1. Taano ta dinagka ni apostol Pablo an inot na mga Kristiyanong Hebreo na pakusugon an lambang saro “lalo na” kan panahon na idto?

TAANO ta dapat kitang mas maghinguwa na magin nakakapakusog? Itinao ni apostol Pablo an dahilan sa saiyang surat sa mga Kristiyanong Hebreo: “Padagos tang isip-isipon an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo, na dai pinapabayaan an satuyang pagtiripon, siring kan nakaugalian na nin nagkapira, kundi padagos na pinapakusog an lambang saro, lalo na ta nahihiling nindo na an aldaw harani na.” (Heb. 10:24, 25) Dai na malimang taon, mahihiling kan mga Kristiyanong Judio na nakaistar sa Jerusalem na padangadang na an “aldaw ni Jehova” asin maaaraman ninda base sa tanda na itinao sa sainda ni Jesus na kaipuhan na nindang magdulag sa siyudad na iyan tanganing makaligtas. (Gibo 2:19, 20; Luc. 21:20-22) Nag-abot an aldaw na iyan ni Jehova kan 70 C.E. kan isagibo kan mga Romano an paghukom ni Jehova sa Jerusalem.

2. Taano ta dapat na lalo kitang magin interesado na pakusugon an lambang saro lalo na ngunyan?

² Kadakul kita ngunyan nin makusog na dahilan na maniwala na harani na an ‘dakula asin makangingirhat’ na aldaw ni Jehova. (Joel 2:11) Sinabi  ni propeta Sofonias: ‘Harani na an dakulang aldaw [ni Jehova]! Harani na iyan asin makaskas na nagdadangadang!’ (Sof. 1:14, An Banal na Biblia) Aplikado man sa satong panahon an makahulang patanid na iyan. Huling harani na an aldaw ni Jehova, sinabi sa sato ni Pablo na “padagos kitang magpahiling nin interes sa kada saro sa katuyuhan na mapahiro an lambang saro na magpahiling nin pagkamuot asin marahay na mga gibo.” (Heb. 10:24, nota) Kaya dapat na lalo kitang magin interesado sa satong mga tugang tanganing mapakusog ta sinda pag kaipuhan ninda iyan.

3. Ano an sinabi ni apostol Pablo mapadapit sa pagpakusog sa iba? (Hilingon an ritrato sa kapinunan kan artikulo.)

³ ‘An kahaditan minapagabat sa puso nin tawo, alagad minapaugma [kaiyan] an marahay na tataramon.’ (Tal. 12:25, BPV *) Totoo ini sa sato gabos. Kita gabos nangangaipo nin pampakusog sa pana-panahon. Ipinahiling ni Pablo na nangangaipo man nin pampakusog nin buot maski an mga may paninimbagan na magpakusog sa iba. Nagsurat siya sa mga Kristiyanong nakaistar sa Roma: “Minamawot ko nanggad na mahiling kamo, tanganing makapagtao ako sa saindo nin mga bagay na espirituwal para maparigon kamo; o sa ibang pagtaram, tanganing mapakusog nindo ako paagi kan saindong pagtubod asin mapakusog ko man kamo paagi kan sakuyang pagtubod.” (Roma 1:11, 12) Iyo, maski si Pablo, na nagtao nin pambihirang pampakusog sa iba, nangaipo man mismo kun minsan nin pampakusog.—Basahon an Roma 15:30-32.

4, 5. Sairisay ngunyan an puwede tang pakusugon, asin taano?

⁴ Dapat na komendaran an mga tugang niyatong ginagamit an buhay sa mapagsakripisyong paglilingkod ki Jehova. Kaiba sa sainda an maimbod na mga payunir. Dakul sa sainda an naggibo nin dakulang mga pagsasakripisyo tanganing makapagpayunir. Arog man kaiyan an mga misyonero, mga Bethelite, mga paraataman nin sirkito asin an saindang agom, asin an mga nagtatrabaho sa mga remote translation office. Gabos sinda may isinasakripisyo sa saindang buhay tanganing makapagtao nin mas dakul na panahon sa sagradong paglilingkod. Kaya, dapat ta sindang tawan nin pampakusog nin buot. May mga tugang man kita na gustong-gusto pa kutang makapaglingkod nin bilog na panahon alagad kinaipuhan na magpundo huli sa manlain-lain na dahilan. Inaapresyar man ninda an satong pampakusog nin buot.

⁵ Maninigo man na pakusugon an mga tugang na nagdadanay na daing agom huling gusto nindang sunudon an sadol na mag-agom sana nin ‘sarong parasunod kan Kagurangnan.’ (1 Cor. 7:39) Siring man, naaapresyar kan mahigos na mga agom na babayi pag may sinasabi sa sainda na nakakapakusog na mga tataramon an saindang agom. (Tal. 31:28, 31) Nangangaipo man nin pampakusog an mga Kristiyanong nagdadanay na maimbod sa ibong nin persekusyon o hilang. (2 Tes. 1:3-5) Rinaranga ni Jehova asin ni Cristo an gabos na maimbod na lingkod na ini.—Basahon an 2 Tesalonica 2:16, 17.

6. Ano an papel kan mga elder sigun sa Isaias 32:1, 2?

⁶ Basahon an Isaias 32:1, 2. Paagi kan saiyang linahidan na mga tugang asin matinabang na ‘mga prinsipe’ na kabilang sa ibang karnero, nagtatao si Jesu-Cristo nin pampakusog nin buot asin paggiya sa mga nagmumundong marhay asin pinangluluyahan nin buot sa masakit na panahon na ini. Ginigibo iyan kan mga elder huling bako sindang “mga paradikta” sa pagtubod kan iba kundi “mga kapwa . . . trabahador” na an mawot iyo na magin maugma an saindang mga tugang.—2 Cor. 1:24.

7, 8. Apuwera sa pagtao nin nakakapakusog na mga tataramon, ano pa an puwedeng gibuhon kan mga elder para pakusugon an iba?

⁷ Nagtao si apostol Pablo nin arugan para sa sato. Nagsurat siya sa pinersegir na mga Kristiyano sa Tesalonica: “Dahil sa hararom niyamong pagkamuot sa saindo, andam kaming itao sa saindo, bako sana  an maugmang bareta nin Diyos kundi pati mismo an samuyang mga sadiri, huli ta napamahal na nanggad kamo sa samo.”—1 Tes. 2:8.

⁸ Ipinahiling ni Pablo na bako sanang pagsabi nin nakakapakusog na mga tataramon an kaipuhan. Sinabi niya sa kamagurangan sa Efeso: “Dapat nindong tabangan an mga maluya asin dapat nindong tandaan an mga tataramon kan Kagurangnan na Jesus, kan siya mismo magsabi: ‘Igwang urog na kaugmahan sa pagtao kisa sa pag-ako.’” (Gibo 20:35) Andam si Pablo bako sana tanganing pakusugon an saiyang mga tugang kundi “itao [man] an gabos asin magsakripisyo nin lubos para sa” sainda. (2 Cor. 12:15) Kaagid kaiyan, bako sanang pampakusog asin karangahan paagi sa tataramon an dapat na itao kan mga elder sa mga tugang kundi dapat man nindang pakusugon sinda paagi sa pagpahiling nin sinserong personal na interes.—1 Cor. 14:3.

9. Paano an mga elder makakatao nin konseho sa nakakapakusog na paagi?

⁹ Puwedeng kalabot sa pagpakusog sa lambang saro an pagtao nin konseho. Pero sa giraray, dapat na sunudon kan mga elder an halimbawa na itinao kan Bibliya mapadapit sa kun paano matao nin konseho sa nakakapakusog na paagi. An sarong marahayon na halimbawa kaini iyo mismo si Jesus pagkatapos kan saiyang kagadanan asin pagkabuhay liwat. May itinao siyang mapuwersang konseho sa nagkapirang kongregasyon sa Asia Minor, pero risahon kun paano niya ini ginibo. Bago siya nagtao nin konseho, tinawan niya nguna nin mamumuton na komendasyon an mga kongregasyon sa Efeso, Pergamo, asin Tiatira. (Kap. 2:1-5, 12, 13, 18, 19) Sinabi niya sa kongregasyon sa Laodicea: “An gabos na namumutan ko sinasaway ko asin dinidisiplina. Kaya magi kang maigot asin magsulsol ka.” (Kap. 3:19) Marahay para sa mga elder na arugon an halimbawa ni Cristo pag kaipuhan nindang magtao nin konseho.

10. Paano kita gabos puwedeng makikabtang sa pagpakusog sa lambang saro?

¹⁰ Bako sanang mga elder an may responsabilidad na magpakusog nin buot. Dinagka ni Pablo an gabos na Kristiyano na magtaram nin “nakakapakusog sigun sa hinahagad kan kamugtakan, tanganing makinabang” an iba. (Efe. 4:29) An kada saro sa sato dapat na magin mapagrisa sa pangangaipo kan iba. Sinadol ni Pablo an Hebreong mga Kristiyano:  “Pakusuga an mga kamot na nakalaylay saka an mga tuhod na nangluluya, asin padagos na gumibo nin tanos na mga dalan para sa saindong mga bitis, na sa siring an parte na maluya dai na maggrabe an kamugtakan, kundi maumayan.” (Heb. 12:12, 13) Gabos kita, kaiba an mga aki asin hoben, puwedeng pakusugon an lambang saro paagi sa nakakapakusog na mga tataramon.

11. Paano nag-ako nin tabang si Marthe kan panahon na igwa siya nin depresyon?

¹¹ Si Marthe, * sarong sister na nagkaigwa kaidto nin depresyon, nagsurat: “Sarong aldaw namimibi ako para sa kusog, dangan may nakipag-istoryahan sakong mas maedad na sister na ipinamati sakong padaba niya ako asin nagpahiling nin pagmalasakit sako, na kaipuhan ko talaga kan panahon na idto. Inistorya niya man sako na naeksperyensiyahan niya man an pagbalong inaagihan ko, kaya namati kong dai ako nagsosolo.” Posibleng dai aram kan mas maedad na sister na magkakaigwa palan nin marahay na epekto ki Marthe an mga sinabi niya.

12, 13. Sa anong marahay na mga paagi ta maiaaplikar an sadol na nasa Filipos 2:1-4?

¹² Itinao ni Pablo an sadol na ini sa gabos na miyembro kan kongregasyon sa Filipos: “Kun siring, mantang pinapakusog nindo an lambang saro bilang mga kasaro ni Cristo, mantang rinaranga nindo an lambang saro nin huli sa pagkamuot, mantang nagmamakulog kamo sa lambang saro, mantang yaon an pagpadaba asin pagmalasakit sa tahaw nindo, gibuhon nindong lubos an sakuyang kaugmahan paagi sa pagkaigwa nin magkakaparehong kaisipan asin nin pagkamuot sa lambang saro, na may lubos na pagkauruyon asin may saro sanang pag-iisip. Likayan nindo an paggibo nin ano man na bagay dahil sa hilig na makipagdaugan o dahil sa pagigin mapagpaimportante sa sadiri, kundi may kapakumbabaan nindong ibilang an iba na mas urog kisa saindo, mantang tinatawan nindo nin atensiyon bako sana an sadiri nindong kapakanan, kundi an kapakanan man kan iba.”—Fil. 2:1-4.

¹³ Iyo, gabos kita dapat na maghinguwang magtao nin atensiyon sa kapakanan kan satong mga tugang, na ‘rinaranga sinda huli sa pagkamuot,’ ‘pinagmamakulgan,’ saka ‘pinapadaba asin pinagmamalasakitan’ tanganing pakusugon sinda.

14. Ano an puwedeng magin gikanan nin pampakusog nin buot?

¹⁴ Nakakapakusog talaga pag nababaretaan tang maimbod na naglilingkod an mga tinabangan ta kaidto. Arog kaiyan an namati ni apostol Juan: “Mayo na akong ibang mas urog pang dahilan para mag-ugma kisa kaini: an madangog ko na an sakuyang mga aki danay na naglalakaw sa katotoohan.” (3 Juan 4) Dakul na payunir an makakapagpatunay kun gurano sinda napakusog kan maaraman nindang nagkapira sa mga natabangan nindang mag-ako kan katotoohan, dakul na taon na an nakaagi, an nagdadanay na maimbod asin tibaad naglilingkod pa ngani bilang mga payunir. Dawa an simpleng pagpagirumdom sa sarong payunir na pinangluluyahan nin buot mapadapit sa maugmang mga eksperyensiya niya kaidto puwedeng magin tunay na gikanan nin karangahan.

15. Ano an sarong paagi na mapapakusog ta an mga maimbod na naglilingkod?

¹⁵ Dakul na paraataman nin sirkito an nagsabi na sinda asin an saindang agom napakusog na marhay kan may magtao sa sainda nin halipot na mensahe nin pasasalamat sa pagbisita ninda sa sarong kongregasyon. Iyan man an puwedeng mamatian kan mga elder, mga misyonero, mga payunir, asin mga miyembro kan pamilyang Bethel kun tatawan sinda nin mensahe nin pasasalamat huli kan saindang maimbod na paglilingkod.

16. Ano an kaipuhan tanganing magin nakakapakusog kita sa iba?

¹⁶ Sala an kaisipan na dai kita magigin nakakapakusog huling bako man talaga kitang paragirong. Dawa sa simpleng paagi, puwede kitang magin nakakapakusog sa iba—tibaad sa simpleng pagtino sa saro paagi sa mainamigong ngirit. Kun dai siya magngirit, posibleng may inaagihan siyang problema,  asin puwedeng makaranga sa saiya dawa an simpleng pagdangog mo sa saiya.—Sant. 1:19.

17. Paano natabangan an sarong hoben na brother sa panahon nin kasakitan?

¹⁷ Namundong marhay si Henri na sarong hoben na brother, kan may mga kapamilya siyang nagbaya sa katotoohan kaiba na an saiyang ama, na sarong iginagalang na elder. Pinakusog si Henri nin sarong paraataman nin sirkito. Iiniba siya kaini sa sarong café para magkape asin duman pinabayaan kaining iluwas ni Henri an gabos na nasa puso niya. Dangan, narealisar ni Henri na an solamenteng paagi tanganing matabangan an saiyang pamilya na bumalik sa katotoohan iyo na padagos siyang magin maimbod. Naranga siyang marhay sa pagbasa kan Salmo 46; Sofonias 3:17; asin Marcos 10:29, 30.

18. (a) Ano an naobserbaran ni Hading Solomon? (b) Anong suhestiyon an itinao ni apostol Pablo?

¹⁸ Ipinapahiling kan halimbawa ni Marthe asin Henri na puwede kitang magin nakakapakusog sa sarong tugang na nangangaipo nin karangahan. Si Hading Solomon nagsurat: ‘Nakakaugma an tataramon [na sinambit] sa tamang [panahon]. An nakahuyom na lalawgon minapaugma nin puso; an marahay na bareta minapakusog nin buot.’ (Tal. 15:23, 30, BPV) Apuwera kaiyan, puwede man na mapakusog an saro na pinangluluyahan nin buot paagi sa pagbasa kan An Torrengbantayan o paagi sa satong website. Ipinahiling ni Pablo na an iribang pagkanta nin kanta na pang-Kahadian puwedeng magin gikanan nin pampakusog nin buot. Siya nagsurat: “Padagos na tukduan asin pakusugon an lambang saro paagi sa mga salmo, mga pag-umaw sa Diyos, mga kantang pang-espirituwal na inawit na may pag-apresyar, asin sa saindong mga puso padagos kamong umawit ki Jehova.”—Col. 3:16; Gibo 16:25.

19. Taano ta mas lalo na niyatong kaipuhan na pakusugon an lambang saro sa maarabot na panahon, asin ano an dapat niyatong gibuhon?

¹⁹ An pagpakusog sa lambang saro lalo ta nang kakaipuhanon mantang nahihiling niyatong an aldaw ni Jehova “harani na.” (Heb. 10:25) Arog kan sinabi ni Pablo sa mga kapwa niya Kristiyano kaidto, “padagos na rangahon asin pakusugon an lambang saro, na sa katunayan iyo na an piggigibo nindo.”—1 Tes. 5:11.