1-2. Taano ta napurisaw na marhay si Jesus?

KAN mga huring aldaw ni Jesus bilang tawo, napurisaw siyang marhay. Madali na siyang mag-agi nin maringis na kagadanan sa kamot nin maraot na mga tawo. Alagad bako lang an padangadang niyang kagadanan an nakakapurisaw ki Jesus. Namumutan niyang marhay an saiyang Ama asin gusto niya na mapaugma siya. Aram ni Jesus na kun magdadanay siyang maimbod sa papaabot na masakit na pagbalo, makakakontribwir siya sa pagbindikar kan pangaran ni Jehova. Namumutan man ni Jesus an mga tawo, asin aram niya na an satong paglaom na buhay na daing katapusan sa maabot nakadepende kun magdadanay siyang maimbod ki Jehova sagkod sa kagadanan.

² Dawa napupurisaw na marhay si Jesus, igwa siya nin katuninungan. “Itinatao ko sa saindo an sakuyang katuninungan,” an sabi niya sa saiyang mga apostol. (Juan 14:27) Igwa siya kan “katuninungan nin Diyos,” an pagkakalmado na resulta kan pagkaigwa nin mahalagang marhay na relasyon ki Jehova. An katuninungan na iyan an nakatabang ki Jesus na dai maghadit.—Fil. 4:6, 7.

3. Ano an sisiyasaton niyato sa artikulong ini?

³ Mayo nin siisay man sa sato an mapapaatubang sa mga kadipisilan na inagihan ni Jesus, alagad gabos na mga nagsusunod ki Jesus mapapaatubang sa mga pagbalo. (Mat. 16:24, 25; Juan 15:20) Arog ni Jesus, makakamati man kita nin pagkapurisaw kun minsan. Paano ta malilikayan na madaog kita nin kahaditan asin mahali an katuninungan kan satong isip? Siyasaton niyato an tulong bagay na ginibo ni Jesus durante kan saiyang ministeryo sa daga asin aramon niyato kun paano ta siya maaarog pag napapaatubang kita sa mga pagbalo.

4. Mantang isinasaisip an 1 Tesalonica 5:17, magtao nin mga halimbawa na nagpapahiling na parating namimibi si Jesus kan huring aldaw kan buhay niya sa daga.

⁴ Basahon an 1 Tesalonica 5:17. Parating namimibi si Jesus kan huring aldaw kan buhay niya digdi sa daga. Kan punan niya an paggirumdom sa saiyang kagadanan, namibi siya para sa tinapay asin arak. (1 Cor. 11:23-25) Bago maghali sa lugar kun sain ninda ginibo an Paskuwa, namibi siya kaiba an mga disipulo. (Juan 17:1-26) Pag-abot niya asin kan mga disipulo sa Bukid nin mga Olibo kan bangging idto, pauruutro siyang namibi. (Mat. 26:36-39, 42, 44) Asin an huring mga tataramon ni Jesus bago siya magadan sinabi niya paagi sa pamibi. (Luc. 23:46) Ipinamibi ni Jesus ki Jehova an dapit sa gabos na importanteng pangyayari sa mahalagang marhay na aldaw na idto.

5. Taano ta nagluya an buot kan mga apostol?

⁵ An sarong dahilan kaya natagalan ni Jesus an pagbalo sa saiya iyo na nanarig siya sa saiyang Ama paagi sa pagpamibi. Sa ibong na lado, an mga apostol dai nagdanay na matiyaga sa pagpamibi kan bangging idto. Bilang resulta, nagluya an saindang buot kan mag-abot na an oras kan pagbalo. (Mat. 26:40, 41, 43, 45, 56) Pag napapaatubang kita sa mga pagbalo, magdadanay sana kitang maimbod kun susundon ta an halimbawa ni Jesus asin ‘padagos na mamimibi.’ Ano an puwede tang ipamibi?

6. Paano an pagtubod makakatabang sa sato na magdanay na may katuninungan?

⁶ Puwede kitang mamibi ki Jehova na ‘dagdagan an satong pagtubod.’ (Luc. 17:5; Juan 14:1) Kaipuhan niyato an pagtubod huling babaluon ni Satanas an gabos na nagsusunod ki Jesus. (Luc. 22:31) Paano an pagtubod makakatabang sa sato na magdanay na may katuninungan dawa pag sunod-sunod an mga problema niyato? Kun nagibo ta na an gabos na rasonableng magigibo niyato tanganing atubangon an sarong pagbalo,  papahiruon kita kan pagtubod na ipabaya iyan ki Jehova. Huling nagtitiwala kita na mas aram nanggad ni Jehova an gigibuhon sa mga bagay-bagay, makakamati kita nin katuninungan sa satong isip asin puso.—1 Ped. 5:6, 7.

7. Ano an nanudan mo sa mga sinabi ni Robert?

⁷ Nakakatabang sa sato an pagpamibi na mapagdanay an satong panglaog na katuninungan ano man na pagbalo an inaatubang niyato. Pag-isipan an eksperyensiya ni Robert na sarong maimbod na elder asin labi nang 80 anyos ngunyan. Sinabi niya: “Nakatabang sa sako an sadol na nasa Filipos 4:6, 7 na makayanan an dakul na pagbalo sa buhay ko. Nagkaigwa ako nin mga problema sa pinansiyal. Asin temporaryong nawara sa sako an pribilehiyo ko bilang elder.” Ano an nakatabang ki Robert na mapagdanay an saiyang panglaog na katuninungan? “Pag nahahadit na ako, namimibi tulos ako,” an sabi niya. “Naniniwala ako na mantang mas parati asin udok akong namimibi, urog man akong nakakamati nin katuninungan.”

8. Arog kan sinambit sa Juan 8:29, ano an saro pang dahilan kaya igwa nin panglaog na katuninungan si Jesus?

⁸ Basahon an Juan 8:29. Dawa kan pinepersegir, may panglaog na katuninungan si Jesus huling aram niya na napapaugma niya an saiyang Ama. Nagdanay siyang makinuyog kan dipisil sa saiya na gibuhon iyan. Namumutan niya an saiyang Ama asin ipinokus niya an saiyang buhay sa paglilingkod ki Jehova. Bago siya magdigdi sa daga, siya an “ekspertong trabahador” nin Diyos. (Tal. 8:30, NW) Asin kan siya nasa daga, maigot niyang tinukduan an iba mapadapit sa saiyang Ama. (Mat. 6:9; Juan 5:17) An gibuhon na iyan nagtao ki Jesus nin dakulang kaugmahan.—Juan 4:34-36.

9. Paano an pagigin sibot sa gibuhon na paghuhulit nakakatabang sa sato na mapagdanay an satong panglaog na katuninungan?

 ⁹ Maaarog niyato si Jesus paagi sa pagkuyog ki Jehova asin paagi sa “pirming dakul an ginigibo sa gibuhon kan Kagurangnan.” (1 Cor. 15:58) Pag ‘idinudusay niyato an satong bilog na panahon’ sa gibuhon na paghuhulit, nagigin mas positibo an pagmansay ta sa satong mga problema. (Gibo 18:5) Halimbawa, an mga nakakaulay ta sa ministeryo sa parati may mga problemang mas grabe pa kisa kan sa sato. Alagad, kan mamutan na ninda si Jehova asin inaaplikar na an saiyang mga sadol, napaparahay an buhay ninda asin nagigin mas maugma. Kada nakakahiling kita nin arog kaiyan, lalong nagkukusog an satong pagtitiwala na dai kita papabayaan ni Jehova. Asin an pagigin kumbinsido niyato diyan nakakatabang na mapagdanay an satong panglaog na katuninungan. Napatunayan ini nin sarong sister na pirming nakakamati nin depresyon asin grabeng kawaran nin halaga. “Pag sibot ako sa ministeryo,” an sabi niya, “mas nakokontrol ko an sakong emosyon saka mas maugma ako. Sa hiling ko dahil iyan ta namamatian kong haranihon ako ki Jehova lalo na pag naglilingkod ako sa langtad.”

10. Ano an nanudan mo sa mga sinabi ni Brenda?

¹⁰ Pag-isipan man an halimbawa nin sarong sister na si Brenda. Pareho sindang may multiple sclerosis kan saiyang aking babayi. Naka-wheel chair na sana si Brenda asin madaling mapagal. Naghaharong-harong siya pag kaya niya, pero nagpapatotoo siya panginot na paagi sa surat. Sinabi niya: “Kan inako ko nang dai na ako mauumayan sa sistemang ini, nakapagpokus na ako nin lubos sa sakong ministeryo. Sa katunayan pag nagpapatotoo ako, nairarayo kaiyan an atensiyon ko sa mga kahaditan ko. Kaya an atensiyon ko nasa pagtabang na sa mga nakakaulay ko sa teritoryo kan samong kongregasyon. Saka pirmi kaiyan na naipapagirumdom sa sako an paglaom ko sa maabot na panahon.”

11-13. (a) Paano pinatunayan kan mga apostol asin kan iba pa na tunay sindang mga amigo ni Jesus? (b) Ano an nagin epekto ki Jesus kan mga amigo niya?

¹¹ Dipisil an ministeryo ni Jesus, pero sa bilog na panahon na iyan, pinatunayan kan maimbod na mga apostol na tunay sindang mga amigo ni Jesus. Sinda an buhay na halimbawa kan talinhaga na an sabi: “Igwa nin amigo na nagdadanay na mas dayupot pa kisa tugang.” (Tal. 18:24, NW) Mahalagang marhay ki Jesus an siring na mga amigo. Sa panahon kan saiyang ministeryo, mayo sa mga tugang niya sa laman an nagtubod sa saiya. (Juan 7:3-5) May pangyayari pa ngani na sinabi kan mga paryente niya na nararaot na an isip niya. (Mar. 3:21) Sa kabaliktaran, ini an sinabi ni Jesus mapadapit sa saiyang maimbod na mga apostol kan banggi bago an saiyang kagadanan: “Kamo an mga nagdanay na kaiba ko sa mga kadipisilan na inagihan ko.”—Luc. 22:28.

¹² Nakakagibo kun minsan an mga apostol nin mga bagay na dai nakakapaugma ki Jesus, pero dai siya nagpokus sa mga sala ninda kundi sa pagtubod ninda sa saiya. (Mat. 26:40; Mar. 10:13, 14; Juan 6:66-69) Kan huring banggi kaiba sinda bago siya gadanon, sinabi ni Jesus sa maimbod na mga lalaking ini: “Inapod ko na kamong mga amigo, huli ta ihinayag ko sa saindo an gabos na bagay na nadangog ko sa sakuyang Ama.” (Juan 15:15) Mayong duda na an mga amigo ni Jesus nagin dakulang gikanan nin pampakusog nin buot sa saiya. Nakamati si Jesus nin labi-labing kaugmahan huli sa tabang na itinao ninda sa saiya sa ministeryo niya.—Luc. 10:17, 21.

¹³ Apuwera sa mga apostol, igwa si Jesus nin iba pang nagin mga amigo—mga lalaki asin babayi na nagtabang sa saiya sa gibuhon na paghuhulit asin sa iba pang praktikal na mga paagi. An iba inimbitaran siya sa saindang harong para magkakan. (Luc. 10:38-42; Juan 12:1, 2) An iba  nagbiyahe kaiba niya asin ginamit an saindang mga pagsadiri para tabangan siya. (Luc. 8:3) Nagkaigwa si Jesus nin marahay na mga amigo huling marahay man siyang amigo sa sainda. Naggibo siya nin marahay na mga bagay sa sainda asin rasonable siya sa mga inaasahan niya sa sainda. Perpekto si Jesus, pero pinahalagahan niya an tabang na itinao sa saiya kan saiyang bakong perpektong mga amigo. Asin siguradong nakatabang sinda sa saiya na mapagdanay an saiyang panglaog na katuninungan.

14-15. Paano kita magkakaigwa nin marahay na mga amigo, asin paano ninda kita matatabangan?

¹⁴ Matatabangan kita kan marahay na mga amigo na magdanay na maimbod ki Jehova. Asin an pinakamarahay na paagi tanganing magkaigwa nin marahay na mga amigo iyo na kita magin marahay na amigo man. (Mat. 7:12) Halimbawa, dinadagka kita kan Bibliya na gamiton ta an satong panahon asin kusog tanganing tabangan an iba, lalo na an mga “nangangaipo.” (Efe. 4:28) May naiisip ka daw sa kongregasyon nindo na puwede mong tabangan? Puwede daw na ika an magsaod para sa sarong parahayag na dai na kayang maghali sa harong? Puwede mo daw na tawan nin kakanon an sarong pamilya na kapos sa pinansiyal? Kun aram mo kun paano gamiton an website na jw.org^® asin an JW Library^® app, puwede mo daw na tukduan an iba sa mga kakongregasyon mo kun paano gagamiton an mga iyan? Kun nakapokus kita sa pagtabang sa iba, urog kitang magigin maugma.—Gibo 20:35.

¹⁵ Pag napapaatubang kita sa mga problema, susuportaran kita kan satong mga amigo, asin tatabangan kitang mapagdanay an satong panglaog na katuninungan. Kun paanong nagdangog si Elihu mantang sinasabi ni Job an dapit sa mga  inaagihan kaini, tatabangan man kita kan satong mga amigo paagi sa mapasensiyang pagdangog mantang iniistorya ta an satong mga ikinakahadit. (Job 32:4) Dai niyato dapat lauman na an satong mga amigo an madesisyon para sa sato, alagad sarong kadunungan kun dadangugon ta an saindang sadol na basado sa Bibliya. (Tal. 15:22) Asin kun paanong mapakumbabang inako ni Hading David an tabang kan saiyang mga amigo, magpahiling man kita nin kapakumbabaan paagi sa pag-ako kan tabang kan satong mga amigo pag kaipuhan niyato iyan. (2 Sam. 17:27-29) Iyo, an siring na mga amigo regalo hali ki Jehova.—Sant. 1:17.

16. Sigun sa Filipos 4:6, 7, ano an solamenteng paagi na magkakaigwa kita nin katuninungan? Ipaliwanag.

¹⁶ Basahon an Filipos 4:6, 7. Taano ta sinasabi sa sato ni Jehova na magkakaigwa kita kan katuninungan na itinatao niya “paagi ki Cristo Jesus”? Huling makakamtan ta sana an nagdadanay na katuninungan sa satong isip asin puso kun nasasabutan ta asin kun nagtutubod kita sa papel ni Jesus sa katuyuhan ni Jehova. Halimbawa, paagi sa atang na pantubos ni Jesus, an gabos niyatong kasalan puwedeng mapatawad. (1 Juan 2:12) Nakakaginhawa nanggad an mga tataramon na iyan! Bilang Hadi kan Kahadian nin Diyos, hahalion ni Jesus an gabos na danyos sa sato ni Satanas asin kan saiyang sistema. (Isa. 65:17; 1 Juan 3:8; Kap. 21:3, 4) Nakakapahirong paglaom nanggad iyan! Asin dawa tinawan kita ni Jesus nin dipisil na asignasyon, kaiba ta siya, sinusuportaran niya kita sa huring mga aldaw kan sistemang ini. (Mat. 28:19, 20) Nakakapakusog nanggad iyan! An kaginhawahan, paglaom, asin kusog nin buot mahalagang marhay na mga bagay na kaipuhan niyato tanganing magkaigwa nin katuninungan nin isip.

17. (a) Paano mapagdadanay nin sarong Kristiyano an panglaog na katuninungan? (b) Sigun sa panuga na nasa Juan 16:33, ano an puwede niyatong magibo?

¹⁷ Kun siring, paano mo mapagdadanay an saimong katuninungan nin isip pag napupurisaw ka huli sa grabeng mga kadipisilan? Magigibo mo iyan paagi sa pag-arog ki Jesus. Inot, mamibi asin magin matiyaga sa pagpamibi. Ikaduwa, magkuyog ki Jehova asin maigot na maghulit dawa pag dipisil iyan gibuhon. Asin ikatulo, maghagad nin tabang sa saimong mga amigo na malampasan an mga problema. Dangan an katuninungan nin Diyos magbabantay sa saimong isip asin puso. Asin arog ni Jesus, mapapangganahan mo an ano man na pagbalo.—Basahon an Juan 16:33.