KAN nakaaging taon, ribo-ribong lalaki sa mga Saksi ni Jehova sa bilog na kinaban an ninombrahan bilang elder asin ministeryal na lingkod. Kun saro ka sa namumutan na mga brother na iyan, siguradong nauugma ka sa bago mong pribilehiyo sa paglilingkod.

Natural sana na tibaad makamati ka man nin dikit na paghadit. Si Jason, na sarong hoben pang elder, nag-istorya: “Kan kanonombra pa sana sako, medyo namati kong dai ko makakaya an bago kong mga paninimbagan.” Kan tawan sinda ni Jehova nin bagong mga asignasyon, namatian ni Moises asin ni Jeremias na dai ninda iyan kaya. (Ex. 4:10; Jer. 1:6) Kun arog man kaiyan an namamatian mo, paano mo iyan mapapangganahan asin padagos na umuswag? Pag-isipan an halimbawa kan Kristiyanong disipulo na si Timoteo.—Gibo 16:1-3.

Posibleng ma-20 o labi pa sanang 20 anyos si Timoteo kan imbitaran siya ni Pablo na magin kaiba-iba niya sa pagbiyahe. Sa primero, palibhasa hoben pa, posibleng mayo pang gayong kumpiyansa sa sadiri si Timoteo asin tibaad nag-alangan na gibuhon an bagong asignasyon niya. (1 Tim. 4:11, 12; 2 Tim. 1:1, 2, 7) Pero pakalihis nin sarong dekada, masasabi na ni Pablo sa kongregasyon sa Filipos: “Kun bubuuton kan Kagurangnan na Jesus, gusto kong padiyanon sa saindo si Timoteo sa madaling panahon . . . Mayo na kaya akong iba digdi na may kapareho niyang sabuot.”—Fil. 2:19, 20.

Taano ta kahanga-hangang magurang sa kongregasyon si Timoteo? Pag-isipan an anom na bagay na manunudan mo sa halimbawa niya.

1. Tunay siyang nagmakulog sa mga tawo. Sinabi ni Pablo sa mga tugang sa Filipos: “Tunay na magmamakulog sa saindo [si Timoteo].” (Fil. 2:20) Iyo, may pagmakulog si Timoteo sa mga tawo. Talagang interesado siya sa saindang espirituwal na kapakanan asin andam siyang magsakripisyo para sa ikakarahay ninda.

Likayan na magin arog nin sarong drayber nin bus na mas importante sa saiya na makaabot sa oras sa lambang bus stop kisa sa magpasakay nin mga pasahero. Si William, sarong iginagalang na elder sa laog nin labi nang 20 taon, nagsadol sa bagong manombrahan na mga lalaki: “Mamutan nindo an mga tugang. Mas magpokus sa mga pangangaipo ninda imbes na sa pag-organisar asin pagmanehar kan mga bagay-bagay sa kongregasyon.”

2. Ininot niya an espirituwal na mga bagay. Kan pinagkukumparar ni Pablo an mga ginigibo kan iba asin an halimbawa ni Timoteo, sinabi niya: “Gabos sinda sadiring kapakanan an pig-iinot, bako an para ki Jesu-Cristo.” (Fil. 2:21) Nasa Roma si Pablo kan isinusurat niya ini. Naobserbaran niya na an mga tugang duman sibot-sibot sa personal na mga aktibidad. Dai sinda gayong naghihinguwa sa espirituwal na mga aktibidad. Pero bako nanggad arog kaiyan si Timoteo! Kan magkaigwa nin mga oportunidad na palakupon an maugmang bareta, an sabuot niya arog kan ki Isaias, na nagsabi: ‘Uya ako! Sugua ako!’—Isa. 6:8.

Paano mo mababalanse an personal asin espirituwal na mga paninimbagan mo? Inot, gumibo nin mga priyoridad. Sinabi ni Pablo: “Lugod [na] masiyerto nindo kun ano an mas importanteng mga bagay.” (Fil. 1:10) Gibuhon na priyoridad an mga priyoridad nin Diyos. Ikaduwa, magpasimple. Halion an mga bagay na nakakaubos nin panahon asin kusog. Sinadol ni Pablo si Timoteo: “Rayuan mo an mga kamawutan na dara nin pagigin hoben, alagad  magmaigot ka na mahiling sa saimo an pagigin matanos, an pagtubod, an pagkamuot, an pagigin matuninong.”—2 Tim. 2:22.

3. Maigot siyang marhay sa sagradong paglilingkod. Ipinagirumdom ni Pablo sa mga tugang sa Filipos: “Aram nindo kun paano [napatunayan ni Timoteo] an saiyang sadiri, na siring sa sarong aking kaiba kan saiyang ama nagpauripon siyang kaiba ko sa pagpalakop kan maugmang bareta.” (Fil. 2:22) Bakong hugakon si Timoteo. Maigot siyang naglingkod kaiba ni Pablo, kaya nagin mas ugos sinda sa lambang saro.

Kadakul kan gibuhon sa organisasyon nin Diyos ngunyan. An gibuhon na iyan talagang nakakaugma asin puwede iyan na mas magpadayupot sa saimo sa mga tugang. Kaya gibuhon mong obheto na pirming “dakul an ginigibo sa gibuhon kan Kagurangnan.”—1 Cor. 15:58.

4. Inaplikar niya an mga nanudan niya. Nagsurat si Pablo ki Timoteo: “Maingat mong sinundan an sakuyang pagtutukdo, an sakuyang paagi nin pamumuhay, an sakuyang katuyuhan sa buhay, an sakuyang pagtubod, an sakuyang pagkamapasensiya, an sakuyang pagkamuot, an sakuyang pakatagal.” (2 Tim. 3:10) Inaplikar ni Timoteo an mga nanudan niya, kaya nagin kuwalipikado siya sa mas dakulang paninimbagan.—1 Cor. 4:17.

Igwa ka daw nin amigong mas maedad asin mas eksperyensiyado na puwede mong magin arugan sa espirituwal? Kun mayo pa, marahay kun maghanap ka. Nagigirumduman ni Tom na dakul na taon nang elder: “Sarong eksperyensiyadong elder an nag-alalay sa sako asin nagtao sako nin marahayon na pagsasanay. Pirmi akong naghahagad nin sadol sa saiya asin inaaplikar ko iyan. Nakatabang na marhay iyan na mapakusog an kumpiyansa ko sa sadiri.”

5. Padagos niyang sinanay an saiyang sadiri. Sinadol ni Pablo si Timoteo: “Sanayon mo an saimong sadiri na an obheto mo iyo na magkaigwa ka nin debosyon sa Diyos.” (1 Tim. 4:7) Dawa may coach an sarong atleta, kaipuhan pa man giraray niyang sanayon an sadiri niya. Sinabi ni Pablo ki Timoteo: “Padagos kang magpokus sa ginigibo mong pagbasa sa atubangan nin mga tawo, sa pagsadol, asin sa pagtutukdo, . . . Hurop-hurupon mo an mga bagay na ini; itao mo diyan an saimong lubos na atensiyon, tanganing an saimong pag-uswag malinaw na mahiling kan gabos na tawo.”—1 Tim. 4:13-15.

Kaipuhan mo man na padagos na pauswagon an mga abilidad mo. Padagos na dagdagan an kaaraman mo sa katotoohan asin sumabay sa pinakabagong mga paggiyang itinatao sa kongregasyon. Likayan man an sobrang tiwala sa sadiri—na tibaad iniisip na huling eksperyensiyado ka nang marhay, makakaya mo na an ano man na sitwasyon dawa dai ka na mag-research na marhay dapit diyan. Imbes, arugon si Timoteo. “Danay mong tawan nin atensiyon an saimong sadiri asin an saimong itinutukdo.”—1 Tim. 4:16.

6. Nanarig siya sa espiritu ni Jehova. Mapadapit sa ministeryo ni Timoteo, ipinagirumdom sa saiya ni Pablo: “Ingatan mo an marahayon na bagay na ini na ipinagkatiwala sa saimo paagi sa banal na espiritu na yaon sa satuya.” (2 Tim. 1:14) Tanganing maingatan ni Timoteo an saiyang ministeryo, kaipuhan niyang magsarig sa espiritu nin Diyos.

Naobserbaran ni Donald na haloy nang elder: “Dapat na pahalagahan na marhay kan nombradong mga lalaki an relasyon ninda sa Diyos. An mga naggigibo kaiyan ‘urog na magigin makusog.’ Kun hahagadon ninda sa pamibi an espiritu nin Diyos asin papatalubuon an bunga kaiyan, magigi sindang tunay na bendisyon para sa saindang mga tugang.”—Sal. 84:7, An Marahay na Bareta Biblia; 1 Ped. 4:11.

Nakakapakusog talaga na mahiling an dakulon na bagong nombrahan na brother, arog mo, na ginagamit ni Jehova. Si Jason, na sinambit sa kapinunan, nagsabi: “Puon kan magin elder ako, kadakul kong nanudan asin nagkusog an kumpiyansa ko sa sadiri. Ngunyan, talagang ikinakaugma ko na an asignasyon ko asin ibinibilang ko iyan na sarong pambihirang pribilehiyo!”

Padagos mo daw hihinguwahon na umuswag sa paglilingkod ki Jehova? Arugon mo si Timoteo, asin magigin bendisyon ka man sa banwaan nin Diyos.