1. Sairisay an nagtarabang tanganing maestablisar an kongregasyon sa Filipos?

KAN si apostol Pablo, Silas, Lucas, asin Timoteo mag-abot sa Filipos na sarong kolonya nin Roma, nahiling ninda na dakul duman an interesado sa mensahe kan Kahadian. An apat na maigot na tugang na ini nagtarabang tanganing maestablisar an sarong kongregasyon, asin an bagong mga disipulo nagpuon na magtiripon, posibleng sa harong kan mapag-istimar na kapagtubod na si Lydia.—Gibo 16:40.

2. Anong kadipisilan an napaatubang tulos sa bagong kongregasyon na iyan?

² Napaatubang tulos sa kadipisilan an bagong kongregasyon. Pinahiro ni Satanas an mga kaiwal kan katotoohan na maringis na kontrahon an gibuhon na paghuhulit kan maimbod na mga Kristiyanong iyan. Si Pablo asin Silas inaresto, hinampak nin pamakol, asin iprineso. Kan palibrehon na sinda sa presuhan, binisita ninda an bagong mga disipulo asin pinakusog an mga ini. Dangan, si Pablo, Silas, asin Timoteo naghali sa siyudad mantang si Lucas minalataw na nagdanay diyan. Ano an nangyari sa bagong establisar na kongregasyon? Sa tabang kan espiritu ni Jehova, an bagong mga Kristiyano padagos na naglingkod nin may kaigutan ki Jehova. (Fil. 2:12) May marahay na dahilan nanggad si Pablo na mag-orgulyo huli sa sainda!

3. Arog kan mababasa sa Filipos 1:9-11, ano an ipinamibi ni Pablo?

³ Pakalihis nin mga sampulong taon, nagsurat si Pablo sa kongregasyon sa Filipos. Mantang binabasa mo an surat na iyan, madali mong maririsa an pagkamuot ni Pablo sa saiyang mga tugang. Sinabi niya: ‘Napupungaw ako sa saindo gabos asin an rarom kan pagkamuot ko sa saindo siring kan pagkamuot ni Cristo Jesus.’ (Fil. 1:8) Sinabi niya sa sainda na namimibi siya para sa sainda. Hinagad niya ki Jehova na tabangan sindang urog pang kumusog  an saindang pagkamuot, na masiyerto an mas importanteng mga bagay, na mayong makuang depekto sa sainda, na dai ninda mapasingkog o maulang an pagtubod kan iba, asin na padagos na mamunga nin mga bungang matanos. Siguradong mauyon ka na makikinabang kita ngunyan sa udok sa pusong mga tataramon ni Pablo. Kaya basahon niyato an surat ni Pablo sa mga taga Filipos. (Basahon an Filipos 1:9-11.) Dangan, hilingon niyato an sinambit niyang mga punto asin pag-ulayan ta kun paano niyato iaaplikar an kada saro kaiyan.

4. (a) Sigun sa 1 Juan 4:9, 10, paano ipinahiling ni Jehova an saiyang pagkamuot sa sato? (b) Gurano dapat kakusog kan satong pagkamuot sa Diyos?

⁴ Ipinahiling ni Jehova an saiyang dakulang pagkamuot sa sato paagi sa pagsugo sa daga kan saiyang Aki tanganing magadan para sa satong mga kasalan. (Basahon an 1 Juan 4:9, 10.) An bakong makasadiring pagkamuot nin Diyos nagpapahiro sa sato na kamutan siya. (Roma 5:8) Gurano dapat kakusog kan pagkamuot niyato sa Diyos? Sinimbag ni Jesus an hapot na iyan kan sabihon niya sa sarong Fariseo: “Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip.” (Mat. 22:36, 37) Gusto niyatong kamutan si Jehova sa bilog niyatong puso. Asin gusto niyato na urog pang kumusog sa kada aldaw an satong pagkamuot sa saiya. Sinabi ni Pablo sa mga taga Filipos na an saindang pagkamuot dapat na “lalo pang mag-urog nin mag-urog.” Ano an puwede niyatong gibuhon tanganing pakusugon an satong pagkamuot sa Diyos?

5. Paano urog na magkukusog an satong pagkamuot?

⁵ Kaipuhan niyatong mamidbid an Diyos tanganing kamutan siya. Sinasabi kan Bibliya: “An siisay man na dai namumuot dai nakakamidbid sa Diyos, huli ta an Diyos pagkamuot.” (1 Juan 4:8) Sinabi ni apostol Pablo na mas magkukusog an satong pagkamuot sa Diyos mantang nagkukua kita nin “tamang kaaraman asin lubos na pakamansay” dapit sa Saiya. (Fil. 1:9) Kan magpuon kitang mag-adal nin Bibliya, namutan na niyato an Diyos dawa dikit pa lang an aram ta dapit sa saiya. Asin mantang mas namimidbid niyato si Jehova, mas nagkukusog man an satong pagkamuot sa saiya. Kaya para sa sato, an regular na pag-adal sa Bibliya asin an paghurop-hurop sa Tataramon nin Diyos kaiba nanggad sa pinakamahalagang mga bagay sa satong buhay!—Fil. 2:16.

6. Sigun sa 1 Juan 4:11, 20, 21, sa anong paagi urog niyatong mapapakusog an satong pagkamuot?

⁶ An dakulaon na pagkamuot sa sato nin Diyos makakapahiro sa sato na kamutan an satong mga tugang. (Basahon an 1 Juan 4:11, 20, 21.) Tibaad maisip niyato na magigin pasil na sana sa sato na kamutan an satong mga tugang. Tutal, parareho niyatong sinasamba si Jehova asin nagmamaigot kitang arugon an saiyang marahayon na mga kuwalidad. Inaarog niyato an halimbawa ni Jesus, na dakulaon an pagkamuot kaya itinao niya an saiyang buhay alang-alang sa sato. Pero, tibaad madipisilan kita kun minsan na sunudon an pagbuot na kamutan an lambang saro. Pag-isipan an sarong halimbawa sa kongregasyon sa Filipos.

7. Ano an manunudan niyato sa konseho ni Pablo ki Eudias asin Sintique?

⁷ Si Eudias asin Sintique maigot na mga sister na naglingkod “kaibanan” ni apostol Pablo. Pero, posibleng nagkaigwa sinda nin dai pagkasinabutan kaya naapektaran kaiyan an saindang pagigin mag-amigo. Sa surat ni Pablo sa kongregasyon kun sain nakaasosyar an mga sister na iyan, espesipikong nginaranan ni Pablo si Eudias asin Sintique asin tinawan sinda nin direkta sa puntong konseho “na maghinguwang magkáuyon an isip.” (Fil. 4:2, 3) Namatian ni Pablo na kaipuhan niyang sabihan an bilog na kongregasyon: “Padagos nindong gibuhon an gabos na bagay na mayo nin paggumod-gumod asin pagdiriskutiran.” (Fil. 2:14) Siguradong an direkta sa  puntong konseho ni Pablo nakatabang bako sana sa maimbod na mga sister na idto kundi pati man sa bilog na kongregasyon na pakusugon ninda an saindang pagkamuot sa lambang saro.

8. Ano an dakulang ulang sa pagkamuot niyato sa satong mga tugang, asin paano niyato mapapangganahan iyan?

⁸ Arog ni Eudias asin Sintique, tibaad mapaatubang kita sa sarong dakulang ulang sa pagkamuot niyato sa iba—an tendensiya na magpokus sa nagigibong mga sala. Gabos kita nasasala aroaldaw. Kun pagpaparahilingon niyato an mga sala kan iba, an pagkamuot niyato sa sainda magigin malipot. Halimbawa, kun nalingawan nin sarong brother na tabangan kita sa paglinig sa Kingdom Hall, tibaad masuya kita. Dangan kun bibilangon ta na an mga sala na nagibo kan satong tugang, mas lalo pa kitang masusuya sa saiya asin mababawasan an satong pagkamuot sa saiya. Kun arog kaiyan an sitwasyon mo, marahay na hurop-hurupon an katotoohan na ini: Nahihiling ni Jehova an pagkabakong perpekto niyato pati kan satong tugang. Alagad sa ibong kan pagkabakong perpektong ini, namumutan niya pa man giraray an satong tugang asin namumutan niya pa man giraray kita. Huli kaiyan, kaipuhan niyatong arugon an pagkamuot ni Jehova asin padagos na magin positibo an pagmansay sa satong mga tugang. Pag pinagmamaigutan niyatong kamutan an satong mga tugang, pinapakusog ta an satong bugkos nin pagkasararo.—Fil. 2:1, 2.

9. Ano an kaiba sa “mas importanteng mga bagay” na sinambit ni Pablo sa saiyang surat sa mga taga Filipos?

⁹ Pinasabngan si Pablo kan banal na espiritu na sabihan an mga taga Filipos—asin an gabos na Kristiyano—na ‘siyertuhon kun ano an mas importanteng mga bagay.’ (Fil. 1:10) Kaiba sa importanteng mga bagay na iyan an pagpakangbanal sa pangaran ni Jehova, an kautuban kan saiyang mga katuyuhan, asin an katuninungan saka pagkasararo kan kongregasyon. (Mat. 6:9, 10; Juan 13:35) Pag isinesentro niyato an satong buhay sa importanteng mga bagay na ini, pinapatunayan niyato na namumutan ta si Jehova.

10. Ano an dapat niyatong gibuhon tanganing mayong makuang depekto sa sato si Jehova?

¹⁰ Sinabi man ni Pablo na dapat na “mayong makuang depekto” sa sato. Dai buot sabihon kaini na dapat kitang magin perpekto. Dai niyato kayang magin mayong depekto na kapareho kan pagigin mayong depekto kan Diyos na Jehova. Alagad ibibilang kita ni Jehova na mayong depekto kun gigibuhon niyato an satong pinakamakakaya na pakusugon an satong pagkamuot asin siyertuhon kun ano an mas importanteng mga bagay. An sarong paagi na ipinapahiling niyato an satong pagkamuot iyo an paggibo kan satong pinakamakakaya na likayan na mapasingkog o maulang an pagtubod kan iba.

11. Taano ta dapat niyatong likayan na maulang an pagtubod kan iba?

¹¹ An instruksiyon na likayan na mapasingkog o maulang an pagtubod kan iba sa katunayan sarong patanid. Paano niyato puwedeng maulang an pagtubod nin saro? Paagi sa pinipili tang libangan, pagbado, o maski ngani trabaho. Tibaad bako man sala an ginigibo niyato. Pero kun an satong mga pinipili nakakaapektar sa konsiyensiya nin saro asin magin dahilan na magluya an saiyang pagtubod, seryosong bagay iyan. Sinabi ni Jesus na mas marahay pang sabitan kita sa satong liog nin magabat na gapo asin isalya sa dagat kisa mapasingkog niyato an saro sa saiyang mga karnero!—Mat. 18:6.

12. Ano an manunudan niyato sa halimbawa nin sarong mag-agom na payunir?

¹² Risahon kun paano inaplikar nin sarong mag-agom na payunir an patanid ni Jesus. Naglingkod sinda kaidto sa sarong kongregasyon kaiba an sarong bago pa sanang mabawtismuhan na mag-agom na hali sa pamilyang konserbatibong marhay. An mag-agom na ini na baguhan naniniwala na dai dapat magsine an mga Kristiyano —dawa nin marahay man na mga pelikula. Kan maaraman nindang nagsine an mag-agom na payunir, ikinauyam na marhay ninda iyan. Pagkatapos kaiyan, dai na nguna nagsine an mag-agom na payunir sagkod na dai pa nasasanay kan mag-agom na baguhan an saindang konsiyensiya na magin mas balanse. (Heb. 5:14) Paagi kaiyan, pinatunayan kan mag-agom na payunir na namumutan ninda an saindang bagong mga tugang bako sanang paagi sa tataramon kundi paagi sa gibo.—Roma 14:19-21; 1 Juan 3:18.

13. Paano niyato puwedeng papagkasalaon an sarong indibidwal?

¹³ An saro pang paagi na puwedeng maulang niyato an pagtubod kan iba iyo an papagkasalaon siya. Paano puwedeng mangyari iyan? Imahinara an sitwasyon na ini. Pagkatapos nin halawig saka maigot na paghihinguwa, nakontrol man giraray nin sarong tinutukduan sa Bibliya an saiyang pagkaadikto sa inumon na de-alkohol. Narealisar niya na dapat biyo na niyang likayan iyan. Marikas an saiyang pag-uswag asin nabawtismuhan. Pag-abot nin panahon, inimbitaran siya nin sarong brother sa sarong Kristiyanong pagtiripon-tipon asin inalukan nin inumon na de-alkohol, na sinasabi: “Kristiyano ka na ngunyan; igwa ka na kan espiritu ni Jehova. Saro sa mga aspekto kan banal na espiritu an pagpupugol sa sadiri. Kun may pagpupugol ka sa sadiri, makakaya mong mag-inom nin tama sana.” Imahinaron ta na sana an posibleng magin konsekwensiya kun susunudon kan baguhan na brother an salang sadol na iyan!

14. Paano nakakatabang sa sato an Kristiyanong mga pagtiripon na iaplikar an mga instruksiyon sa Filipos 1:10?

¹⁴ An satong Kristiyanong mga pagtiripon nakakatabang sa sato na iaplikar sa dakul na paagi an mga instruksiyon sa Filipos 1:10. Inot,  an programa nin abundang espirituwal na kakanon nagpapagirumdom sa sato kun ano an ibinibilang ni Jehova na mas mahalaga. Ikaduwa, nanunudan niyato kun paano iaaplikar an satong mga nanunudan tanganing mayong makuang depekto sa sato. Asin ikatulo, napapahiro kita “na magpahiling nin pagkamuot asin marahay na mga gibo.” (Heb. 10:24, 25) Mantang mas napapakusog kita kan satong mga tugang, urog man na magkukusog an pagkamuot niyato sa satong Diyos asin sa satong mga tugang. Pag namumutan niyato nin bilog na puso an Diyos asin an satong mga tugang, gigibuhon ta an satong bilog na makakaya na likayan na maulang an pagtubod kan satong mga tugang.

15. Ano an buot sabihon kan ‘mapano nin mga bungang matanos’?

¹⁵ Udok na namibi si Pablo na an mga taga Filipos lugod na ‘mapano nin mga bungang matanos.’ (Fil. 1:11) Siguradong kaiba sa “mga bungang matanos” na iyan an pagkamuot ninda ki Jehova asin sa saiyang mga lingkod. Kaiba man diyan an pagsabi sa iba kan dapit sa saindang pagtubod ki Jesus asin sa magayunon nindang paglaom. Naggamit an Filipos 2:15 nin saro pang ilustrasyon, an ‘pagliwanag bilang mga ilaw sa kinaban.’ Angay nanggad iyan huling inapod ni Jesus an saiyang mga disipulo na “ilaw kan kinaban.” (Mat. 5:14-16) Ipinagbuot niya man sa saiyang mga parasunod na “gumibo . . . nin mga disipulo,” asin sinabi niya na sinda “magigin mga saksi . . . sa pinakaharayong parte kan daga.” (Mat. 28:18-20; Gibo 1:8) Namumunga kita nin “mga bungang matanos” pag aktibo kitang nakikikabtang sa pinakamahalagang gibuhon na ini.

16. Paano ipinapahiling kan Filipos 1:12-14 na puwede kitang magliwanag bilang mga ilaw dawa nasa masakit na mga kamugtakan? (Hilingon an ritrato sa cover.)

¹⁶ Ano man an satong kamugtakan, puwede kitang magliwanag bilang mga ilaw. Kun minsan, an garo baga ulang sa pagpahayag kan maugmang bareta puwedeng magin oportunidad na makapaghulit kita. Halimbawa, nakapreso  sa harong si apostol Pablo mantang nasa Roma kan magsurat siya sa mga taga Filipos. Alagad dawa nakapreso siya, hinulitan niya an saiyang mga guwardiya asin mga bisita. Maigot na naghulit si Pablo sa ibong kan saiyang kamugtakan, asin nagtao ini sa mga tugang nin kumpiyansa asin kusog nin buot “sa pagpahayag kan tataramon nin Diyos na daing takot.”—Basahon an Filipos 1:12-14; 4:22.

17. Paano padagos na nakapaghulit an nagkapirang tugang dawa nasa masakit na mga kamugtakan?

¹⁷ Dakul sa satong mga tugang an may oportunidad na arugon an halimbawa nin kusog nin buot ni Pablo. Nakaistar sinda sa mga nasyon na dai sinda puwedeng maghulit sa publiko o sa harong-harong, kaya naghahanap sinda nin ibang mga paagi tanganing ipahayag an maugmang bareta. (Mat. 10:16-20) Sa saro sa mga nasyon na iyan, isinuherir nin sarong paraataman nin sirkito na kobrehan kan lambang parahayag an saindang sadiring “teritoryo”—an saindang mga kapamilya, kataraid, kaeskuwela, katrabaho, asin mga kabisto. Sa laog nin duwang taon, nagdakul nanggad an bilang kan mga kongregasyon sa sirkitong iyan. Tibaad dai man kita nakaistar sa nasyon na dai kita puwedeng maghulit sa publiko. Alagad, makakanuod kita nin mahalagang leksiyon sa halimbawa kan satong mapamaaging mga tugang: Pirming maghanap nin mga paagi tanganing lubos na makikabtang sa ministeryo, na may kumpiyansang tatawan ka ni Jehova kan kinakaipuhan mong kusog na mapangganahan an ano man na ulang.—Fil. 2:13.

18. Ano an dapat na determinado niyatong gibuhon?

¹⁸ Ngunyan urog kasuarin man, lugod na magin determinado kitang iaplikar an ipinasabong na konseho sa surat ni Pablo sa mga taga Filipos. Lugod na siyertuhon niyato an mas importanteng mga bagay, na mayo nin makuang depekto sa sato, likayan na mapasingkog o maulang an pagtubod kan iba, asin mamunga nin mga bungang matanos. Sa siring, urog pang magkukusog an satong pagkamuot asin matatawan niyato nin onra an satong mamumuton na Ama, si Jehova.