1. Ano an gustong siguraduhon kan Kristiyanong mga magurang bago mabawtismuhan an saindang mga aki?

“PIRANG bulan kong pigpaparasabi kaidto ki Papa pati ki Mama na gusto ko nang magpabawtismo, tapos parati man ninda iyan na ipinapakipag-ulay sa sako. Gusto nindang siguraduhon na nasasabutan ko na seryoso an desisyon na gigibuhon ko. Kan Disyembre 31, 1934, nag-abot an pinakamahalagang pangyayaring ini sa buhay ko.” Arog kaini inistorya ni Blossom Brandt an mga pangyayari kan magdesisyon siyang magpabawtismo. Kapareho kan saiyang mga magurang, gusto man kan mga magurang ngunyan na tabangan an saindang mga aki na gumibo nin madunong na mga desisyon. An pag-atraso o pagpaliman-liman na magpabawtismo puwedeng magresulta sa mga problema sa espirituwalidad kan saindang aki. (Sant. 4:17) Pero siyempre, sisiguraduhon kan madunong na mga magurang na bago mabawtismuhan an saindang aki, andam na ining isaabaga an mga paninimbagan kan pagigin Kristiyanong disipulo.

2. (a) Anong problema an narisa nin nagkapirang paraataman nin sirkito? (b) Ano an pag-uulayan niyato sa artikulong ini?

 ² Narisa kan nagkapirang paraataman nin sirkito na dakul na hoben, na ma-20 na asin labi nang 20 anyos na nagdakula sa pamilyang Kristiyano, an dai pa bawtisado. Kadaklan man sa sainda nag-aatender sa mga pagtiripon asin nakikikabtang sa ministeryo. Ibinibilang ninda an saindang sadiri na mga Saksi ni Jehova. Pero, nagduduwa-duwa pa man giraray sinda na idusay an saindang buhay ki Jehova asin magpabawtismo. Ano an posibleng dahilan kaiyan? An pira kaya sa sainda pinugulan nguna kan saindang mga magurang na magpabawtismo. Sa artikulong ini, tutukaron ta an apat na bagay na nakakaulang sa mga magurang na tabangan an saindang mga aki na umuswag asin magpabawtismo.

3. Ano an pinag-isipan na marhay kan mga magurang ni Blossom?

³ Masasabutan ta kun taano ta pinag-isipan na marhay kan mga magurang ni Blossom, na sinambit sa inot na parapo, kun baga nasa tamang edad na an aki ninda tanganing masabutan an kahulugan asin pagigin seryoso kan bawtismo. Paano maaaraman kan mga magurang kun baga andam na an saindang aki na idusay an saiyang sadiri ki Jehova?

4. Paano makakatabang sa mga magurang an pagbuot ni Jesus na nasa Mateo 28:19, 20 pag nagtutukdo sa saindang mga aki?

⁴ Basahon an Mateo 28:19, 20. Arog kan tinukar sa nainot na artikulo, mayong sinambit an Bibliya na espesipikong edad na dapat magpabawtismo an saro. Pero, makakatabang sa mga magurang na pag-isipan na marhay kun ano an buot sabihon kan paggibo nin disipulo. Sa Mateo 28:19, an Griegong termino na itrinadusir na “gumibo . . . nin mga disipulo” nangangahulugan nin pagtukdo sa saro na may pasuhan na gibuhon siyang estudyante, o disipulo. An disipulo sarong indibidwal na pinag-aadalan asin nasasabutan an mga katukduan ni Jesus asin determinado siyang sunudon iyan. Kaya, an dapat na pasuhan kan gabos na Kristiyanong magurang iyo na tukduan an saindang mga aki puon sa pagkaumboy sa katuyuhan na tabangan sinda na magin bawtisadong disipulo ni Cristo. Siyempre, an umboy dai pa kuwalipikadong bawtismuhan. Alagad ipinapahiling kan Bibliya na puwedeng masabutan asin mapahalagahan dawa kan mga aki an mga katotoohan sa Bibliya.

5, 6. (a) Sigun sa sinasabi kan Bibliya manungod ki Timoteo, ano an masasabi niyato kun dapit sa saiyang pagpabawtismo? (b) Ano an pinakamarahay na paagi na matatabangan kan madunong na mga magurang an saindang mga aki?

⁵ Si Timoteo sarong disipulo na isinapuso an katotoohan kan siya aki pa. Sinabi ni apostol Pablo na nanudan ni Timoteo an mga katotoohan sa Kasuratan puon pa sa pagkaumboy. Bakong lingkod ni Jehova an ama ni Timoteo, pero tinabangan siya kan saiyang Judiong ina asin lola na pahalagahan na marhay an Kasuratan, arog kan pagkasabot diyan kan mga Judio. Huli kaiyan, kuminusog na marhay an saiyang pagtubod. (2 Tim. 1:5; 3:14, 15) Kan si Timoteo mga 20 anyos na, saro na siyang Kristiyanong disipulo na kuwalipikado nang tawan nin espesyal na mga pribilehiyo sa kongregasyon.—Gibo 16:1-3.

⁶ Siyempre, bakong magkakapareho an mga aki; magkakaiba an rikas kan pag-uswag ninda. An iba dawa hoben pa, nasasabutan na an katotoohan asin maygurang na kun mag-isip saka gusto nang magpabawtismo. Pero an iba, tibaad kaipuhan pa nin dagdag na panahon tanganing magin andam na magpabawtismo. Kaya, dai pipiriton kan madunong na mga magurang an saindang aki na magpabawtismo. Imbes, tatabangan ninda an lambang aki ninda na mag-uswag sa espirituwal sigun sa rikas kan pag-uswag kaini. Mauugma an mga magurang pag isinasapuso kan saindang aki an mga tataramon na nasa Talinhaga 27:11. (Basahon.) Pero dai ninda dapat paglingawan an pasuhan ninda—na tabangan an mga aki na magin Kristiyanong mga disipulo. Mapadapit digdi, marahay na ihapot kan mga magurang sa saindang sadiri, ‘Igo  na daw an kaaraman kan aki ko tanganing idusay niya an saiyang sadiri sa Diyos asin magpabawtismo?’

7. Kaipuhan daw na dakulon nang aram dapit sa Bibliya an saro na gusto nang magpabawtismo? Ipaliwanag.

⁷ Angay sana na bilang mga paratukdo sa laog kan pamilya, gusto kan mga magurang na magkaigwa nin masarig na pundasyon nin kaaraman an saindang mga aki. Mapapahiro kan kaaraman na ini an mga aki na idusay an saindang sadiri sa Diyos. Pero dai man kaiyan buot sabihon na kaipuhan aram na niya an gabos na detalye kan lambang katukduan sa Bibliya bago siya magdusay sa Diyos asin magpabawtismo. Pagkatapos kan bawtismo, gabos na disipulo dapat na padagos na mag-uswag kun dapit sa tamang kaaraman. (Basahon an Colosas 1:9, 10.) Kaya, gurano kadakul an dapat na manudan kan saro bago siya bawtismuhan?

8, 9. Ano an manunudan ta sa istorya dapit ki Pablo asin kan bantay?

⁸ Makakatabang sa mga magurang ngunyan an eksperyensiya nin sarong pamilya kan inot na siglo. (Gibo 16:25-33) Kan mga 50 C.E., durante kan saiyang ikaduwang pagbiyahe sa pagmimisyonero, nagduman si Pablo sa Filipos. Sa siyudad na iyan, inaresto siya asin si Silas base sa palsong mga akusasyon, dangan iprineso. Kan banggi na, nagkaigwa nin makusog na linog kaya nagkataranyog an pundasyon kan presuhan asin nagkaburuksan an gabos na pinto. Huling paghuna kan bantay nagdurulag an mga preso, mahugot na kutana siya pero pinugulan siya ni Pablo. Nakapagtao si Pablo asin Silas nin marahayon na patotoo sa bantay asin sa pamilya kaini. Huli sa pagpapahalaga sa mga katotoohan na nanudan mapadapit ki Jesus, ano an sunod na ginibo kan bantay asin kan pamilya niya? Nagpabawtismo tulos sinda. Ano an manunudan ta sa istoryang ini?

⁹ Sigun sa kaugalian kaidto, posibleng sarong retiradong suldados an bantay. Bako siyang pamilyar sa Kasuratan. Kaya tanganing magkaigwa siya nin masarig na pundasyon nin kaaraman na basado sa Kasuratan, kaipuhan niyang manudan an pundamental na mga katotoohan sa Bibliya, masabutan kun ano an kahulugan kan pagigin lingkod nin Diyos, asin magin determinadong sunudon an mga katukduan ni Jesus. Sa halipot sanang panahon, napahiro siyang magpabawtismo huli sa naaraman niyang pundamental na mga katotoohan na basado sa Kasuratan asin sa saiyang pagpapahalaga sa mga iyan. Siguradong padagos niyang dinagdagan an saiyang kaaraman pagkatapos mabawtismuhan. Sigun sa istoryang ini, ano an puwede mong gibuhon kun mahiling mong udok sa puso nang pinapahalagahan kan saimong aki an pundamental na mga katukduan sa Kasuratan, kaiba na an kahulugan asin kahalagahan kan pagdusay asin bawtismo? Puwede mo siyang dagkahon na dumulok sa mga elder tanganing maaraman kun naabot na niya an mga kahagadan sa bawtismo. * Arog kan ibang bawtisadong mga disipulo, padagos siyang makua nin kaaraman mapadapit sa katuyuhan ni Jehova sa bilog niyang buhay, asin sagkod lamang pa ngani.—Roma 11:33, 34.

10, 11. (a) Ano an kaisipan nin nagkapirang magurang? (b) Ano an dapat na panginot na isipon kan mga magurang kun dapit sa saindang mga aki?

¹⁰ Iniisip kan nagkapirang magurang na pinakamarahay kun saka na sana magpabawtismo an saindang aki kun makakua na ini nin marahay na edukasyon asin magayon na trabaho. Puwedeng marahay man an intensiyon ninda, pero makakatabang daw iyan tanganing magin tunay na mapanggana an saindang aki? An pinakamahalaga, kauyon daw iyan kan sinasabi kan Kasuratan? Anong karera an irinerekomendar kan Tataramon ni Jehova?—Basahon an Parahulit 12:1.

 ¹¹ Mahalagang tandaan na an kinaban na ini asin an gabos na kabtang kaiyan kontra sa gusto asin kaisipan ni Jehova. (Sant. 4:7, 8; 1 Juan 2:15-17; 5:19) An pagkaigwa nin haraning relasyon ki Jehova an pinakamakusog na depensa nin sarong aki laban ki Satanas, sa saiyang kinaban, asin sa bakong diyosnon na kaisipan kaiyan. Kun an sekular na mga bagay an ginigibong priyoridad kan mga magurang, puwedeng maribong an aki kun ano talaga an mas papahalagahan niya asin maraot an saiyang relasyon ki Jehova. Gugustuhon daw kan mamumuton na Kristiyanong mga magurang na moldehon kan kinaban na ini an pagmansay kan saindang aki mapadapit sa kapangganahan? An totoo, makakamtan sana niyato an tunay na kaugmahan asin kapangganahan kun gigibuhon niyatong panginot sa satong buhay si Jehova.—Basahon an Salmo 1:2, 3.

12. Taano ta may mga magurang na habo ngunang mabawtismuhan an aki ninda?

¹² Ipinaliwanag nin sarong Kristiyanong ina kun taano ta dinisganar niya an saiyang aki na magpabawtismo, asin ini an dahilan niya: “Nakakasupog pero an panginot na dahilan talaga iyo an areglo nin pagtitiwalag.” Arog kan sister na iyan, may mga magurang na nagsasabi na mas marahay na dai nguna magpabawtismo an saindang aki sagkod na may mga tendensiya pa ining komun sa mga hoben. (Gen. 8:21; Tal. 22:15) Tibaad magkongklusyon sinda, ‘Sagkod na dai pa nababawtismuhan an aki ko, dai siya matitiwalag.’ Taano ta bakong tama an kaisipan na ini?—Sant. 1:22.

13. Kun an saro bako pang bawtisado, dai daw siya maninimbag ki Jehova sa mga ginigibo niya? Ipaliwanag.

¹³ Siyempre, gusto kan mga magurang na bago magpabawtismo an aki ninda, andam na ining idusay an saiyang buhay ki Jehova. Pero, salang isipon na dai maninimbag ki Jehova an aki sa mga ginigibo niya miling dai pa siya bawtisado. Taano man? Dai nakadepende sa bawtismo kun maninimbag ki Jehova o dai. Imbes, maninimbag sa Diyos an aki sa saiyang mga ginigibo kun aram na niya an tama asin an sala sa paghiling ni Jehova. (Basahon an Santiago 4:17.) Kaya, imbes na sabihon sa aki na dai nguna magpabawtismo, hihinguwahon kan madunong na mga magurang na magpahiling nin marahay na halimbawa. Tatabangan ninda an saindang aki puon sa pagkaumboy na magkaigwa nin udok sa pusong pagpapahalaga sa halangkaw na mga pamantayan ni Jehova sa moral. (Luc. 6:40) An pagpapahalagang iyan an pinakamakusog na proteksiyon, huling mapapahiro kaiyan an saindong aki na mangapot sa matanos na mga pamantayan ni Jehova.—Isa. 35:8.

14. Paano puwedeng suportaran kan mga elder an paghihinguwa kan mga magurang sa pagtabang sa mga aki ninda na umuswag sagkod na magpabawtismo?

¹⁴ Bilang espirituwal na mga pastor, puwedeng suportaran kan mga elder sa kongregasyon an mga paghihinguwa kan mga magurang paagi sa pagsabi nin positibong mga bagay mapadapit sa espirituwal na mga pasuhan. Nagigirumduman nin sarong sister kan makipag-ulay sa saiya si Brother Charles T. Russell kan siya sais anyos pa sana. Inistorya niya, “Nakipag-ulay siya sako nin 15 minutos mapadapit sa espirituwal na mga pasuhan ko.” Ano an resulta? Nagin payunir an sister sa laog nin labing 70 taon. Iyo, an positibo asin nakakapakusog na mga tataramon puwedeng magkaigwa nin nagdadanay na epekto. (Tal. 25:11) Puwede man na agdahon kan mga elder an mga magurang kaiba an mga aki kan mga ini para magtabang sa mga proyekto sa Kingdom Hall. Puwede nindang tawan nin asignasyon an mga aki depende sa saindang edad asin kakayahan.

15. Ano an nagkapirang paagi na makakatabang an ibang mga miyembro kan kongregasyon sa mga hoben?

¹⁵ Puwedeng makatabang an mga miyembro kan kongregasyon paagi sa pagpahiling nin angay na personal na interes sa mga aki. Puwedeng kaiba diyan an pagigin mapagrisa sa pag-uswag kan mga ini sa espirituwal. May sarong aki daw na nagtao  nin udok sa puso asin pinag-andaman na marhay na komento o nagpresentar kan saiyang kabtang sa programa sa midweek na pagtiripon? May sarong aki o hoben daw na napagdanay an integridad sa pagbalong napaatubang sa saiya o na nagpatotoo sa eskuwelahan? Magtao tulos nin sinserong komendasyon. Puwede mo daw magin pasuhan na makipag-ulay—bago o pagkatapos kan pagtiripon—sa sarong aki o hoben tanganing ipahiling na talagang interesado ka sa saiya? Paagi kaini, mamamatian ninda na kabtang sinda kan “dakulang kongregasyon.”—Sal. 35:18, NW.

16, 17. (a) Ano an koneksiyon kan bawtismo sa paglaom nin saro sa maabot na panahon? (b) Anong kaugmahan an hinihinguwang makamtan kan gabos na Kristiyanong mga magurang? (Hilingon an ritrato sa kapinunan kan artikulo.)

¹⁶ An pagpadakula sa aki sa “disiplina asin sadol ni Jehova” an saro sa pinakadakulang pribilehiyo na puwedeng akuon nin sarong Kristiyanong magurang. (Efe. 6:4; Sal. 127:3) Bakong arog kan mga aki sa suanoy na nasyon nin Israel, an mga aki kan Kristiyanong mga magurang dai namundag na kabtang na kan banwaan na dusay ki Jehova. Apuwera kaiyan, dai namamana an pagkamuot sa Diyos asin sa katotoohan. Puon kan aldaw na mamundag an sarong aki, dapat na pasuhan na kan mga magurang na gibuhon siyang disipulo, na tinatabangan ini na magin dusay asin bawtisadong lingkod ni Jehova. Igwa pa daw nin mas mahalaga diyan? An pagdusay, bawtismo, asin an maimbod na paglilingkod nin sarong tawo sa Diyos an magpapangyari na mamarkahan siya para sa kaligtasan sa panahon kan padangadang na grabeng kasakitan.—Mat. 24:13.

¹⁷ Kan magsabi si Blossom Brandt na gusto na niyang magpabawtismo, gustong masigurado kan saiyang may takot sa Diyos na mga magurang na andam na siyang gibuhon an pinakamahalagang desisyon na ini sa saiyang buhay. Kan siyerto na nindang andam na siya, sinuportaran ninda an saiyang desisyon. Kan banggi bago an saiyang bawtismo, may ginibo an saiyang ama na dai niya malilingawan. Inistorya ni Blossom: “Sinabi niya na magluhod kami gabos, dangan namibi siya. Sinabi niya ki Jehova na ugmahon siya sa desisyon kan saiyang aki na idusay an saiyang buhay sa Saiya.” Pagkalihis nin labing 60 taon, sinabi ni Blossom: “Dawa pirang panahon pa man an maglihis, nungka kong malilingawan an bangging idto!” Mga magurang, lugod na mamatian nindo an kaugmahan asin pagkakontento na mahiling an saindong mga aki bilang dusay asin bawtisado nang lingkod ni Jehova.