Kan madali nang mautsan si Jesus, taano ta kinotar niya an mga tataramon ni David na nasa Salmo 22:1?

Kan madali nang mautsan si Jesus, kaiba sa huring mga sinabi niya an nasa Mateo 27:46: “Diyos ko, Diyos ko, ta’daw ta pinabayaan mo ako?” Sa pagsabi kaiyan, inutob ni Jesus an mga tataramon ni salmista David sa Salmo 22:1. (Mar. 15:34) Salang isipon na kinotar ni Jesus an mga tataramon na ini dahil makulog an buot niya ki Jehova o dahil temporaryo siyang nawaran nin pagtubod. Lubos na nasasabutan ni Jesus an dahilan kun taano ta kaipuhan niyang magadan, asin andam siyang gibuhon iyan. (Mat. 16:21; 20:28) Aram man ni Jesus na sa oras kan kagadanan niya, kakaipuhanon ni Jehova na halion an ano man na “nagpoprotektar na kudal sa palibot” niya. (Job 1:10, NWT) Kaya tinugutan ni Jehova na lubos na mapatunayan ni Jesus na magdadanay siyang maimbod gurano man kasakit an magin kagadanan niya.—Mar. 14:35, 36.

Kaya taano ta sinabi ni Jesus an mga tataramon na iyan? Dai kita sigurado, pero pag-ulayan ta an nagkapirang posibleng dahilan. *

Paagi sa pagsabi kan mga tataramon na iyan, idinuduon daw ni Jesus na dai mainterbenir si Jehova sa saiyang kagadanan? Kaipuhan na itao ni Jesus an pantubos na mayo kan tabang ni Jehova. Tawo siya, asin kaipuhan niyang magadan tanganing mag-agi nin “kagadanan alang-alang sa gabos.”—Heb. 2:9.

Paagi sa pagkotar nin pirang tataramon hali sa salmong iyan, gusto daw ni Jesus na darahon  an atensiyon kan mga tawo sa bilog na salmo? Komun sa mga Judio kan panahon na idto na magtuom nin dakul na salmo. Pag makadangog sinda nin sarong bersikulo nin sarong salmo, natural sanang maiisip ninda an bilog na salmo. Kun ini an nasa isip ni Jesus, makakatabang iyan sa mga Judiong parasunod niya na magirumduman an dakul na propesiya sa salmong ini manungod sa mga pangyayari bago siya magadan. (Sal. 22:7, 8, 15, 16, 18, 24) Saka, sa huring mga bersikulo kan salmo, mababasa an mga pag-umaw ki Jehova asin an paglaladawan sa saiya bilang Hadi kan gabos.—Sal. 22:27-31.

Paagi sa pagkotar sa mga tataramon na ini ni David, idinuduon daw ni Jesus na mayo siyang sala? Bago an kagadanan ni Jesus, ilegal siyang pigbista asin hinusgaran na nagkasala nin paglanghad. (Mat. 26:65, 66) Banggihon na kaidto kan dali-daling iareglar an pagbistang iyan, saka bako nanggad iyan kauyon kan legal na mga pamantayan. (Mat. 26:59; Mar. 14:56-59) Paagi sa pagkotar kan mga tataramon na iyan bilang retorikal na hapot, posibleng gustong ipahiling ni Jesus na mayo man talaga siyang ano man na ginibong maninigo sa padusang kagadanan.

Ipinapagirumdom daw ni Jesus na dawa tinugutan na magsakit an kagsurat kan salmong ini na si David, dai man kaini naiwara an pag-uyon ni Jehova? An paghapot kaiyan ni David dai man nangangahulugan na mayo na siyang pagtubod sa Diyos. Pagkatapos niyang ihapot iyan, nagpahayag si David nin pagtitiwala sa kapangyarihan ni Jehova na magligtas, asin padagos siyang binendisyunan ni Jehova. (Sal. 22:23, 24, 27) Kaagid kaiyan, dawa ngani si Jesus, “an Aki ni David,” nagsasakit sa hariging pasakitan, dai iyan nangangahulugan na dai na siya inuuyunan ni Jehova.—Mat. 21:9.

Nagpapahayag daw si Jesus nin grabeng kamunduan dahil kaipuhan ni Jehova na halion an proteksiyon saiya para lubos niyang mapatunayan an saiyang integridad? An orihinal na katuyuhan ni Jehova para sa saiyang Aki bako na magsakit asin magadan. Kinaipuhan iyan pagkatapos lang kaidtong magrebelde si Adan asin Eva. Mayong nagibong sala si Jesus, pero kaipuhan niyang magsakit asin magadan tanganing masimbag an mga isyung ibinangon ni Satanas asin tanganing itao an halaga kan pantubos na kaipuhan para balukaton an naiwara nin tawo. (Mar. 8:31; 1 Ped. 2:21-24) Magigibo sana iyan kun hahalion ni Jehova sa kadikit na panahon an proteksiyon niya ki Jesus sa inot na pagkakataon sa buhay ni Jesus.

Tinatabangan daw ni Jesus an mga parasunod niya na magpokus sa dahilan kaya tinugutan ni Jehova na magadan siya sa paaging ini? * Aram ni Jesus na dakul an masisingkog dahil sa paagi nin paggadan saiya bilang kriminal. (1 Cor. 1:23) Kun mapokus an saiyang mga parasunod sa tunay na dahilan kan kagadanan niya, masasabutan ninda an totoong kahulugan kaiyan. (Gal. 3:13, 14) Dangan ibibilang ninda siya na Paraligtas, bakong kriminal.

Ano man an dahilan ni Jesus kaya kinotar niya an mga tataramon na iyan, aram niya na an naeeksperyensiyahan niya parte kan kabutan ni Jehova para sa saiya. Dai nahaloy pagkatapos niyang kotaron an salmong ini, sinabi ni Jesus: “Nautob na!” (Juan 19:30; Luc. 22:37) Iyo, dahil hinali ni Jehova nin kadikit na panahon an proteksiyon niya ki Jesus, lubos na nautob ni Jesus an gabos na ipinapagibo saiya digdi sa daga. Nautob niya man dahil kaiyan an gabos na bagay manungod sa saiya na nasusurat “sa Katugunan ni Moises asin sa Mga Propeta saka Mga Salmo.”—Luc. 24:44.