1, 2. (a) Ano an reaksiyon nin nagkapirang magurang pag sinabi sa sainda kan saindang aki na gusto na kaining magpabawtismo? (b) Taano ta hinahapot an mga kandidato sa bawtismo kun nagdusay na sinda ki Jehova? (Hilingon an ritrato sa itaas.)

MANTANG pinagmamasdan siya kan saiyang Kristiyanong mga magurang, sarong aking babayi na aapudon tang Maria an nagtindog kaiba kan iba pang kandidato sa bawtismo. Sa makusog asin malinaw na boses, nagsimbag siya sa duwang hapot kan ispiker. Dangan uruatyan, binawtismuhan siya.

² Maugmang marhay an mga magurang ni Maria sa desisyon kan saindang aki na bilog na pusong magdusay ki Jehova asin magpabawtismo. Pero bago kaini, may mga ikinakapurisaw an saiyang ina. Naisip niya: ‘Akion pa daw si Maria para magpabawtismo? Nasasabutan niya daw talaga kun gurano iyan kaseryoso? Mas marahay daw kun palihison nguna an pirang panahon bago siya magpabawtismo?’ Ini an parating naiisip kan dakul na magurang pag sinabi sa sainda kan saindang aki na gusto na kaining magpabawtismo. (Par. 5:5) Kun sabagay, an pagdusay asin bawtismo an pinakaimportanteng mga lakdang sa buhay  nin sarong Kristiyano.—Hilingon an kahon na “ Idinusay Mo Na Daw an Saimong Sadiri ki Jehova?”

3, 4. (a) Paano itinukdo ni apostol Pedro na mahalagang marhay an pagpabawtismo? (b) Taano ta an bawtismo puwedeng iagid sa pagtugdok kan arka kan panahon ni Noe?

³ Iinagid ni Pedro an bawtismo sa pagtugdok ni Noe kan arka. Sinabi niya: “An katimbang kaini na bawtismo iyo man ngunyan an nagliligtas sa saindo.” (Basahon an 1 Pedro 3:20, 21.) An arka sarong nahihiling asin malinaw na ebidensiya na si Noe dedikado sa paggibo kan kabutan nin Diyos. Inutob ni Noe an gabos na ipinagibo sa saiya ni Jehova. Iyo, huli sa nahihiling na mga gibong ini nin pagtubod, nakaligtas si Noe asin an saiyang pamilya sa Baha. Ano an punto kan ilustrasyon ni Pedro?

⁴ Kun paanong an arka nagserbing nahihiling na ebidensiya kan pagtubod ni Noe, an bawtismo nagtatao man sa mga nagmamasid nin nahihiling na ebidensiya na idinusay na nin sarong Kristiyanong disipulo an saiyang sadiri ki Jehova basado sa pagtubod niya sa atang asin pagkabuhay liwat ni Cristo. Arog ni Noe, makinuyog na inuutob kan nagdusay na mga disipulo an gibuhon na itinao sa sainda nin Diyos. Kun paanong ilinigtas si Noe sa Baha, ililigtas man an maimbod na mga bawtisadong lingkod pag nag-abot na an katapusan kan maraot na kinaban na ini. (Mar. 13:10; Kap. 7:9, 10) Ini an dahilan kaya mahalagang marhay an pagdusay asin bawtismo. Kun pinapaliman-limanan nin saro an pagpabawtismo, puwede niyang maiwara an saiyang oportunidad na mabuhay nin daing sagkod.

5. Ano an pag-uulayan niyato sa artikulong ini?

⁵ Ngunyan na nasabutan niyato na seryosong marhay an pagpabawtismo, kaipuhan niyatong maaraman an simbag sa tulong hapot na ini: Ano an sinasabi kan Bibliya mapadapit sa bawtismo? Anong mga lakdang an dapat na gibuhon nin saro bago magpabawtismo? Taano ta dapat na pirmi tang isaisip kun gurano kaimportante kan bawtismo  pag nagtutukdo kita sa satong aki o sa iba pa niyatong tinutukduan sa Bibliya?

6, 7. (a) Ipaliwanag an kahulugan kan pagbawtismo ni Juan. (b) Anong napapalain na bawtismo an ginibo ni Juan?

⁶ An inot na salaysay sa Bibliya mapadapit sa bawtismo iyo idtong ginibo ni Juan Bautista. (Mat. 3:1-6) Nagpapabawtismo ki Juan an mga tawo tanganing ipahiling na pinagsusulsulan ninda an mga kasalan ninda may koneksiyon sa Katugunan ni Moises. Pero mahalagang mangnuhon na an pinakaimportanteng bawtismo na ginibo ni Juan daing koneksiyon sa pagsulsol. Nagkaigwa si Juan nin pambihirang pribilehiyo na bawtismuhan si Jesus, an perpektong tawong Aki nin Diyos. (Mat. 3:13-17) Nungkang nagkasala si Jesus kaya dai niya kaipuhan na magsulsol. (1 Ped. 2:22) An saiyang bawtismo nagsisimbolisar sa pagpresentar niya na gibuhon an kabutan nin Diyos.—Heb. 10:7.

⁷ Kan panahon kan ministeryo ni Jesus sa daga, nagbawtismo man an saiyang mga disipulo. (Juan 3:22; 4:1, 2) Arog kan pagbawtismo ni Juan, an pagbawtismo ninda nagsimbolisar sa pagsulsol nin saro sa mga kasalan niya may koneksiyon sa Katugunan ni Moises. Pero pagkatapos na magadan asin buhayon liwat si Jesus, nag-iba nang marhay an kahulugan kan pagpabawtismo kan mga gustong magin parasunod ni Jesus.

8. (a) Ano an ipinagbuot ni Jesus sa saiyang mga parasunod pagkabuhay liwat sa saiya? (b) Ipaliwanag an kahulugan kan Kristiyanong bawtismo.

⁸ Kan 33 C.E., nagpahiling an binuhay liwat na si Jesus sa sarong grupo nin labing 500 katawo—mga lalaki, babayi, asin posibleng pati mga aki. Posibleng kaidto niya sinabi: “Padumán kamo asin gumibo kamo nin mga disipulo sa mga tawo kan gabos na nasyon, na binabawtismuhan sinda sa ngaran kan Ama asin kan Aki asin kan banal na espiritu, na tinutukduan sinda na utubon an gabos na bagay na ipinagbuot ko sa saindo.” (Mat. 28:19, 20; 1 Cor. 15:6) Iyo, minalataw na ginatos na disipulo ni Jesus an yaon kaidto kan itao niya an pagbuot na gumibo nin mga disipulo. Sinabi man niya na kahagadan an pagpabawtismo sa mga gustong magpasan kan sakal nin pagigin Kristiyanong disipulo. (Mat. 11:29, 30) Tanganing makapaglingkod sa Diyos sa paaging inuuyunan Niya, kaipuhan na midbidon asin akuon nin saro an papel ni Jesus sa kautuban kan katuyuhan ni Jehova. Kun magibo na niya iyan, puwede na siyang magpabawtismo. Ini an solamenteng pagbawtismo sa tubig na inuuyunan nin Diyos. Dakul nin ebidensiya sa Bibliya na kan inot na siglo, nasabutan kan bagong mga disipulo ni Cristo an kahulugan kan bawtismo. Asin dai sinda nag-atraso sa pagpabawtismo.—Gibo 2:41; 9:18; 16:14, 15, 32, 33.

9, 10. Ano an manunudan niyato sa proselitong Etiope asin ki apostol Pablo mapadapit sa bawtismo?

⁹ Basahon an Gibo 8:35, 36. Pag-isipan an halimbawa kan proselitong Etiope na pauli na pagkatapos magsamba sa templo sa Jerusalem. Sa paggiya kan anghel ni Jehova, dinulok ni Felipe an Etiope asin “ipinahayag niya sa saiya an maugmang bareta manungod ki Jesus.” Ano an reaksiyon kan Etiope? An sunod na ginibo niya malinaw na ebidensiya kan saiyang udok sa pusong pagpapahalaga sa mga katotoohan na naaraman niya. Gusto niyang gibuhon kun ano an kauyon kan areglo ni Jehova, kaya dai siya nag-atrasong magpabawtismo.

¹⁰ An ikaduwang halimbawa iyo an Judio na dating parapersegir sa mga Kristiyano. Namundag siya sa sarong nasyon na dusay sa Diyos. Pero, naiwara kan mga Judio an saindang espesyal na relasyon ki Jehova. An lalaking ini maigot na parasuportar kan mga tradisyon kan Judaismo, pero kan huri, naitanos an kaigutan na iyan. Personal siyang pinatotoohan kan binuhay liwat asin pinamuraway na si Jesu-Cristo. Ano an nagin reaksiyon niya? Inako niya an tabang kan Kristiyanong disipulo na si Ananias. Mapadapit sa lalaking iyan, sinabi kan Bibliya: “Dangan tuminindog siya asin  binawtismuhan.” (Gibo 9:17, 18; Gal. 1:14) Siguradong midbid mo an Judiong lalaking ini na kan huri nabisto bilang si apostol Pablo. Pero risahon na kan masabutan na ni Pablo an katotoohan mapadapit sa papel ni Jesus sa kautuban kan katuyuhan nin Diyos, huminiro siya tulos. Dai siya nag-atrasong magpabawtismo.—Basahon an Gibo 22:12-16.

11. (a) Ano an nagpapahiro sa mga tinutukduan sa Bibliya ngunyan na magpabawtismo? (b) Ano an namamatian niyato pag may binabawtismuhan?

¹¹ Arog man kaiyan pag-abot sa satong mga tinutukduan sa Bibliya, hoben man o may edad na. Gusto kan mga may pagtubod asin may tunay na pagpapahalaga sa katotoohan sa Bibliya na idusay an saindang buhay ki Jehova asin magpabawtismo. Tampok sa lambang asembleya asin kumbensiyon an pahayag na espesyalmenteng para sa mga indibidwal na iyan. Nauugma an mga Saksi ni Jehova pag may sarong tinutukduan sa Bibliya na nag-ako kan katotoohan asin nag-uswag sagkod na magpabawtismo. Bako daw na nauugma man na marhay an mga magurang na mahiling an saindang mga aki na kaiba sa bagong mga disipulo na mapabawtismo? Kan 2017 na taon nin paglilingkod, labing 284,000 “na igwang pusong nasa tamang kamugtakan” an sinimbolisaran an saindang pagdusay paagi sa pagpabawtismo sa tubig. (Gibo 13:48) Malinaw na nasabutan kan bagong mga disipulong iyan na an bawtismo kahagadan para sa mga Kristiyano. Anong mga lakdang an ginibo ninda tanganing makuwalipikar sa bawtismo?

12. Anong mga lakdang an dapat gibuhon nin sarong tinutukduan sa Bibliya tanganing makuwalipikar siya sa bawtismo?

¹² Tanganing makuwalipikar sa bawtismo an sarong tinutukduan sa Bibliya, dapat na magkaigwa siya nin pagtubod na basado sa tamang kaaraman dapit sa Diyos, sa Saiyang katuyuhan, asin sa ginibo Niyang areglo para maligtas an mga tawo. (1 Tim. 2:3-6) An pagtubod na iyan an magpapahiro sa tinutukduan sa Bibliya na isikwal an paggawing dai nakakapaugma sa Diyos asin iuyon an saiyang buhay sa matanos na mga pamantayan ni Jehova. (Gibo 3:19) Importante ini huling dai aakuon ni Jehova an pagdusay nin saro kun padagos siyang naggigibo nin mga bagay na magigin dahilan na dai siya makalaog sa Kahadian. (1 Cor. 6:9, 10) Pero bako sanang pagsunod sa halangkaw na mga pamantayan ni Jehova sa moral an kaipuhan. An mga gustong magdusay kan saindang buhay ki Jehova kaipuhan man na mag-atender sa mga pagtiripon kan kongregasyon asin regular na makikabtang sa nagliligtas-buhay na paghuhulit asin paggibo nin disipulo. Sinabi ni Jesus na isasagibo iyan kan saiyang tunay na mga disipulo. (Gibo 1:8) Pag nagibo na nin bagong disipulo an mga lakdang na iyan, saka sana siya puwedeng magdusay ki Jehova sa personal na pamibi asin simbolisaran sa publiko an saiyang pagdusay paagi sa pagpabawtismo.

13. Pag nagtutukdo kita, taano ta dapat na pirmi niyatong isaisip na an bawtismo kahagadan tanganing magin tunay na Kristiyano?

¹³ Mantang tinatabangan ta an satong mga aki asin mga tinutukduan sa Bibliya na gibuhon an mahalagang marhay na mga lakdang na nasambit, dapat niyatong tandaan na an pagpabawtismo saro sa mga kahagadan kan pagigin tunay na disipulo. Kun pirmi niyatong isinasaisip iyan, magigin mas epektibo an satong pakikipag-ulay sa sainda. Dai kita mag-aalangan na ipakipag-ulay sa angay na mga pagkakataon an kahalagahan kan pagdusay asin bawtismo. Iyo, gusto nanggad niyatong padagos na mag-uswag an satong mga aki asin mga tinutukduan sa Bibliya asin magpabawtismo!

14. Taano ta dai niyato pinipirit an siisay man na magpabawtismo?

¹⁴ Siyempre dai dapat piriton nin siisay man an saro na magpabawtismo dawa kan mga magurang niya, nagtutukdo sa Bibliya, o nin siisay man sa kongregasyon. Dai pinipirit ni Jehova an siisay man. (1 Juan 4:8) Imbes, mantang nagtutukdo kita, dapat niyatong iduon an kahalagahan kan pagkaigwa nin personal na relasyon sa Diyos.  An udok sa pusong pagpapahalaga sa katotoohan asin an pagmawot na pasanon an sakal kan pagigin disipulong Kristiyano an dapat na magpahiro sa tinutukduan na magpabawtismo.—2 Cor. 5:14, 15.

15, 16. (a) May partikular daw na edad tanganing makuwalipikar sa bawtismo? Ipaliwanag. (b) Taano ta dapat na magpabawtismo bilang saro sa mga Saksi ni Jehova an sarong tinutukduan sa Bibliya dawa nabawtismuhan na siya kaidto sa ibang relihiyon?

¹⁵ Mayong partikular na edad tanganing makuwalipikar sa bawtismo. Iba-iba an rikas kan pag-uswag sa espirituwal kan lambang tinutukduan sa Bibliya. Dakul an nabawtismuhan kan aki pa sinda, asin padagos sindang nagin maimbod sa paglilingkod ki Jehova. May iba man na gurang na kan maaraman an katotoohan asin an kahalagahan kan pagpabawtismo—na an pira ngani labi nang 100 an edad kan mabawtismuhan!

¹⁶ Sarong may edad nang tinutukduan sa Bibliya an naghapot sa nagtutukdo sa saiya kun talagang kaipuhan na magpabawtismo giraray; nabawtismuhan na kaya siya kaidto sa manlain-lain na relihiyon. Rinepaso ninda kan nagtutukdo sa saiya an pirang teksto na nagsisimbag sa hapot niya. Nasabutan kan tinutukduan an kahagadan kan Bibliya kaya dai nahaloy nagpabawtismo siya. Madali na siyang mag-80 anyos kaidto, pero dai niya inisip na dai na niya kaipuhan pang magpabawtismo. Iyo, tanganing akuon ni Jehova an satong bawtismo, dapat na nakabasar iyan sa tamang kaaraman mapadapit sa saiyang kabutan. Kaya, dapat na magpabawtismo an bagong mga disipulo dawa pa kun nabawtismuhan na sinda kaidto sa ibang relihiyon.—Basahon an Gibo 19:3-5.

17. Ano an angay na hurop-hurupon nin saro sa aldaw kan saiyang bawtismo?

¹⁷ Maugmang panahon nanggad an aldaw nin bawtismo. Panahon man ini para hurop-hurupon kun ano an kalabot sa pagdusay asin bawtismo. Kaipuhan nin dakulang paghihinguwa tanganing mautob nin saro an saiyang pagdusay. Iyan an dahilan kaya ikinumparar ni Jesus sa sarong sakal an pagigin disipulong Kristiyano. An mga disipulo ni Jesus dapat na “mabuhay bako nang para sa saindang sadiri, kundi para sa saiya na nagadan alang-alang sa sainda saka ibinangon.”—2 Cor. 5:15; Mat. 16:24.

18. Anong mga hapot an pag-uulayan niyato sa sunod na artikulo?

¹⁸ Ini an nasa isip kan ina ni Maria kan maihapot niya sa sadiri an mga bagay na sinambit sa kapinunan. Kun saro kang magurang, puwede mong ihapot sa sadiri: ‘Andam na daw talaga an aki ko na magpabawtismo? Igo na daw an kaaraman niya tanganing makagibo siya nin pagdusay na aakuon ni Jehova? Dapat daw na magkaigwa nguna nin marahay na sekular na edukasyon an aki ko asin makakua nin trabaho bago magpabawtismo? Paano kun mabawtismuhan an aki ko tapos makagibo siya nin magabat na kasalan?’ Pag-uulayan niyato sa sunod na artikulo an mga bagay na ini asin kun paano mapagdadanay nin Kristiyanong mga magurang an tamang pagmansay mapadapit sa bawtismo.