1. Ano an kaipuhan niyato gabos na gibuhon?

GUGUSTUHON mo daw na magdalagan sa sarong paurumbasan na aram mong dipisil, lalo na kun may hilang ka o kaya pagal? Posibleng marhay na dai. Pero sinabi ni apostol Pablo na an gabos na tunay na Kristiyano nasa sarong paurumbasan. (Heb. 12:1) Asin gabos kita, hoben man o may edad na, mabagsik man o pagal, kaipuhan na magtagal sagkod sa katapusan kun gusto niyatong kamtan an premyo na inaalok sa sato ni Jehova.—Mat. 24:13.

2. Siring kan sinambit sa 2 Timoteo 4:7, 8, taano ta may katalingkasan sa pagtaram si Pablo?

² Manungod sa bagay na ini, may katalingkasan sa pagtaram si Pablo huling mapanggana niyang ‘natapos an saiyang pagdalagan.’ (Basahon an 2 Timoteo 4:7, 8.) Pero, sa ano man nanggad nanunungod an paurumbasan na sinambit ni Pablo?

3. Ano an paurumbasan na sinambit ni Pablo?

³ Ginagamit kun minsan ni Pablo an mga aktibidad sa mga kawat sa suanoy na Grecia tanganing magtukdo nin mahalagang mga leksiyon. (1 Cor. 9:25-27; 2 Tim. 2:5) Sa nagkapirang pagkakataon, ginamit niya an pagdalagan sa sarong daralaganan o paurumbasan tanganing iilustrar an buhay nin sarong Kristiyano. (1 Cor. 9:24; Gal. 2:2; Fil. 2:16) Nag-iintra sa “paurumbasan” na ini an sarong tawo pag idinusay na niya an saiyang sadiri ki Jehova asin nagpabawtismo. (1 Ped. 3:21) Makakaabot siya sa finish line pag itinao na saiya ni Jehova an premyong buhay na daing katapusan.—Mat. 25:31-34, 46; 2 Tim. 4:8.

4. Ano an pag-uulayan niyato sa artikulong ini?

⁴ Ano an mga pagkakaagid kan pagdalagan sa halawig na paurumbasan asin kan pamumuhay bilang Kristiyano? Igwa nin  nagkapira. Pag-ulayan ta an tulo kaiyan. Inot, kaipuhan niyatong sundan an tamang dalan; ikaduwa, dapat na magpokus kita sa finish line; asin ikatulo, kaipuhan tang mapangganahan an mga kadipisilan mantang nagdadalagan.

5. Anong dalan an dapat niyatong sundan, asin taano?

⁵ Tanganing makamtan an premyo sa aktuwal na paurumbasan, dapat na sundan kan mga paradalagan an dalan o ruta na itinao kan mga nag-organisar kan kawat. Sa kaagid na paagi, kun gusto niyatong makamtan an premyong buhay na daing katapusan, dapat tang sundan an Kristiyanong dalan, o paagi nin pamumuhay. (Gibo 20:24; 1 Ped. 2:21) Pero, gusto ni Satanas asin kan mga nagsusunod sa saiyang halimbawa na ibang dalan an pilion ta; gusto nindang ‘mag-iba kita sa sainda.’ (1 Ped. 4:4) Tinutuya-tuya ninda an satong dalan nin pamumuhay asin hinihingakong mas marahay daa an dalan ninda, na pasiring daa iyan sa katalingkasan. Pero sala sinda.—2 Ped. 2:19.

6. Ano an nanudan mo sa halimbawa ni Brian?

⁶ Narerealisar kan siisay man na nagdadalagan kaiba kan mga tawong impluwensiyado kan kinaban ni Satanas na an dalan na pinili ninda bakong pasiring sa katalingkasan, kundi sa pagkauripon. (Roma 6:16) Pag-isipan an halimbawa ni Brian. Dinagka siya kan saiyang mga magurang na sundan an Kristiyanong dalan nin pamumuhay. Pero kan tin-edyer na siya, nagduda siya kun baga magigin maugma siya sa dalan na iyan. Pinili ni Brian na magdalagan kaiba kan mga namumuhay sa pamantayan ni Satanas. Sinabi niya: “Dai ko naisip na an minamawot kong ‘katalingkasan’ an madara sa sako sa pagigin adik. Pag-abot nin panahon, naadik ako sa droga saka sa arak, asin namuhay nin imoral. Sa suminunod na mga taon, dagos-dagos na akong naggamit nin mas nakakaadiktong mga droga asin naadik sa dakul sa mga iyan. . . . Nagpabakal na ako nin droga tanganing masustentuhan an bisyo ko.” Pag-abot nin panahon, nagdesisyon si Brian na mamuhay kauyon kan mga pamantayan ni Jehova. Nagbalyo siya nin dalan asin nabawtismuhan kan 2001. Nakakamati na siya nin tunay na kaugmahan ngunyan na sinusundan na niya an Kristiyanong dalan nin pamumuhay. *

7. Sigun sa Mateo 7:13, 14, anong duwang dalan an nasa atubangan ta?

⁷ Mahalagang marhay nanggad na pilion niyato an tamang dalan na susundan! Gusto ni Satanas na magpundo kita gabos sa pagdalagan sa hayakpit na dalan na “pasiring sa buhay” asin bumalyo sa mahiwas na dalan na diyan nagdadalagan an kadaklan na tawo sa kinaban. Popular an dalan na iyan asin mas madali na magdalagan diyan. Alagad “pasiring [iyan] sa kalaglagan.” (Basahon an Mateo 7:13, 14.) Tanganing  magdanay sa tamang dalan asin dai madisturbo, dapat na magtiwala kita ki Jehova asin magdangog sa saiya.

8. Kun masingkog an sarong paradalagan, ano an ginigibo niya?

⁸ An mga paradalagan sa sarong halawig na paurumbasan nakapokus sa dalan na nasa atubangan mismo ninda tanganing dai sinda masingkog. Alagad, puwede pa man giraray sindang masingkog kan kapwa ninda paradalagan o kaya mabulsot sinda sa lubak sa tinampo. Kun matumba sinda, minabuhat sinda asin nagpapadagos sa pagdalagan. An panginot na pokus ninda bako sa nakapasingkog sainda, kundi sa finish line asin sa premyong gusto nindang makamtan.

9. Kun masingkog kita, ano an dapat niyatong gibuhon?

⁹ Sa satong paurumbasan, puwede kitang masingkog nin dakul na beses dahil napapasala kita sa satong mga sinasabi o ginigibo. O tibaad makagibo nin mga sala an kapwa ta mga paradalagan asin makulgan ninda kita. Talagang mangyayari iyan. Gabos kita bakong perpekto, asin gabos kita nagdadalagan sa parehong hayakpit na dalan pasiring sa buhay. Kaya asahan ta nang “magkakabinanggaan” kita kun minsan. Sinabi ni Pablo na may mga pagkakataon na magkakaigwa kita nin “dahilan na ireklamo” an lambang saro. (Col. 3:13) Pero imbes na magpokus sa nakapasingkog sa sato, magpokus kita sa premyo sa inutan. Kun masingkog man kita, pilion tang magbuhat asin padagos na magdalagan. Kun kita maaanggot na marhay asin maghihinanakit dangan dai na mabuhat, dai ta maaabot an finish line asin makakamtan an premyo. Saro pa, posibleng marhay na magi kitang ulang sa iba na nagmamaigot na magdalagan sa hayakpit na dalan pasiring sa buhay.

10. Paano ta malilikayan na magin singkugan?

¹⁰ An saro pang paagi na malilikayan niyato na magin singkugan kan satong kapwa mga paradalagan iyo an pagpahunod sa sainda nuarin man posible imbes na iinsistir an gusto ta. (Roma 14:13, 19-21; 1 Cor. 8:9, 13) Sa mahalagang aspektong ini, bako kitang arog kan mga paradalagan sa aktuwal na paurumbasan. Nakikikumpetensiya sinda sa iba pang mga paradalagan, asin an lambang saro sainda nagmamaigot na sadirihon an premyo. Sadiring interes an panginot na iniisip kan mga paradalagan na iyan. Kaya tibaad piriton nindang makisusuan tanganing mainot  sa grupo. Sa kabaliktaran, dai kita nakikikumpetensiya sa lambang saro. (Gal. 5:26; 6:4) An pasuhan ta iyo na tabangan an pinakadakul na tawong posible na makaabot sa finish line kaiba ta asin makamtan an premyong buhay. Kaya pinagmamaigutan niyatong iaplikar an ipinasabong na sadol ni Pablo na “[tawan] nin atensiyon bako sana an sadiri [niyatong] kapakanan, kundi an kapakanan man kan iba.”—Fil. 2:4.

11. Sa ano nakapokus an sarong paradalagan, asin taano?

¹¹ Apuwera sa pagpokus sa dalan na nasa atubangan mismo ninda, an mga paradalagan sa aktuwal na paurumbasan nakapokus man sa finish line. Dawa dai pa ninda nahihiling iyan, naiimahinar ninda an saindang sadiri na nakaabot na diyan asin nagkamit na kan premyo. Nagdadanay sindang motibado paagi sa pagpokus sa premyo.

12. Ano an mabuot na iinaalok sa sato ni Jehova?

¹² Sa paurumbasan na dinadalaganan ta, mabuot na iinaalok ni Jehova sa saiyang banwaan an siguradong balos pag natapos ninda an paurumbasan—buhay na daing katapusan magsalang sa langit o sa paraisong daga. An Kasuratan nagtatao nin mga patanaw kan balos na ini tanganing maimahinar niyato kun gurano kagayon kan magigin buhay ta. Mantang urog niyatong pinagdadanay na buhay sa satong isip asin puso an paglaom na iyan, magigin mas determinado kitang dai tugutan an ano man na bagay na permanenteng makasingkog sa sato.

13. Ano an bentaha ta kumpara sa aktuwal na mga paradalagan?

¹³ An mga paradalagan sa mga kawat kaidto sa Grecia kaipuhan na mapangganahan an mga kadipisilan, arog nin kapagalan asin kulog. Pero an masasarigan sana ninda iyo an saindang pagsasanay asin sadiring kusog. Kaagid kan mga paradalagan na iyan, nag-aako man kita nin pagsasanay kun paano kita madalagan sa paurumbasan. Pero may bentaha kita kumpara sa aktuwal na mga paradalagan. Makakakua kita nin kusog sa gikanan nin daing limiteng kapangyarihan. Kun magsasarig kita ki Jehova, nangangako siya na dai niya lang kita sasanayon kundi papakusugon niya man kita!—1 Ped. 5:10.

14. Paano makakatabang sa sato an 2 Corinto 12:9, 10 na maatubang an mga kadipisilan?

¹⁴ Napaatubang si Pablo sa dakul na kadipisilan. Apuwera sa pang-iinsulto saka pagpersegir sa saiya, nakamati man siya kun minsan nin pangluluya asin kaipuhan niyang tagalan an inapod niyang “tunok sa laman.” (2 Cor. 12:7) Pero imbes na gibuhon na sarahutan an mga kadipisilan na iyan para magsuko na, ibinilang niya iyan na oportunidad tanganing magsarig ki Jehova. (Basahon an 2 Corinto 12:9, 10.) Huli sa sabuot na ini ni Pablo, tinabangan siya ni Jehova sa gabos niyang kasakitan.

15. Kun aarugon ta si Pablo, ano an maeeksperyensiyahan niyato?

¹⁵ Tibaad insultuhon man kita o persegiron huli sa satong pagtubod. Tibaad magkahilang man kita o kaya makamati nin grabeng kapagalan. Pero kun aarugon niyato si Pablo, an lambang kadipisilan na iyan puwedeng magin oportunidad na maeksperyensiyahan ta an mamumuton na suporta ni Jehova.

16. Dawa kun maluya na an saimong hawak, ano an magigibo mo?

¹⁶ Dai ka na daw makabangon o naka-wheelchair na sana? Maruluya na daw an tuhod mo o naglalabog na an paghiling mo? Kun iyo, kaya mo daw magdalagan kaiba kan mga hoben asin marahay an salud? Iyo nanggad! Dakul na may edad na asin maluya an hawak an nagdadalagan sa dalan pasiring sa buhay. Dai ninda ini magigibo kun sa sadiri sana nindang kusog. Imbes, nagkukua sinda nin kusog ki Jehova paagi sa pagdangog sa Kristiyanong mga pagtiripon paagi sa telepono o pagdalan nin mga pagtiripon  paagi sa video streaming. Asin nakikikabtang sinda sa gibuhon na paggibo nin mga disipulo paagi sa pagpapatotoo sa mga doktor, nars, asin mga kapamilya.

17. Ano an namamatian ni Jehova para sa mga lingkod niya na limitado na an nagigibo huli sa nagluluya nang hawak?

¹⁷ Kun limitado na sana an nagigibo mo huli sa nagluluya nang hawak, dai madisganar asin isipon na maluyahon ka na para magdalagan sa dalan pasiring sa buhay. Namumutan ka ni Jehova dahil sa pagtubod mo sa saiya asin sa gabos na nagibo mo para saiya sa dakul na taon. Kaipuhan mo an saiyang tabang lalo na ngunyan, asin dai ka niya babayaan. (Sal. 9:10) Imbes, mas lalo pa ngani siyang marani sa saimo. Mangnuhon an sinabi nin sarong sister na may mga kamatian: “Mantang nagdadakul an mga kamatian ko, nagdidikit man an mga oportunidad kong ihiras an katotoohan sa iba. Pero aram ko na nakakapaugma sa puso ni Jehova dawa an sadit na mga paghihinguwa ko, asin huli kaiyan, maugma ako.” Pag pinangluluyahan ka, tandaan na kaiba mo si Jehova. Isipon an halimbawa ni Pablo, asin girumdumon an nakakapakusog sa buot na sinabi niya: “Nag-uugma ako sa mga kaluyahan, . . . huli ta pag ako maluya, saka man ako makusog.”—2 Cor. 12:10.

18. Anong lalo nang masakit na kamugtakan an inaatubang nin iba?

¹⁸ An iba sa mga nagdadalagan sa dalan pasiring sa buhay napapaatubang sa saro pang kadipisilan. May inaatubang sindang personal na mga problema na dai nahihiling o tibaad dai maintindihan kan iba. Halimbawa, tibaad igwa sinda nin depresyon o nakakamati nin grabeng kapurisawan. Taano ta lalo nang masakit an kamugtakan na iyan? Huling kun an sarong tawo nabarian nin takyag o kaya naka-wheelchair, nahihiling kan gabos an problema niya asin napapahiro sinda na magtabang. Alagad, tibaad dai risa sa sarong tawo na igwa siya nin hilang sa emosyon o sa isip. Totoong nasasakitan sinda arog nin saro na nabarian, pero tibaad dai sinda mapahilingan nin pagmalasakit huling dai risa an saindang problema.

19. Ano an nanudan ta sa halimbawa ni Mefiboset?

¹⁹ Kun igwa ka nin problema asin sa pagmati mo dai ka nasasabutan kan iba, mapapakusog ka kan halimbawa ni Mefiboset. (2 Sam. 4:4) Pilay siya, tapos napasala si Hading David sa opinyon kaini saiya. Bako man kasalan ni Mefiboset na nangyari saiya an mga kasakitan na iyan. Alagad, dai niya tinugutan na magin negatibo an saiyang sabuot; pinahalagahan niya an marahay na mga bagay sa buhay niya. Nagin mapagpasalamat siya sa kabuutan na ipinahiling saiya ni David kaidto. (2 Sam. 9:6-10) Kaya kan mapasala si David sa opinyon saiya, kinonsiderar ni Mefiboset an bilog na sitwasyon. Dai siya naanggot huli sa sala ni David. Asin dai niya binasol si Jehova sa ginibo ni David. Nagpokus si Mefiboset sa kun ano an magigibo niya tanganing suportaran  an hadi na ninombrahan ni Jehova. (2 Sam. 16:1-4; 19:24-30) Ipinasurat ni Jehova sa saiyang Tataramon an marahayon na halimbawa ni Mefiboset para sa satong kapakinabangan.—Roma 15:4.

20. Ano an posibleng epekto sa sarong tawo nin grabeng pagkapurisaw, pero sa ano siya makakasiyerto?

²⁰ Huli sa grabeng kapurisawan, may mga tugang na ninenerbiyos asin nasusupog na marhay dawa sa pang-aroaldaw na mga sitwasyon. Tibaad masakit sainda pag dakulon an tawo, pero padagos sindang nag-aatender sa mga pagtiripon, asembleya, asin kumbensiyon. Nadidipisilan sindang makipag-ulay sa dai ninda kabisto, pero nakikipag-ulay sinda sa mga tawo sa ministeryo. Kun arog ka kaiyan, dai ka nagsosolo. Dakul an nakakamati man kaiyan. Tandaan na nauugma si Jehova sa bilog na kalag mong mga paghihinguwa. An padagos mong paglilingkod saiya patunay na binebendisyunan ka niya asin na tinatawan ka niya kan kusog na kaipuhan mo. * (Fil. 4:6, 7; 1 Ped. 5:7) Kun naglilingkod ka ki Jehova sa ibong kan tinatagalan mong mga problema sa pisikal o emosyon, makakasiyerto ka na napapaugma mo si Jehova.

21. Sa tabang ni Jehova, ano an magigibo niyato gabos?

²¹ Marahay na sana ta igwang mga pagkakaiba an aktuwal na paurumbasan asin an paurumbasan na sinambit ni Pablo. Sa aktuwal na daralaganan kan mga panahon kan Bibliya, saro sana an nagkakamit kan premyo. Sa kabaliktaran, an gabos na maimbod na nagtatagal sa Kristiyanong dalan nin pamumuhay magkakamit kan premyong buhay na daing katapusan. (Juan 3:16) Asin sa aktuwal na paurumbasan, gabos na paradalagan dapat na marahay an pisikal na kondisyon huling kun bako, tibaad dai sinda manggana. Sa ibong na lado, dakul sa sato an may mga problema sa pisikal, pero nagtatagal kita. (2 Cor. 4:16) Sa tabang ni Jehova, matatapos niyato gabos an satong pagdalagan!