1-3. (a) Sa anong paagi binayaan ni Jesus an saiyang mga apostol, asin taano ta bako iyan na mapungaw na pamamaaram? (b) Taano ta kaipuhan niatong maaraman an manongod sa nagin buhay ni Jesus poon kan sia magbalik sa langit?

 ONSENG lalaki an magkairibanan na nakatindog sa sarong bukid. May dakulang pagkamoot asin paghanga, sinda nakaheling sa sarong ikadoseng persona. Sia nasa pormang tawo, alagad an totoo sia an binuhay liwat na si Jesus, na sa giraray iyo an pinakamakapangyarihan sa espiritung mga aki ni Jehova. Tiniripon ni Jesus an saiyang mga apostol tanganing tagboon sia sa ultimong beses digdi sa Bukid nin mga Olibo.

² Sa bukid na ini, na kabtang nin magkatarakod na mga bulod nin gapong puti sa ibong kan Kababan nin Cedron hale sa Jerusalem, siertong igwa nin dakol na nagigirumdoman si Jesus. Yaon sa mga bakilid na ini an banwaan nin Betania, na dian binuhay liwat ni Jesus si Lazaro. Mga semana pa sana an nakaagi, pinonan ni Jesus an saiyang pagsakay para sa kapangganahan palaog sa Jerusalem hale sa kaharaning Betfage. An Bukid nin mga Olibo iyo man an posibleng lugar kan hardin nin Getsemani, na duman inagihan ni Jesus an labi-labi kasakit na mga oras bago sia arestaron. Ngonyan sa iyo man sanang bulod na ini, si Jesus nag-aandam nang bayaan an saiyang pinakadayupot na mga katood asin parasunod. Sia nagtaram nin maboot na pamamaaram. Dangan nagpoon siang umitaas hale sa daga! An mga apostol nakatindog duman na dai makahiro sa kinamumugtakan ninda, na nakaturuhok sa saindang namomotan na Kagurangnan mantang sia pasakat sa langit. Sa katapustapusi, sarong panganoron an tuminahob sa saiya sa pagheling ninda, asin dai na ninda sia naheling.​—Gibo 1:6-12.

³ An naiimahinar daw nindo sa eksenang iyan sarong maogma alagad mamondong pagtatapos, sarong mapungaw na pamamaaram? Bako. An totoo, siring kan ipinapagirumdom ngonyan kan duwang anghel sa mga apostol, an estorya manongod ki Jesus dai pa tapos. (Gibo 1:10, 11) Sa dakol na paagi, an saiyang paghale pasiring  sa langit kapinonan pa sana. Dai kita pinabayaan kan Tataramon nin Dios na daing aram manongod sa sunod na nangyari ki Jesus. Importante na maaraman niato an manongod sa nagin buhay ni Jesus poon kan maghale digdi sa daga. Taano? Girumdoma an sinabi ni Jesus ki Pedro: “Padagos kang sumunod sa sako.” (Juan 21:19, 22) Kita gabos kaipuhan na kumuyog sa pagboot na iyan, na bako sanang bilang temporaryong desisyon kundi bilang paagi nin pamumuhay. Tanganing magibo iyan, kaipuhan na masabotan niato kun ano an ginigibo ngonyan kan satong Kagurangnan asin an mga asignasyon na inako nia sa langit.

4. Paano ihinayag kan Biblia antes pa kun ano an mangyayari sa langit pagkabalik ni Jesus duman?

⁴ Mayong sinasabi an Kasuratan mapadapit sa pagdatong ni Jesus sa langit, sa maogmang pag-ako sa saiya, asin sa magayagayang pag-ibanan giraray ninda kan saiyang Ama. Minsan siring, talagang ihinayag kan Biblia antes pa kun ano an mangyayari sa langit pagkabalik tolos ni Jesus duman. Aram nindo, sa laog nin labing 15 siglo, an mga Judio regular na nakakaheling mismo nin banal na seremonya. Sarong aldaw kada taon, an halangkaw na saserdote minalaog sa Kabanalbanale kan templo tanganing iwirik sa atubangan kan kaban kan tipan an dugo kan mga atang sa Aldaw nin Pagbayad sa Kasalan. Sa aldaw na iyan, an halangkaw na saserdote naglaladawan sa Mesiyas. An makahulang kahulogan kan seremonyang iyan inotob ni Jesus nin sararoan sana pagkabalik nia sa langit. Naglaog sia sa mamuraway na presensia ni Jehova sa langit​—an pinakabanal na lugar sa uniberso—​asin iprinesentar sa saiyang Ama an halaga kan saiyang atang na pantubos. (Hebreo 9:11, 12, 24) Inako daw iyan ni Jehova?

5, 6. (a) Anong ebidensia an nagpaheling na inako ni Jehova an atang na pantubos ni Cristo? (b) Sairisay an nakikinabang sa pantubos, asin paano?

⁵ Makukua niato an simbag paagi sa pag-adal sa kun ano an nangyari pira sanang aldaw pagkasakat ni Jesus. Sarong sadit na grupo nin mga 120 Kristiano an nagtitiripon sa Jerusalem sa sarong kuarto sa itaas kan an lugar na iyan bigla na sanang mapano nin ribok na siring sa hagobohob nin makosog na doros. May garo mga  dila nin kalayo na naheling sa ibabaw kan saindang payo, napano sinda nin banal na espiritu, asin nagpoon sindang magtaram nin manlaenlaen na lenguahe. (Gibo 2:1-4) An pangyayaring ini nangahulogan kan pagkamundag nin sarong bagong nasyon, an espirituwal na Israel, na iyo an bagong “rasang pinili” asin “sa hadeng grupo nin mga saserdote” na gagamiton nin Dios sa paggibo kan saiyang kabotan digdi sa daga. (1 Pedro 2:9) Malinaw nanggad, inako asin inoyonan ni Jehova Dios an atang na pantubos ni Cristo. An pagbubo na ini kan banal na espiritu kabale sa enot na mga bendisyon na nagin posible huli sa pantubos.

⁶ Poon pa kaidto, an pantubos ni Cristo nagtaong pakinabang sa saiyang mga parasunod sa bilog na kinaban. Nakikinabang kita sa saiyang atang, baga man kita kabilang sa linahidan na “sadangoton na aripompon,” na mamamahala kaiba ni Cristo sa langit, o kabilang sa “ibang mga karnero,” na mabubuhay sa irarom kan saiyang pamamahala digdi sa daga. (Lucas 12:32; Juan 10:16) Iyan an basehan kan satong paglaom asin kan kapatawadan kan satong mga kasalan. Sagkod na kita padagos na “nagtutubod” sa pantubos na iyan, na nagsusunod ki Jesus aroaldaw, magkakaigwa kita nin malinig na konsensia asin maogmang paglaom para sa ngapit.​—Juan 3:16.

7. Anong autoridad an itinao ki Jesus pagkabalik nia sa langit, asin paano nindo sia masusuportaran?

⁷ Ano an ginigibo ni Jesus sa langit poon kan sia magbalik duman? Igwa sia nin dakulaon na autoridad. (Mateo 28:18) Sa katunayan, ninombrahan sia ni Jehova na mamahala sa Kristianong kongregasyon, sarong asignasyon na isinagibo nia sa mamomoton asin makatanosan na paagi. (Colosas 1:13) Siring kan ihinula, si Jesus nagtao nin responsableng mga lalaki tanganing mag-asikaso kan mga pangangaipo kan saiyang aripompon. (Efeso 4:8) Halimbawa, pinili nia si Pablo na magin “apostol sa mga nasyon,” na isinugo sia tanganing magpalakop kan maogmang bareta sa gabos na lugar. (Roma 11:13; 1 Timoteo 2:7) Sa paghinanapos kan enot na siglo, si Jesus nagtao nin mga mensahe nin komendasyon, hatol, asin pagtatanos sa pitong kongregasyon sa Romanong probinsia nin Asia. (Kapahayagan, kapitulo 2-3) Minimidbid daw nindo si Jesus bilang Payo kan Kristianong kongregasyon? (Efeso 5:23) Tanganing padagos na makasunod sa saiya, bobooton nindong paoswagon an pagigin  makinuyog asin pakikipagkooperar sa lokal na kongregasyon nindo.

8, 9. Anong autoridad an itinao ki Jesus kan 1914, asin ano an maninigong magin kahulogan kaiyan para sa sato kun dapit sa mga desisyon na ginigibo niato?

⁸ Tinawan si Jesus nin dugang pang autoridad kan 1914. Kan taon na iyan ninombrahan sia bilang Hade kan Mesiyanikong Kahadean ni Jehova. Kan magpoon an pamamahala ni Jesus, may ‘puminutok na guerra sa langit.’ An resulta? Si Satanas asin an saiyang mga demonyo inapon sa daga, na iyo an pinonan nin sarong panahon nin grabeng sakit. An lakop na mga guerra, krimen, grabeng takot, helang, linog, asin tiggutom na nagpasakit nin makuri sa mga tawo sa presenteng panahon nagpapagirumdom sa sato na si Jesus namamahala na ngonyan sa langit. Si Satanas pa man giraray “an namamahala sa kinaban na ini” sa laog nin ‘halipot na sanang panahon.’ (Kapahayagan 12:7-12; Juan 12:31; Mateo 24:3-7; Lucas 21:11) Minsan siring, an mga tawo sa bilog na kinaban tinatawan ni Jesus nin oportunidad na akoon an Saiyang pamamahala.

⁹ Mahalagang marhay na manindogan kita sa lado kan Mesiyanikong Hade. Sa gabos niatong desisyon sa aroaldaw, dapat niatong hingoahon na kamtan an saiyang pag-oyon, bakong an pag-oyon kan maraot na kinaban na ini. Mantang sinisiyasat kan “Hade nin mga hade asin Kagurangnan nin mga kagurangnan” an katawohan, an saiyang matanos na puso naglalaad sa kaanggotan asin nagsosopay sa kagayagayahan. (Kapahayagan 19:16) Taano?

10. Natural na ano si Jesus, pero ano an dahelan na nakakamateng gayo nin matanos na kaanggotan an satong Kagurangnan?

¹⁰ Arog kan saiyang Ama, an satong Kagurangnan natural na maogma. (1 Timoteo 1:11) Kan sia magin tawo kaidto digdi sa daga, si Jesus bakong mapagkritika ni masakit paoyonan. Pero, dakol an nangyayari sa daga ngonyan na seguradong nagigin dahelan na makamate siang gayo nin matanos na kaanggotan. Sia anggot nanggad sa gabos na organisasyon nin relihion na putik na naghihingakong nagrerepresentar sa saiya. Ihinula nanggad nia: “Bakong gabos na nagsasabi sa sako, ‘Kagurangnan, Kagurangnan,’ makakalaog sa kahadean kan kalangitan, kundi an naggigibo kan kabotan  kan sakong Ama na nasa kalangitan. Dakol an masarabi sa sako sa aldaw na iyan, ‘Kagurangnan, Kagurangnan, bakong kami . . . naggibo nin dakol na makapangyarihan na gibo sa ngaran mo?’ Alagad ta sasabihan ko sinda: Dai ko kamo noarin man namidbid! Rumayo kamo sa sako, kamong mga paragibo nin katampalasanan.”​—Mateo 7:21-23.

11-13. Taano ta tibaad masakit para sa nagkapira na saboton an magabat na sinabi ni Jesus sa mga naggigibo nin “dakol na makapangyarihan na gibo” sa ngaran nia, pero taano ta naanggot sia? Iilustrar.

¹¹ Para sa dakol ngonyan na naghihingakong Kristiano tibaad masakit na saboton an mga tataramon na iyan. Taano ta sasabihon ni Jesus an siring kagabat na mga tataramon sa mga tawo na naggigibo nin “dakol na makapangyarihan na gibo” sa ngaran nia? An mga iglesia nin Kakristianohan nag-isponsor nin mga institusyon sa paglimos, nagtao nin ayuda sa mga dukha, nagpatogdok nin mga ospital asin eskuelahan, asin dakol na iba pa an ginibo. Tanganing masabotan kun taano ta tama sanang maanggot sa sainda si Jesus, helinga an sarong ilustrasyon.

¹² An sarong ama asin ina kaipuhan na magbiahe. Dai ninda puedeng iiba an saindang mga aki, kaya nagtangdan sinda nin sarong paraaling. Simple an itinao nindang instruksion sa saiya: “Atamanon mo an samong mga aki. Pakakanon mo sinda, seguradohon mo na sinda malinig, asin harayo sa peligro.” Pero kan magbalik an mga magurang, nabigla sinda kan maheling na an saindang mga aki gutom na marhay. An mga aki maati, herelangon, asin miserable. Sinda naghihiribi na naghahagad nin atension kan paraaling, alagad dai kaini iniintindi an saindang paghibi. Taano? An paraaling nasa itaas kan aroalsang hagyan, naglilinig kan mga bintana. Sa grabeng kaanggotan, naghagad nin paliwanag an mga magurang. An paraaling nagsimbag: “Helinga nindo an gabos na ginibo ko! Malinig an mga bintana, bako daw? May mga hinirahay man ako sa harong, an gabos na iyan para man sa saindo!” Maoogma na daw an mga magurang? Dai nanggad! Nungka nindang ipinagibo sa saiya an mga trabahong iyan; an gusto sana ninda atamanon nia an saindang mga aki. Ikakaanggot na gayo ninda an dai nia paghimate sa saindang mga instruksion.

¹³ An Kakristianohan guminawe na arog kan paraaling na iyan. Si Jesus nagwalat nin mga instruksion sa saiyang mga representante  na pakakanon sa espirituwal an mga tawo paagi sa pagtotokdo sa sainda kan katotoohan sa Tataramon nin Dios asin pagtabang sa sainda na magin malinig sa espirituwal. (Juan 21:15-17) Pero, biyong dai nasunod kan Kakristianohan an saiyang instruksion. Pinabayaan kaiyan an mga tawo na magutom sa espirituwal, nariribaraw huli sa mga kaputikan asin mayong aram dapit sa pundamental na mga katotoohan sa Biblia. (Isaias 65:13; Amos 8:11) Dawa an mga pagprobar kaiyan na pakarhayon an kinaban na ini dai nanggad puedeng ipangatanosan para sa tuyong pagsuway kaiyan. An totoo, an sistemang ini kan kinaban kapareho nin sarong harong na nakatalaan nang gabaon! Linilinaw kan Tataramon nin Dios na an sistema kan kinaban ni Satanas madali nang laglagon.​—1 Juan 2:15-17.

14. Anong gibohon an nagpapaogma ki Jesus ngonyan, asin taano?

¹⁴ Sa ibong na lado, si Jesus seguradong naoogmang marhay na magmasid hale sa langit asin maheling na minilyon na tawo an nag-ootob kan saiyang sugo na gumibo nin mga disipulo​—sarong gibohon na isinugo nia sa saiyang mga parasunod bago sia naghale sa daga. (Mateo 28:19, 20) Kanigoan na pribilehio na makatao nin kagayagayahan sa Mesiyanikong Hade! Magin determinado kita na dai noarin man umontok sa pagtabang sa “maimbod asin mapagmansay na oripon.” (Mateo 24:45) Bakong arog kan klero nin Kakristianohan, an sadit na grupong ini nin linahidan na mga tugang makinuyog na dinidirehiran an paghuhulit asin maimbod na pinapakakan an mga karnero ni Cristo.

15, 16. (a) Ano an saboot ni Jesus manongod sa kawaran nin pagkamoot na lakop na gayo ngonyan, asin paano niato naaaraman iyan? (b) Taano ta tama sanang maanggot si Jesus sa Kakristianohan?

¹⁵ Makakasierto kita na anggot an Hade kun naheheling nia an kawaran nin pagkamoot na lakop sa daga ngonyan. Tibaad nagigirumdoman niato kun paano krinitika si Jesus kan mga Fariseo huli sa pagpaomay nia kan Sabbath. Matagason an saindang puso, sutil na gayo, kaya an pinagbabasaran sana ninda iyo an sainda mismong hayakpit na interpretasyon kan Ley ni Moises asin kan berbal na ley. Kadakol na karahayan an nagibo kan mga milagro ni Jesus! Alagad daing saysay para sa mga tawong iyan an kagayagayahan, an pakaginhawa, an pagpakosog sa pagtubod na ibinunga kan siring na mga milagro. Ano an nagin saboot ni Jesus manongod sa  sainda? Sia nangalagkalag kaidto “sa sainda na may kaanggotan, na namomondo nin biyo sa katagasan kan saindang puso.”​—Marcos 3:5.

¹⁶ Ngonyan, orog pa nanggad dian an naheheling ni Jesus na ‘biyong nagpapamondo sa saiya.’ An mga namomoon sa Kakristianohan nabuta kan saindang debosyon sa mga tradisyon asin doktrina na bakong kaoyon kan Kasuratan. Dugang pa, ikinakaanggot ninda an paghuhulit kan maogmang bareta kan Kahadean nin Dios. Sa dakol na parte kan kinaban, an klero nagsutsut nin madahas na persekusyon tumang sa mga Kristiano na sinserong nagmamaigot na ihulit an mensahe na ihinulit kaidto ni Jesus. (Juan 16:2; Kapahayagan 18:4, 24) Kadungan kaiyan, an mga klerigong iyan parateng sinasadol an mismong mga parasunod ninda na makiguerra asin gadanon an iba​—na garo baga an paggibo kaiyan makakapaogma ki Jesu-Cristo!

17. Paano pinapagayagaya kan tunay na mga parasunod ni Jesus an saiyang puso?

¹⁷ Sa kabaliktaran, an tunay na mga parasunod ni Jesus naghihingoang magpaheling nin pagkamoot sa saindang kapwa tawo. Ipinapaabot ninda an maogmang bareta sa “gabos na klase nin tawo,” arog kan ginibo ni Jesus, sa ibong nin pagtumang. (1 Timoteo 2:4) Asin pambihira an pagkamoot na ipinapaheling ninda sa lambang saro; iyan an pangenot na tanda na nagpapamidbid sa sainda. (Juan 13:34, 35) Mantang tinatratar ninda an mga kapwa ninda Kristiano na may pagkamoot, paggalang, asin dignidad, talagang sinusunod ninda si Jesus​—asin pinapagayagaya an puso kan Mesiyanikong Hade!

18. Ano an nakakapamondong gayo sa satong Kagurangnan, pero paano niato sia mapapaogma?

¹⁸ Pirme man niatong isaisip na an satong Kagurangnan namomondong gayo kun an saiyang mga parasunod dai nakakatagal, na pinapabayaan na lumipot an saindang pagkamoot ki Jehova asin minapondo sa paglilingkod sa Saiya. (Kapahayagan 2:4, 5) Minsan siring, si Jesus naoogma sa mga nagtatagal sagkod sa katapusan. (Mateo 24:13) Kun siring, pirme nanggad niatong isaisip an pagboot ni Cristo: “Padagos kang sumunod sa sako.” (Juan 21:19) Pag-olayan niato an nagkapira sa mga bendisyon na itatao kan Mesiyanikong Hade sa mga nagtatagal sagkod sa katapusan.

19, 20. (a) An pagsunod ki Jesus nagbubunga nin anong mga bendisyon ngonyan mismo? (b) Paanong an pagsunod ki Cristo nakakatabang sa sato na mapanigoan an satong pangangaipo na magkaigwa nin “Amang Daing Sagkod”?

¹⁹ An pagsunod ki Jesus iyo an paagi tanganing magkaigwa nin tunay na nakakakontentong buhay ngonyan mismo. Kun aakoon niato si Cristo bilang satong Kagurangnan, na sinusunod an saiyang paggiya asin ginagamit an saiyang halimbawa bilang satong giya, makakanompong kita nin kayamanan na hinahanap kan mga tawo sa bilog na kinaban pero dai ninda nakukua. Magkakaigwa kita nin gibohon na magtatao nin katuyohan asin kahulogan sa satong buhay, sarong pamilya nin mga kapagtubod na nagkakasararo sa tunay na bogkos nin pagkamoot, sarong malinig na konsensia, asin katoninongan nin isip. Sa halipot, magkakamit kita nin buhay na maogma asin nakakakontento. Asin dakol pang pakinabang an makakamtan niato.

²⁰ Itinao ni Jehova si Jesus bilang “Amang Daing Sagkod” para sa mga may paglaom na mabuhay sagkod lamang digdi sa daga. Si Jesus an kasalida kan enot na tawong ama, si Adan, na dai nanggad nakatao kan pangangaipo kan gabos niang aki. (Isaias 9:6, 7) Paagi sa pag-ako ki Jesus bilang satong “Amang Daing Sagkod,” asin pagtubod sa saiya, kita igwa nin seguradong paglaom na buhay na daing katapusan. Dugang pa, paagi kaiyan kita orog pang nagigin dayupot ki Jehova Dios. Arog kan nanodan niato, an pagmamaigot na sumunod sa halimbawa ni Jesus aroaldaw iyo an pinakamarahay na paaging magigibo niato na kuyogon an pagboot na ini nin Dios: “Magin kamong mga paraarog sa Dios, bilang mga aki na namomotan na marhay.”​—Efeso 5:1.

21. Paano nagpapabanaag nin liwanag sa sarong madiklom na kinaban an mga parasunod ni Cristo?

²¹ Mantang inaarog niato si Jesus asin an saiyang Ama, si Jehova, igwa kita nin marahayon na pribilehio. Nagpapabanaag kita nin makinang na liwanag. Sa sarong kinaban na napapatos nin kadikloman, na dian binilyon an nadadaya ni Satanas asin inaarog an mga karakteristiko nia, kita na mga nagsusunod ki Cristo nagpapalakop nin mga banaag kan pinakamakinang na liwanag​—an liwanag kan mga katotoohan sa Kasuratan, an liwanag kan marahayon  na Kristianong mga kualidad, an liwanag kan tunay na kagayagayahan, tunay na katoninongan, asin tunay na pagkamoot. Kadungan kaiyan, kita mas nagigin dayupot ki Jehova, asin iyan an pinakapasohan, an pinakahalangkaw na maaabot na obheto, nin siisay man na intelihenteng linalang.

22, 23. (a) Anong mga bendisyon sa ngapit an kakamtan kan mga maimbod na nagpapadagos sa pagsunod ki Jesus? (b) Ano an maninigo na determinado niatong gibohon?

²² Isip-isipa man an gustong gibohon ni Jehova para sa saindo sa ngapit paagi sa saiyang Mesiyanikong Hade. Dai na mahahaloy an Hadeng iyan magibo nin matanos na pakikilaban tumang sa marigsok na sistema nin mga bagay ni Satanas. Segurado an kapangganahan ni Jesus! (Kapahayagan 19:11-15) Pagkatapos, poponan ni Cristo an saiyang Sangribong Taon na Paghade sa bilog na daga.  Itatao kan saiyang langitnon na gobyerno an mga pakinabang kan pantubos sa gabos na maimbod na tawo, na magibo sa sainda na magin sangkap. Imahinara na marahayon an saindong salud, na kamo pirmeng hoben asin makosog, na maogmang nagtatrabaho kaiba nin sarong nagkakasararong pamilya nin tawo tanganing gibohon an dagang ini na magin paraiso! Sa katapusan kan Milenyong iyan, ibabalik ni Jesus sa saiyang Ama an pamamahala. (1 Corinto 15:24) Kun kamo maimbod na magpapadagos sa pagsunod ki Cristo, itatao sa saindo an sarong marahayon nanggad na bendisyon na masakit nganing imahinaron​—an “mamuraway na katalingkasan kan mga aki nin Dios”! (Roma 8:21) Iyo, mapapasato an gabos na bendisyon na yaon kaidto ki Adan asin Eva alagad nawara ninda. Bilang mga aki ni Jehova, kita magigin mayo nang digta kan kasalan ni Adan sagkod lamang. Totoo nanggad, “dai na magkakaigwa nin kagadanan.”​—Kapahayagan 21:4.

²³ Girumdoma an mayaman na hoben na namamahala na pinag-olayan niato sa Kapitulo 1. Sinayumahan nia an imbitasyon ni Jesus: “Madia magin parasunod taka.” (Marcos 10:17-22) Nungka nindong paggibohon an salang iyan! Logod na akoon nindo na may kagayagayahan asin entusiasmo an imbitasyon ni Jesus. Logod na magin determinado kamo na magtagal, na padagos na sumunod sa Marahay na Pastor aroaldaw, taon-taon, asin mabuhay tanganing maheling sa katapustapusi na pinangyayari nia an mamuraway na kaotoban kan gabos na katuyohan ni Jehova!