1. Anong mga kadipisilan an napaatubang sa mga Kristiyano kan inot na siglo?

MAY panahon kaidto sa pag-ultanan kan 62 asin 64 C.E. na nagsurat si apostol Pedro “sa temporaryong mga residente na nagkasuruway-suway asin yaon sa Ponto, Galacia, Capadocia, Asia, asin Bitinia.” (1 Ped. 1:1) Hali sa magkakalain na marhay na kultura an mga tugang na ini, asin kaipuhan ninda nin pampakusog nin buot saka paggiya. Napapaatubang sinda sa pagkontra asin pigtataraman nin maraot. “Grabeng mga pagbalo” an inaagihan ninda. Nabubuhay man sinda sa sarong delikadong marhay na panahon. Nagsurat si Pedro: “An katapusan kan gabos na bagay harani na.” Mayo nang sarong dekada, maabot na an makatatakot na paglaglag sa Jerusalem. Ano an makakatabang sa lambang Kristiyano na matagalan an masakit na mga panahon na idto?—1 Ped. 4:4, 7, 12.

2, 3. Taano ta dinagka ni Pedro an mga Kristiyano na magin mapag-istimar? (Hilingon an ritrato sa itaas.)

² Dinagka ni Pedro an mga tugang: “Magin mapag-istimar sa lambang saro.” (1 Ped. 4:9) Sa Griego, an “pagkamapag-istimar” literal na nangangahulugan nin “kapadangatan o kabuutan sa mga estranghero.” Alagad, mangnuhon na dinagka ni Pedro an saiyang Kristiyanong mga tugang  na magin mapag-istimar “sa lambang saro,” buot sabihon, sa mga dati na nindang kabisto asin kairiba. Paano iyan makakatabang sa sainda?

³ Makakatabang iyan na magin dayupot sinda sa lambang saro. Pag-isipan an sadiri mong eksperyensiya. Naimbitaran ka na daw nin sarong tugang sa saiyang harong? Bako daw na nauugma kang marhay pag nagigirumduman mo iyan? Naimbitaran mo na man daw sa harong an pira mong kakongregasyon? Bako daw na huli kaiyan nagin mas dayupot kamong mag-aramigo? An pagigin mapag-istimar sarong marahay na paagi tanganing mas mamidbid ta an mga tugang. Kaipuhan kan mga Kristiyano kan panahon ni Pedro na magin mas dayupot sa lambang saro mantang mas naggagrabe an mga kamugtakan. Totoo man ini para sa mga Kristiyano sa “huring mga aldaw” na ini.—2 Tim. 3:1.

4. Anong mga hapot an pag-uulayan ta sa artikulong ini?

⁴ Sa anong mga oportunidad kita makakapahiling nin pagkamapag-istimar “sa lambang saro”? Paano ta mapapangganahan an mga ulang kun dapit sa pagkamapag-istimar? Ano an makakatabang sa sato na magin marahay na bisita?

5. Paano ta maipapahiling an pagigin mapag-istimar pag nasa Kristiyanong mga pagtiripon?

⁵ Sa mga pagtiripon: Maugma tang inaako an gabos na nag-aatender sa satong mga pagtiripon huling ibinibilang ta sindang mga kapwa bisita sa espirituwal na bangkete. Si Jehova asin an saiyang organisasyon an nag-imbitar sa sato. (Roma 15:7) Pag may bagong mga nag-aatender, garo na man kita nagigin kag-imbitar. Kaya, taano ta dai mag-inot na magdulok sa sainda, ano man an pagbado o itsura ninda? (Sant. 2:1-4) Kun mayo pang nag-aasikaso sa sarong bisita, taano ta dai siya alukon na magtaid sa saimo? Puwedeng maapresyar niya kun tatabangan mo siyang masundan an mga kabtang sa programa o hanapon an mga binabasang teksto. Marahayon na paagi ini para maipahiling an “pagigin mapag-istimar.”—Roma 12:13.

6. Sairisay an nangungurog nang dapat tang pahilingan nin pagigin mapag-istimar?

⁶ Sa pagmirindal o sa pagkakan: Kan mga panahon kan Bibliya, parating kaiba sa pag-istimar an pag-imbitar na magkakan sa harong. (Gen. 18:1-8; Hok. 13:15; Luc. 24:28-30) An pagsabay sa bisita sa pagkakan nagpapahiling na gusto kan nag-imbitar na magin amigo ini asin na magkaigwa sinda nin matuninong na relasyon. Sairisay an nangungurog nang dapat tang pahilingan nin pagigin mapag-istimar? Sinda an mga tawong parte na kan buhay ta—an mga tugang sa kongregasyon. Pag-abot nin masakit na mga panahon, bako daw na mayo kitang aasahan kundi an lambang saro? Kaipuhan tang magin maimbod na mga amigo asin magkaigwa nin matuninong na relasyon sa gabos. Kan 2011, binago kan Namamahalang Grupo an oras kan Pag-adal sa Torrengbantayan kan pamilyang Bethel sa Estados Unidos. An dating alas 6:45 nin banggi, ginibo nang alas 6:15. Taano? Sinabi sa paisi na kun mas amay na matatapos an pagtiripon, mas dakul an posibleng maengganyar na mag-imbitar asin mag-ako nin imbitasyon sa mga kapwa ninda Bethelite. Inarog man iyan kan ibang sangang opisina. Nakatabang an areglong ini na magin mas lalong dayupot an mga miyembro kan pamilyang Bethel.

7, 8. Paano kita makakapahiling nin pagkamapag-istimar sa nagbibisitang mga representante kan organisasyon ni Jehova?

⁷ An pagbisita kan mga ispiker hali sa ibang kongregasyon, pati man kan mga paraataman nin sirkito asin kun minsan kan mga representante hali sa Bethel, nagtatao sa sato nin mga oportunidad na magpahiling nin pagigin mapag-istimar. (Basahon an 3 Juan 5-8.) An pag-imbitar sa sainda na magmirindal o magkakan marahayon na paagi na magigibo ta ini. Puwede mo man daw gibuhon iyan?

⁸ Sarong sister sa Estados Unidos an nag-istorya: “Sa paglihis nin mga taon, nagkaoportunidad kami ni agom na mag-istimar sa harong nin dakul na bisitang ispiker kaiba an saindang agom. Nakakaugmang marhay an lambang eksperyensiyang iyan asin, urog sa gabos, talagang nakakapakusog iyan sa espirituwal. Dai mi lamang iyan pinagbasulan.”

9, 10. (a) Sairisay an tibaad mangaipo nin haloy-halóy na panahon na pag-istimar? (b) Puwede daw mag-alok nin tabang dawa an mga may simple sanang harong? Magtao nin halimbawa.

 ⁹ Sa haloy-halóy na panahon na mga bisita: Kan suanoy na mga panahon, parating kaiba sa pag-istimar an pagtao nin madadagusan sa mapagtitiwalaan na mga bisita. (Job 31:32; Filem. 22) Sa ngunyan, may mga pagkakataon man na kaipuhan ta ining gibuhon. Sa parati, kaipuhan nin madadagusan kan mga paraataman nin sirkito pag nagdadalaw sinda sa mga kongregasyon. Siring man an mga estudyante sa teokratikong mga paadalan, o an mga boluntaryo sa pagtugdok. Huli sa kalamidad, tibaad may mga pamilyang mawaran nin harong asin mangaipo nin madadagusan sagkod na dai pa nahihirahay o naitutugdok liwat an harong ninda. Dai ta dapat isipon na idto sanang mga may komportableng marhay na harong an nasa kamugtakan na tumabang huling posibleng dakul na beses na nindang nagibo iyan. Puwede ka man daw mag-alok dawa simple sana an saindong harong?

¹⁰ Nagigirumduman nin sarong brother sa South Korea kan padaguson niya sa harong ninda an mga estudyante sa teokratikong mga paadalan. Nagsurat siya: “Nag-alangan ako kan primero ta bago pa sana kaming kasal kaidto saka sadit sana an harong mi. Pero talagang nakakaugmang eksperyensiya an pagpadagos sa mga estudyante. Bilang bagong kasal, nahiling mi na talagang magigin maugmang marhay an sarong mag-agom kun magkaibanan sindang naglilingkod ki Jehova asin nag-aabot nin espirituwal na mga pasuhan.”

11. Taano ta tibaad kaipuhan kan mga bagong lipat sa kongregasyon an saindong pag-istimar?

¹¹ Sa mga bagong lipat sa kongregasyon: Tibaad may mga indibidwal o pamilya hali sa ibang kongregasyon na naglipat sa saindong lugar. Tibaad an iba sa sainda mga need-greater. Tibaad may mga payunir na ipinadara para magtabang sa kongregasyon nindo. Sa primero, gabos sinda naninibago pang marhay. Naglipat sinda sa bagong komunidad, bagong kongregasyon, o tibaad sa bagong lengguwahe pa ngani asin kultura. An pag-imbitar sa sainda sa mga pagtiripon-tipon, pagkakan, o sa mga outing, makakatabang na magkaigwa sinda nin bagong mga amigo asin maka-adjust sa bago nindang kamugtakan.

12. Magtao nin sarong eksperyensiya na nagpapahiling na dai man kaipuhan an sobra-sobrang pag-andam sa pag-istimar.

¹² Dai man kaipuhan an sobra-sobrang pag-andam sa pag-istimar. (Basahon an Lucas 10:41, 42.) Inistorya nin sarong brother kan bago pa sana sinda sa pagmimisyonero kan saiyang agom: “Hoben pa kaming marhay kaidto, bako pang eksperyensiyado, saka mapupungawon. Sarong banggi, pungawon kaidto si agom. Dawa anong gibuhon ko, mayong epekto. Dangan kan mga alas 7:30 na nin banggi, may nagtuktok sa pinto. Sarong Bible study an nagbisita na may darang tulong orange na para samo. Nagduman siya para i-welcome an bagong mga misyonero. Pinadagos mi siya asin tinawan nin sarong basong tubig. Dangan nagtimpla kami nin tsa saka mainit na tsokolate. Dai pa kami tataong mag-Swahili, saka dai man siya tataong mag-Ingles. Pero diyan nagpuon an nakakaugmang marhay na pakikiamigo mi sa mga tugang duman.”

13. Ano an mga pakinabang kan pagigin mapag-istimar?

¹³ May mga pagkakataon daw na nag-alangan kang mag-istimar? Kun iyo, tibaad napalampas mo an magayunon na mga oportunidad na maeksperyensiyahan an maugmang pag-iribanan asin na magkaigwa nin nagdadanay na pakikiamigo. An pagigin mapag-istimar saro sa pinakaepektibong panglaban sa kamunduan. Pero tibaad maisip mo, ‘Taano ta nag-aalangan an iba na mag-istimar?’ May nagkapirang dahilan.

14. Ano an puwede tang gibuhon kun an kakulangan nin panahon asin kusog an nakakaulang sa sato na mag-ako nin pag-istimar o mag-istimar man sa iba?

¹⁴ Panahon asin kusog: Sibot-sibot an mga lingkod ni Jehova asin sa parati dakul an responsabilidad. Kaya tibaad mamatian kan iba na mayo na sindang panahon o kusog para mag-istimar. Kun arog  kaiyan an sitwasyon mo, tibaad kaipuhan mong siyasaton an iskedyul mo. Puwede ka daw gumibo nin pirang pagbabago tanganing magkaigwa ka nin panahon asin kusog na mag-ako nin pag-istimar o mag-istimar man sa iba? Dinadagka kan Kasuratan an mga Kristiyano na magin mapag-istimar. (Heb. 13:2) Bakong sala na magtagama nin panahon para digdi; sa katunayan, iyan an tamang gibuhon. Siyempre, tanganing magibo ini, tibaad kaipuhan mong bawasan an panahon mo sa mga aktibidad na bako man gayong importante.

15. Ano an posibleng ikinakahadit kan nagkapira kun dapit sa pagigin mapag-istimar?

¹⁵ Pagmansay sa sadiri: Gusto mo man daw magin mapag-istimar kaso pagmati mo dai mo iyan kaya? An iba nasusupog asin natatakot na tibaad dai mag-enjoy an mga bisita. An iba man limitado sa pinansiyal kaya tibaad maisip ninda na dai ninda kayang maistimar an mga bisita arog kan pag-istimar kan ibang tugang. Tandaan, dai man kaipuhan na dakula o magarbo an harong, an importante iyo na areglado asin malinig iyan, saka mainamigo an mga nakaistar diyan.

16, 17. Ano an makakatabang tanganing mabawasan an paghadit dapit sa pag-istimar sa mga bisita?

¹⁶ Bako sana ika an nakakamati nin nerbiyos pag-abot sa pag-istimar sa mga bisita. Sarong elder sa Britania an nagsabi: “Maski paano nakakanerbiyos an pagpreparar para sa mga bisita. Pero arog sa ano man na may koneksiyon sa paglilingkod ki Jehova, an ano man na nerbiyos na namamatian mo dai lamang maikukumparar sa mga pakinabang asin kaugmahan pagkatapos. Maugma na ako dawa sa simpleng pag-inom nin kape kaiba kan mga bisita mantang nakikipag-istoryahan sa sainda.” Tandaan, pirming kapaki-pakinabang an pagpahiling nin personal na interes sa mga bisita. (Fil. 2:4) Haros gabos gustong-gustong mag-istorya kan mga eksperyensiya ninda sa buhay. Asin posibleng sa mga okasyon sanang ini nagkakaoportunidad an iba na madangog an satong mga eksperyensiya. Saro pang elder an nagsurat: “Pag iniimbitaran ko sa harong an mga amigo sa kongregasyon, nakakatabang iyan sako na mas masabutan sinda asin nagtatao iyan nin panahon para mas mamidbid ko sinda, lalo na kun paano sinda nagin Saksi.” Kun nagpapahiling kita nin mamumuton na personal na interes sa mga bisita, dawa anong okasyon magigin nakakaugma.

¹⁷ An sarong payunir na sister, na nagpadagos nin mga estudyante kan manlain-lain na teokratikong paadalan, nagsabi: “Kan primero, haditon ako ta talagang simple sana an pinapadagusan ko sainda saka an mga furniture ko mga tinauhan man sana. Pero napamugtak talaga an buot ko sa sinabi kan agom kan saro sa mga instruktor. Sinabi niya na pag nagdadalaw sinda sa mga kongregasyon, masasabi nindang pinakamaugma an mga semanang nagdadagos sinda sa harong nin sarong tawong espirituwal na tibaad kulang sa materyal pero kapareho nindang nakapokus sa paglilingkod ki Jehova asin sa pamumuhay nin simple. Nagirumduman ko lugod an pirming sinasabi ni Mama samo kaidto: ‘Mas marahay an [putaheng] gulay na igwa nin pagkamuot.’” (Tal. 15:17) Kun pagkamuot an nagpapahiro sa saimo na magin mapag-istimar, mayo kang dapat ikahadit.

18, 19. Paano makakatabang sa sato an pagigin mapag-istimar na mahali an negatibong impresyon mapadapit sa iba?

¹⁸ An pagmansay mo sa iba: Naiiritar ka daw sa kakongregasyon mo? Tibaad negatibo an inot na impresyon mo sa saiya asin puwede iyan magdanay kun mayo kang gigibuhon para mahali iyan. An pagkakaiba kan saindong personalidad puwedeng makaulang sa saimo na magin mapag-istimar sa saiya. O tibaad may nakakulog kan buot mo kaidto, tapos nasasakitan kang lingawan iyan.

¹⁹ Sinasabi kan Bibliya na makakatabang an pagigin mapag-istimar tanganing magkaigwa kita nin marahay na relasyon sa iba, dawa sa mga kaiwal ta. (Basahon an Talinhaga 25:21, 22.) An pagkamapag-istimar puwedeng makahali nin tensiyon asin magresulta sa mas matuninong na relasyon. Puwede kaiyan na mapaluwas an marahayon na mga kuwalidad kan satong bisita—mga kuwalidad na nahiling ni Jehova kan darahon niya ini sa katotoohan. (Juan 6:44) An imbitasyon na dai inaasahan, kun pagkamuot an motibo kaiyan, puwedeng  pagpunan nin marahay na iribanan. Paano mo masisigurado na pagkamuot an motibo mo sa pag-alok? An sarong paagi iyo an pagsunod sa sadol na nasa Filipos 2:3: “May kapakumbabaan nindong ibilang an iba na mas urog kisa saindo.” Kun mahanap kita nin mga bagay na diyan nakakalabi sa sato an satong mga tugang—posibleng sa pagtubod, pakatagal, kusog nin buot, o iba pang mga kuwalidad nin Kristiyano—mas mamumutan ta sinda asin makakapahiling kita nin tunay na pagkamapag-istimar na makakapagayon kan relasyon ta sa sainda.

20. Taano ta dapat niyatong pahalagahan an imbitasyon na inako niyato, asin paano ta iyan maipapahiling?

²⁰ Naghapot an salmistang si David: “O Jehova, siisay an puwedeng magin bisita sa saimong tolda?” (Sal. 15:1, NW) Sunod niyang sinambit an dapit sa mga kuwalidad na gusto ni Jehova sa mga magigin bisita niya. Saro diyan an pagigin mapagtitiwalaan sa pag-utob nin mga panuga: “Dai niya binabawi an saiyang panuga, dawa kun disbentaha iyan para sa saiya.” (Sal. 15:4, NW) Kun nag-ako kita nin imbitasyon, dai ta iyan dapat basta-basta na sana kanselaron. Tibaad nag-andam nang marhay an nag-imbitar, kaya kun dai kita matunga masasayang sana an pag-andam niya. (Mat. 5:37) Kun minsan, kinakanselar kan iba an nainot na imbitasyon tanganing akuon an sa hiling nindang mas marahay na imbitasyon. Pagpahiling daw iyan nin pagkamuot asin respeto? Kun may inako kitang imbitasyon, dapat na magpahiling kita nin tunay na pasasalamat sa ano man na iprineparar sa sato kan nag-imbitar. (Luc. 10:7) Pero kun talagang may balido kitang dahilan para kanselaron an imbitasyon, pagpahiling nin pagkamuot asin konsiderasyon kun aabisuhan ta tulos an nag-imbitar.

21. Paano makakatabang an paggalang sa mga kaugalian sa sarong lugar tanganing magin marahay kitang bisita?

²¹ Mahalaga man na igalang ta an mga kaugalian sa sarong lugar. May mga kultura na inaako maski an dai inaasahan na mga bisita; pero sa iba, gusto nindang patiinot ngunang nagsasabi bago magbisita. Sa ibang lugar, itinatao ninda sa bisita an pinakamarahay na maiaalok ninda asin panduwa na sana an saindang pamilya; sa iba man, kun ano an sa pamilya, iyo man an sa bisita. May mga lugar man na kinaugalian na kan mga bisita na may madará para sa okasyon; mantang sa iba, mas gusto kan nag-imbitar na dai na magdara nin ano man an mga bisita. May mga kultura man na inaasahan na masayuma nguna an bisita sa inot o ikaduwang imbitasyon; sa iba man, kawaran nin respeto kun masayuma ka. Gibuhon lugod niyato an satong pinakamakakaya tanganing magin maugma an nag-imbitar sa sato.

22. Taano ta mahalagang marhay na “magin mapag-istimar sa lambang saro”?

²² Sinabi ni Pedro: “An katapusan kan gabos na bagay harani na.” (1 Ped. 4:7) Madali ta nang maeksperyensiyahan an pinakagrabeng kasakitan na maabot sa kinaban. Mantang naggagrabe an mga kadipisilan, kakaipuhanon niyatong pakusugon na marhay an satong pagkamuot sa mga tugang. Kaya urog kasuarin man, aplikado sa sato ngunyan an sadol ni Pedro: “Magin mapag-istimar sa lambang saro.” (1 Ped. 4:9) Iyo, an pagigin mapag-istimar talagang nakakaugma asin mahalagang marhay na parte iyan kan satong buhay ngunyan asin sa maabot na panahon.