1. Ano an dapat na gibuhon nin mga Kristiyano tanganing matapos ninda an paurumbasan para sa buhay?

AN MGA Kristiyano nasa paurumbasan para sa buhay. Kita man kakapuon pa sana o haloy na sa paurumbasan, kaipuhan niyatong padagos na magdalagan sagkod na makaabot kita sa finish line. An sadol ni apostol Pablo sa mga Kristiyano sa Filipos makakapakusog sa sato na tapuson an paurumbasan. May mga miyembro kan kongregasyon na iyan kan inot na siglo na dakul na taon nang naglilingkod ki Jehova kan maresibi ninda an surat ni Pablo. Maimbod na sindang naglilingkod ki Jehova, pero ipinagirumdom sa sainda ni Pablo na kaipuhan nindang padagos na magdalagan na may pakatagal. Gusto niyang padagos na arugon ninda an saiyang halimbawa na padagos na “nagmamaigot na maabot an pigmamawot” o premyo.—Fil. 3:14.

2. Taano ta napapanahon an sadol ni Pablo sa mga taga Filipos?

² Napapanahon an sadol ni Pablo sa mga taga Filipos. Sa kapinunan pa sana, napaatubang na sa oposisyon an kongregasyon. Kan mga 50 C.E., si Pablo saka si Silas nagduman sa Filipos asin naghulit bilang pagsunod sa imbitasyon nin Diyos na “bumalyo . . . sa Macedonia.” (Gibo 16:9) Nanumpungan ninda diyan si Lydia, sarong babayi na “nagdadangog [asin] lubos na binuksan ni Jehova an saiyang puso” sa maugmang bareta. (Gibo 16:14) Dai nahaloy, nabawtismuhan siya kaiba kan mga kairiba niya sa harong. Alagad, tulos na nagpuon nin kariribukan an Diyablo. An mga lalaki sa siyudad ginuyod si Pablo asin Silas tanganing iatubang sa mga mahistrado sibil dangan putik na inakusaran na nagkakawsa daa sinda nin kariribukan. Kaya si Pablo asin Silas hinampak, iprineso, asin kan huri sinabihan na maghali sa siyudad. (Gibo 16:16-40) Suminuko na daw sinda? Dai nanggad! Asin kumusta man an mga tugang sa bagong establisar na kongregasyon? Nagin marahay nanggad sindang halimbawa huling nagtagal man sinda! Siguradong  napakusog sindang marhay kan marahay na halimbawa na ipinahiling sa sainda ni Pablo asin Silas.

3. Ano an narealisar ni Pablo, asin anong mga hapot an pag-uulayan niyato?

³ Determinado si Pablo na dai sumuko. (2 Cor. 4:16) Alagad aram niya na tanganing matapos niya an paurumbasan, kaipuhan niyang magdanay na nakapokus sa premyo. Ano an manunudan ta sa halimbawa ni Pablo? Anong mga halimbawa nin pagtubod sa panahon ta an nagpapahiling sa sato na kaya niyatong mapangganahan an mga ulang asin makatagal? Asin paano mapapakusog kan paglaom ta sa maabot an satong determinasyon na dai nanggad sumuko?

4. Paano si Pablo padagos na nagin sibot sa paglilingkod ki Jehova sa ibong kan saiyang kamugtakan?

⁴ Pag-isipan an gabos na ginigibo ni Pablo kan magsurat siya sa mga taga Filipos. Nakapreso siya sa harong mantang nasa Roma. Limitadong marhay an katalingkasan niya sa paghuhulit. Alagad, padagos siyang nagin sibot paagi sa pagpapatotoo sa mga nagbibisita sa saiya asin paagi sa pagsurat sa hararayong kongregasyon. Siring man ngunyan, dakul na Kristiyanong dai na kayang magluwas sa harong an inaaprobetsaran an lambang oportunidad na ihiras an maugmang bareta sa mga nagbibisita sa sainda. Nagpapadara man sinda nin nakakapakusog na mga surat sa mga kagharong na dai posibleng makaulay nin personal.

5. Sigun sa mga tataramon ni Pablo na nasa Filipos 3:12-14, ano an nakatabang saiya na magdanay na nakapokus sa premyo?

⁵ Si Pablo dai nagpadisturbo sa mga nagibo niya kaidto—marahay man iyan o maraot. Sa katunayan, sinabi niya na kaipuhan na ‘lingawan an mga bagay sa likudan’ tanganing ‘makaabante pasiring sa mga bagay sa inutan,’ o mapangganang matapos an paurumbasan. (Basahon an Filipos 3:12-14.) Ano an nagkapira sa mga bagay na puwede kutanang nakadisturbo ki Pablo? Inot, kahanga-hanga an saiyang mga naginibuhan sa Judaismo. Pero minansay niya an mga bagay na iyan bilang “tambak nin basura.” (Fil. 3:3-8) Ikaduwa, dai niya tinugutan an saiyang pagkakonsiyensiya sa pagpersegir niya kaidto sa mga Kristiyano na papunduhon siya sa paglilingkod ki Jehova. Asin ikatulo, dai niya inisip na igo na an gabos na nagibo niya para ki Jehova. Nagin mabunga an ministeryo ni Pablo dawa pa siya iprineso, hinampak, ginapo, nakaeksperyensiya nin paglubog nin barko, pati man nin kawaran nin makakakan asin maisusulot. (2 Cor. 11:23-27) Alagad, ano man an naginibuhan na asin natagalan na mga kasakitan ni Pablo, aram niya na kaipuhan niyang padagos na magmaigot. Iyo man iyan an dapat niyatong gibuhon.

6. Ano an pira sa “mga bagay sa likudan” na tibaad kaipuhan niyatong lingawan?

⁶ Paano niyato maaarog an halimbawa ni Pablo kun dapit sa ‘paglingaw sa mga bagay sa likudan’? An pira sa sato tibaad kaipuhan na mapangganahan an pagkakonsiyensiya huli sa nagibong mga sala kaidto. Kun arog kaiyan, taano ta dai purbaran na pag-adalan an dapit sa atang na pantubos ni Cristo sa saimong personal na pag-adal? Kun pag-aadalan niyato, huhurop-hurupon, asin ipapamibi an dapit sa nakakapakusog na temang iyan, makakatabang iyan sa sato na mabawasan an dai kinakaipuhan na pagkakonsiyensiya. Puwede pa nganing biyo nang mahali an pagkakonsiyensiya niyato sa mga kasalan na pinatawad na ni Jehova. Pag-isipan an saro pang manunudan niyato ki Pablo. Tibaad may nagkapira sa sato na binayaan an trabahong may halangkaw na suweldo tanganing inuton an intereses kan Kahadian. Kun siring, puwede daw niyatong lingawan an mga bagay sa likudan paagi sa dai na pagparaisip na may panghihinayang sa materyal na mga oportunidad na tibaad napalampas ta? (Bil. 11:4-6; Par. 7:10) Puwede pa nganing kaiba sa “mga bagay sa likudan” an mga naginibuhan ta na o an mga pagbalo na  natagalan ta kaidto. Siyempre, mas napaparani kita sa satong Ama pag ginigirumdom niyato kun paano kita binendisyunan asin sinuportaran ni Jehova sa nag-aging mga taon. Alagad, habo niyatong mamatian na igo na an mga nagibo ta para ki Jehova.—1 Cor. 15:58.

7. Sigun sa 1 Corinto 9:24-27, ano an kaipuhan tanganing manggana sa paurumbasan para sa buhay? Iilustrar.

⁷ Nasabutan na marhay ni Pablo an sinabi ni Jesus: “Maghinguwa nanggad kamo nin maigot.” (Luc. 13:23, 24) Aram ni Pablo na, arog ni Jesus, dapat na maghinguwa siya sagkod sa katapusan. Kaya ikinumparar niya an buhay nin Kristiyano sa sarong paurumbasan. (Basahon an 1 Corinto 9:24-27.) An sarong paradalagan sa paurumbasan nagdadanay na nakapokus sa finish line asin linilikayan an mga pandisturbo. Halimbawa, an mga paradalagan sa paurumbasan ngunyan sa siyudad tibaad mag-agi sa ruta na yaon an mga establisimiyento asin an iba pang puwedeng makadisturbo sa sainda. Maiisip mo daw na mapundo an sarong paradalagan tanganing hilingon an nakadispley na mga produkto sa tindahan? Dai niya nanggad iyan gigibuhon kun gusto niyang manggana! Sa paurumbasan para sa buhay, dapat man niyatong likayan an mga pandisturbo. Kun magdadanay kitang nakapokus sa satong pigmamawot, na maigot na naghihinguwa arog ni Pablo, makakamtan nanggad niyato an premyo!

8. Ano an tulong pagbalo na pag-uulayan ta?

⁸ Pag-ulayan niyato ngunyan an tulong pagbalo na posibleng makapaluya kan satong pagdalagan. Iyan an mga inaasahan na naaatraso, pagluya nin hawak, asin mga pagbalong haloy ta nang tinatagalan. Makakanuod kita sa mga indibidwal na nakayanan an siring na mga kamugtakan.—Fil. 3:17.

9. Ano an puwedeng magin epekto sa sato pag naaatraso an satong mga inaasahan?

⁹ Mga inaasahan na naaatraso. Normal sana na gustong-gusto ta nang mangyari an marahay na mga bagay na ipinanuga ni Jehova. Sa katunayan, kan ipahayag kan propeta ni Jehova na si Habacuc na gusto niyang tapuson na ni Jehova an karatan sa Juda, sinabi sa saiya ni Jehova na padagos na ‘maghalat.’ (Hab. 2:3) Alagad, pag garo baga naaatraso an kautuban kan satong mga inaasahan, puwedeng mabawasan an satong kaigutan. Tibaad madisganar pa ngani  kita. (Tal. 13:12) Nangyari iyan kan kapinunan kan ika-20 siglo. Kan panahon na iyan, dakul na linahidan na Kristiyano an nag-aasa na makakamtan na ninda an saindang balos sa langit pag-abot nin 1914. Kan dai iyan nangyari, ano an ginibo kan mga maimbod kan naatraso an saindang mga inaasahan?

10. Ano an ginibo nin sarong mag-agom kan naatraso an saindang mga inaasahan?

¹⁰ Pag-isipan an halimbawa nin duwang maimbod na lingkod ni Jehova na napaatubang sa siring na pagbalo. Nabawtismuhan si Brother Royal Spatz kan 1908 sa edad na 20. Sigurado siya na madali na niyang makamtan an saiyang balos sa langit. Sa katunayan, kan alukon niyang magpakasal an saiyang kailusyon na si Pearl, sinabi niya saiya: “Aram mo an mangyayari sa 1914. Kun mapakasal kita, dapat dalian ta na!” An Kristiyanong mag-agom daw na ini suminuko na sa paurumbasan para sa buhay kan dai ninda nakamtan an saindang balos sa langit kan 1914? Dai, huling an panginot na pokus ninda iyo an maimbod na paggibo kan kabutan nin Diyos, bako an pagkamit kan saindang balos. Determinado sindang tapuson an paurumbasan na may pakatagal. Asin tunay nanggad na nagdanay na aktibo asin maimbod si Royal saka Pearl sagkod na matapos an saindang buhay digdi sa daga pakalihis nin dakul na dekada. Siguradong gusto mo nang mahiling na bindikaron ni Jehova an saiyang pangaran asin soberaniya asin na utubon na an saiyang mga panuga. Makakasigurado ka na mangyayari iyan sa itinalaan na panahon ni Jehova. Sagkod na dai pa iyan nangyayari, lugod na padagos kitang magin sibot sa paglilingkod sa satong Diyos, na dai tinutugutan na madisganar kita o kaya mangluya huli sa naaatrasong mga inaasahan.

11-12. Taano ta puwede kitang padagos na makadalagan sa paurumbasan dawa pa nagluya na an satong hawak? Magtao nin halimbawa.

¹¹ Pagluya nin hawak. Bakong arog nin literal na paradalagan, dai kaipuhan na makusog ka sa pisikal tanganing padagos na kumusog sa espirituwal. Sa katunayan, dakul na indibidwal na nagluya na an hawak an napagdanay na makusog an determinasyon na padagos na mag-uswag sa espirituwal. (2 Cor. 4:16) Halimbawa, pagkatapos maglingkod sa Bethel sa laog nin 55 taon, si Brother Arthur Secord * 88 anyos na asin maluya na an hawak. Sarong aldaw, nagrani sa saiya an sarong nars tanganing asikasuhon siya. Naghiling ini sa saiya asin mabuot na nagsabi: “Brother Secord, dakulon na milya an nadumanan kan hawak na ini sa paglilingkod ki Jehova.” Alagad, dai nakapokus si Brother Secord sa kun ano man an naginibo niya. Hiniling niya man an nars, nagngirit, saka nagsabi: “Iyo, totoo ’yan. Pero bako an mga naginibuhan ta an mahalaga. An mahalaga iyo an mga ginigibo asin gigibuhon pa niyato.”

¹² Posibleng dakul na taon ka nang naglilingkod  ki Jehova asin huli sa nagluluyang salud, may mga bagay na dai mo na kayang gibuhon ngunyan. Kun arog kaiyan, dai madisganar. Makakasigurado ka na pinapahalagahan na marhay ni Jehova an ginibo mong maimbod na paglilingkod kaidto. (Heb. 6:10) Asin ngunyan man, tandaan na an bilog na kalag na paglilingkod dai nasusukol sa kun gurano kadakul an ginigibo ta sa paglilingkod ki Jehova. Imbes, ipinapahiling niyato an rarom kan satong debosyon paagi sa pagigin positibo asin sa paggibo kan gabos niyatong makakaya. (Col. 3:23) Nasasabutan ni Jehova an satong mga limitasyon asin dai siya naghahagad nin labi sa kaya niyatong itao.—Mar. 12:43, 44.

13. Paano kita napapakusog kan eksperyensiya ni Anatoly asin Lidiya na magpadagos sa paglilingkod ki Jehova sa ibong nin dakul na pagbalo?

¹³ Mga pagbalong haloy nang tinatagalan. May mga lingkod ni Jehova na dakul na taon na nagtagal nin mga kasakitan asin persekusyon. Halimbawa, 12 anyos pa sana kaidto si Anatoly Melnik * kan an saiyang ama arestaron, ipreso, asin puwersahan na dinara sa Siberia, na labing 7,000 kilometros an rayo sa saindang pamilya sa Moldova. Pakalihis nin sarong taon, dinara man sa Siberia si Anatoly, an saiyang ina, asin lolo saka lola. Kan huri, nakaatender na sinda sa mga pagtiripon sa saro pang baryo, pero kaipuhan nindang magbaklay nin 30 kilometros sa niyebe, na tinatagalan an grabeng lipot. Pag-abot nin panahon, tulong taon na napreso si Brother Melnik, harayo sa saiyang agom na si Lidiya, asin sa saindang sarong taon na aking babayi. Sa ibong kan dakul na taon nin kasakitan, si Anatoly saka an saiyang pamilya padagos na maimbod na naglingkod ki Jehova. Ngunyan, 82 anyos na si Anatoly asin naglilingkod siya sa sarong Komite kan Sangay sa Central Asia. Arog ni Anatoly asin Lidiya, lugod na gibuhon niyato an satong gabos na makakaya sa paglilingkod ki Jehova. Padagos na magtagal arog kan dati ta nang ginigibo.—Gal. 6:9.

14. Tanganing makamtan an saiyang premyo, ano an narealisar ni Pablo na dapat niyang gibuhon?

¹⁴ May kumpiyansa si Pablo na matatapos niya an paurumbasan asin makakamtan an saiyang premyo. Bilang linahidan na Kristiyano, hinalat-halat niyang makamtan “an premyong pag-apod nin Diyos para sa langitnon na buhay.” Alagad tanganing makamtan an premyong iyan, narealisar niya na kaipuhan niyang padagos na ‘magmaigot.’ (Fil. 3:14) Tinawan ni Pablo an mga taga Filipos nin sarong interesanteng pagkumparar tanganing tabangan sindang padagos na magpokus sa saindang premyo.

15. Paano ginamit ni Pablo an tema dapit sa pagkasiyudadano tanganing dagkahon an mga taga Filipos na padagos na ‘magmaigot’?

¹⁵ Ipinagirumdom ni Pablo sa mga taga Filipos an saindang pagkasiyudadano sa langit. (Fil.  3:20) Taano ta mahalagang girumdumon an siring na pagkasiyudadano? Kan panahon na idto, pinapahalagahan na marhay an pagigin siyudadano nin Roma. * Alagad, an linahidan na mga Kristiyano igwa nin mas marahay na pagkasiyudadano, saro na matao sa sainda nin mas marahay nanggad na mga pakinabang. Mayo lamang sinabi diyan an pagigin siyudadano nin Roma! Huli kaiyan, dinagka ni Pablo an mga taga Filipos na gumawi bilang mga siyudadano “sa paaging kauyon kan maugmang bareta manungod sa Cristo.” (Fil. 1:27) Nagtatao nin marahay na halimbawa ngunyan an linahidan na mga Kristiyano mantang padagos sindang nagmamaigot para makamtan an saindang premyo na buhay na daing katapusan sa langit.

16. Baga man an satong paglaom buhay sa langit o sa daga, ano an dapat na padagos niyatong gibuhon sigun sa Filipos 4:6, 7?

¹⁶ Baga man an satong paglaom buhay na daing katapusan sa langit o sa paraisong daga, dapat na padagos kitang magmaigot na abuton an premyong iyan. Ano man an satong kamugtakan, dai kita dapat na magsalingoy sa mga bagay na nasa likudan; ni tugutan an ano man na makaulang sa satong pag-uswag. (Fil. 3:16) Tibaad garo baga naaatraso an kautuban kan satong mga inaasahan, o tibaad nagluluya na an satong hawak. Tibaad dakul na taon na kitang nagtatagal nin mga kasakitan asin persekusyon. Ano man an satong kamugtakan, “dai . . . mahadit sa ano man na bagay.” Imbes, ipaaram sa Diyos an saimong mga kahagadan asin pagngayo-ngayo, asin tatawan ka niya nin katuninungan na labi pa sa saimong maiisip.—Basahon an Filipos 4:6, 7.

17. Ano an pag-uulayan niyato sa sunod na artikulo?

¹⁷ Arog nin sarong paradalagan na nagmamaigot na marhay sa huring parte kan paurumbasan, lugod na magdanay kitang biyong nakapokus sa pasuhan na tapuson an paurumbasan para sa buhay. Sagkod sa makakaya niyato depende sa satong kusog asin kamugtakan, lugod na maghinguwa kita asin maigot na mag-abante pasiring sa marahayon na mga bagay na nasa inutan. Ano an dapat niyatong gibuhon tanganing padagos kitang magmaigot sa tamang direksiyon asin sa rikas na kaya niyatong mapagdanay? Tatabangan kita kan sunod na artikulo na magbugtak nin tamang mga priyoridad asin na “masiyerto . . . kun ano an mas importanteng mga bagay.”—Fil. 1:9, 10.