1. Ano an nagtatao sato nin dakulang kaugmahan?

 GUSTO ni Jehova na magin maugma kita. Aram ta iyan huling an kagaya-gayahan o kaugmahan sarong aspekto kan bunga kan saiyang banal na espiritu. (Gal. 5:22) Igwang urog na kaugmahan sa pagtao kisa sa pag-ako, kaya nakakamati kita nin dakulang kaugmahan pag lubos kitang nakikikabtang sa Kristiyanong ministeryo asin pag tinatabangan ta an satong mga tugang sa manlain-lain na paagi.—Gibo 20:35.

2-3. (a) Arog kan ipinaparisa kan Galacia 6:4, anong duwang bagay an makakatabang sato na magdanay na maugma sa paglilingkod ki Jehova? (b) Ano an pag-uulayan ta sa artikulong ini?

² Arog kan mababasa sa Galacia 6:4, nagsambit si apostol Pablo nin duwang bagay na makakatabang sato na magdanay na maugma. (Basahon.) Inot, dapat na an pasuhan ta iyo na itao ki Jehova an satong pinakamakakaya. Kun itinatao ta saiya an satong pinakamakakaya, dapat kitang magin maugma. (Mat. 22:36-38) Ikaduwa, dapat tang likayan na ikumparar an satong sadiri sa iba. Ano man an kaya tang gibuhon huli sa satong salud, edukasyon, o abilidad, dapat na magpasalamat kita ki Jehova. Tutal, hali man saiya an gabos na igwa kita. Kun an iba mas mahusay sa sato sa nagkapirang aspekto kan ministeryo, dapat kitang mag-ugma na ginagamit ninda an saindang mga abilidad bako para paluwason na mas matibay sinda o para sa pansadiring intereses, kundi para umawon si Jehova. Kaya imbes na makipagkumpetensiya, dapat na makanuod kita sainda.

³ Sa artikulong ini, aaramon ta kun ano an makakatabang sato pag namamatian tang limitado an kaya tang gibuhon sa satong paglilingkod. Pag-uulayan ta man kun paano ta magagamit sa pinakamarahay na paagi an ano man na abilidad o talento na igwa kita asin kun paano kita makakanuod sa halimbawa kan iba.

4. Ano an puwedeng makapadisganar sato? Magtao nin halimbawa.

⁴ May mga lingkod si Jehova na nadidipisilan na mag-adjust sa mga limitasyon na dara kan paggurang o pagluya nin salud. Arog kaiyan an nangyari ki Carol. Dati siyang need-greater. Kan panahon na iyan, igwa siya nin 35 tinutukduan sa Bibliya saka natabangan niya an nagkapira sainda na magdusay asin magpabawtismo. Mabunga talaga an ministeryo ni Carol! Dangan nagkahilang siya, kaya haros sa harong na lang siya. “Aram ko na huli sa hilang ko, dai ko na kayang gibuhon an mga nagigibo kan iba,” an sabi ni Carol, “pero pagmati ko bako na akong arog ninda kaimbod. Kadakul kong gustong gibuhon pero dai ko na man kaya. Nakakadisganar talaga.” Gusto ni Carol na gibuhon an gabos na makakaya niya para ki Jehova. Marahayon nanggad iyan! Nakakasigurado kita na pinapahalagahan kan satong mapagmalasakit na Diyos an paggibo ni Carol kan saiyang pinakamakakaya.

5. (a) Ano an dapat tang girumdumon kun nadidisganar kita huli sa satong mga limitasyon? (b) Arog kan mahihiling sa mga ritrato, paano padagos na itinao kan brother an saiyang pinakamakakaya sa paglilingkod ki Jehova?

⁵ Kun nadidisganar ka kun minsan huli kan saimong limitasyon, haputon an sadiri, ‘Ano an hinahagad sako ni Jehova?’ An saimong pinakamakakaya—ano man iyan depende sa kamugtakan mo ngunyan. Pag-isipan an sitwasyon na ini: Sarong sister na 80 anyos an nadidisganar ta an mga nagigibo niya ngunyan sa ministeryo bako nang arog kaidtong 40 anyos siya. Iniisip niya na dawa ngani itinatao man niya an pinakamakakaya niya, dai iyan nakakapaugma ki Jehova. Pero totoo daw iyan? Isip-isipon: Kun itinao kan sister na ini an pinakamakakaya niya kan 40 anyos siya saka padagos pa man giraray na itinatao an pinakamakakaya niya ngunyan na 80 anyos na siya, di dai man siya nagpundo sa pagtao kan pinakamakakaya niya. Kun namamatian niyato na an satong paglilingkod garo baga kulang para mapaugma si Jehova, kaipuhan tang ipagirumdom sa satong sadiri na si Jehova an nagdedesisyon sa kun ano an nakakapaugma saiya. Kun gigibuhon ta an satong pinakamakakaya, garo man sana sasabihon sato ni Jehova: “Magayon an ginibo mo!”—Ikumparar an Mateo 25:20-23.

6. Ano an manunudan ta sa halimbawa ni Maria?

⁶ Magigin mas madali sato na magin maugma kun mapokus kita sa mga kaya tang gibuhon imbes na sa mga dai ta kayang gibuhon. Pag-isipan an sister na si Maria, na may hilang na nakakalimitar sa kun gurano kadakul kan kaya niyang gibuhon sa ministeryo. Kan primero, na-depress siya saka pagmati niya mayo na siyang pakinabang. Pero inisip-isip niya an kakongregasyon niyang sister na dai na nakakabangon, asin nagdesisyon si Maria na tumabang. “Naggibo ako nin paagi na makaibanan ko siya sa paghuhulit paagi sa telepono saka surat,” an sabi ni Maria. “Pagpuli ko sa harong sa kada pagkatapos ming magpartner sa ministeryo, maugma ako saka kontento na nakatabang ako sa sakong tugang.” Magigin mas maugma man kita pag nagpopokus kita sa mga kaya tang gibuhon imbes na sa mga dai ta kayang gibuhon. Pero paano kun urog pa an kaya tang gibuhon o kun mahusay talaga kita sa nagkapirang aspekto nin paglilingkod ki Jehova?

7. Anong praktikal na sadol an itinao ni apostol Pedro sa mga Kristiyano?

⁷ Sa inot na ipinasabong na surat ni apostol Pedro, dinagka niya an mga tugang na gamiton an ano man na abilidad saka talento na igwa sinda para pakusugon an saindang mga kapagtubod. Isinurat ni Pedro: “Sigun sa sukol kan balaog na naako kan kada saro, gamiton iyan sa paglilingkod sa lambang saro bilang mahusay na mga katiwala kan daing kapantay na kabuutan nin Diyos.” (1 Ped. 4:10) Dai kita dapat mag-alangan na lubos na gamiton an satong mga  abilidad huli sana ta nahahadit kita na tibaad mauri o madisganar an iba. Kun mag-aalangan kaya kita, dai ta na maitatao ki Jehova an satong pinakamakakaya.

8. Sigun sa 1 Corinto 4:6, 7, taano ta dapat tang likayan na ipaghambog an satong mga abilidad?

⁸ Kaipuhan tang lubos na gamiton an satong mga abilidad, pero dapat na likayan tang ipaghambog iyan. (Basahon an 1 Corinto 4:6, 7.) Halimbawa, tibaad mahusay ka sa pagpuon nin mga pag-adal sa Bibliya. Dai ka dapat mag-alangan na gamiton an abilidad na iyan! Marahay na gamiton mo iyan, pero ibang urulay na kun ipaghahambog mo na iyan. Halimbawa, dai pa sana nahahaloy, nagkaigwa ka ngaya nin magayunon na eksperyensiya sa ministeryo asin nakapuon ka nin pag-adal sa Bibliya. Gustuhon mong iistorya iyan sa mga kagrupo mo. Pero kan maghirilingan na kamo kan mga kagrupo mo, may sarong sister na nag-iistorya kun paano siya nakapasakamot nin magasin. Siya nakapasakamot nin magasin; ika nakapuon nin pag-adal. Ano an gigibuhon mo? Aram mong makakapakusog sa mga kagrupo mo an eksperyensiya mo, pero puwede kang magdesisyon na sa ibang angay na pagkakataon na sana iyan iistorya tanganing dai man maapektaran an kaugmahan kan sister na nakapasakamot nin magasin. Pagpahiling iyan nin kabuutan. Pero dai man buot sabihon na mapundo ka na sa pag-alok nin mga pag-adal sa Bibliya. Igwa kang abilidad—gamiton iyan!

9. Paano ta dapat gamiton an mga regalo sato ni Jehova?

⁹ Tandaan, ano man na natural na abilidad an tibaad igwa kita, regalo iyan hali ki Jehova. Dapat tang gamiton an mga regalong iyan para pakusugon an kongregasyon, bako para paluwason na mas matibay kita sa iba. (Fil. 2:3) Pag ginagamit ta an satong kusog saka mga abilidad para gibuhon an kabutan nin Diyos, magkakaigwa kita nin dahilan para mag-ugma—bako dahil ta mas mahusay an nagigibo ta kisa sa iba o pinapatunayan tang nakakalabi kita sa sainda, kundi dahil ginagamit ta an mga regalo sato ni Jehova para umawon siya.

10. Taano ta bakong rasonable na ikumparar ta an satong sadiri sa iba?

¹⁰ Kun an saro dai mag-iingat, tibaad mahulog siya sa siod na ikumparar an sadiri sa iba—sa mga bagay na diyan mahusay siya pero an iba bako. Halimbawa, tibaad mahusayon sa pagtao nin pampublikong pahayag an sarong brother. Diyan siya mahusay. Pero sa buot-buot niya, tibaad minemenos niya an saro pang brother na nasasakitan sa pagpahayag. Pero an brother na iyan tibaad mapag-istimar na marhay, mahusay sa pagsasanay kan mga aki niya, o maiguton sa ministeryo. Ipinagpapasalamat ta nanggad na  dakulon kitang mahusay na brother saka sister na ginagamit an mga regalong itinao sainda ni Jehova para paglingkudan Siya asin tabangan an iba!

11. Taano ta dapat tang hinguwahon na arugon an halimbawa ni Jesus?

¹¹ Dawa ngani dapat tang likayan na ikumparar an satong sadiri sa iba, dakulon kitang manunudan sa halimbawa kan mga maimbod. An pinakamarahay na halimbawa iyo si Jesus. Totoo na perpekto si Jesus mantang kita bako, pero makakanuod kita sa magagayon niyang kuwalidad asin pamamaagi. (1 Ped. 2:21) Pag ginigibo ta an satong pinakamakakaya para arugon na marhay an saiyang halimbawa, nagigin kitang mas marahay na lingkod ni Jehova asin nagigin mas epektibo sa ministeryo.

12-13. Ano an manunudan ta ki Hading David?

¹² Sa Tataramon nin Diyos, igwa nin dakul na halimbawa nin maimbod na mga lalaki asin babayi. Bako sindang perpekto, pero angay na arugon. (Heb. 6:12) Isipa si Hading David, na inapod ni Jehova na “sarong lalaki na nauuyunan kan sakuyang puso” o, arog kan traduksiyon nin saro pang bersiyon nin Bibliya, “an klase nin tawo na pinakanakakapaugma sako.” (Gibo 13:22) Pero si David bakong perpekto. Sa katunayan, nakagibo siya nin magagabat na sala. Dawa arog kaiyan, marahay siyang halimbawa sato. Taano? Dahil kan itinanos siya, dai niya ipinangatanusan an saiyang sadiri. Imbes, inako niya an magabat na konseho asin sinserong pinagbasulan an ginibo niya. Kaya, pinatawad siya ni Jehova.—Sal. 51:3, 4, 10-12.

¹³ Makakanuod kita ki David paagi sa paghapot sa satong sadiri: ‘Ano an reaksiyon ko pag tinatawan ako nin konseho? Inaako ko daw tulos an sakong mga sala, o ipinapangatanusan ko daw an sadiri ko? Binabasol ko daw tulos an iba? Nagmamaigot daw akong dai na utruhon an mga sala ko?’ Puwede mong haputon an sadiri mo nin kaagid kaiyan na mga hapot mantang nagbabasa ka manungod sa iba pang maimbod na mga lalaki asin babayi sa Bibliya. Napaatubang daw sinda sa mga kadipisilan na kaagid kan sa saimo? Anong marahay na mga kuwalidad an ipinahiling ninda? Sa kada halimbawa, haputon an sadiri: ‘Paano ko mas maaarog an maimbod na lingkod na ini ni Jehova?’

14. Paano kita makikinabang sa pag-obserbar sa mga kapagtubod?

¹⁴ Makikinabang man kita paagi sa pag-obserbar sa mga kapagtubod, hoben man o may edad na. Halimbawa, may naiisip ka daw na kakongregasyon na maimbod na nagtatagal nin pagbalo—tibaad panggigipit nin kairiba, pagkontra nin  kapamilya, o maluyang salud? May nahihiling ka daw na marahay na mga kuwalidad saiya na gusto mong mas patalubuon pa? Paagi sa pag-isip-isip kan saiyang marahay na halimbawa, tibaad makanuod ka nin praktikal na mga paagi na matagalan mo man an mga inaagihan mong pagbalo. Nagpapasalamat kitang marhay na igwa kitang buhay na mga halimbawa nin pagtubod na puwede tang arugon—dahilan nanggad iyan para mag-ugma!—Heb. 13:7; Sant. 1:2, 3.

15. Anong konseho an itinao ni apostol Pablo na makakatabang sato na padagos na mag-ugma sa paglilingkod ki Jehova?

¹⁵ Tanganing makatabang na magkaigwa nin katuninungan asin pagkasararo sa kongregasyon, an lambang saro sato kaipuhan na itao an saiyang pinakamakakaya. Pag-isipan an mga Kristiyano kan inot na siglo. Manlain-lain an saindang balaog asin asignasyon. (1 Cor. 12:4, 7-11) Pero bako iyan dahilan na magkurumpetensiyahan sinda saka magkaigwa nin pagkabaranga. Imbes, dinagka ni Pablo an lambang saro na itao an kinakaipuhan “para pasarigon an hawak kan Cristo.” Isinurat ni Pablo sa mga taga Efeso: “Pag an lambang kabtang nagpupunsiyonar nin tama, nakakatabang ini sa pagtalubo kan hawak miyentras na pinapakusog kaiyan an sadiri paagi sa pagkamuot.” (Efe. 4:1-3, 11, 12, 16) An mga naggibo kaiyan nakatabang na magkaigwa nin katuninungan asin pagkasararo—mga karakteristiko na nahihiling ta sa mga kongregasyon ta ngunyan.

16. Ano an dapat na magin determinado tang gibuhon? (Hebreo 6:10)

¹⁶ Magin determinadong likayan na ikumparar sa iba an sadiri mo. Imbes, makanuod ki Jesus, asin magmaigot na arugon an saiyang mga kuwalidad. Makinabang sa mga halimbawa sa Bibliya asin sa mga halimbawa nin pagtubod sa presenteng panahon. Mantang ginigibo mo an saimong pinakamakakaya, magtiwala na si Jehova “bakong biko para lingawan niya an [saimong] ginibo.” (Basahon an Hebreo 6:10.) Padagos na mag-ugma sa paglilingkod ki Jehova sa pakaaram na pinapahalagahan niya an saimong bilog na kalag na mga paghihinguwa na paugmahon siya.