1-2. Ano an buot sabihon ni Jesus sa mga tataramon niya na nasa Juan 4:35, 36?

NAGBABAKLAY si Jesus sa mga kaumahan, na posibleng marhay na kaumahan nin sebada na nagtatambo pa sana. (Juan 4:3-6) Mga apat na bulan pa bago iyan puwedeng anihon. Kaya siguradong makangangalas kan sabihon ni Jesus: “Hilingon nindo asin pagmasdan an kaumahan, hirinog na an tipasi asin puwede nang anihon.” (Basahon an Juan 4:35, 36.) Ano an buot niyang sabihon?

² Minalataw na an pinapanungdan digdi ni Jesus sarong piguratibong pag-ani nin mga tawo. Pag-isipan kun ano pa sana an nangyari. Dawa ngani sa parati linilikayan kan mga Judio an mga Samaritano, hinulitan ni Jesus an sarong Samaritana—asin nagdangog ini! Sa katunayan, mantang sinasabi ni Jesus an manungod sa kaumahan na “hirinog na an tipasi asin puwede nang anihon,” sarong grupo nin mga Samaritano na inistoryahan kan Samaritana mapadapit ki Jesus an pasiring man sa saiya para urog pang makanuod. (Juan 4:9, 39-42) Manungod sa pagkasaysay na ini, sinabi nin sarong komentaryo sa Bibliya: “An pagigin interesadong marhay kan mga tawo . . . nagpaparisa na sinda siring sa mga tipasi na puwede nang anihon.”

3. Ano an magigin mga pakinabang sa saimong paghuhulit kun arog kan ki Jesus an pagmansay mo sa mga tawo?

³ Kumusta man an pagmansay mo sa mga tawong hinuhulitan mo kan maugmang bareta? Minamansay mo daw sinda bilang hirinog nang tipasi na puwede nang anihon? Kun iyo, magkakaigwa iyan nin tulong epekto. Inot, mahulit ka nin may urog na pagkaapurado. An panahon nin pag-ani limitado sana; dai dapat magsayang nin panahon. Ikaduwa, magigin maugma ka mantang nahihiling mong naghihimati an mga tawo sa maugmang bareta. Sinasabi  kan Bibliya: ‘Nauugma an mga tawo kun sinda nag-aani.’ (Isa. 9:3, An Marahay na Bareta Biblia) Asin ikatulo, mamansayon mo an lambang tawo bilang potensiyal na disipulo, kaya ibabagay mo an saimong pamamaagi sigun sa mga pinagkakainteresan niya.

4. Ano an mga manunudan ta ki apostol Pablo sa artikulong ini?

⁴ Dai inisip ni Jesus na imposibleng magin disipulo an mga Samaritano, na iyo an tibaad inisip kan nagkapirang parasunod niya. Imbes, minansay niya sinda bilang potensiyal na mga disipulo. Kaipuhan man niyatong mansayon an mga tawo sa satong teritoryo bilang potensiyal na mga disipulo ni Cristo. Marahayon na halimbawa kaiyan si apostol Pablo. Ano an manunudan ta sa saiya? Sa artikulong ini, pag-uulayan ta kun paano ni Pablo (1) inaram an mga paniniwala kan mga hinulitan niya, (2) inaram an saindang mga pinagkakainteresan, asin (3) minansay sinda bilang potensiyal na mga disipulo ni Jesus.

5. Taano ta nasasabutan ni Pablo an mga nagdadangog sa saiya sa sinagoga?

⁵ Parating naghuhulit si Pablo sa Judiong mga sinagoga. Halimbawa, “sa tulong magkasurunod na sabbath nakipagrasunan siya sa [mga Judio] basado sa Kasuratan” kan siya nasa sinagoga sa Tesalonica. (Gibo 17:1, 2) Posibleng marhay na pamugtak si Pablo sa sinagoga. Pinadakula siyang Judio. (Gibo 26:4, 5) Nasasabutan ni Pablo an mga Judio, kaya nakapaghulit siya sa sainda nin may kumpiyansa.—Fil. 3:4, 5.

6. Ano an pagkakalain kan mga tawo sa saudan sa Atenas asin kan mga tawo na hinulitan ni Pablo sa sinagoga?

⁶ Pagkatapos na mapiritan si Pablo na maghali sa Tesalonica dangan sa Berea huli sa mga parapersegir, nag-abot siya sa Atenas. Sa giraray, “nagpuon siyang makipagrasunan duman sa sinagoga sa mga Judio asin sa iba pang mga tawong nagsasamba sa Diyos.” (Gibo 17:17) Pero mantang naghuhulit si Pablo sa saudan, iba na man ngunyan an mga nagdadangog sa saiya. Kaiba sa mga nagdadangog sa saiya an mga pilosopo asin iba pang mga Hentil na minamansay an mensahe ni Pablo bilang sarong “bagong katukduan.” Sinabi ninda sa saiya: “Nagtataram ka . . . nin mga bagay na ngunyan mi pa sana nadangog.”—Gibo 17:18-20.

7. Uyon sa Gibo 17:22, 23, paano ibinagay ni Pablo an saiyang presentasyon?

⁷ Basahon an Gibo 17:22, 23. An paaging ginamit ni Pablo para ipresentar an saiyang mensahe sa mga Hentil sa Atenas iba man sa ginamit niya sa mga Judio sa sinagoga. Posibleng marhay na ihinapot niya sa saiyang sadiri, ‘Ano daw kaya an paniniwala kan mga taga Atenas?’ Maingat niyang pinagmasdan an palibot asin rinisa niya an relihiyosong mga kaugalian kan mga  tawo. Dangan, naghanap si Pablo nin puntong mapagkakauyunan ninda—mga bagay na diyan an saindang porma nin pagsamba bako man kontra sa katotoohan na nasa Kasuratan. Sinabi nin sarong komentarista sa Bibliya: “Bilang sarong Judiong Kristiyano, narealisar niyang an paganong mga Griego dai nagsasamba sa ‘tunay’ na Diyos kan mga Judio asin Kristiyano, pero hininguwa niyang ipahiling na an Diyos na ibinabalangibog niya bako man talagang bago sa mga taga Atenas.” Kaya andam si Pablo na ibagay an saiyang presentasyon. Sinabi niya sa mga taga Atenas na an saiyang mensahe hali sa “Diyos na Dai Midbid,” na kaidto pa ninda gustong sambahon. Dawa ngani an mga Hentil bakong pamilyar sa Kasuratan, dai inisip ni Pablo na dai na nanggad sinda magigin Kristiyano. Imbes, minansay niya sinda bilang hirinog nang tipasi na puwede nang anihon, asin ibinagay niya an presentasyon niya kan maugmang bareta.

8. (a) Paano mo maaaraman an relihiyosong mga paniniwala kan mga tawo sa saindong teritoryo? (b) Kun may magsabing may relihiyon na siya, ano an puwede mong isimbag?

⁸ Arog ni Pablo, magin mapag-obserbar. Maghanap nin mga bagay na makakatabang saimo na maaraman kun ano an mga paniniwala kan mga tawo sa saindong teritoryo. Ano an mga dekorasyon niya sa saiyang harong o lunadan? Maririsa daw sa saiyang pangaran, pagbado, pag-ayos, o maski ngani sa saiyang bokabularyo kun ano an relihiyon niya? Tibaad direkta niyang sabihon saimo na may relihiyon na siya. Kan mangyari iyan sa espesyal payunir na si Flutura, ini an isinimbag niya: “Nagdigdi po ako, bako para ipirit saindo an mga paniniwala ko, kundi para ipakipag-ulay po saindo an manungod sa . . . ”

9. Anong puntong mapagkakauyunan an puwede mong gamiton para sa sarong relihiyosong tawo?

⁹ Anong mga tema an puwede mong ipakipag-ulay sa sarong relihiyosong tawo? Mag-isip nin puntong mapagkakauyunan nindo. Tibaad sarong Diyos sana an sinasamba niya, tibaad minamansay niya si Jesus bilang an Paraligtas kan katawuhan, o tibaad naniniwala siya na nabubuhay kita sa maraot na panahon na madali nang matapos. Base sa mga paniniwalang pinagkakauyunan nindo, ipresentar an mensahe kan Bibliya sa paaging magugustuhan niya.

10. Ano an dapat niyatong hinguwahon na gibuhon, asin taano?

¹⁰ Tandaan na posibleng dai man naniniwala an mga tawo sa gabos na itinutukdo kan saindang relihiyon. Kaya dawa ngani aram mo na an relihiyon nin saro, hinguwahon na aramon an sadiri niyang mga paniniwala. Sinabi ni David na sarong espesyal payunir sa Australia: “Dakul na tawo ngunyan an sinasalakan nin pilosopiya an saindang relihiyosong mga paniniwala.” Sinabi ni Donalta na taga Albania: “May mga nakakaulay kami na nagsasabing may relihiyon na sinda, pero sa bandang huri sinasabi ninda na dai talaga  sinda nagtutubod sa Diyos.” Narisa man nin sarong brother na misyonero sa Argentina na may mga tawong nagsasabing naniniwala sinda sa Trinidad, pero posibleng dai man talaga sinda nagtutubod na an Ama, an Aki, saka an banal na espiritu saro sanang Diyos. Sinabi niya: “Kun aram mo iyan, mas mapapasilan kang makahanap nin puntong mapagkakauyunan nindo.” Kaya hinguwahon na aramon kun ano talaga an mga paniniwala kan mga tawo. Dangan, arog ki Pablo, magigibo mong ‘makibagay sa gabos na klase nin tawo.’—1 Cor. 9:19-23.

11. Arog kan mababasa sa Gibo 14:14-17, paano ni Pablo iprinesentar an saiyang mensahe sa paaging magugustuhan kan mga taga Listra?

¹¹ Basahon an Gibo 14:14-17. Inaram ni Pablo an mga pinagkakainteresan kan mga nagdadangog sa saiya, dangan ibinagay niya diyan an saiyang presentasyon. Halimbawa, an sarong grupo nin mga tawong hinulitan niya sa Listra kadikit sana an aram o mayo nganing aram sa Kasuratan. Kaya naggamit si Pablo nin mga argumento na masasabutan ninda. Nagtaram siya manungod sa abundang ani asin sa kakayahan na ikaugma an buhay. Naggamit siya nin mga tataramon asin halimbawa na masasabutan tulos kan mga nagdadangog sa saiya.

12. Paano mo maaaraman an pinagkakainteresan nin sarong tawo asin maibabagay diyan an saimong presentasyon?

¹² Gamiton an pakasabot para maaraman an mga pinagkakainteresan kan mga tawo sa saindong teritoryo asin ibagay diyan an saimong presentasyon. Paano mo maaaraman an pinagkakainteresan nin sarong tawo mantang parani ka sa saiya o sa saiyang harong? Sa giraray, magin mapag-obserbar. Tibaad nagtatanom siya, nagbabasa nin libro, naghihirahay nin lunadan, o iba pang gibo. Kun angay, taano ta dai iyan gamiton para punan an pakikipag-ulay sa saiya? (Juan 4:7) Dawa an pagbado nin saro puwedeng magtao saimo nin ideya manungod sa saiya—tibaad iparisa kaiyan an saiyang nasyonalidad, trabaho, o paboritong sports team. Sinabi ni Gustavo: “Nakapuon ako nin pakikipag-ulay sa sarong 19 anyos na lalaki na sa T-shirt niya may ritrato nin sarong sikat na parakanta. Hinapot ko siya manungod diyan, tapos inistorya niya sako kun  taano ta nagustuhan niya an parakantang iyan. Paagi sa pag-uulay na iyan, napunan ko siya nin pag-adal sa Bibliya, asin ngunyan kapagtubod ta na siya.”

13. Paano mo maiaalok an pag-adal sa Bibliya sa paaging magugustuhan nin mga tawo?

¹³ Pag nag-aalok nin pag-adal sa Bibliya sa sarong tawo, gibuhon iyan sa paaging magugustuhan niya; ipahiling sa saiya kun paano makakatabang sa saiya an pag-adal. (Juan 4:13-15) Halimbawa, an sister na si Poppy pinadagos sa harong nin sarong interesadong babayi. Kan mahiling ni Poppy sa lanob an sarong sertipiko na nagpaparisang an babayi sarong propesor na nagtapos sa kursong education, idinuon niya na nagtutukdo man kita sa mga tawo paagi sa satong programa nin pag-adal sa Bibliya asin mga pagtiripon. Nag-ako nin pag-adal sa Bibliya an babayi, asin nag-atender sa pagtiripon kan suminunod na aldaw, dangan dai nahaloy nag-atender man siya sa sarong pansirkitong asembleya. Pakalihis nin sarong taon, nabawtismuhan siya. Haputon an sadiri: ‘Sa ano interesado an mga dinadalaw ko liwat? Maipapaliwanag ko daw sa sainda an manungod sa satong programa nin pag-adal sa Bibliya sa paaging magugustuhan ninda?’

14. Paano mo ibabagay sa lambang Bible study an saimong pagtutukdo?

¹⁴ Pag nakapuon ka nin pag-adal sa Bibliya, mag-andam para sa kada pag-study, na isinasaisip an kamugtakan asin mga pinagkakainteresan kan saimong tinutukduan. Mantang nag-aandam ka, pag-isipan kun anong mga teksto an babasahon, kun anong mga video an ipapahiling, asin kun anong mga ilustrasyon an gagamiton para ipaliwanag an mga katotoohan sa Bibliya. Haputon an saimong sadiri, ‘Ano an nangurugnang magugustuhan saka makakaabot sa puso kan Bible study na ini?’ (Tal. 16:23) Sa Albania, prangkang sinabi nin sarong babayi na Bible study kan payunir na si Flora: “Dai ko talaga maaako an katukduan manungod sa pagkabuhay liwat.” Dai ipinirit ni Flora sa babayi an katukduan na iyan. Sinabi ni Flora: “Naisip ko na kaipuhan nguna niyang mamidbid an Diyos na nanunuga kan pagkabuhay liwat.” Kaya sa kada pag-study, idinuon ni Flora an pagkamuot, kadunungan, asin kapangyarihan ni Jehova. Pag-abot nin panahon, nagtubod na sa pagkabuhay liwat an saiyang tinutukduan. Ngunyan, saro na siyang maigot na Saksi ni Jehova.

15. Sigun sa Gibo 17:16-18, anong mga gibo sa suanoy na Grecia an dai nagustuhan ni Pablo, pero taano ta dai niya inisip na imposible nang magin disipulo an mga taga Atenas?

¹⁵ Basahon an Gibo 17:16-18. Lakop sa siyudad nin Atenas an idolatriya, seksuwal na imoralidad, asin paganong pilosopiya, pero dai inisip ni Pablo na imposible nang magin disipulo an mga taga Atenas; dai man siya nagpadisganar sa mga pang-iinsulto ninda. Siya mismo nagin Kristiyano dawa ngani dati siyang “paralanghad asin parapersegir saka aroganteng tawo.” (1 Tim. 1:13) Kun paanong ibinilang ni Jesus na potensiyal na disipulo si Pablo, ibinilang man ni Pablo na potensiyal na disipulo an mga taga Atenas. Asin dai napasala an pagtitiwala niyang iyan.—Gibo 9:13-15; 17:34.

16-17. Ano an nagpapatunay na puwedeng magin disipulo ni Cristo an gabos na klase nin tawo? Magtao nin halimbawa.

¹⁶ Kan inot na siglo, nagin disipulo ni Jesus an gabos na klase nin tawo. Kan magsurat si Pablo sa mga Kristiyanong nakaistar sa siyudad nin Corinto sa Grecia, sinabi niya na may mga miyembro kan kongregasyon na iyan na dating mga kriminal o grabe kaimoral an pamumuhay. Dangan sinabi niya: “Arog kaiyan dati an nagkapira sa saindo. Pero hinugasan na kamo asin lininig.” (1 Cor. 6:9-11) Kun ika, iisipon mo daw na puwedeng magbago asin magin disipulo an mga tawong idto?

¹⁷ Sa panahon ta, dakul an andam na gumibo nin kinakaipuhan na mga pagbabago para magin disipulo ni Jesus. Halimbawa sa Australia,  napatunayan kan espesyal payunir na si Yukina na puwedeng maghimati sa mensahe kan Bibliya an gabos na klase nin tawo. Sarong beses, kan nasa sarong opisina siya nin real estate, may nahiling siyang hoben na babaying may mga tatu asin haluwagon an bado. Sinabi ni Yukina: “Nag-alangan ako kan primero, pero nakipag-ulay man giraray ako saiya. Naaraman kong interesado siyang marhay sa Bibliya mala ngani ta an nagkapira sa mga tatu niya mga bersikulo hali sa Salmo!” Nagpa-Bible study an babayi asin nagpuon na mag-atender sa mga pagtiripon. *

18. Taano ta dai niyato dapat husgaran an mga tawo?

¹⁸ Minansay daw ni Jesus an kaumahan bilang andam nang anihon huling inaasahan niya na masunod sa saiya an kadaklan na tawo? Dai nanggad. Ihinula kan Kasuratan na dikit sana an matubod sa saiya. (Juan 12:37, 38) Igwa man si Jesus kan milagrosong kakayahan na makabasa nin puso. (Mat. 9:4) Pero dawa arog kaiyan, nagpokus siya sa dikit na tawong iyan na matubod sa saiya, saka maigot man siyang naghulit sa gabos. Kaya lalo na kita na mga dai nakakabasa nin puso, dapat nanggad niyatong labanan an tendensiyang husgaran an sarong teritoryo o indibidwal! Imbes, maghiling sa potensiyal kan mga tawo. Si Marc, na sarong misyonero sa Burkina Faso, nagsabi: “Sa parati, an mga tawong hinuhuna kong mag-uuswag iyo lugod an nagpupundo sa pag-study. Pero an mga tawong paghuna ko dai mapadagos iyo lugod an nag-uuswag. Kaya nanudan kong mas marahay na magpagiya kita sa espiritu ni Jehova.”

19. Ano an dapat na magin pagmansay niyato sa mga tawo sa satong teritoryo?

¹⁹ Sa primero, tibaad garo baga dikit sana sa teritoryo an arog sa hirinog nang tipasi na puwede nang anihon. Alagad tandaan an sinabi ni Jesus sa saiyang mga disipulo. Hirinog na an mga tipasi sa kaumahan, an buot sabihon, puwede na iyan anihon. Puwedeng magbago an mga tawo asin magin disipulo ni Cristo. Para ki Jehova, “mahahalagang bagay” an potensiyal na mga disipulong ini. (Hag. 2:7, NWT) Kun minamansay niyato an mga tawo arog kan pagmansay sa sainda ni Jehova asin ni Jesus, bibistuhon niyato sinda asin aaramon an mga pinagkakainteresan ninda. Dai niyato sinda ibibilang na mga estranghero, kundi potensiyal na mga tugang.