“Bubuhayon liwat nin Diyos an mga matanos pati an mga bakong matanos.”—Gibo 24:15, Bagong Kinaban na Traduksiyon.

Matao nin karangahan kun may nagadan na mahal sa buhay.—2 Corinto 1:3, 4.

Mawawara an grabeng takot sa kagadanan.—Hebreo 2:15.

Tunay na paglaom na makaiba giraray an mga nagadan na mahal sa buhay.—Juan 5:28, 29.

Iyo, huli sa tulong panginot na dahilan:

• An Diyos an Kaglalang nin buhay. Sinasabi kan Bibliya na an Diyos na Jehova an “burabod nin buhay.” (Salmo 36:9; Gibo 17:24, 25) Siyertong kaya kan Saro na nagtao nin buhay sa gabos na linalang na buhayon liwat an mga nagadan.

• An Diyos may binuhay liwat na mga tawo kaidto. Sinasabi kan Bibliya an manungod sa walong pangyayari na diyan binuhay liwat an mga tawo digdi sa daga—aki, may edad, lalaki, asin babayi. An nagkapira dai pa sana nahahaloy magadan, pero may saro na apat na aldaw nang nasa lulubngan!—Juan 11:39-44.

• Gustong-gusto nin Diyos na gibuhon giraray iyan. Nauungis si Jehova sa kagadanan; para saiya kaiwal iyan. (1 Corinto 15:26) Minamawot niyang daugon an kaiwal na iyan, na halion an kagadanan paagi sa pagkabuhay liwat. Gusto niya nanggad na buhayon liwat an mga nasa memorya niya asin mahiling giraray sindang buhay sa daga.—Job 14:14, 15.