An salaysay ni Mateo mapadapit sa mga pangyayari may koneksiyon sa pagkamundag ni Jesus asin sa inot na mga taon kan buhay niya medyo iba sa salaysay ni Lucas huling isinurat ninda an mga pangyayari sa magkaibang anggulo.

An salaysay ni Mateo nakapokus sa mga pangyayaring kalabot si Jose. Isinaysay kaiyan an inot na nagin reaksiyon ni Jose sa pagbados ni Maria, an pangaturugan niya na diyan ipinaliwanag sa saiya nin sarong anghel an sitwasyon, asin an pagsunod niya sa ipinapagibo kan anghel. (Mat. 1:19-25) Isinaysay pa ni Mateo an dapit sa pangaturugan ni Jose na diyan sinabi sa saiya nin sarong anghel na magdulag pa-Ehipto, an pagdulag niya kaiba an pamilya niya, an pangaturugan niya na diyan sinabi nin sarong anghel na magbalik siya sa Israel, an pagbalik niya, asin an desisyon niya na mag-istar sinda kan saiyang pamilya sa Nazaret.—Mat. 2:13, 14, 19-23.

Sa ibong na lado, an salaysay ni Lucas mas nakapokus ki Maria. Sinambit diyan an dapit sa pagbisita ki Maria kan anghel na si Gabriel, an pagbisita ni Maria sa paryente niyang si Elizabeth, asin an kapahayagan ni Maria nin pag-umaw ki Jehova. (Luc. 1:26-56) Sinambit man ni Lucas an mga sinabi ni Simeon ki Maria dapit sa mga kasakitan na aagihan ni Jesus. Pati an salaysay dapit sa pagbisita kan pamilya sa templo kan 12 anyos si Jesus, mga tataramon ni Maria an kinotar ni Lucas bako an ki Jose. Sinabi pa ni Lucas na dakula an nagin epekto ki Maria kan gabos na pangyayaring ini. (Luc. 2:19, 34, 35, 48, 51) Kaya malinaw na mas dakul an sinabi ni Mateo dapit sa mga inisip asin ginibo ni Jose, tapos si Lucas, mas nagpokus sa mga detalye dapit sa papel asin mga eksperyensiya ni Maria.

May pagkakaiba man sa rekord na itinao kan duwang kagsurat kan Ebanghelyo dapit sa ginikanan ni Jesus. Pigsusog ni Mateo an ginikanan na pamilya ni Jose asin ipinahiling na si Jesus, bilang ampon na aki ni Jose, iyo an legal na tagapagmana kan pagkahadi ni David. Taano? Huling si Jose naggikan ki Hading David paagi sa aki kaining si Solomon. (Mat. 1:6, 16) Pero malinaw na an pigsusog ni Lucas iyo an ginikanan na pamilya ni Maria asin ipinahiling na, bilang ‘gikan sa lahi ni David,’ si Jesus an natural na tagapagmana kan pagkahadi ni David. (Roma 1:3) Taano? Huling si Maria naggikan ki Hading David paagi sa aki kaining si Natan. (Luc. 3:31) Pero taano ta dai iiniba ni Lucas si Maria sa lista bilang aki ni Heli, na saiyang ama? Huling mga lalaki sana an iiniiba sa opisyal na rekord nin ginikanan nin lahi. Kaya kan iiba ni Lucas si Jose sa lista asin apudon ini na aki ni Heli, an buot niyang sabihon, manugang ini ni Heli.—Luc. 3:23.

An rekord ni Mateo asin ni Lucas kan ginikanan ni Jesus malinaw na nagpapatunay na si Jesus an ihinulang Mesiyas. Sa katunayan, aram na marhay kan mga tawo na talagang naggikan si Jesus ki David, mala ngani ta dawa an mga Fariseo asin mga Saduceo dai iyan kinuwestiyon. Sa ngunyan, kabtang pa man giraray kan pundasyon kan satong pagtubod an rekord ni Mateo asin ni Lucas dapit sa ginikanan ni Jesus, asin nagpapatunay na talagang mauutob an mga panuga nin Diyos.