1. Ano an pighihiling ni Jehova sa mga lingkod niya?

AN Diyos na Jehova ‘nauugma sa saiyang banwaan.’ (Sal. 149:4) Marahayon nanggad na maaraman iyan! Pighihiling niya an marahay na mga kuwalidad ta, an potensiyal ta, asin irinarani niya kita sa saiya. Kun magdadanay kitang maimbod ki Jehova, magdadanay nanggad siyang harani sato sagkod pa man!—Juan 6:44.

2. Taano ta nasasakitan an iba na maniwala na namumutan sinda ni Jehova?

² Tibaad may mga nag-iisip, ‘Aram kong namumutan ni Jehova an mga lingkod niya bilang grupo, pero paano ko man masisigurado na pinapahalagahan niya ako bilang indibidwal?’ Ano an posibleng dahilan kaya naiisip iyan kan iba? Si Oksana, * na nag-agi nin marauton na mga eksperyensiya kan aki pa, nagsabi: “Ugmahon ako kan mabawtismuhan ako saka magpayunir na. Pero pakalihis nin 15 taon, nagbalik na naman sako su marauton na mga nangyari sako kaidto. Kaya naisip ko na dai na sako nauugma si Jehova, na dai na ako angay na mamutan niya.” Si Yua, na sarong payunir na sister na nag-agi man nin dakul na problema kan aki pa, nagsabi: “Idinusay ko ki Jehova an buhay ko dahil gusto ko siyang mapaugma. Pero sigurado akong dai niya ako mamumutan.”

3. Ano an pag-uulayan ta sa artikulong ini?

³ Arog kan maimbod na mga sister na idto, namumutan mong marhay si Jehova, pero tibaad nagdududa ka kun baga namumutan ka niya. Taano ta kaipuhan mong magin kumbinsido na talagang nagmamalasakit siya saimo? Asin ano an makakatabang saimo pag naiisip mong dai ka namumutan ni Jehova? Pag-ulayan ta an simbag sa mga hapot na iyan.

4. Taano ta peligroso na magduda kun baga namumutan kita ni Jehova?

⁴ Dakula an epekto sato nin pagkamuot. Kun kumbinsido kita na namumutan saka tinatabangan kita ni Jehova, mapapahiro kita na bilog na pusong maglingkod saiya dawa nag-aagi kita nin mga problema. Pero kun nagdududa kita kun baga nagmamalasakit sato an Diyos, “an [satong] kusog magigin diit na lang.” (Tal. 24:10, NWT) Asin pag pinangluyahan kita nin buot asin dai na naniniwalang namumutan kita nin Diyos, magigin dai kitang kalaban-laban sa mga pag-atake ni Satanas.—Efe. 6:16.

5. Paano nakaapektar sa pirang tugang an pagduda sa pagkamuot nin Diyos?

⁵ Dahil sa mga pagduda, nagluya an espirituwalidad kan pirang maimbod na Kristiyano sa satong panahon. Sinabi ni James na sarong elder: “Dawa naglilingkod ako sa Bethel saka maugma sa ministeryo sa kongregasyon na iba an lengguwahe, dai ako sigurado kun baga nauugma talaga si Jehova sa mga pagsasakripisyo ko. May pagkakataon pa ngani kaidto na nagduda ako kun baga dinadangog talaga ni Jehova an mga pamibi ko.” Si Eva, na naglilingkod man nin bilog na panahon, nagsabi: “Narealisar ko na pag nagdududa ka kun baga namumutan ka ni Jehova, peligroso iyan ta maaapektaran kaiyan an gabos na ginigibo mo sa paglilingkod sa saiya. Mababawasan kaiyan an gana mo sa espirituwal na mga bagay saka an kaugmahan mo sa paglilingkod ki Jehova.” Si Michael, na regular payunir saka elder, nagsabi: “Kun dai ka naniniwala na nagmamakulog saimo an Diyos, maaanod ka parayo saiya.”

6. Ano an dapat tang gibuhon pag nagpupuon na kitang magduda kun baga namumutan kita nin Diyos?

⁶ Ipinapahiling kan mga eksperyensiyang iyan kun gurano kapeligroso kan pag-isip na dai kita namumutan ni Jehova. Kaya ano an dapat tang gibuhon pag nagpupuon na kitang magduda kun baga namumutan kita nin Diyos? Ipundo ta tulos iyan! Hagadon ki Jehova na tabangan kang mahali an mga ikinakapurisaw mo asin maribayan iyan kan ‘katuninungan nin Diyos na nakakalabi sa gabos na pakasabot na magbabantay sa saimong puso asin kaisipan.’ (Sal. 139:23; Fil. 4:6, 7) Saka tandaan na dai ka nagsosolo. May maimbod na mga tugang na piglalabanan man an pagmating iyan—pati ngani mga lingkod ni Jehova kaidto. Pag-isipan kun ano an manunudan ta sa halimbawa ni apostol Pablo.

7. Nagkaigwa si Pablo nin anong mga problema?

⁷ Kun minsan daw pagmati mo nagagabatan ka na sa dakul na responsabilidad mo? Kun iyo, masasabutan mo si Pablo. Nahadit siya, bako lang para sa sarong kongregasyon kundi “para sa gabos na kongregasyon.” (2 Cor. 11:23-28) May minamati ka daw na hilang na nakakahali kan kaugmahan mo? Igwa si Pablo nin dai mahaling “tunok sa laman,” na posibleng sarong hilang asin gusto niya talagang maumayan. (2 Cor. 12:7-10) Nadidisganar ka daw kun minsan dahil sa mga kaluyahan mo? Iyo man si Pablo. Dahil sa mga kaluyahan na padagos niyang linalabanan, sinabi niya: “Hirak man sa sako.”—Roma 7:21-24.

8. Ano an nakatabang ki Pablo na makayanan an mga problema niya?

⁸ Sa ibong kan gabos na problemang iyan, padagos na naglingkod si Pablo ki Jehova. Ano an nakatao saiya nin kusog na magibo iyan? Aram niyang marhay an mga kaluyahan niya, pero makusog an pagtubod niya sa pantubos. Pamilyar nanggad si Pablo sa panuga ni Jesus na “an siisay man na nagtutubod [ki Jesus magkakaigwa] nin buhay na daing katapusan.” (Juan 3:16; Roma 6:23) Iyo, saro si Pablo sa mga nagpahiling nin pagtubod sa pantubos. Kumbinsido siya na andam si Jehova na patawadon dawa an mga nakagibo nin magabat na kasalan kun nagsusulsol sinda.—Sal. 86:5.

9. Ano an manunudan ta sa sinabi ni Pablo na mababasa sa Galacia 2:20?

⁹ Nagtutubod man si Pablo sa kapangyarihan kan pagkamuot nin Diyos na ipinahiling paagi ki Cristo. (Basahon an Galacia 2:20.) Mangnuhon an nakakapakusog na mga tataramon sa huring parte kan teksto. Sinabi ni Pablo: “[An] Aki nin Diyos . . . namuot sa sakuya asin nagtao kan saiyang sadiri para sa sako.” Dai namatian ni Pablo na dai siya angay sa pagkamuot nin Diyos. Dai niya inisip, ‘Nasasabutan ko kun taano ta namumutan ni Jehova an mga tugang, pero ako, dai talaga niya ako mamumutan.’ Ipinagirumdom ni Pablo sa mga taga Roma: “Si Cristo nagadan para sa sato kan kita mga parakasala pa.” (Roma 5:8) Mayo nanggad nin ano man na makakaulang sa pagkamuot nin Diyos para sa sato!

10. Ano an manunudan ta sa Roma 8:38, 39?

¹⁰ Basahon an Roma 8:38, 39. Lubos na kumbinsido si Pablo sa kapangyarihan kan pagkamuot nin Diyos. Isinurat niya na mayo nin ano man na “makakayang isuway kita sa pagkamuot nin Diyos.” Aram ni Pablo kun gurano si Jehova kamapasensiya sa nasyon nin Israel. Aram niya man kun paano si Jehova nagpahiling  saiya nin pagkahirak. Puwede tang sumaryuhon an sinabi ni Pablo nin arog kaini, ‘Isinugo ni Jehova an mismong Aki niya tanganing magadan para sako, kaya igwa daw nin ano man na rason para pagdudahan ko an pagkamuot niya?’—Roma 8:32.

11. Dawa nakagibo si Pablo nin mga kasalan na sinambit sa 1 Timoteo 1:12-15, taano ta sigurado siya na namumutan siya nin Diyos?

¹¹ Basahon an 1 Timoteo 1:12-15. Siguradong may mga pagkakataon na grabe an pagkakonsiyensiya ni Pablo sa mga nagibo niya kaidto. Inapod niya an sadiri niya na “panginot” na parakasala, asin masasabutan ta nanggad siya! Bago niya naaraman an katotoohan, daing hirak na pinersegir ni Pablo an mga Kristiyano sa lambang siyudad—an iba sainda ipinepreso niya, asin minaboto siya apabor sa paggadan sainda. (Gibo 26:10, 11) Isipa na sana an pagmati ni Pablo pag nakakabisto siya nin sarong hoben na Kristiyano na an mga magurang ginadan huli sa pag-uyon niya! Pinagbasulan ni Pablo an mga salang nagibo niya, pero aram niyang dai niya na mababago an nakaagi. Inako niya na nagadan si Cristo para sa saiya, kaya may pagtitiwala niyang isinurat: “Huli sa daing kapantay na kabuutan nin Diyos, yaon sa sako an katungdan na ini.” (1 Cor. 15:3, 10) Ano an manunudan ta diyan? Akuon na nagadan si Cristo para sa saimo asin na binuksan niya an dalan tanganing magkaigwa ka nin dayupot na pakikiamigo ki Jehova. (Gibo 3:19) An mahalaga sa Diyos iyo an ginigibo ta ngunyan asin an mga gigibuhon ta sa maabot, bako an mga salang nagibo ta kaidto, kita man Saksi ni Jehova na kan panahon na idto o dai pa.—Isa. 1:18.

12. Paano makakatabang sato an 1 Juan 3:19, 20 kun pagmati ta bako kitang mahalaga o dai angay na mamutan?

¹² Pag iniisip mo na nagadan si Jesus para mabayadan an mga kasalan mo, tibaad sabihon mo, ‘Dai ako angay sa onrang iyan.’ Taano ta  puwede kang makamati kaiyan? Puwede kitang dayaon kan satong bakong perpektong puso asin ipamati na bako kitang mahalaga o angay na mamutan. (Basahon an 1 Juan 3:19, 20.) Pag nakakamati kita kaiyan, kaipuhan tang girumdumon na “an Diyos mas urog kisa satuyang mga puso.” An pagkamuot saka pagpapatawad kan satong Ama sa langit mas makusog nanggad kisa sa ano pa man na negatibong pagmati na tibaad nasa puso ta. Kaipuhan tang kumbinsiron an satong sadiri na namumutan kita ni Jehova. Para magibo iyan, dapat na parati kitang mag-adal kan saiyang Tataramon, parating mamibi saiya, asin regular na makiasosyar sa maimbod na mga lingkod niya. Taano ta mahalagang marhay iyan?

13. Paano makakatabang sato an pag-adal kan Tataramon nin Diyos? (Hilingon man an kahon na “ Kun Paano Nakakatabang Sainda an Tataramon nin Diyos.”)

¹³ Kun pag-aadalan mo aroaldaw an Tataramon nin Diyos, mas malinaw mong mahihiling an marahayon na personalidad ni Jehova. Masasabutan mo kun gurano ka niya kapadangat. An paghurop-hurop sa sarong porsiyon kan Tataramon nin Diyos kada aldaw makakatabang saimo na makapag-isip nin mas malinaw dahil ‘itatanos’ kaiyan an saimong salang kaisipan saka mga pagmawot. (2 Tim. 3:16) Si Kevin, na nakamati kaidto na mayo siyang halaga, nagsabi: “Nakatabang sako an pagbasa saka paghurop-hurop sa Salmo 103 na maitanos an kaisipan ko asin masabutan kun ano talaga an paghiling sako ni Jehova.” Si Eva, na sinambit kasubago, nagsabi: “Pagkatapos kan maghapon, nagtatao ako nin panahon para hurop-hurupon kun ano an mahalaga ki Jehova. Nakakapakalma iyan sako saka napapakusog kaiyan an pagtubod ko.”

14. Paano makakatabang sato an pagpamibi?

¹⁴ Parating mamibi. (1 Tes. 5:17) Nagkukusog an pagigin mag-amigo nin duwang tawo pag parati saka udok sa puso sindang nag-uulay. Arog man kaiyan sa relasyon ta ki Jehova. Pag sinasabi ta sa pamibi an mga namamatian ta, iniisip, saka ikinakahadit, ipinapahiling ta na nagtitiwala kita saiya asin na aram tang namumutan niya kita. (Sal. 94:17-19; 1 Juan 5:14, 15) Si Yua, na sinambit kasubago, nagsabi: “Pag namimibi ako, bako lang an mga ginibo ko sa bilog na aldaw an sinasabi ko, kundi pati man an gabos kong iniisip saka namamatian. Luway-luway kong nahiling si Jehova bako bilang boss nin sarong kompanya, kundi bilang sarong Ama na talagang namumutan an mga aki niya.”—Hilingon an kahon na “ Nabasa Mo Na?”

15. Paano si Jehova nagpapahiling sato nin personal na interes?

¹⁵ Makiasosyar sa maimbod na mga amigo; regalo sinda hali ki Jehova. (Sant. 1:17) Nagpapahiling sato nin personal na interes an satong Ama sa langit paagi sa pagtao sato nin mga tugang sa espirituwal na ‘namumuot sa gabos na panahon.’ (Tal. 17:17) Sa surat niya para sa mga taga Colosas, sinambit ni Pablo an pirang Kristiyano na nagtabang saiya, asin “nagi sindang dakulang karangahan” sa saiya. (Col. 4:​10, 11) Kinaipuhan maski ni Cristo Jesus an tabang kan mga amigo niya—mga anghel saka mga tawo—asin inapresyar iyan.—Luc. 22:​28, 43.

16. Paano nakakatabang an maimbod na mga amigo na magin mas harani kita ki Jehova?

 ¹⁶ Naghahagad asin nag-aako ka daw nin tabang hali sa mga amigo mo sa kongregasyon? Bakong kaluyahan na sabihon sa sarong maygurang na amigo an mga ikinakahadit mo, puwede pa ngani iyan na magin proteksiyon saimo. Pag-isipan an sinabi ni James na sinambit kasubago: “Nakatabang talaga sako an pagkaigwa nin mga amigong maygurang na Kristiyano. Pag dai ko na makaya an negatibong kaisipan ko, yaon an marahayon na mga amigong ini para mapasensiyang magdangog saka magpagirumdom sako na namumutan ninda ako. Dahil sainda, namamatian kong namumutan saka nagmamakulog sako si Jehova.” Mahalaga nanggad na magkaigwa kita nin mga amigo sa kongregasyon asin padagos na magin dayupot sainda!

17-18. Kiisay kita dapat maniwala, asin taano?

¹⁷ Gusto ni Satanas na sumuko kita sa pakikipaglaban na gibuhon an tama. Gusto niya kitang papaniwalaon na dai kita namumutan ni Jehova, na dai kita angay na iligtas. Pero arog kan naaraman ta, bako nanggad iyan totoo.

¹⁸ Namumutan ka ni Jehova. Mahalaga kang marhay saiya. Kun masunod ka saiya, ‘magdadanay ka sa saiyang pagkamuot’ sagkod pa man, arog ni Jesus. (Juan 15:10) Kaya dai maniwala ki Satanas asin sa puso mong nagsasabing bako kang marahay na tawo. Imbes, maniwala ki Jehova, na naghihiling sa kun ano an marahay sa lambang saro sato. Magin kumbinsido na ‘si Jehova nauugma sa saiyang banwaan,’ asin kaiba ka diyan!