na maghulit saen man asin noarin man may manonompongan na mga tawo.​—1 Tesalonica 2:8.

10-12. Anong importanteng mga leksion an itinokdo ni Jesus sa saiyang mga disipulo bago sinda isugo na maghulit?

¹⁰ An saro pang paagi na sinanay ni Jesus an saiyang mga disipulo  iyo an pagtao sa sainda nin detalyadong mga instruksion. Bago sugoon na maghulit enot an 12 apostol asin kan huri an 70 disipulo, naggibo si Jesus nin puedeng apodon na mga sesyon nin pagsasanay. (Mateo 10:1-15; Lucas 10:1-12) Marahay an ibinunga kan pagsasanay, huli ta an Lucas 10:17 nagbabareta: “An setenta nagbuelta na may kagayagayahan.” Estudyaran niato an duwa kan importanteng mga leksion na itinokdo ni Jesus, na pirmeng isinasaisip na sa pagsabot sa saiyang mga tataramon dapat na girumdomon an impormasyon manongod sa mga kostumbreng Judio kan mga panahon kan Biblia.

¹¹ Tinokdoan ni Jesus an saiyang mga disipulo na magtiwala ki Jehova. Sinabihan nia sinda: “Dai kamo kumua nin bulawan o plata o tanso para sa saindong mga panhagkos na supot, o nin supot nin kakanon para sa pagbaklay, o duwang pan-irarom na gubing, o sandalyas o sogkod; huli ta an trabahador maninigo sa saiyang kakanon.” (Mateo 10:9, 10) Nakatodan na kan mga parabiahe na magdara nin panhagkos na supot na laganan nin kuarta, sarong supot para sa mga balon na kakanon, asin ekstrang padis na sandalyas. * Paagi sa pagtao nin instruksion sa saiyang mga disipulo na dai maghadit manongod sa siring na mga bagay, garo man sana sinasabi ni Jesus: “Lubos kamong magtiwala ki Jehova, huli ta aasikasohon nia an saindong mga pangangaipo.” Itatao ni Jehova an kaipuhan ninda paagi sa  pagpahiro sa mga uminako kan maogmang bareta na magin mapagpasakat, na kostumbre kaidto sa Israel.​—Lucas 22:35.

¹² Tinokdoan man ni Jesus an saiyang mga disipulo na likayan an dai kaipuhan na mga disturbo. Sia nagsabi: “Dai nindo pagkugoson sa pagtaratara an siisay man sa dalan.” (Lucas 10:4) Sinasabihan daw sinda ni Jesus na magin antipatiko o indiperente? Dai nanggad. Kaidtong mga panahon kan Biblia, bako sana nanggad na pagsabi nin simpleng kumusta an parateng kaiba sa mga pagtaratara. Kaiba sa nakaugalean nang pagtaratara an manlaenlaen na pormalidad asin halawigon na erestoryahan. An sarong nag-espesyalisar sa Biblia nagsasabi: “An pagtaong galang sa tahaw kan mga taga Subangan bako sanang, siring sa sato, kadikit na pagduko, o pag-abrasa, kundi ginigibo paagi sa dakol na pagkugos, asin pagduko, patin paglaob pa ngani sa daga. An gabos na ini nangangaipo nin dakol na oras.” Paagi sa pagsabi sa saiyang mga disipulo na dai gibohon an kinaugalean na mga pagtaratara, garo man sana sinasabi ni Jesus: “Dapat na aprobetsaran nindo an oras, huli ta apurado an mensahe na dara nindo.” *

13. Sa anong mga paagi niato mapapatunayan na isinasapuso niato an mga instruksion na itinao ni Jesus sa saiyang mga disipulo kan enot na siglo?

¹³ Isinasapuso niato an mga instruksion na itinao ni Jesus sa saiyang mga disipulo kan enot na siglo. Sa pagsagibo sa satong ministeryo, lubos kitang nagtitiwala ki Jehova. (Talinhaga 3:5, 6) Aram niato na dai kita noarin man magkukulang sa mga pangangaipo sa buhay kun ‘padagos niatong hahanapon nguna an kahadean.’ (Mateo 6:33) An bilog na panahon na mga parahulit kan Kahadean sa bilog na kinaban makakapagpatunay na dawa sa masakit na mga panahon, an kamot ni Jehova nungkang nagin halipot. (Salmo 37:25) Aram man niato na kaipuhan  na likayan an mga disturbo. Kun dai kita mag-iingat, madali sana kitang malingling kan sistemang ini nin mga bagay. (Lucas 21:34-36) Minsan siring, bako ini an panahon na kita madisturbo. Huling buhay an nakataya, apurado an satong mensahe. (Roma 10:13-15) Paagi sa pagpapadanay na buhay sa satong puso kan pakamate nin pag-apura, dai niato papabayaan an mga disturbo sa kinaban na ini na uboson an panahon asin kosog na mas marahay na gamiton sa ministeryo. Girumdomon, halipot na sana an panahon na natatada asin an anihon mahiwas.​—Mateo 9:37, 38.

14. Ano an nagpaparisa na an sugo na nakasurat sa Mateo 28:18-20 aplikado sa gabos na parasunod ni Cristo? (Helingon man an nota sa ibaba.)

¹⁴ Paagi sa mga tataramon na “Paduman kamo asin gumibo kamo nin mga disipulo,” an binuhay liwat na si Jesus nagtao nin sarong magabat na paninimbagan sa saiyang mga parasunod. An nasa isip nia bako sanang an mga disipulo na presente kan aldaw na idto nin tigsoli sa bukid sa Galilea. * An gibohon na isinugo nia may kalabot na paghuhulit sa “mga tawo kan gabos na nasyon,” asin iyan magpapadagos “sagkod sa pagtatapos kan sistema nin mga bagay.” Malinaw nanggad, an sugong ini aplikado sa gabos na parasunod ni Cristo, kaiba kita ngonyan. Siyasaton niatong marhay an mga tataramon ni Jesus na nakasurat sa Mateo 28:18-20.

15. Taano ta madonong na kumuyog kita sa pagboot ni Jesus na gumibo nin mga disipulo?

¹⁵ Bago itao an sugo, si Jesus nagsabi: “An gabos na autoridad sa langit asin sa daga itinao na sa sako.” (Bersikulo 18) Si Jesus daw talagang may siring kaiyan kadakulang autoridad? Igwa nanggad! Sia an arkanghel, na pinapangenotan an manampulong ribo nin manorosampulong ribong anghel. (1 Tesalonica 4:16; Kapahayagan 12:7) Bilang “payo kan kongregasyon,” may autoridad sia sa saiyang mga parasunod sa daga. (Efeso 5:23) Poon  kan 1914, sia namamahala na bilang Mesiyanikong Hade sa langit. (Kapahayagan 11:15) An saiyang autoridad nakakaabot pa ngani sa lolobngan, huli ta sia may kapangyarihan na buhayon liwat an mga gadan. (Juan 5:26-28) Paagi sa pagsabi nguna kan saiyang mahiwas an sakop na autoridad, ipinaparisa ni Jesus na an kasunod na mga tataramon bakong suhestion kundi pagboot. Madonong na kumuyog kita, huli ta an saiyang autoridad bakong hale sa sadiri nia sana kundi tao nin Dios.​—1 Corinto 15:27.

16. Paagi sa pagsabi sa sato na “paduman kamo,” ano an pangapodan ni Jesus na gibohon niato, asin paano niato inootob an aspektong ini kan sugo?

¹⁶ Sinumaryo ngonyan ni Jesus an sugo, na minapoon sa mga tataramon na: “Paduman kamo.” (Bersikulo 19) Sa siring, pinagbobotan nia kita na gumibo nin inisyatiba na ipaabot sa iba an mensahe kan Kahadean. Sa pag-otob kan aspektong ini kan sugo, puede kitang gumamit nin laen-laen na paagi. An paghuhulit sa harong-harong iyo an pinakaepektibong paagi na makaolay nin personal an mga tawo. (Gibo 20:20) Naghahanap man kita nin mga oportunidad na magpatotoo sa impormal na paagi; gustong-gusto niatong ipakipag-olay an maogmang bareta saen man angay sa satong pangaroaldaw na buhay. An espesipikong mga paagi nin paghuhulit niato puedeng magbarobago, na ibinabagay sa lokal na mga pangangaipo asin kamugtakan. Pero, sarong bagay an dai nagbabago: Kita ‘minaduman’ asin hinahanap niato an mga maninigo.​—Mateo 10:11.

17. Paano kita ‘naggigibo nin mga disipulo’?

¹⁷ Sunod ipinaliwanag ni Jesus an obheto kan sugo, arin na baga, an ‘gumibo nin mga disipulo sa mga tawo kan gabos na nasyon.’ (Bersikulo 19) Paano kita ‘naggigibo nin mga disipulo’? Sa pundamental, an disipulo saro na nag-aadal, sarong tinokdoan. Minsan siring, an paggibo nin mga disipulo bako sanang pagtao nin kaaraman sa iba. Kun inaadalan niato sa Biblia an mga interesado, an satong pasohan iyo na tabangan sinda na magin mga parasunod ni Cristo. Basta posible, idinodoon niato an halimbawa ni Jesus tangani na an satong mga inaadalan nakakanood na umasa sa saiya bilang saindang Paratokdo asin Arogan, na namumuhay kapareho nia asin ginigibo an ginibo nia.​—Juan 13:15.

18. Taano ta an bautismo an pinakamakahulogan na pangyayari sa buhay nin sarong disipulo?

 ¹⁸ An sarong mahalagang marhay na kabtang kan sugo ipinapahayag sa mga tataramon na ini: “Bautismohan nindo sinda sa ngaran kan Ama asin kan Aki patin kan banal na espiritu.” (Bersikulo 19) An bautismo an pinakamakahulogan na pangyayari sa buhay nin sarong disipulo, huli ta iyan angay na simbolo kan saiyang bilog na pusong pagdusay sa Dios. Sa siring, mahalagang marhay iyan sa kaligtasan. (1 Pedro 3:21) Iyo, paagi sa padagos na paggibo kan saiyang pinakamakakaya sa paglilingkod ki Jehova, an bautisado nang disipulo makakaasa sa daing katapusan na mga bendisyon sa bagong kinaban na madatong. May natabangan na daw kamo na magin bautisadong disipulo ni Cristo? Sa Kristianong ministeryo, mayo na nin orog pa kadakulang dahelan nin kagayagayahan.​—3 Juan 4.

19. Ano an itinotokdo niato sa mga bagohan, asin taano ta an pagtotokdo tibaad magpadagos pagkatapos na mabautismohan sinda?

¹⁹ Ipinaliwanag ni Jesus an sunod na kabtang kan sugo, na nagsasabi: “Tokdoan nindo sinda na otobon an gabos na bagay na ipinagboot ko sa saindo.” (Bersikulo 20) Tinotokdoan niato an mga bagohan na himateon an mga pagboot ni Jesus, kaiba an pagboot na kamotan an Dios, kamotan an kapwa, asin magin mga paragibo nin disipulo. (Mateo 22:37-39) Progresibo niato sindang tinotokdoan na ipaliwanag an mga katotoohan sa  Biblia asin idepensa an saindang nagtatalubong pagtubod. Kun makualipikar na sindang magpartisipar sa pampublikong paghuhulit, iniibanan niato sinda, na tinotokdoan sinda paagi sa tataramon asin halimbawa kun paano magkakaigwa nin makahulogan na kabtang sa gibohon na ini. An pagtotokdo sa bagong mga disipulo dai man pirmeng natatapos bago kan bautismo ninda. An mga bago pa sanang mabautismohan tibaad mangaipo nin dugang pang mga instruksion tanganing matabangan sindang atubangon an mga kadepisilan na kalabot sa pagsunod ki Cristo.​—Lucas 9:23, 24.

20, 21. (a) Sa pagsagibo kan sugo ni Jesus, taano ta mayo kita nin dahelan na matakot? (b) Taano ta bako ini an panahon na magluwayluway, asin ano an maninigong magin determinado niatong gibohon?

²⁰ An huring mga tataramon kan sugo ni Jesus nakakapakosog na marhay sa boot: “Uya! ako kaiba nindo sa gabos na aldaw sagkod sa pagtatapos kan sistema nin mga bagay.” (Mateo 28:20) Aram ni Jesus na importante an asignasyon na ini. Aram man nia na an pag-otob kaiyan kun beses maprobokar nin pagkontra kan mga paratumang. (Lucas 21:12) Minsan siring, mayo nin dahelan na matakot. Dai inaasahan kan satong Poon na isasagibo niato an asignasyon na ini na daing tabang o nagsosolo. Bako daw na nakakarangang maaraman na an Saro na igwa kan “gabos na autoridad sa langit asin sa daga” kaiba niato tanganing suportaran kita sa pag-otob kan sugong ini?

²¹ Inasegurar ni Jesus an saiyang mga disipulo na kaiba ninda sia sa saindang ministeryo sa laog nin dakol na siglo sagkod sa “pagtatapos kan sistema nin mga bagay.” Sagkod na dumatong an katapusan, dapat na padagos niatong isagibo an sugo ni Jesus. Bako ini an panahon na magluwayluway. Nagpapadagos ngonyan an abundang espirituwal na pag-ani! Kadakol na naghihimate an tinitipon. Bilang mga parasunod ni Cristo, magin determinado kita na otobon an importanteng sugo na ipinagkatiwala sa sato. Magin desidido kita na itao an satong panahon, kosog, asin materyal na mga bagay sa pagsagibo kan pagboot ni Cristo: “Paduman kamo asin gumibo kamo nin mga disipulo.”