1. Ano an gustong gibuhon kan gabos na lingkod nin Diyos, asin taano? (Hilingon an ritrato sa cover.)

IPINAGBUOT ni Jesu-Cristo sa saiyang mga parasunod na ‘padumán asin gumibo nin mga disipulo sa mga tawo kan gabos na nasyon.’ (Mat. 28:19) Gusto kan gabos na maimbod na lingkod nin Diyos na manudan kun paano ‘lubos na uutubon’ an ministeryong ini na ipinapagibo sa sainda. (2 Tim. 4:5) Tutal, an gibuhon na ini mas importante, mas kapaki-pakinabang, asin mas apurado kisa sa ano man na ibang gibuhon sa buhay. Alagad dawa ngani gusto tang magtao nin dakul na panahon sa ministeryo, puwedeng dipisil gibuhon iyan.

2. Anong mga kadipisilan an inaatubang niyato mantang inuutob ta an satong ministeryo?

² May iba pang mahalagang mga aktibidad na nangangaipo kan satong panahon asin kusog. Tibaad kaipuhan niyatong magtrabaho nin dakul na oras kada aldaw tanganing masusteniran an mga pangangaipo niyato asin kan satong pamilya. Tibaad nadidipisilan kita huli sa iba pang mga paninimbagan sa pamilya, hilang, depresyon, o mga problema na dara nin paggurang. Paano ta lubos na mauutob an satong ministeryo mantang inaatubang an siring na dipisil na mga kamugtakan?

3. Ano an itinutukdo sa sato kan sinabi ni Jesus sa Mateo 13:23?

³ Kun nalilimitaran kan satong kamugtakan an panahon na naitatao ta sa paglilingkod ki Jehova, dai madisganar. Aram ni Jesus na an lambang saro sa sato dai makakapamunga nin pararehong bilang nin bunga kan Kahadian. (Basahon an Mateo 13:23.) Pinapahalagahan na marhay ni Jehova an gabos niyatong ginigibo para sa paglilingkod sa saiya basta ginigibo ta an satong pinakamakakaya. (Heb. 6:10-12) Sa ibong na lado, tibaad sa hiling ta itinutugot kan satong kamugtakan na urog pang makapaglingkod.  Sa artikulong ini, sisiyasaton niyato kun paano ta magigibong priyoridad sa satong buhay an ministeryo, kun paano ta mapagdadanay na simple an satong buhay, asin kun paano kita magigin mas mahusay sa paghuhulit asin pagtutukdo. Pero pag-ulayan ta nguna kun ano an buot sabihon kan lubos na pag-utob kan satong ministeryo.

4. Ano an buot sabihon kan lubos na pag-utob kan satong ministeryo?

⁴ Sa simpleng pagtaram, tanganing mautob niyato nin lubos an satong ministeryo, kaipuhan niyatong makikabtang nin lubos sagkod na posible sa gibuhon na paghuhulit asin pagtutukdo. Alagad bako lang an panahon na ginagamit ta an kalabot diyan. Mahalaga ki Jehova an satong motibo. Namumutan niyato si Jehova asin an satong kapwa, kaya bilog na kalag niyatong ginigibo an satong Kristiyanong ministeryo. * (Mar. 12:30, 31; Col. 3:23) An paglilingkod ki Jehova nin bilog na kalag nangangahulugan na ginagamit ta an satong kusog sa paglilingkod sa saiya sagkod sa pinakamakakaya ta. Kun pinapahalagahan ta an pribilehiyo na isagibo an paghuhulit, hihinguwahon niyatong ihulit an maugmang bareta sa pinakadakul na tawo sagkod na mapupuwede.

5-6. Iilustrar kun paano magigibong priyoridad nin saro an ministeryo dawa limitado an panahon niya.

⁵ Isipon an sarong hoben na lalaki na mahilig maggitara. Nagtutugtog siya nuarin man posible. Pag-abot nin panahon, nakakua siya nin trabaho bilang gitarista sa sarong kakanan pag Sabado asin Domingo. Alagad, kulang an suweldo niya sa mga gastos niya. Kaya nagtatrabaho siya bilang kahero sa sarong groseri puon Lunes sagkod Biyernes. Dawa kadaklan na panahon nasa groseri siya, an pagtugtog an pinakagusto niya. Mawot niyang magin mas mahusay sa pagtugtog asin magin bilog na panahon na musikero. Dawa arog kaiyan, ikinakaugma niya an lambang oportunidad na nakakatugtog siya dawa madali sana.

⁶ Sa kaagid na paagi, tibaad limitado sana an panahon na maitatao mo sa gibuhon na paghuhulit. Alagad, iyan an gustong-gusto mong ginigibo. Hinihinguwa mong mapauswag an kakayahan mo na mapahiro kan maugmang bareta an puso kan mga tawo. Dakul an kaipuhan mong tawan nin panahon, kaya tibaad iniisip mo kun paano mo gigibuhon na priyoridad an gibuhon na paghuhulit.

7-8. Paano niyato maaarog an sabuot ni Jesus mapadapit sa ministeryo?

⁷ Nagpahiling si Jesus nin marahayon na halimbawa sa saiyang sabuot mapadapit sa ministeryo. Ginibo niyang panginot sa saiyang buhay an pakikipag-ulay sa iba mapadapit sa Kahadian nin Diyos. (Juan 4:34, 35) Naglakaw siya nin ginatos na kilometro tanganing hulitan an pinakadakul na tawo sagkod na posible. Inaprobetsaran niya an lambang oportunidad na makaulay an mga tawo sa pampublikong mga lugar asin sa saindang harong. An bilog na buhay ni Jesus nakasentro sa ministeryo.

⁸ Maaarog niyato si Cristo paagi sa paghanap nin mga oportunidad na maipakipag-ulay an maugmang bareta sain man o ano man na oras na posible. Andam kitang isakripisyo an satong mga kagustuhan tanganing makikabtang sa gibuhon na pag-eebanghelyo. (Mar. 6:31-34; 1 Ped. 2:21) May mga tugang sa kongregasyon na nakakapaglingkod bilang espesyal, regular, o auxiliary payunir. An iba nag-aadal nin ibang lengguwahe o nagin mga need-greater. Alagad, an dakul sa gibuhon na pag-eebanghelyo ginigibo nin regular na mga parahayag kan Kahadian, na ginigibo an saindang pinakamakakaya. Ano man an satong sitwasyon, dai kita hinahagadan ni Jehova nin labi sa makakaya tang itao. Gusto niya na gabos kita magin maugma sa satong sagradong paglilingkod mantang ipinapahayag ta an “mamuraway na maugmang bareta kan maugmang Diyos.”—1 Tim. 1:11; Deut. 30:11.

9. (a) Paano ni Pablo ginibong priyoridad an paghuhulit dawa kan kinaipuhan niyang magtrabaho? (b) Ano an ipinapahiling kan Gibo 28:16, 30, 31 mapadapit sa sabuot ni Pablo sa saiyang ministeryo?

⁹ Nagpahiling si apostol Pablo nin marahay na halimbawa sa pagtao nin priyoridad sa ministeryo. Kan nasa Corinto siya mantang nasa ikaduwang pagbiyahe bilang misyonero, kinulang an panggastos niya kaya kinaipuhan niyang magtrabaho paagi sa paggibo nin mga tolda. Pero, dai nagin panginot ki Pablo an paggibo niya nin tolda. Nagtrabaho siya para suportaran an saiyang sadiri sa ministeryo tanganing maipahayag niya nin “daing bayad” sa mga taga Corinto an maugmang bareta. (2 Cor. 11:7) Dawa ngani kinaipuhan ni Pablo na magtrabaho, padagos niyang ginibong priyoridad an ministeryo, asin naghulit kada Sabbath. Kan magrahay na an saiyang sitwasyon, mas nakapagpokus na si Pablo sa paghuhulit. “Idinusay ni Pablo an bilog niyang panahon sa paghuhulit kan mensahe, na pinapatunayan sa mga Judio na si Jesus iyo an Cristo.” (Gibo 18:3-5; 2 Cor. 11:9) Pag-abot nin panahon, kan nakapreso siya sa harong sa Roma sa laog nin duwang taon, nagpatotoo si Pablo sa mga bisita asin naggibo nin mga surat. (Basahon an Gibo 28:16, 30, 31.) Determinado si Pablo na dai tugutan an ano man na makaulang sa saiyang ministeryo. Isinurat niya: “Huling igwa kami kan sagradong gibuhon na ini . . . , dai kami minasuko.” (2 Cor. 4:1) Arog ni Pablo, dawa kun may sekular na trabaho kita, puwede pa man giraray niyatong gibuhon na pinakaimportanteng aktibidad sa satong buhay an gibuhon na pang-Kahadian.

10-11. Paano niyato lubos na mauutob an satong ministeryo dawa may kamatian kita?

¹⁰ Kun limitado na an nagigibo ta sa pagharong-harong huling nagkakaedad na kita o may hilang, puwede niyatong purbaran an iba pang paagi nin pagmiministeryo. An mga ebanghelisador kan inot na siglo naghulit sain man sindang lugar. Inaprobetsaran ninda an lambang oportunidad na ipakipag-ulay an dapit sa katotoohan—sa harong-harong, sa publiko, asin sa impormal—sain man may “maabutan” na tawo. (Gibo 17:17; 20:20) Kun dai niyato kayang magparalakaw, tibaad puwede kitang magtukaw sa sarong pampublikong lugar na diyan makakapaghulit kita sa mga nag-aaragi. O tibaad puwede kitang magpatotoo nin impormal, paagi sa surat, o sa telepono. Dakul na parahayag na limitadong  marhay an kamugtakan an nakakamati nin dakulang kaugmahan asin pagkakontento sa ibang mga paaging ini nin paghuhulit.

¹¹ Dawa may mga kamatian, puwede mong lubos na mautob an saimong ministeryo. Pag-isipan giraray an halimbawa ni apostol Pablo. Sinabi niya: “Kaya kong atubangon an gabos na bagay paagi sa saiya na nagtatao sa sako nin kusog.” (Fil. 4:13) Kinaipuhan ni Pablo an kusog na iyan kan magkahilang siya sa saro sa mga pagbiyahe niya bilang misyonero. Ipinaliwanag niya sa mga taga Galacia: “Dahil sa pigmamati ko sa hawak kaya inot akong nagkaoportunidad na ipahayag an maugmang bareta sa saindo.” (Gal. 4:13) Kaagid kaiyan, an saimong hilang puwedeng makapagtao sa saimo nin oportunidad na ihulit an maugmang bareta sa iba, arog kan mga doktor, nars, asin iba pa na nag-aasikaso saimo. Dakul sa sainda an nasa trabaho sa panahon na naghaharong-harong kita.

12. Ano an buot sabihon kan pagdanayon na “nakapokus” an saimong mata?

¹² Sinabi ni Jesus: “An lampara kan hawak iyo an mata. Kaya, kun an saimong mata nakapokus [o “simple,” nota sa ibaba], magigin maliwanag an bilog mong hawak.” (Mat. 6:22) Ano an buot niyang sabihon? Sinasabi niya na kaipuhan niyatong pagdanayon na simple an satong buhay o nakapokus sa saro sanang pasuhan, o katuyuhan, asin dai magpadisturbo. Ipinahiling mismo ni Jesus an halimbawa paagi sa pagpokus kan saiyang buhay sa ministeryo, asin itinukdo niya sa saiyang mga disipulo na magdanay na nakapokus sa paglilingkod ki Jehova asin sa Saiyang Kahadian. Inaarog niyato si Jesus paagi sa pamumuhay na nakasentro sa Kristiyanong ministeryo, na ‘hinahanap nguna an Kahadian saka an katanusan nin Diyos.’—Mat. 6:33.

13. Ano an makakatabang sa sato na makapagpokus sa satong Kristiyanong ministeryo?

 ¹³ An sarong paagi para makapagpokus sa ministeryo iyo an pagpapasimple kan satong buhay tanganing mas dakul kitang panahon sa pagtabang sa iba na mamidbid asin mamutan si Jehova. * Halimbawa, puwede ta daw na i-adjust an satong iskedyul sa trabaho tanganing mas dakul kitang panahon sa ministeryo sa laog kan semana? Puwede ta daw na bawasan an nagkapirang paglilibang na tibaad nakakaubos na marhay nin panahon?

14. Anong mga pagbabago an ginibo nin sarong mag-agom tanganing makatao nin urog na panahon asin atensiyon sa ministeryo?

¹⁴ Ini an ginibo nin sarong elder na si Elias asin kan saiyang agom. Sinabi niya: “Dai pa kami makakapagpayunir kan panahon na idto, pero kaipuhan na may gibuhon na kami. Kaya naggibo kami nin saradit na lakdang para urog na makikabtang sa ministeryo. Halimbawa, binawasan mi an samong mga gastos, hinali an mga paglilibang na ngunyan narealisar ming sobra man palan, asin pinakiulayan mi an samong mga boss na tawan kami nin iskedyul na mas makakatao samo nin panahon sa ministeryo. Bilang resulta, nakapartisipar kami sa pagpapatotoo sa banggi, nakapagkondukta nin mas dakul na pag-adal sa Bibliya, asin nakakaiba pa ngani kami sa pagluwas sa langtad sa tahaw kan semana duwang beses kada bulan. Nakakaugma talaga!”

15-16. Kauyon kan 1 Timoteo 4:13, 15, paano niyato padagos na mapapauswag an satong mga kakayahan bilang mga parahulit? (Hilingon man an kahon na “ Mga Pasuhan na Makakatabang Sako na Lubos na Mautob an Sakong Ministeryo.”)

¹⁵ An saro pang paagi tanganing mas lubos tang mautob an satong ministeryo iyo an pagpauswag  kan satong mga kakayahan sa paghuhulit. May mga tawo na kahagadan sa saindang propesyon na mag-ako sinda nin regular na pagsasanay asin pagtutukdo tanganing mapauswag ninda an saindang kaaraman asin mga kakayahan. Totoo man ini kun dapit sa mga parahulit kan Kahadian. Kaipuhan niyatong padagos na magsanay kun paano magigin mas mahusay sa satong ministeryo.—Tal. 1:5; basahon an 1 Timoteo 4:13, 15.

¹⁶ Alagad, paano kita padagos na mag-uuswag sa satong ministeryo? Paagi sa pagdangog na marhay sa mga pagtutukdo na itinatao sa sato sa semanal na Pagtiripon na Pamumuhay Asin Ministeryo. Nagtatao an pagtiripon na ini nin mahalagang marhay na pagsasanay tanganing tabangan kita na padagos na mapauswag an satong mga kakayahan sa paglilingkod sa langtad. Halimbawa, pag nagtatao nin sadol an tsirman sa mga estudyanteng nagpresentar kan saindang mga asignasyon, may mapupurot kitang mga suhestiyon na makakatabang sa sato na mapauswag an satong ministeryo. Puwede tang iaplikar an mga suhestiyon na iyan sa sunod na ipakipag-ulay ta sa iba an maugmang bareta. Puwede tang sabihon sa satong paraataman nin grupo sa paglilingkod sa langtad na tabangan kita sa ministeryo o na partneran niya kita o kan iba pang eksperyensiyadong parahayag, payunir, o paraataman nin sirkito. Mantang nagigin mas mahusay kita sa paggamit kan lambang kasangkapan sa Toolbox sa Pagtutukdo, mas ikakaugma man niyato an satong paghuhulit asin pagtutukdo.

17. Ano an maeeksperyensiyahan mo pag lubos mong inuutob an saimong ministeryo?

¹⁷ Pribilehiyo nanggad para sa sato na tinugutan kita ni Jehova na magin “kapwa trabahador” niya! (1 Cor. 3:9) Kun ‘sinisiyerto mo kun ano an mas importanteng mga bagay’ asin nagpopokus sa Kristiyanong ministeryo, ‘makakapaglingkod ka ki Jehova na may kaugmahan.’ (Fil. 1:10; Sal. 100:2) Bilang saro sa mga ministro nin Diyos, makakasigurado ka na tatawan ka niya kan kusog na kaipuhan mo tanganing mautob an saimong ministeryo ano man na mga kadipisilan o limitasyon an mapaatubang sa saimo. (2 Cor. 4:1, 7; 6:4) Sadit man o dakula an nagigibo mo sa ministeryo na itinutugot kan saimong kamugtakan, puwede kang ‘magkaigwa nin dahilan para mag-ugma’ kun bilog na kalag mong ginigibo an saimong ministeryo. (Gal. 6:4) Pag lubos mong inuutob an saimong ministeryo, ipinapahiling mong namumutan mo si Jehova asin an saimong kapwa. “Sa paggibo mo kaini maililigtas mo an saimong sadiri pati na idtong mga nagdadangog sa saimo.”—1 Tim. 4:16.