1. Ano an gusto niyato gabos para sa satong mga kapamilya?

“PUON kan manudan ko an katotoohan, gusto kong makaibanan sa Paraiso an bilog kong pamilya,” an sabi nin sarong sister na si Pauline. * “Lalo nang gusto kong makaibanan sa paglilingkod ki Jehova an agom kong si Wayne asin an samong aking lalaki.” May mga kapamilya ka daw na dai pa namimidbid asin namumutan si Jehova? Posibleng kapareho ki Pauline an namamatian mo sa saimong mga kapamilya.

2. Anong mga hapot an pag-uulayan niyato sa artikulong ini?

² Dai niyato puwedeng piriton an satong mga kapamilya na akuon an maugmang bareta, pero puwede ta sindang dagkahon na buksan an saindang isip asin puso sa mensahe kan Bibliya. (2 Tim. 3:14, 15) Taano ta dapat niyatong patotoohan an satong mga kapamilya? Taano ta kaipuhan niyatong magpahiling nin empatiya? Ano an puwede niyatong gibuhon tanganing tabangan an satong mga kapamilya na mamutan man si Jehova arog ta? Asin paano kita matatabangan kan gabos sa satong kongregasyon?

3. Sigun sa 2 Pedro 3:9, taano ta dapat niyatong patotoohan an satong mga kapamilya?

³ Dai na mahahaloy, tatapuson na ni Jehova an sistemang ini. Idto sanang “igwang pusong nasa tamang kamugtakan para sa buhay na daing katapusan” an makakaligtas. (Gibo 13:48) Dakul na panahon asin kusog an ginagamit niyato tanganing hulitan an mga dai ta kabisto sa satong komunidad, kaya normal sana na gusto ta man na makaibanan an satong mga kapamilya sa paglilingkod ki Jehova. An satong mamumuton na Ama, si Jehova, ‘habong malaglag  an siisay man, imbes, gusto niya na an gabos magkaigwa nin oportunidad na magsulsol.’—Basahon an 2 Pedro 3:9.

4. Anong sala an puwede niyatong magibo pag nagpapatotoo sa satong mga kapamilya?

⁴ Kaipuhan niyatong isaisip na may tama asin salang paagi nin paghiras kan mensahe nin kaligtasan. Tibaad mataktika kita pag nagpapatotoo sa dai ta kabisto, pero tibaad sobra kita kaprangka pag nakikipag-ulay sa satong mga kapamilya.

5. Ano an dapat niyatong girumdumon bago ihiras an katotoohan sa satong mga kapamilya?

⁵ Tibaad nagbabasol kita pag nagigirumduman ta kan inot niyatong purbaran na magpatotoo sa satong mga kapamilya asin iniisip na kutana sa ibang paagi niyato ginibo iyan. Sinadol ni apostol Pablo an mga Kristiyano: “Pirmi lugod na magin mabuot an saindong pagtaram, na tinimplahan nin asin. Paagi kaiyan maaaraman nindo kun paano sisimbagon an lambang tawo.” (Col. 4:5, 6) Marahay na girumdumon an sadol na iyan pag nakikipag-ulay kita sa satong mga kapamilya. Kun dai, tibaad magkulog an saindang buot imbes na madagka na magdangog sa sato.

6-7. Magtao nin halimbawa na nagpapahiling na kaipuhan na magpahiling nin empatiya sa agom na bakong kapagtubod.

⁶ Magpahiling nin empatiya. Si Pauline, na nasambitan sa inutan, nagsabi: “Kan primero, puro sana espirituwal na mga bagay an gusto kong ipinapakipag-ulay ki agom. Dai mi pinag-uulayan an dapit sa pang-aroaldaw na mga bagay.” Alagad, an agom ni Pauline na si Wayne dikit sana an aram sa Bibliya asin dai niya nasasabutan an pigpaparasabi ni Pauline. Para saiya, garo baga an relihiyon na sana kan saiyang agom an pigpaparaisip kaini. Nahahadit siya na tibaad sarong peligrosong sekta an linalaugan kan saiyang agom asin na napapatubod sana ini.

⁷ Inadmitir ni Pauline na may panahon kaidto na dakul na oras niyang kaibanan an mga tugang  pag banggi saka pag Sabado asin Domingo—sa mga pagtiripon, sa paghuhulit, asin sa mga pagtiripon-tipon. “Minsan mayong naaabutan sa harong si Wayne pagpuli niya kaya namumundo siya,” an sabi ni Pauline. Siyempre, nami-miss ni Wayne an saiyang agom asin aki. Dai niya bisto an mga kaibanan ninda, saka garo baga mas importante na para sa saiyang agom an bagong mga amigo kaini kisa sa saiya. Kaya nagsabi ini na gusto na niyang makidiborsiyo. Naiisip mo daw kun paano kutana puwedeng nagin mas may empatiya si Pauline?

8. Sigun sa 1 Pedro 3:1, 2, ano an posibleng marhay na makatao nin pinakadakulang epekto sa satong mga kapamilya?

⁸ Magpahiling nin marahay na halimbawa. Sa parati, mas dakula an epekto sa satong mga kapamilya kan satong ginigibo kisa sa satong sinasabi. (Basahon an 1 Pedro 3:1, 2.) Kan huri, narealisar ni Pauline an katotoohan na iyan. “Aram kong namumutan kami ni Wayne asin na habo niya man talagang makidiborsiyo,” an sabi niya. “Pero huli sa sinabi ni Wayne, narealisar ko na dapat punan ko nang gibuhon an mga bagay-bagay kauyon sa paagi ni Jehova. Imbes na magparataram, kaipuhan na magpahiling ako nin marahay na halimbawa paagi sa sakong paggawi.” Dai na pigparapirit ni Pauline na ipakipag-ulay ki Wayne an dapit sa Bibliya, asin nagpuon na siyang makipag-ulay sa saiya dapit sa pang-aroaldaw na mga bagay. Narisa ni Wayne na nagi nang mas mapagpatuninong an saiyang agom, asin nahiling niyang nagigin mas tultol an saindang aki. (Tal. 31:18, 27, 28) Kan nahiling ni Wayne an marahay na epekto sa saiyang pamilya kan mensahe kan Bibliya, binuksan niya an saiyang isip asin puso sa mensahe kan Tataramon nin Diyos.—1 Cor. 7:12-14, 16.

9. Taano ta dapat na padagos kitang magmaigot na tabangan an satong mga kapamilya?

⁹ Padagos na magmaigot na tabangan an saimong mga kapamilya. Nagtao nin halimbawa  si Jehova para sa sato. “Padagos” o pauruutro niyang tinawan an saiyang banwaan nin oportunidad na magdangog sa maugmang bareta asin magkamit nin buhay. (Jer. 44:4, An Marahay na Bareta Biblia) Asin sinabi ni apostol Pablo ki Timoteo na padagos na pagmaigutan o magin matiyaga sa pagtabang sa iba. Taano? Huling sa paggibo kaiyan, maililigtas niya an saiyang sadiri asin idtong mga nagdadangog sa saiya. (1 Tim. 4:16) Namumutan ta an satong mga kapamilya, kaya gusto niyato na maaraman ninda an mga katotoohan na nasa Tataramon nin Diyos. Pag-abot nin panahon, an mga sinasabi asin paggawi ni Pauline nagkaigwa nin marahay na impluwensiya sa saiyang pamilya. Ngunyan, maugma siyang naglilingkod ki Jehova kaiba an saiyang agom. Pareho sindang payunir, asin naglilingkod bilang elder si Wayne.

10. Taano ta kaipuhan niyatong magin mapasensiya?

¹⁰ Magin mapasensiya. Pag namumuhay na kita kauyon kan mga pamantayan nin Diyos, tibaad madipisilan an satong mga kapamilya na mag-adjust sa bago tang mga paniniwala asin pamumuhay. Sa parati, inot nindang naririsa na dai na kita nakikiiba sa sainda sa relihiyosong mga selebrasyon asin dai na man kita nagpapartisipar sa mga aktibidad sa pulitika. Sa primero, posibleng maanggot sa sato an iba tang kapamilya. (Mat. 10:35, 36) Pero dai ta dapat isipon na dai na nanggad sinda mabago. Kun mapundo na kita sa pagmamaigot na tabangan sindang masabutan an satong mga tinutubod, garo ta na man sana sinda hinusgaran na dai sinda maninigong mag-ako nin buhay na daing katapusan. Bako kita an tinawan ni Jehova kan trabaho na maghusgar—iinasignar niya iyan ki Jesus. (Juan 5:22) Kun mapasensiya kita, tibaad pag-abot nin panahon magin andam na an satong mga kapamilya na magdangog sa satong mensahe.—Hilingon an kahon na “ Gamiton sa Pagtukdo an Satong Website.”

11-13. Ano an nanudan mo sa paagi nin pagtratar ni Alice sa saiyang mga magurang?

¹¹ Magin marigon pero mataktika. (Tal. 15:2) Pag-isipan an halimbawa ni Alice. Nanudan niya an dapit ki Jehova kan nakaistar siya harayo sa saiyang mga magurang, na mga ateista asin aktibo sa pulitika. Narealisar niya na kaipuhan niyang sabihon tulos sa sainda an marahay na mga bagay na nanunudan niya. Sinabi niya: “Kun papahaluyon mo pang sabihon na nagbago na an saimong mga tinutubod asin kaugalian, mas ikakabigla asin ikakakulog iyan kan buot ninda.” Nagpadara siya nin mga surat sa saiyang mga magurang na hinahapot sinda kun ano an opinyon ninda sa mga katukduan sa Bibliya na sa hiling niya pagkakainteresan ninda, arog nin pagkamuot. (1 Cor. 13:1-13) Pinasalamatan niya an saiyang mga magurang sa pagpadakula asin pag-ataman ninda sa saiya, saka nagpadara man siya nin mga regalo. Pag nagbibisita siya sa harong kan mga magurang niya, ginigibo niya an gabos na magigibo niya para tabangan an saiyang ina sa mga gibuhon sa harong. Kan primero, bakong marahay an reaksiyon kan mga magurang niya kan sabihon sa sainda ni Alice an dapit sa saiyang bagong mga tinutubod.

¹² Pag si Alice nasa harong kan saiyang mga magurang, ipinapadagos niya an saiyang iskedyul nin pagbasa nin Bibliya. “Nakatabang iyan ki Mama na masabutan kun gurano kahalaga sako kan Bibliya,” an sabi ni Alice. Kan panahon na iyan, nagdesisyon an ama ni Alice na pag-adalan an dapit sa Bibliya tanganing masabutan kun taano ta nagbago an kaisipan kan saiyang aki, asin gusto niyang hanapan nin sala an Bibliya. “Tinawan ko siya nin Bibliya,” an sabi ni Alice, “dangan sinuratan ko iyan nin mensahe para saiya.” Ano an resulta? Imbes na may mahanap na sala, nataros na marhay an puso kan ama ni Alice sa nabasa niya sa Tataramon nin Diyos.

¹³ Kaipuhan niyatong magin marigon pero mataktika, dawa kun may mga pagbalo. (1 Cor. 4:12b) Halimbawa, kaipuhan ni Alice na tagalan an pagkontra kan saiyang ina. “Kan mabawtismuhan ako, inapod ako ni Mama na ‘maraot na aki.’” Ano an ginibo ni Alice? “Imbes na likayan  an isyu, magalang kong ipinaliwanag sa saiya na desisyon kong magin Saksi ni Jehova asin dai na iyan mababago. Hininguwa kong asiguraron si Mama na talagang namumutan ko siya. Pareho kaming naghibi, dangan linutuan ko siya nin masiram na kakanon. Puon kaidto, sinasabi na ni Mama na nakakatabang sa sako an Bibliya na magin mas marahay na tawo.”

14. Taano ta dapat na dai nanggad kita magpadara sa panggigipit?

¹⁴ Tibaad mangaipo nin haloy-haloy na panahon bago lubos na masabutan kan mga kapamilya niyato kun gurano kita kaseryoso sa paglilingkod ki Jehova. Halimbawa, kan magdesisyon si Alice na magpayunir imbes na ipadagos an karera na gusto kan mga magurang niya para sa saiya, hinibian giraray siya kan saiyang ina. Pero nagdanay na marigon si Alice. Sabi niya: “Kun mapadara ka sa sarong panggigipit, posibleng marhay na gigipiton ka kan mga kapamilya mo sa iba pang mga bagay. Pero kun mabuot alagad marigon ka sa saimong kapamilya, tibaad magdangog sa saimo an nagkapira sa sainda.” Iyan an nangyari ki Alice. Payunir na ngunyan an mga magurang niya, asin elder na an saiyang ama.

15. Sigun sa Mateo 5:14-16 asin 1 Pedro 2:12, paano puwedeng makatabang sa satong mga kapamilya an ‘marahay na mga gibo’ nin iba?

¹⁵ Irinarani ni Jehova sa saiya an mga tawo paagi sa ‘marahay na mga gibo’ kan Kristiyanong kongregasyon. (Basahon an Mateo 5:14-16; 1 Pedro 2:12.) Kun bakong Saksi ni Jehova an saimong agom, may nakamidbid na daw siyang mga kakongregasyon mo? Si Pauline, na nasambitan kasubago, inimbitaran sa saindang harong an saiyang mga kakongregasyon tanganing mabisto sinda kan agom niyang si Wayne. Nagigirumduman ni Wayne kun paano siya tinabangan nin sarong brother na mahiling kun ano talagang klase nin tawo an mga Saksi: “Nag-leave  siya sa trabaho para lang ibanan akong maghiling nin sports game. Kaya naisip ko, ‘Normal man palan siya!’”

16. Taano ta dapat niyatong imbitaran an satong mga kapamilya na mag-atender sa mga pagtiripon?

¹⁶ An sarong marahayon na paagi na matatabangan niyato an satong mga kapamilya iyo an pag-imbitar sa sainda na mag-iba sa sato sa mga pagtiripon kan kongregasyon. (1 Cor. 14:24, 25) Sa Memoryal inot na nag-atender si Wayne huling pagkatapos iyan kan saiyang trabaho asin halipot sana an programa. “Haros mayo akong nasabutan sa pahayag,” an sabi niya, “pero nagigirumduman ko an mga tawo. Rinanihan ninda ako asin pig-welcome saka higot na inabrasa. Namatian ko talaga na sinsero sinda.” May sarong mag-agom na mabuuton na marhay ki Pauline; tinatabangan ninda siya sa pag-asikaso sa aki niya mantang nasa mga pagtiripon asin ministeryo. Kaya kan magdesisyon na si Wayne na kaipuhan niyang mas masabutan an bagong mga tinutubod ni Pauline, nakiulay siya sa agom na lalaki na iyo an magtukdo sa saiya.

17. Dai niyato dapat basulon an satong sadiri huli sa ano, pero taano ta dai kita dapat pumundo sa pagmamaigot na tabangan an satong mga kapamilya?

¹⁷ Naglalaom kita na makakaibanan niyato sa paglilingkod ki Jehova an gabos tang kapamilya. Alagad, sa ibong kan gabos niyatong mga paghihinguwang tabangan an satong mga kapamilya na magin lingkod ni Jehova, posibleng dai ninda akuon an katotoohan. Kun arog kaiyan, dai ta dapat basulon an satong sadiri sa desisyon ninda. Tutal, dai man niyato puwedeng piriton an siisay man na akuon an satong mga tinutubod. Dawa arog kaiyan, dai pagbaliwalaon an puwedeng magin epekto sa saimong kapamilya mantang nahihiling ninda kun gurano ka kaugma sa paglilingkod ki Jehova. Ipamibi sinda. Magin mataktika pag nakikipag-ulay sainda. Dai nanggad magpundo sa pagmamaigot na tabangan sinda! (Gibo 20:20) Makakasigurado kang bebendisyunan ni Jehova an saimong mga paghihinguwa. Asin kun magdesisyon an saimong mga kapamilya na magdangog sa saimo, maliligtas sinda!