1. Paano mo nagigin dayupot na amigo an sarong tawo?

SA PARATI, tanganing magin dayupot na amigo mo an sarong tawo, kaipuhan mong makaibanan siya. Mantang nag-uulay kamo, nag-iistoryahan dapit sa mga iniisip asin eksperyensiya nindo, nagigin kamong mag-amigo. Sa paghihinguwa niyatong makipag-amigo ki Jesus, may mga kadipisilan. Ano an nagkapira sa mga iyan?

2. Ano an inot na kadipisilan tanganing magin dayupot kitang amigo ni Jesus?

² An inot na kadipisilan iyo na dai man niyato personal na nabisto si Jesus. Dakul sa mga Kristiyano kan inot na siglo an dai man personal na nabisto si Jesus. Pero sinabi ni apostol Pedro: “Dawa dai pa lamang nindo siya nahiling, namumutan nindo siya. Dawa dai nindo siya nahihiling ngunyan, nagtutubod kamo sa saiya.” (1 Ped. 1:8) Kaya posible na magin dayupot na amigo ni Jesus dawa dai siya personal na nabisto.

3. Ano an ikaduwang kadipisilan?

³ An ikaduwang kadipisilan iyo na dai niyato makakaulay si Jesus. Pag namimibi kita, ki Jehova kita nakikipag-ulay. Iyo, namimibi kita sa ngaran ni Jesus, pero dai ta siya direktang kinakaulay. Sa katunayan, habo ni Jesus na mamibi kita sa saiya. Taano? Huling an pagpamibi sarong porma nin pagsamba, asin si Jehova sana an dapat na sambahon. (Mat. 4:10) Dawa arog kaiyan, puwede niyatong ipahiling an satuyang pagkamuot ki Jesus.

4. Ano an ikatulong kadipisilan, asin ano an pag-uulayan niyato sa artikulong ini?

 ⁴ An ikatulong kadipisilan iyo na si Jesus nasa langit, kaya dai ta talaga siya personal na makakaibanan. Pero puwede ta pa man giraray na mamidbid si Jesus maski dai niyato siya personal na kaibanan. Rerepasuhon ta an apat na bagay na puwede niyatong gibuhon tanganing mapakusog an satong relasyon sa saiya bilang amigo. Pero pag-ulayan nguna niyato kun taano ta mahalagang marhay para sa sato na magkaigwa nin dayupot na relasyon ki Cristo.

5. Taano ta dapat kitang magin amigo ni Jesus? (Hilingon man an mga kahon na “ Kun Amigo Kita ni Jesus Magigin Amigo Man Kita ni Jehova” asin “ Tamang Pagmansay sa Papel ni Jesus.”)

⁵ Dapat kitang magin amigo ni Jesus kun gusto niyatong magkaigwa nin dayupot na relasyon ki Jehova. Taano man? Pag-isipan an duwa sana sa mga dahilan. Inot, sinabi ni Jesus sa saiyang mga disipulo: “An Ama mismo namumuot sa saindo, dahil namumutan nindo ako.” (Juan 16:27) Sinabi pa niya: “Mayo nin makakaduman sa Ama kun bakong paagi sa sako.” (Juan 14:6) Kun nagmamaigot kitang magin amigo ni Jehova na dai naghihinguwang magin amigo ni Jesus, garo ta man sana pinupurbaran na makalaog sa sarong establisimiyento na dai nag-aagi sa pinto. Naggamit si Jesus nin kaagid na ilustrasyon kan sabihon niya na siya “an pinto para sa mga karnero.” (Juan 10:7) An ikaduwang dahilan iyo na perpektong ipinahiling ni Jesus an mga kuwalidad kan saiyang Ama. Sinabi niya sa saiyang mga disipulo: “An siisay man na nakahiling na sa sako nakahiling na man sa Ama.” (Juan 14:9) Kaya an sarong mahalagang paagi na namimidbid niyato si Jehova iyo an pag-adal manungod sa buhay ni Jesus. Mantang mas namimidbid ta si Jesus, mas mararom an satong pagkamuot sa saiya. Asin  mantang nagigin mas dayupot kita ki Jesus, mas mararom man an pagkamuot niyato sa saiyang Ama.

6. Ano an saro pang dahilan kaya dapat kitang magin amigo ni Jesus? Ipaliwanag.

⁶ Dapat na amigo kita ni Jesus tanganing simbagon an satong mga pamibi. Nangangahulugan ini na dai sana niyato iiniiba sa mga pamibi ta an fraseng “sa ngaran ni Jesus” bilang pormalidad. Dapat niyatong masabutan kun paano ginagamit ni Jehova si Jesus sa pagsimbag sa satong mga pamibi. Sinabi ni Jesus sa saiyang mga apostol: “Ano man na hagadon nindo sa ngaran ko, gigibuhon ko ini.” (Juan 14:13) Dawa ngani si Jehova an nagdadangog asin nagsisimbag sa satong mga pamibi, tinawan niya nin awtoridad si Jesus na isagibo an Saiyang mga desisyon. (Mat. 28:18) Kaya bago simbagon nin Diyos an satong mga pamibi, hinihiling niya nguna kun inaplikar ta na an sadol na itinao ni Jesus. Halimbawa, sinabi ni Jesus: “Kun pinapatawad nindo an mga tawo sa mga kasalan ninda, papatawadon man kamo kan saindong langitnon na Ama; pero kun dai nindo pinapatawad an mga tawo sa mga kasalan ninda, dai man papatawadon kan saindong Ama an mga kasalan nindo.” (Mat. 6:14, 15) Kaya mahalagang marhay nanggad na trataron niyato an iba kapareho kan mabuot na pagtratar sa sato ni Jehova saka ni Jesus!

7. Siisay sana an makikinabang sa atang na pantubos ni Jesus?

⁷ An mga dayupot na amigo sana ni Jesus an makikinabang sa saiyang atang na pantubos. Paano niyato iyan naaraman? Sinabi ni Jesus na ‘itatao niya an saiyang buhay para sa mga amigo niya.’ (Juan 15:13) An maimbod na mga tawong nabuhay bago nagdigdi si Jesus sa daga kaipuhan na mamidbid si Jesus asin mamutan siya. Bubuhayon liwat an mga lalaki asin babaying arog ni Abraham, Sara, Moises, asin Rahab. Pero kaipuhan dawa kan matanos na mga lingkod na ini ni Jehova na magin amigo ni Jesus tanganing magkamit sinda nin buhay na daing katapusan.—Juan 17:3; Gibo 24:15; Heb. 11:8-12, 24-26, 31.

8-9. Siring kan sinabi sa Juan 15:4, 5, ano an maisasagibo ta huli sa pakikiamigo ki Jesus, asin taano ta mahalaga iyan?

⁸ Nauugma kitang makipagtabangan ki Jesus sa paghuhulit asin pagtutukdo kan maugmang bareta kan Kahadian. Kan nasa daga si Jesus, saro siyang paratukdo. Asin puon kan magbalik si Jesus sa langit, padagos niyang ginigiyahan an gibuhon na paghuhulit asin pagtutukdo bilang payo kan kongregasyon. Nahihiling niya asin pinapahalagahan an saimong mga paghihinguwa na tabangan an pinakadakul na tawong posible tanganing mamidbid ninda siya asin an saiyang Ama. An totoo, maisasagibo niyato an gibuhon na ini paagi sana sa tabang ni Jehova saka ni Jesus.—Basahon an Juan 15:4, 5.

⁹ Malinaw na itinutukdo kan Tataramon nin Diyos na dapat na namumutan niyato si Jesus asin na papagdanayon niyato iyan tanganing mapaugma ta si Jehova. Kaya pag-ulayan ta an apat na bagay na puwede niyatong gibuhon tanganing magin amigo kita ni Jesus.

10. Ano an inot na lakdang tanganing magin amigo kita ni Jesus?

¹⁰ (1) Midbidon si Jesus. Magigibo ta ini paagi sa pagbasa kan mga libro sa Bibliya na Mateo, Marcos, Lucas, asin Juan. Mantang hinuhurop-hurop niyato an mga pagkasaysay sa Bibliya manungod sa buhay ni Jesus, mamumutan asin igagalang ta si Jesus huli sa mabuot niyang pagtratar sa mga tawo. Halimbawa, dawa ngani Kagurangnan siya kan saiyang mga disipulo, dai niya sinda trinatar bilang mga uripon. Imbes, sinabi niya sa sainda an saiyang mga iniisip asin namamatian. (Juan 15:15) Namatian ni Jesus an saindang kulog asin naghibi kaiba ninda.  (Juan 11:32-36) Sinabi maski kan mga nagkokontra ki Jesus na nagin amigo niya an mga naghimati sa saiyang mensahe. (Mat. 11:19) Pag inaarog niyato kun paano trinatar ni Jesus an saiyang mga disipulo, magigin mas marahay an relasyon ta sa iba, magigin mas kontento saka maugma kita, asin mas mararom an satong pagkamuot asin paggalang ki Cristo.

11. Ano an ikaduwang lakdang para magin amigo ni Jesus, asin taano ta mahalaga an lakdang na iyan?

¹¹ (2) Arugon an kaisipan asin paggawi ni Jesus. Mantang mas aram asin inaarog niyato an kaisipan niya, nagigin mas dayupot kita sa saiya. (1 Cor. 2:16) Paano ta maaarog si Jesus? Mangnuhon an sarong halimbawa. Mas nagpokus si Jesus sa pagtabang sa iba kisa sa pagpaugma sa saiyang sadiri. (Mat. 20:28; Roma 15:1-3) Huling arog kaiyan an saiyang kaisipan, mapagsakripisyo siya saka mapagpatawad. Dai siya tulos naaanggot huli sa mga sinasabi kan iba manungod saiya. (Juan 1:46, 47) Asin dawa pa nakagibo kaidto nin sala an sarong tawo, dai niya inisip na dai na mabago an tawong iyan. (1 Tim. 1:12-14) Sinabi ni Jesus: “Maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:35) Marahay na ihapot sa sadiri, “Sinusunod ko daw an halimbawa ni Jesus paagi sa pagmamaigot na mapagdanay an matuninong na relasyon sa mga tugang?”

12. Ano an ikatulong lakdang tanganing magin amigo ni Jesus, asin paano ta iyan magigibo?

¹² (3) Suportaran an mga tugang ni Cristo. Para ki Jesus, an mga ginigibo niyato para sa saiyang linahidan na mga tugang garo man sana saiya ta ginigibo. (Mat. 25:34-40) An panginot na paagi na sinusuportaran niyato an mga linahidan iyo an lubos na pakikikabtang sa paghuhulit kan Kahadian asin sa paggibo nin disipulo na ipinagbuot ni Jesus na gibuhon kan saiyang mga parasunod. (Mat. 28:19, 20; Gibo 10:42) Paagi sana sa tabang kan “ibang mga karnero” maisasagibo kan mga tugang ni Cristo an dakulang pambilog na kinaban na kampanya nin paghuhulit na isinasagibo ngunyan. (Juan 10:16) Kun kabilang ka sa ibang mga karnero, sa kada pakikikabtang mo sa gibuhon na paghuhulit, ipinapahiling mo an saimong pagkamuot bako lang sa mga linahidan kundi ki Cristo man.

13. Paano niyato maiaaplikar an sadol ni Jesus na nasa Lucas 16:9?

¹³ Nakikipag-amigo man kita ki Jehova asin ki Jesus paagi sa paggamit kan satong materyal na pagsadiri tanganing suportaran an gibuhon na dinidirehiran ninda. (Basahon an Lucas 16:9.) Halimbawa, puwede kitang magdonar sa pambilog na kinaban na gibuhon—na ginagamit sa paghuhulit kan maugmang bareta sa hararayong teritoryo, pagtugdok saka pagmentenar kan mga pasilidad na ginagamit sa tunay na pagsamba, asin pag-ayuda sa mga naapektaran nin kalamidad. Puwede man kitang magtao nin pinansiyal na suporta sa sato mismong kongregasyon asin magtabang sa mga tugang na aram tang nangangaipo. (Tal. 19:17) Ini an mga paagi na makakasuportar kita sa mga tugang ni Cristo.

14. Siring sa mababasa sa Efeso 4:15, 16, ano an ikaapat na lakdang tanganing magin amigo ni Jesus?

¹⁴ (4) Suportaran an mga areglo kan Kristiyanong kongregasyon. Nagkukusog an satong relasyon ki Jesus bilang payo kan kongregasyon pag nakikipagtabangan kita sa mga ninombrahan na mangataman sa sato. (Basahon an Efeso 4:15, 16.) Halimbawa, hinihinguwa niyatong lubos na magamit an gabos na Kingdom Hall. Kaya may mga kongregasyon na pinagsaro asin pig-adjust an boundary kan mga teritoryo. Huli sa areglong ini, dakula an natipid sa mga donasyon sa organisasyon. Pero kasabay kaiyan, may mga parahayag na kaipuhan na mag-adjust sa bagong mga kamugtakan. An maimbod na mga tugang na iyan tibaad haloy nang nakaasosyar  sa sarong kongregasyon asin naparani na sa mga tugang duman. Pero ngunyan hinahagad sainda na maglingkod sa ibang kongregasyon. Siguradong nauugmang marhay si Jesus na mahiling na nakikipagtabangan sa areglong ini an maimbod na mga disipulong iyan!

15. Paano kita urog na magigin dayupot ki Jesus pag-abot nin panahon?

¹⁵ An mga linahidan kan banal na espiritu igwa kan paglaom na makaibanan ni Jesus sagkod lamang asin maglingkod bilang kapwa tagapagmana kan Kahadian nin Diyos. Aktuwal nindang makakaiba si Jesus—mahihiling siya, makakaulay, asin makakaibanan. (Juan 14:2, 3) An mga may daganon na paglaom mag-aako man nin pagkamuot asin atensiyon ni Jesus. Dawa dai ninda mahihiling si Jesus, urog nanggad sindang magigin dayupot sa saiya mantang maugma nindang naeeksperyensiyahan an buhay na itinao sa sainda ni Jehova asin ni Jesus.—Isa. 9:6, 7.

16. Anong mga bendisyon an makakamtan niyato sa pagigin amigo ni Jesus?

¹⁶ Pag inako niyato an imbitasyon ni Jesus na magin amigo niya, dakul na bendisyon an makakamtan ta. Halimbawa, namamatian niyato ngunyan an saiyang pagkamuot asin suporta. Igwa man kita kan oportunidad na mabuhay nin daing sagkod. Asin an pinakamahalaga, an pagigin amigo ni Jesus nagtatao sa sato kan pinakamarahay na kayamanan sa gabos—an dayupot na personal na relasyon sa Ama ni Jesus, si Jehova. Sarong pribilehiyo nanggad sa sato na apudon na amigo ni Jesus!