1. Paano kita magkakaigwa nin kadunungan, asin ano an mga pakinabang kaiyan?

SI Jehova an Gikanan nin kadunungan, asin bukas-palad niyang itinatao iyan sa iba. Sinasabi kan Santiago 1:5: “Kun an siisay man sa saindo kulang sa kadunungan, padagos siyang maghagad sa Diyos, huling siya bukas-palad na nagtatao sa gabos asin dai nanunuyaw.” An sarong paagi tanganing magkaigwa kita kan kadunungan na hali sa Diyos iyo an pag-ako ta kan saiyang disiplina. Puwede kitang maprotektaran kan kadunungan na iyan sa mga peligro sa moral asin espirituwal. (Tal. 2:10-12) Paagi kaiyan, “magdadanay [kita] sa pagkamuot nin Diyos . . . na minaresulta sa buhay na daing katapusan.”—Jud. 21.

2. Paano ta maaapresyar an disiplina nin Diyos?

² Alagad, huli sa satong makasalan na mga tendensiya, sa pagpadakula sa sato, asin sa iba pang dahilan, nagigin dipisil para sa sato na akuon an disiplina o ibilang iyan na sarong marahay na bagay. Pero pag naeeksperyensiyahan ta na an mga pakinabang kan disiplina, mas naaapresyar ta iyan asin nagigin malinaw sa sato na kapahayagan iyan kan pagkamuot sa sato nin Diyos. An Talinhaga 3:11, 12 nagsasabi: ‘Aki ko, dai mo ipagsikwal an pagdisiplina sa saimo [ni Jehova] huli ta dinidisiplina [ni Jehova]  an saiyang namumutan.’ (BPV *) Iyo, nungka niyatong lingawan na pirming an pinakaikakarahay ta an iniisip ni Jehova. (Basahon an Hebreo 12:5-11.) Huling midbid kita nin lubos nin Diyos, pirming angay asin rasonable an itinatao niyang disiplina. Pag-ulayan ta ngunyan an apat na aspekto nin disiplina: (1) disiplina sa sadiri, (2) disiplina nin magurang, (3) disiplina sa laog kan kongregasyon, asin (4) an sarong bagay na urog pa kisa sa temporaryong kulog nin disiplina.

3. Paano nagkakaigwa nin disiplina sa sadiri an sarong aki? Iilustrar.

³ Kalabot sa pagkaigwa nin disiplina sa sadiri an pagpupugol sa sadiri tanganing umuswag kita kun dapit sa satong paggawi asin pag-iisip. Dai kita ipinangaki na awtomatiko nang may disiplina sa sadiri. Kaipuhan niyatong manudan iyan. Halimbawa: Pag an aki nag-aadal pa sanang magbisikleta, sa parati kinakaputan kan magurang an bisikleta tanganing dai iyan matumba. Pero pag medyo nakakabalanse na an aki, papasolohon na niya ini nin pirang segundo sa pana-panahon mantang nakaantabay siya. Pag sigurado na an magurang na kaya nang magbalanse kan aki, bubutasan na niya an bisikleta. Kaagid kaiyan, kun padagos asin mapasensiyang sinasanay kan mga magurang an saindang mga aki “sa disiplina asin sadol ni Jehova,” tinatabangan man ninda an mga ini na magkaigwa nin disiplina sa sadiri asin nin kadunungan.—Efe. 6:4.

4, 5. (a) Taano ta mahalagang kabtang kan “bagong personalidad” an disiplina sa sadiri? (b) Taano ta dai kita dapat sumuko dawa kun, sabi ngani, ‘matumba kita nin nagkapirang beses’?

⁴ Aplikado man an mga prinsipyong iyan sa mga tawong adulto na kan mamidbid si Jehova. Totoo na tibaad maski paano may disiplina na man sinda sa sadiri. Alagad dai pa masasabing maygurang na Kristiyano an sarong bagong disipulo. Pero puwede siyang padagos na mag-uswag sa pagkamaygurang mantang nanunudan niyang isulot an arog-Cristong “bagong personalidad.” (Efe. 4:23, 24) An disiplina sa sadiri importanteng kabtang sa pag-uswag na iyan. Matatabangan kita kaiyan “na isikwal an bakong diyosnon na paggawi saka kinabanon na mga pagmawot asin na mamuhay na tultol an isip asin matanos saka may debosyon sa Diyos sa tahaw kan presenteng sistemang ini nin mga bagay.”—Tito 2:12.

⁵ Minsan siring, gabos kita may tendensiyang magkasala. (Par. 7:20) Pero dai man buot sabihon na pag nakagibo kita nin sala, mayo na kitang pag-asa o haros mayo na kitang disiplina sa sadiri. An Talinhaga 24:16 nagsasabi: ‘Huli ta an matanos matindog giraray maski siya matumba nin nagkapirang beses.’ (BPV) Ano an makakatabang sa saiya na ‘makatindog giraray’? Dai iyan posible sa sadiri sana niyang paghihinguwa, kundi paagi sa espiritu nin Diyos. (Basahon an Filipos 4:13.) Saro sa mga aspekto kan bunga kan espiritung iyan an pagpupugol sa sadiri, na konektadong marhay sa disiplina sa sadiri.

6. Paano ka magigin mas marahay na estudyante kan Tataramon nin Diyos? (Hilingon an ritrato sa kapinunan kan artikulo.)

⁶ Tanganing mas magkaigwa kita nin disiplina sa sadiri, makakatabang man na marhay an udok sa pusong pagpamibi, pag-adal sa Bibliya, asin paghurop-hurop. Pero paano kun nasasakitan ka sa pag-adal kan Tataramon nin Diyos? Tibaad bako ka man talagang paraadal. Pero tandaan na tatabangan ka ni Jehova, kun tutugutan mo siya. Matatabangan ka niyang “magkaigwa . . . nin grabeng pagmawot” para sa saiyang Tataramon. (1 Ped. 2:2) Inot, hagadon ki Jehova sa pamibi na tawan ka kan kinakaipuhan na disiplina sa sadiri sa pag-adal kan saiyang Tataramon. Dangan, humiro kauyon kan mga pamibi mo. Puwedeng magpuon ka sa haralipot na pag-adal. Sa paglihis nin panahon, maririsa mong nagigin mas madali na asin nakakaugma an pag-adal! Hahanap-hanapon mo na an mga pagkakataon na tuninong mong hinuhurop-hurop an mahalagang marhay na mga kaisipan ni Jehova.—1 Tim. 4:15.

7. Paano makakatabang an disiplina sa sadiri na maabot niyato an satong espirituwal na pasuhan?

⁷ Makakatabang sa sato an disiplina sa sadiri na  maabot an satong espirituwal na mga pasuhan. Pag-isipan an halimbawa nin sarong payo nin pamilya na narisang medyo nainaan an saiyang kaigutan. Kaya, nagin pasuhan niyang magregular payunir asin nagbasa siya nin mga artikulo dapit diyan sa satong mga magasin. Nakatabang ini sa saiya pati an pamimibi na magin marigon asin kumusog sa espirituwal. Nag-o-auxiliary payunir man siya kaidto sagkod sa mapupuwede. Ano an resulta? Dawa may mga ulang, nagdanay siyang nakapokus sa pasuhan niyang magin regular payunir kaya naabot niya iyan pag-abot nin panahon.

8-10. Ano an makakatabang sa Kristiyanong mga magurang na mapadakula an mga aki na magin lingkod ni Jehova? Magtao nin halimbawa.

⁸ May mahalagang marhay na pribilehiyo an Kristiyanong mga magurang—an padakulaon an saindang mga aki “sa disiplina asin sadol ni Jehova.” (Efe. 6:4) Dipisilon iyan lalo na sa kinabubuhayan tang kinaban. (2 Tim. 3:1-5) Siyempre, kan mamundag an mga aki dai pa man ninda aram an tama asin an sala. Ipinangaki sindang may konsiyensiya, pero kaipuhan pa iyan sanayon, o disiplinahon. (Roma 2:14, 15) Ipinaliwanag kan sarong reperensiya sa Bibliya na an Griegong tataramon na trinadusir na “disiplina” puwede man mangahulugan nin “pagpadakula sa aki.”

⁹ Pag dinidisiplina kan mga magurang an mga aki sa mamumuton na paagi, namamatian kan mga aki na ligtas sinda. Nanunudan ninda na may mga limitasyon an saindang libertad asin na may epekto—magsalang marahay o maraot—an mga desisyon asin paggawi ninda. Kaya mahalagang marhay na magpagiya ki Jehova an Kristiyanong mga magurang. Tandaan na magkakaiba, depende sa kultura asin sa kinabubuhayan na panahon, an pananaw asin pamamaagi sa pagpadakula nin aki. Pero, an mga magurang na nagsasarig sa kadunungan nin Diyos dai marambang sa kun ano an dapat nindang gibuhon o madepende sa sadiring eksperyensiya o sa kaisipan nin tawo tanganing magin mapanggana sa pagpadakula nin aki.

¹⁰ Gamiton ta an halimbawa ni Noe. Kan suguon siya ni Jehova na magtugdok nin arka, dai siya puwedeng magdepende sa saiyang eksperyensiya huling primerong beses niyang magibo kaiyan. Kaya kinaipuhan niyang magsarig ki Jehova asin sinunod niya an mga instruksiyon Niya—“iyan nanggad an saiyang ginibo.” (Gen. 6:22, NW) Ano an resulta? Nagibo niya iyan nin tama sa primerong beses. Kaipuhan niya talaga idtong magibo nin tama! Nagin mapanggana man si Noe bilang magurang huli sa iyo man sanang dahilan; nagsarig siya sa kadunungan nin Diyos. Kaya natukduan niyang marhay an saiyang mga aki asin nagin marahay na halimbawa sa sainda sa ibong kan marauton na kinaban bago an Baha.—Gen. 6:5.

11. Gurano kaimportante sa pagdidisiplina an pagigin marahay na halimbawa kan mga magurang sa mga aki?

¹¹ Bilang magurang, paano mo magigibo an siring nanggad sa inaasahan ni Jehova? Maghinanyog ki Jehova. Tugutan mong tukduan ka niya sa pagpadakula nin aki paagi sa saiyang Tataramon asin sa paggiyang inaako ta sa saiyang organisasyon. Pag-abot nin panahon, posibleng marhay na  papasalamatan ka kan mga aki mo sa paggibo mo kaiyan! Sarong brother an nagsurat: “Nagpapasalamat akong marhay sa paagi nin pagpadakula sako kan mga magurang ko. Ginibo ninda an saindang pinakamakakaya para maabot an puso ko. Sinda talaga an nakatabang sa sako na mag-uswag sa espirituwal.” Alagad, dawa ginibo na kan mga magurang an pinakamakakaya ninda, may mga aki na binabayaan pa man giraray si Jehova. Dawa arog kaiyan, may malinig na konsiyensiya an mga magurang huling ginibo ninda an pinakamakakaya ninda tanganing itadom an katotoohan sa puso kan aki ninda. Puwede man sindang maglaom na maabot an panahon na mabalik ki Jehova an aki ninda.

12, 13. (a) Paano maipapahiling nin mga magurang na makinuyog sinda sa Diyos kun matiwalag an saindang aki? (b) Paano nakinabang an sarong pamilya sa pagigin makinuyog kan mga magurang ki Jehova?

¹² An saro sa pinakadakulang pagbalo sa pagigin makinuyog kan nagkapirang magurang iyo an dapit sa relasyon ninda sa natiwalag nindang aki. Pag-isipan an eksperyensiya nin sarong ina na an aking babayi natiwalag asin naghali sa harong. Inadmitir kan ina: “Naghanap ako sa satong publikasyon nin mga maidadahilan tanganing makaibanan ko an aki saka makuapo ko.” Sinabi pa niya: “Pero mabuot akong tinabangan ni agom na marealisar na dai mi na kapot an aki mi asin dai kami dapat makiaram.”

¹³ Pakalihis nin pirang taon, nakabalik an saindang aki. Sabi kan ina: “Ngunyan, haros aroaldaw na siyang nag-aapod o nagti-text sako. Saka mas iginalang niya kami ni agom huling aram niyang sinunod mi si Jehova. Magayunon an iribanan mi ngunyan.” Kun may aki kang tiwalag, ‘masarig ka daw ki Jehova sa bilog mong puso asin dai masarig sa [sadiri mong pakasabot]’? (Tal. 3:5, 6) Tandaan na ipinapahiling kan disiplina ni Jehova an saiyang dai mapapantayan na kadunungan asin pagkamuot. Pirming tandaan na itinao niya an saiyang Aki para sa gabos, pati na sa aki mo. Habo nin Diyos na malaglag an siisay man. (Basahon an 2 Pedro 3:9.) Kaya magtiwala sa disiplina asin paggiya ni Jehova. Dawa makulog sa saimo bilang magurang, kuyugon mo an sinasabi ni Jehova. Iyo, makipagtabangan sa disiplina ni Jehova, imbes na kontrahon iyan.

14. Paano kita nakikinabang sa instruksiyon ni Jehova paagi sa “maimbod na katiwala”?

¹⁴ Nangako si Jehova na aatamanon, poprotektaran, asin tutukduan niya an Kristiyanong kongregasyon. Ginigibo niya ini sa nagkapirang paagi. Halimbawa, ipinagkatiwala niya an kongregasyon sa pangangataman kan saiyang Aki, na nagnombra man nin “maimbod na katiwala” tanganing magtao nin espirituwal na kakanon sa tamang panahon. (Luc. 12:42) An kakanon na iyan itinatao sa manlain-lain na paagi asin nagtatao iyan nin mahalagang paggiya, o disiplina. Haputon an sadiri, ‘Pirang beses na daw akong napahiro nin sarong pahayag o nin sarong artikulo sa satong mga publikasyon na gumibo nin mga pagbabago sa pag-iisip o paggawi ko?’ Kun ginibo mo an mga pagbabagong iyan, mag-ugma ka! Huling nangangahulugan iyan na tinutugutan mo si Jehova na moldehon o disiplinahon ka para sa saimong kapakinabangan.—Tal. 2:1-5.

15, 16. (a) Paano kita makikinabang sa “mga balaog na tawo” sa kongregasyon? (b) Paano ta matatabangan an mga elder na magin mas maugma sa paggibo kan saindang trabaho?

¹⁵ Tinawan man ni Cristo an mga kongregasyon nin “mga balaog na tawo”—mga elder na mapastor sa aripumpon nin Diyos. (Efe. 4:8, 11-13) Paano kita makikinabang sa mahalagang marhay na mga balaog na ini? An sarong paagi iyo an pag-arog sa pagtubod kan mga elder asin sa marahay na halimbawa ninda. An saro pang paagi iyo an pagsunod sa itinatao nindang maka-Kasuratan na sadol. (Basahon an Hebreo 13:7, 17.) Tandaan na namumutan kita kan mga elder asin gusto nindang mag-uswag kita sa espirituwal. Halimbawa, kun marisa nindang bako kitang regular sa mga pagtiripon o nababawasan an satong kaigutan, siguradong tatabangan ninda tulos kita. Madangog sinda sa sato, papakusugon kita, asin tatawan nin angay na sadol  na basado sa Bibliya. Minamansay mo daw an siring na tabang bilang kapahayagan kan pagkamuot sa saimo ni Jehova?

¹⁶ Tandaan man na tibaad bakong madali para sa mga elder na dulukon kita tanganing magtao nin kinakaipuhan na sadol. Halimbawa, pag-isipan kun gurano kadipisil ki propeta Natan na kaulayon si David pagkatapos na purbaran kan hadi na tahuban an magabat niyang kasalan! (2 Sam. 12:1-14) Kaagid kaiyan, siguradong kinaipuhan man ni apostol Pablo na magin makusog an buot tanganing itanos si Pedro, na saro sa 12 apostol, kan magpahiling ini nin paboritismo sa Kristiyanong mga Judio. (Gal. 2:11-14) Kaya paano ta mapapagian an pasan kan mga elder sa kongregasyon? Magin mapakumbaba, madaling dulukon, asin mapagpasalamat. Hilingon an saindang tabang bilang kapahayagan kan pagkamuot ni Jehova sa saimo. Makikinabang ka digdi, asin makakadagdag iyan sa kaugmahan ninda mantang ginigibo ninda an saindang trabaho.

17. Paano nakinabang an sarong sister sa mamumuton na pagtabang kan mga elder sa kongregasyon?

¹⁷ Nasakitan an sarong sister na mamutan si Jehova huli sa mga nangyari sa saiya kaidto. Sinabi niya: “Kan haros dai ko na makaya an sakong namamatian huli sa nakaagi ko asin sa iba pang problema, aram kong kaipuhan kong makipag-ulay sa mga elder. Dai ninda ako inanggutan o krinitika, imbes dinagka ninda ako saka pinakusog. Pagkatapos kan kada pagtiripon, maski sibot sinda, kisiyera saro sainda an makumusta sa sako. Huli sa mga nakaagi ko, nasasakitan akong akuon na maninigo ako sa pagkamuot nin Diyos. Pero pag nangyayari iyan, ginagamit ni Jehova an kongregasyon saka an mga elder tanganing siyertuhon sako na namumutan niya ako. Ipinapamibi ko na dai lugod mangyari na bayaan ko siya.”

18, 19. Ano an sarong bagay na mas grabe pa kisa sa kulog nin disiplina? Magtao nin mga halimbawa.

¹⁸ Puwedeng makulog an disiplina, pero may mas makulog pa diyan—an konsekwensiya kan dai pag-ako sa disiplina. (Heb. 12:11) Pag-isipan an halimbawa ni Cain asin ni Hading Zedekias. Kan maungis si Cain ki Abel sagkod sa punto na gusto niya na ining gadanon, sinadol siya ni Jehova: “Taano ta angguton ka saka mamunduon? Kun magibo ka nin marahay, bako daw na mauuyunan taka giraray? Pero kun dai ka magibo nin marahay, an kasalan nag-aabang na sa may pinto, asin gustong-gusto kaiyan na biktimahon ka; pero mapadaog ka daw diyan?” (Gen. 4:6, 7, NW) Dai nagdangog si Cain. Nagpadaog siya sa kasalan. Kaniguan na kulog asin pagsakit an sinapo niya! (Gen. 4:11, 12) Mas grabe pa nanggad iyan kisa sa kulog kan pagsaway ni Jehova.

¹⁹ Mayong sadiring desisyon asin maraot na hadi si Zedekias. Naghadi siya sa panahon na marauton an kamugtakan kan Jerusalem. Pauruutrong sinadol ni propeta Jeremias si Zedekias na magbago, pero habong akuon kan hadi an disiplina. Sa giraray, marauton an nagin resulta kaiyan. (Jer. 52:8-11) Habo ni Jehova na saparon ta an kasakitan na puwede ta man kutang malikayan!—Basahon an Isaias 48:17, 18.

20. Ano an mangyayari sa mga nag-aako sa disiplina nin Diyos asin sa mga dai nag-aako kaiyan?

²⁰ Sa kinaban na ini, parating pigngingisihan an disiplina, kaiba na an disiplina sa sadiri. Pero dai na mahahaloy, sasaparon kan siisay man na dai nag-aako sa disiplina nin Diyos an makulugon na konsekwensiya. (Tal. 1:24-31) Kaya lugod na ‘maghinanyog kita sa [disiplina] asin magin madunong.’ Arog kan sinasabi sa Talinhaga 4:13, “mangapot ka sa disiplina; dai mo iyan pagbutasan. Ingatan mo iyan, huli ta nangangahulugan iyan kan saimong buhay.” (NW)