AN GRABENG paghadit garo sarong bagay na nakakapagabat sa satong puso. (Tal. 12:25) Namatian mo na daw an grabeng gabat na dara kaiyan? Nag-abot ka na daw sa punto na garo baga dai mo na kaya? Kun iyo, dai ka nagsosolo. Dakul sa sato an tibaad nag-ataman nin may hilang na kapamilya, nagadanan nin mahal sa buhay, inagihan nin kalamidad, o napaatubang sa mga sitwasyon na nakakapaluyang marhay sa pisikal, mental, asin emosyon. Pero ano an makakatabang sa sato na makayanan an grabeng paghadit? a

Dakul kitang manunudan sa halimbawa ni David kun paano makakayanan an grabeng paghadit. Nakaeksperyensiya siya nin kadakul na dipisil na sitwasyon sa buhay, asin may mga pagkakataon pa ngani na nameligro an buhay niya. (1 Sam. 17:34, 35; 18:10, 11) Paano nakayanan ni David an namatian niyang grabeng paghadit? Paano ta maaarog an saiyang halimbawa?

Sabay-sabay an nagin problema kaidto ni David. Halimbawa, pag-isipan an nangyari kan linalapag siya ni Hading Saul para gadanon. Kan makapuli na si David asin an saiyang mga tawuhan hali sa pakikilaban, nabigla sinda kan mahiling ninda na hinabon nin mga kalaban an mga pagsadiri ninda, sinurulo an saindang mga harong, asin kinidnap an saindang mga pamilya. Ano an nagin reaksiyon ni David? “Nagparatangis nin makusog si David asin an saiyang mga tawuhan sagkod na maubusan sinda nin kusog na magtangis pa.” Mas napurisaw pa si David ta an pinagtitiwalaan niyang mga tawuhan ‘nag-uurulay na gapuon siya.’ (1 Sam. 30:1-6) Kaya tulong darakulang problema an sabay-sabay na napaatubang ki David: Nasa peligro an pamilya niya, natatakot siya na tibaad gadanon siya kan mga tawuhan niya, asin linalapag pa siya ni Hading Saul. Isipa na sana an grabeng paghadit na siguradong namatian kaidto ni David!

Ano an sunod na ginibo ni David? Tulos na “pinakusog ni David an saiyang sadiri paagi ki Jehova na saiyang Diyos.” Paano niya iyan posibleng ginibo? Ugali na ni David na mamibi ki Jehova para maghagad nin tabang saka maghurop-hurop kun paano siya tinabangan kaidto ni Jehova. (1 Sam. 17:37; Sal. 18:2, 6) Nahiling ni David na kaipuhan niyang magpagiya ki Jehova, kaya naghapot siya ki Jehova kun ano an dapat niyang gibuhon. Kan maaraman ni David an paggiya ni Jehova, huminiro tulos siya. Bilang resulta, binendisyunan siya ni Jehova pati an saiyang mga tawuhan asin nailigtas ninda an saindang pamilya saka nabawi an saindang mga pagsadiri. (1 Sam. 30:7-9, 18, 19) Narisa mo an tulong bagay na ginibo ni David? Namibi siya ki Jehova para sa tabang, naghurop-hurop kun paano siya tinabangan kaidto ni Jehova, asin huminiro kauyon kan paggiya ni Jehova. Paano ta maaarog si David? Pag-isipan an tulong paagi.

1. Mamibi. Ano man na oras na makamati kita nin grabeng paghadit, puwede kitang mamibi ki Jehova na tabangan kita asin tawan nin kadunungan. Puwede tang mahali an nakakapagabat sato paagi sa pagtao nin panahon sa pagpamibi na sinasabi ki Jehova an gabos na nasa puso ta. O puwede kitang mamibi nin halipot asin silensiyo kun iyan lang an itinutugot kan satong sitwasyon. Sa kada nagdudulok kita ki Jehova para sa tabang, naipapahiling ta man an pagtitiwala na arog kan ki David: “Si Jehova an sakong dakulang gapo saka an sakong masarig na depensa asin an Saro na nagliligtas sa sakuya. An sakuyang Diyos iyo  an sakong gapo, na sakong pinapailihan.” (Sal. 18:2) Nakakatabang daw talaga an pamibi? Sinabi kan payunir na sister na si Kahlia: “Pagkatapos kong mamibi, nakakamati ako nin katuninungan. Nakakatabang sako an pamibi na maiuyon ko an kaisipan ko sa kaisipan ni Jehova saka napapakusog an pagtitiwala ko saiya.” Iyo, an pamibi sarong mapuwersang probisyon hali ki Jehova na nakakatabang sato na makayanan an grabeng paghadit.

2. Maghurop-hurop. Mantang binabalikan mo an mga nangyari sa buhay mo, may naiisip ka daw na mga problema na nakayanan mo huli sana sa tabang ni Jehova? Pag hinuhurop-hurop ta kun paano kita tinabangan ni Jehova pati man an saiyang mga lingkod kaidto, mas nagkakaigwa kita nin katuninungan saka mas nagkukusog an satong pagtitiwala saiya. (Sal. 18:17-19) “May lista ako nin nagkasirimbag nang mga pamibi,” an sabi kan elder na si Joshua. “Nakatabang ini sako na magirumduman an mga pagkakataon na may espesipiko akong hinagad ki Jehova tapos itinao niya kun ano mismo an kaipuhan ko.” Iyo, pag hinuhurop-hurop ta an mga ginibo na ni Jehova para sato, nagkakaigwa kita nin panibagong kusog na malabanan an grabeng paghadit.

3. Humiro. Bago magdesisyon kun ano an gigibuhon sa sarong sitwasyon, puwede kitang magsiyasat sa Tataramon nin Diyos para sa pinakamaaasahan na giya. (Sal. 19:7, 11) Nahiling kan dakul na pag nagsisiyasat sinda manungod sa sarong partikular na teksto, mas nasasabutan ninda kun paano iyan aplikado sa saindang buhay. Sinabi kan elder na si Jarrod: “Nakakatabang sako an pag-research para mahiling an gabos na aspekto kan sarong teksto asin masabutan kun ano an sinasabi sako ni Jehova. Napapakusog talaga kaiyan an tiwala ko sa binabasa ko kaya napapahiro ako na sunudon an paggiya niya.” Pag inaaram ta an paggiya ni Jehova paagi sa Kasuratan asin sinusunod iyan, nagigin mas madali para sa sato na atubangon an grabeng paghadit.

Nasabutan ni David na tanganing makayanan an grabeng paghadit, kaipuhan niya an tabang ni Jehova. Dakulaon an pasasalamat niya sa suporta ni Jehova kaya nakapagsabi siya: “Paagi sa kapangyarihan nin Diyos, an sarong pader kaya kong sakaton. An tunay na Diyos an naggugubing sa sako nin kusog.” (Sal. 18:29, 32) Tibaad mamatian niyato na an mga problema ta garo baga mga pader na dai ta kayang sakaton. Pero sa tabang ni Jehova, kaya tang sakaton an ano man na arog-pader na mga problema! Iyo, pag namimibi kita ki Jehova para sa tabang, hinuhurop-hurop an gabos na ginibo niya para sato, asin minahiro kauyon kan saiyang paggiya, makakapagtiwala nanggad kita na tatawan niya kita kan kusog asin kadunungan na kaipuhan ta para makayanan an grabeng paghadit!