AN KATOTOOHAN manongod sa ano? Manongod sa nagkapira sa pinakamahalagang mga ihinahapot nin mga tawo. Tibaad inisip-isip na nindo an manongod sa mga hapot na arog kaini:

• An Dios daw talagang may pagmakolog sa sato?

• Matatapos pa daw an guerra asin pagsakit?

• Ano an nangyayari sa sato kun kita magadan?

• Igwa daw nin ano man na paglaom para sa mga gadan?

• Paano ako mamimibi tanganing dangogon nin Dios?

• Paano ako makakanompong nin kaogmahan sa buhay?

Saen nindo hahanapon an simbag sa mga hapot na ini? Kun maduman kamo sa mga libreriya o tindahan nin libro, tibaad makaheling kamo nin rinibong libro na igwa daa kan mga simbag. Pero, sa parate, magkakakontra an mga libro. An iba garo baga balido ngonyan alagad madaling lumihis kaya rinerebisar o sinasalidahan iyan.

Minsan siring, may sarong libro na igwa nin masasarigan na mga simbag. Iyan sarong libro nin katotoohan. Si Jesu-Cristo namibi sa Dios: “An saimong tataramon katotoohan.” (Juan 17:17) Ngonyan aram niato na an Tataramon na iyan iyo an Banal na Biblia. Sa sunod na mga pahina, magkakaigwa kamo nin ideya sa malinaw asin totoong simbag kan Biblia sa mga hapot sa itaas.

KUN TAANO TA IHINAHAPOT IYAN: Nabubuhay kita sa sarong kinaban na pano nin karingisan asin inhustisya. Dakol na relihion an nagtotokdo na kabotan nin Dios an mga pagsakit na naeeksperyensiahan niato.

KUN ANO AN ITINOTOKDO KAN BIBLIA: Nungka na an Dios an dahelan nin karatan. “Imposible na an tunay na Dios gumibo nin maraot, na an Makakamhan sa Gabos gumibo nin sala!” an sabi kan Job 34:10. May mamomoton na katuyohan an Dios para sa mga tawo. Iyan an dahelan kun taano ta tinokdoan kita ni Jesus na mamibi: “Ama niamo na nasa langit, . . . dumatong logod an Kahadean mo. Mangyari logod an boot mo, kun paano sa langit, siring man sa daga.” (Mateo 6:9, 10) An Dios nagmamakolog na marhay sa sato kaya ginigibo nia an gabos na paagi tanganing siertohon na maotob an saiyang katuyohan.​—Juan 3:16.

Helingon man an Genesis 1:26-28; Santiago 1:13; asin 1 Pedro 5:6, 7.

KUN TAANO TA IHINAHAPOT IYAN: Kadakol na tawo an nagagadan huli sa guerra. Gabos kita apektado kan pagsakit nin tawo.

KUN ANO AN ITINOTOKDO KAN BIBLIA: Ihinula nin Dios an panahon na papangyayarihon niang magkaigwa nin katoninongan sa bilog na daga. Sa pamamahala kan saiyang Kahadean, na sarong langitnon na gobyerno, an mga tawo dai na ‘mag-aadal pa nin pakikiguerra.’ Imbes, “pupulpogon ninda an saindang mga espada na magin mga tarom nin arado.” (Isaias 2:4) Tataposon nin Dios an gabos na inhustisya asin pagsakit. An Biblia nanunuga: “Papahidon [nin Dios] an gabos na luha sa saindang mga mata, asin an kagadanan mawawara na, mayo na man nin pagmondo o pagtangis o kolog. An enot na mga bagay [kaiba an mga inhustisya asin pagsakit ngonyan] nakalihis na.”​—Kapahayagan 21:3, 4.

Helingon man an Salmo 37:10, 11; 46:9; asin Miqueas 4:1-4.

KUN TAANO TA IHINAHAPOT IYAN: An kadaklan sa mga relihion sa kinaban nagtotokdo na may sarong bagay na nasa laog nin tawo na padagos na nabubuhay pagkagadan. Naniniwala an nagkapira na an mga buhay puedeng gibohan nin maraot kan mga gadan o na pinapadusahan nin Dios an mga maraot paagi sa daing sagkod na pagpasakit sa nagkakalayong impierno.

KUN ANO AN ITINOTOKDO KAN BIBLIA: Pagkagadan, minapondo na an buhay nin tawo. ‘An mga gadan mayo lamang nin pakaaram,’ an sabi kan Eclesiastes 9:5. Huling an mga gadan mayo na nin pakaaram, mayo na nin pakamate, o dai na nakakaeksperyensia nin ano man, dai na ninda magigibohan nin maraot​—o matatabangan—​an mga buhay.​—Salmo 146:3, 4.

Helingon man an Genesis 3:19 asin Eclesiastes 9:6, 10.

KUN TAANO TA IHINAHAPOT IYAN: Gusto niatong mabuhay, asin gusto niatong ikaogma an buhay kaiba kan satong mga namomotan. Natural sana na gustong-gusto tang maheling giraray an nagadan nang mga namomotan niato.

KUN ANO AN ITINOTOKDO KAN BIBLIA: Bubuhayon liwat an kadaklan na tawo na nagadan. Si Jesus nanuga na ‘an nasa mga lolobngan na girumdoman maruluwas.’ (Juan 5:​28, 29) Kaoyon kan orihinal na katuyohan nin Dios, an bubuhayon liwat na mga tawo magkakaoportunidad na mabuhay sa sarong paraisong daga. (Lucas 23:43) Kaiba sa ipinanugang ini na mangyayari sa ngapit an sangkap na salud asin buhay na daing katapusan para sa makinuyog na mga tawo. An Biblia nagsasabi: “An mga matanos makakasadiri kan daga, asin sinda maistar dian sagkod lamang.”​—Salmo 37:29.

Helingon man an Job 14:14, 15; Lucas 7:11-17; asin Gibo 24:15.

KUN TAANO TA IHINAHAPOT IYAN: An mga tawo sa haros gabos na relihion namimibi. Pero, an pagmate nin dakol dai sinisimbag an saindang mga pamibi.

KUN ANO AN ITINOTOKDO KAN BIBLIA: Tinokdoan kita ni Jesus na dai pagparaorootrohon an tinuom na mga pamibi. “Kun namimibi,” an sabi nia, “dai pagparaorootrohon an iyo man sanang mga bagay.” (Mateo 6:7) Kun boot niatong hinanyogon nin Dios an satong mga pamibi, dapat kitang mamibi sa paagi na inooyonan nia. Tanganing magibo iyan, kaipuhan niatong manodan kun ano an kabotan nin Dios dangan mamibi oyon dian. An 1 Juan 5:​14 nagpapaliwanag: ‘Ano man an satong hagadon segun sa kabotan nin Dios, dinadangog nia kita.’

Helingon man an Salmo 65:2; Juan 14:6; 16:23; asin 1 Juan 3:22.

KUN TAANO TA IHINAHAPOT IYAN: Dakol an naniniwala na an kuarta, kabantogan, o gayon iyo an mapaogma sa sainda. Huli kaini, pinagmamaigotan nindang kamtan an siring na mga bagay, pero dai pa man giraray ninda nakakamtan an kaogmahan.

KUN ANO AN ITINOTOKDO KAN BIBLIA: Sinabi ni Jesus kun ano an pinakaliabe sa kaogmahan: “Maogma an mga nakakamate kan saindang espirituwal na pangangaipo.” (Mateo 5:3) Magigin tunay na maogma kita kun naggigibo kita nin mga paagi tanganing panigoan an satong pinakadakulang pangangaipo​​—an satong pagkagutom sa espirituwal na katotoohan manongod sa Dios asin sa saiyang katuyohan para sa sato. An katotoohan na iyan yaon sa Biblia. Kun aram niato an katotoohan na iyan, makakatabang iyan sa sato na maaraman kun ano talaga an mahalaga asin kun ano an bakong mahalaga. Kun totogotan niato an katotoohan sa Biblia na magin giya niato sa satong mga desisyon asin ginigibo, magigin mas makahulogan an satong buhay.​—Lucas 11:28.

Helingon man an Talinhaga 3:5, 6, 13-18 asin 1 Timoteo 6:9, 10.

 Haralipot na simbag sana ini kan Biblia sa anom na hapot na iyan. Gusto nindong maaraman an iba pa? Kun saro kamo sa mga ‘nakakamate kan espirituwal na pangangaipo nindo,’ daing duda na gusto nindo. Tibaad iniisip-isip nindo an iba pang mga hapot, arog baga nin: ‘Kun an Dios may pagmakolog sa sato, taano ta tinotogotan nia an grabeng karatan asin pagsakit sa haloy nang panahon? Paano ko mapapakarhay an buhay kan sakong pamilya?’ An Biblia nagtatao nin kompleto asin nakakakontentong simbag sa mga hapot na ini saka sa dakol pang hapot.

Minsan siring, dakol ngonyan an nag-aalangan na magsiyasat sa Biblia. An pagheling ninda dian sarong mahibog na libro na kun beses depisil na masabotan. Gusto daw nindo nin tabang na manompongan sa Biblia an mga simbag? An mga Saksi ni Jehova may inaalok na duwang pantabang sa saindo.

Enot, an librong Ano Man Nanggad an Itinotokdo kan Biblia? dinisenyo tanganing tabangan an sibot na mga tawo na siyasaton an malinaw na simbag kan Biblia sa mahalagang marhay na mga hapot. An ikaduwang pantabang iyo an daing bayad na pag-adal sa Biblia. An sarong Saksi ni Jehova sa saindong lugar na kualipikadong magtokdo kan Biblia puedeng dumalaw sa saindong harong o sa ibang kombenyenteng lugar asin makipag-olay sa saindo manongod sa Biblia nin kadikit na panahon kada semana. Iyan daing bayad. Minilyon na tawo sa bilog na kinaban an nakinabang na sa pag-adal na ini. Dakol sa sainda an nakapagsabi kan nakakaogmang kongklusyon na ini: “Nanompongan ko na an katotoohan!”

Mayo nang makukuang kayamanan na maorog pa dian. An katotoohan sa Biblia nakakapatalingkas sa sato sa superstisyon, karibarawan, asin grabeng takot. Iyan nagtatao sa sato nin paglaom, katuyohan, asin kaogmahan. Si Jesus nagsabi: “Maaaraman nindo an katotoohan, asin an katotoohan mapatalingkas sa saindo.”​—Juan 8:32.