1-3. (a) Anong kadipisilan an napapaatubang sa gabos na hoben, asin sa ano ini puwedeng iagid? (Hilingon an ritrato sa itaas.) (b) Ano an pinakamarahay na paagi para maatubang kan mga hoben na Kristiyano an kadipisilan na ini?

IPAMUGTAK na nagpaplano kang magbiyahe sa harayong banwaan para sa sarong mahalagang okasyon. Tanganing makaabot duman, kaipuhan mong magbiyahe nin halawig sa bus. Kan nasa terminal ka na nin bus, nabigla ka ta kadakul pasahero saka bus. Marahay na sana ta malinaw sa saimo kun ano an gigibuhon mo—hanapon an bus na pasiring sa destinasyon mo! Kun ibang bus kaya an sasakayan mo, dadarahon ka kaiyan sa salang destinasyon.

² Puwedeng iagid sa mga pasaherong iyan an mga hoben ngunyan. An mga tin-edyer may gigibuhon na halawig na pagbiyahe, bako sa bus, kundi sa buhay. Kun minsan tibaad maribong sinda huli sa kadakul-dakul na oportunidad asin pagdedesisyunan sa buhay. Mga hoben, magigin mas madali iyan para sa saindo kun napag-isipan na nindong marhay kun ano an gusto nindong mangyari sa saindong buhay. Anong direksiyon an dapat nindong pilion?

³ Sisimbagon sa artikulong ini an hapot na iyan paagi sa pagdagka sa  mga hoben na ipokus an saindang buhay sa pagmawot na paugmahon si Jehova. Nangangahulugan iyan na pirmi mong iiiba si Jehova sa pagdedesisyon sa gabos na aspekto kan buhay—edukasyon, trabaho, mga paninimbagan sa pamilya, asin iba pa. Nangangahulugan man iyan nin pag-abot nin espirituwal na mga pasuhan. An mga hoben na padagos na nagpopokus sa paglilingkod ki Jehova makakasigurado na tatabangan niya sinda na magkaigwa nin mapangganang buhay.—Basahon an Talinhaga 16:3.

4. Ano an pag-uulayan ta sa artikulong ini?

⁴ Sarong kadunungan an paggibo nin teokratikong mga pasuhan mantang aki pa. Taano? Pag-uulayan ta an tulong dahilan. An inot na duwang dahilan nagpapahiling na an pag-abot nin espirituwal na mga pasuhan nakakapakusog sa relasyon nin saro ki Jehova; idinuduon kan ikatulo an pakinabang kan pag-abot nin teokratikong mga pasuhan mantang aki pa.

5. Ano an panginot na dahilan sa paggibo nin espirituwal na mga pasuhan?

⁵ An panginot na dahilan sa paggibo nin espirituwal na mga pasuhan iyo na tanganing ipahiling ki Jehova na nagpapasalamat kitang marhay sa saiyang pagkamuot asin sa ginibo niya para sa sato. Naobserbaran kan salmista: ‘Marahay na magpasalamat ki [Jehova]. Huli ta pinaugma mo ako [O Jehova]; sa mga gibo nin saimong mga kamot, minaawit ako sa kaugmahan.’ (Sal. 92:1, 4, An Marahay na Bareta Biblia) Bilang hoben, isipa an gabos na utang na buot mo ki Jehova. An saimong buhay, an saimong pagtubod, an Bibliya, an kongregasyon, asin an saimong pambihirang paglaom sa maabot na panahon. An pagtao nin priyoridad sa espirituwal na mga bagay sarong paagi na maipapahiling mo an saimong pasasalamat sa Diyos para sa mga bendisyon na ini, asin paagi kaiyan mas mapaparani ka sa saiya.

6. (a) Ano an epekto kan espirituwal na mga pasuhan sa satong relasyon ki Jehova? (b) Anong mga pasuhan an puwedeng abuton dawa aki pa?

⁶ An ikaduwang dahilan iyo na pag nagpuon ka nang mag-abot nin espirituwal na mga pasuhan, diyan man nagpupuon an rekord mo nin marahay na mga gibo sa paghiling ni Jehova. Paagi kaini, mas mapaparani ka pa sa saiya. Iginarantiya ni apostol Pablo: “An Diyos bakong biko para malingawan niya an saindong ginibo asin an pagkamuot nindo para sa saiyang ngaran.” (Heb. 6:10) Bakong rason an pagigin aki pa para gumibo nin mga pasuhan. Diyes anyos si Christine kan ginibo niyang pasuhan na regular na basahon an istorya nin buhay kan maimbod na mga Saksi. Dose anyos si Toby kan nagin pasuhan niyang mabasa an bilog na Bibliya bago magpabawtismo. Onse anyos si Maxim mantang diyes anyos an tugang niyang si Noemi kan magpabawtismo sinda. Dangan hininguwa nindang duwa na abuton an saindang pasuhan na maglingkod sa Bethel. Tanganing mapagdanay ninda an saindang pokus, nagpaskil sinda sa lanob kan saindang harong nin sarong aplikasyon para sa paglilingkod sa Bethel. Taano ta dai pag-isipan kun arin na mga pasuhan an mahalaga sa saimo dangan hinguwahon nang abuton an mga iyan?—Basahon an Filipos 1:10, 11.

7, 8. (a) Paano nakakatabang an paggibo nin mga pasuhan na magin mas pasil an paggibo nin desisyon? (b) Taano ta pinili nin sarong tin-edyer na dai mag-eskuwela sa unibersidad?

⁷ Ano an ikatulong dahilan kaya marahay na magkaigwa nin mga pasuhan maski hoben pa? An mga hoben kaipuhan na gumibo nin mga desisyon mapadapit sa edukasyon, trabaho, asin sa iba pang bagay. An paggibo nin mga desisyon puwedeng iagid sa pagpili kan tamang dalan sa sarong krosing. Kun aram mo an ruta pasiring sa saimong destinasyon, dai ka madidipisilan sa pagpili kun arin an tamang dalan. Sa kaagid na paagi, kun igwa ka na nin mga pasuhan, magigin mas pasil na an paggibo nin madunong na mga desisyon. An Talinhaga 21:5 nagsasabi: “An mga plano kan mahigos siguradong magigin mapanggana.” (NW) Mantang mas amay kang nagpaplano paagi sa  paggibo nin marahay na mga pasuhan, mas amay ka man na magigin mapanggana. Iyan mismo an naeksperyensiyahan ni Damaris kan may kaipuhan siyang gibuhon na mahalagang desisyon kan siya tin-edyer.

⁸ Nagtapos sa hayskul si Damaris na may haralangkaw na marka. Puwede kutana siyang magin iskolar sa sarong unibersidad sa kursong abogasiya, pero pinili niyang magtrabaho sa bangko. Taano? “Kaidto pa, nagdesisyon na ako na magpayunir. Nangangahulugan iyan na matrabaho ako nin part-time. Kun nag-abogado ako, dakula kuta an gaganaron ko, pero masasakitan akong makahanap nin part-time.” Beynteng taon nang payunir ngunyan si Damaris. Namamatian daw niyang sala an nagin pasuhan asin desisyon niya kan siya tin-edyer? “Sa trabaho ko ngunyan sa bangko, dakul akong nakakamidbid na mga abogado. Arog kuta sainda an trabaho ko ngunyan kun nag-adal ako nin abogasiya. Pero dakul sa sainda an bakong maugma sa trabaho ninda. Nakatabang sako an desisyon kong magpayunir na malikayan an pagkadisganar na dara kan sekular na karera saka iyan an nagdara sa sako sa dakul na taon nin nakakaugmang paglilingkod ki Jehova.”

9. Taano ta maninigong tawan nin sinserong komendasyon an mga hoben sa kongregasyon?

⁹ Ribo-ribong hoben sa mga kongregasyon sa bilog na kinaban an maninigong tawan nin sinserong komendasyon. Ginigibo ninda an saindang pinakamakakaya para ki Jehova asin ipinopokus an saindang buhay sa teokratikong mga pasuhan. Maugmang namumuhay an mga hoben na iyan asin kasabay kaiyan nakakanuod na magsunod sa paggiya ni Jehova sa gabos na ginigibo ninda. Kaiba diyan an edukasyon, trabaho, asin relasyon sa pamilya. “Magtiwala ka ki Jehova sa bilog mong puso,” an sabi ni Solomon. “Sa gabos mong lakad isipon mo siya, asin itatanos niya an saimong mga dalan.” (Tal. 3:5, 6, NW) Pinapahalagahan na marhay ni Jehova an mga hoben sa laog kan Kristiyanong kongregasyon. Namumutan niya sindang marhay, pinoprotektaran, ginigiyahan, asin binebendisyunan.

10. (a) Taano ta dapat na saro sa mga magin pinakapriyoridad niyato an ministeryo? (b) Paano kita magigin epektibo sa ministeryo?

¹⁰ An sarong hoben na ipinopokus an saiyang buhay sa pagmawot na mapaugma si Jehova nagtatao nin espesyal na atensiyon sa ministeryo. Idinuon ni Jesu-Cristo na “an maugmang bareta kaipuhan na ihulit nguna.” (Mar. 13:10) Huling apuradong marhay an gibuhon na paghuhulit, dapat na saro iyan sa magin pinakapriyoridad niyato. Puwede mo daw magin pasuhan na urog pang makikabtang sa ministeryo? Puwede ka daw magpayunir? Pero paano kun bako ka gayong maugma sa paghuhulit? Asin paano ka magigin mas epektibo sa pagpapatotoo? Makakatabang sa saimo an duwang simpleng lakdang: Mag-andam na marhay, asin dai magpundo sa pagsabi sa iba kan dapit ki Jehova. Dangan, tibaad magngalas ka na nakakaugmang marhay palan an paghuhulit.

11, 12. (a) Ano an puwedeng gibuhon kan mga hoben tanganing makapag-andam na magpatotoo? (b) Paano inaprobetsaran nin sarong hoben na makapagpatotoo sa eskuwelahan?

¹¹ Puwede kang magpuon paagi sa pagpreparar nin simbag sa parating mga ihinahapot kan mga kaeskuwela mo, arog kan “Taano ta nagtutubod ka sa Diyos?” Igwa sa satong jw.org website nin mga artikulong dinisenyo tanganing tabangan an mga hoben na maaraman kun paano sisimbagon an hapot na iyan. Magduman sa TURO NG BIBLIYA > TIN-EDYER. Igwa diyan nin sarong worksheet na may titulong “Bakit Ako Naniniwalang May Diyos?” Gigiyahan ka kan worksheet sa pag-andam kan simbag mo. Nagtatao iyan nin tulong teksto na puwede mong gamiton sa pagpaliwanag kan pagtubod mo—Hebreo 3:4, Roma 1:20, asin Salmo 139:14. Puwede mong gamiton an mga worksheet na ini tanganing makaandam ka nin simbag sa dakul na hapot.—Basahon an 1 Pedro 3:15.

¹² Pag may oportunidad, dagkahon an mga kaeskuwela mo na buksan mismo an jw.org. Iyan an ginibo ni Luca. Mapadapit sa manlain-lain na relihiyon an leksiyon ninda kaidto, asin narisa ni Luca na may salang mga impormasyon manungod sa  Mga Saksi ni Jehova sa textbook na ginagamit ninda. Dawa nag-aalangan si Luca, nagpaaram siya kun puwede niyang ipaliwanag kun taano ta sala an mga sahot na ini, asin nagtugot man an maestra. Ipinaliwanag ni Luca an mga tinutubod niya asin ipinahiling man niya an satong website sa bilog na klase. Bilang homework, sinabi kan maestra na hilingon kan lambang estudyante an whiteboard animation na Daugon an Bully Dawa Dai Ka Nakikiiwal. Naugmang marhay si Luca huling nakapagtao siya nin marahay na patotoo.

13. Taano ta dai kita dapat pangluyahan nin buot kun magkaigwa nin mga kadipisilan?

¹³ Dai pangluyahan nin buot, dawa kun minsan lubak-lubak an dalan na inaagihan mo. (2 Tim. 4:2) Kun may mag-abot na mga kadipisilan, magpokus sa saimong mga pasuhan. Disisiyete anyos kaidto si Katharina kan magin pasuhan niyang makapagpatotoo sa lambang katrabaho niya. May saro siyang katrabaho na pirang beses siyang pigparainsulto, pero dai siya nagpadara sa takot. Naghanga sa marahayon niyang paggawi an saro pa niyang katrabaho na an pangaran Hans. Huli kaiyan, nagbasa ini kan satong mga publikasyon, nag-adal nin Bibliya, asin nabawtismuhan. Nagbalyo na sa ibang lugar si Katharina kaya dai niya na man ini naaraman. Kaya isipa na sana an kaugmahan niya pakalihis nin 13 taon kan nakatukaw siya sa Kingdom Hall kaiba kan saiyang pamilya tapos iintrodusir na an saindang nagbibisitang ispiker iyo si Hans! Marahay na sana ta dai nagpundo si Katharina sa saiyang pasuhan na mapatotoohan an saiyang mga katrabaho!

14, 15. (a) Kun ginigipit, ano an dapat na isaisip kan mga hoben? (b) Paano malalabanan kan mga hoben an panggigipit kan mga kaedad ninda?

¹⁴ Dinagka ka sa nakaaging mga parapo na magdesisyon na ipokus an saimong buhay sa pagmawot na maglingkod ki Jehova. Nangangahulugan ini na isesentro mo an saimong buhay sa pag-abot sa espirituwal na mga pasuhan. An ibang mga kaedad mo tibaad isinesentro an saindang buhay sa pagpasiram-siram, asin posibleng agdahon ka ninda na iyan man an gibuhon. Maabot an panahon, kakaipuhanon mong ipahiling na talagang determinado kang magpokus sa desisyon na pinili mo. Dai ka magpadara sa panggigipit kan mga kaedad mo. Tutal, arog kan ilustrasyon mapadapit sa bus, siguradong dai ka masakay sa bus na dai mo aram kun pasain huli sana ta garo ugmahon na marhay an mga nakasakay diyan.

¹⁵ May nagkapirang paagi tanganing malabanan an panggigipit nin kairiba. Halimbawa, likayan an  mga sitwasyon na diyan tibaad masugutan ka. (Tal. 22:3) Isipon man an makulog na mga konsekwensiya kun aarugon mo an maraot na paggawi kan iba. (Gal. 6:7) Asin akuon na kaipuhan mo nin paggiya. Makakatabang an kapakumbabaan tanganing magin andam kang magdangog sa mga suhestiyon kan saimong mga magurang asin maygurang sa espirituwal na mga tugang sa kongregasyon.—Basahon an 1 Pedro 5:5, 6.

16. Iistorya an sarong eksperyensiya na nagpapahiling kan mga pakinabang nin kapakumbabaan.

¹⁶ Napahiro nin kapakumbabaan si Christoph na magdangog sa marahay na sadol. Dai nahaloy pagkabawtismo saiya, nagpuon siyang regular na mag-training sa sarong fitness center. Inagda siya kan ibang hoben sa fitness center na magbali sa sports club ninda. Ipinakipag-ulay niya ini sa sarong elder, asin sinabi kaini ki Christoph na pag-isipan an mga peligro bago siya magdesisyon, arog kan peligrong magin mahilig na man siya sa pakikumpetensiya. Pero nagbali man giraray sa sports club si Christoph. Alagad pag-abot nin panahon, nahiling niyang madahas asin peligroso pa ngani an kinakawat nindang isport. Kaya nakipag-ulay giraray siya sa nagkapirang elder, asin gabos sinda nagtao nin maka-Kasuratan na sadol. “Nagtao sako si Jehova nin marahay na mga parakonseho, asin nagdangog ako sa Saiya, dawa medyo nahaloy akong gibuhon iyan.” Magpapakumbaba ka daw asin aakuon an madunong na sadol?

17, 18. (a) Ano an gusto ni Jehova para sa mga hoben ngunyan? (b) Anong makamumundong sitwasyon an puwedeng mangyari sa mga adulto, asin paano ini malilikayan? Magtao nin halimbawa.

¹⁷ ‘Mag-ugma ka, [hoben na lalaki o babayi], sa saimong pagkahoben, asin magkamit lugod an saimong puso nin kaugmahan sa mga aldaw kan saimong pagkahoben.’ (Par. 11:9) Iyo, gusto ni Jehova na mag-ugma ka bilang hoben. Tinukar sa artikulong ini an sarong paagi tanganing magin posible iyan. Magdanay na nakapokus sa teokratikong mga pasuhan, na iiniiba si Jehova sa gabos mong plano. Kun mas amay mong gigibuhon iyan, mas amay mo man na mamamatian an paggiya, proteksiyon, asin bendisyon ni Jehova. Isipa an gabos na madunong na sadol na mahihiling mo sa Tataramon nin Diyos, asin isapuso an mga tataramon na: “Girumduma, ngunyan, an saimong Kahuruhalangkawing Kaglalang sa mga aldaw kan saimong pagkahoben.”—Par. 12:1, NW.

¹⁸ Dai ka magdadanay na hoben. Marikas na nagigin adulto an mga hoben. Makamumundo ta dakul na adulto an nagbabasol huling salang mga pasuhan an pig-abot ninda kan sinda hoben pa, o kaya dai sinda nagkaigwa nin ano man na pasuhan. Pero an mga hoben ngunyan na padagos na nagpopokus sa teokratikong mga pasuhan magigin kontentong marhay sa mga desisyon na ginibo ninda sagkod na magin adulto na sinda. Nagin totoo ini ki Mirjana, na matibayon sa isport kan tin-edyer siya. Inalukan siyang magbali sa Winter Olympic Games, pero pinili niyang lumaog sa bilog na panahon na pagmiministeryo. Pakalihis nin labing 30 taon, nasa bilog na panahon na paglilingkod pa man giraray si Mirjana kaiba kan saiyang agom. Sinabi niya: “An pagigin sikat, an onra, an awtoridad, asin an kayamanan temporaryo sana saka maluyang klase iyan na mga pasuhan sa buhay. An talagang kaumaw-umaw asin nagdadanay na mga pasuhan iyo an maglingkod sa Diyos asin maghinguwang makakontribwir sa ano man na paagi tanganing matabangan sa espirituwal an mga tawo.”

19. Itao an mga pakinabang kun an mga hoben magdadanay na nakapokus sa espirituwal na mga pasuhan.

¹⁹ Maninigong tawan nin sinserong komendasyon an mga hoben sa kongregasyon huli sa kadunungan na ipinapahiling ninda tanganing maatubang an mga kadipisilan na ini asin huli sa pagigin determinadong ipokus an saindang buhay sa paglilingkod ki Jehova. Ginigibo ini kan mga hoben paagi sa pag-abot nin espirituwal na mga pasuhan asin paagi sa pagpriyoridad sa gibuhon na paghuhulit. Dugang pa, determinado sindang dai madisturbo kan kinaban na ini. Makakasigurado an mga hoben na dai masasayang an saindang pagmamaigot. Namumutan asin tatabangan sinda kan mga tugang, asin kun gigibuhon ninda an pinakamakakaya ninda para ki Jehova, magigin mapanggana an mga plano ninda sa buhay.