1. Taano ta linalang ni Jehova an buhay?

MAY panahon kaidto na solo-solo si Jehova. Pero bako siyang mamundo. Dai niya kaipuhan an siisay man para magin maugma. Dawa arog kaiyan, gusto nin Diyos na mabuhay an iba asin magin maugma sinda. Huli sa pagkamuot, nagpuon si Jehova na maglalang.—Sal. 36:9; 1 Juan 4:19.

2. Ano an namatian ni Jesus asin kan mga anghel manungod sa mga linalang ni Jehova?

² Inot, naglalang si Jehova nin kapwa trabahador. Dangan, paagi sa panganay na Aking ini, “an gabos na iba pang bagay linalang,” kaiba na an milyon-milyon na anghel. (Col. 1:16) Ikinaugmang marhay ni Jesus an oportunidad na magtrabaho kaiba kan saiyang Ama. (Tal. 8:30) Asin may dahilan man para mag-ugma an mga aki nin Diyos na mga anghel. Nahiling ninda mismo an paglalang ni Jehova asin kan saiyang Ekspertong Trabahador, si Jesus, sa kalangitan asin sa daga. Ano an reaksiyon kan mga anghel? “Nagkururahaw [sinda] nin pag-umaw” kan nalalang an daga, asin siguradong nagpadagos sinda sa pag-umaw sa lambang linalang ni Jehova, kaiba na an saiyang huring obra maestra, an mga tawo. (Job 38:7, NWT; Tal. 8:31) An lambang saro sa mga linalang na ini nagpapahayag kan pagkamuot asin kadunungan ni Jehova.—Sal. 104:24; Roma 1:20.

3. Arog kan ipinaparisa sa 1 Corinto 15:21, 22, ano an nagin posible dahil sa atang na pantubos ni Jesus?

³ Gusto ni Jehova na mabuhay nin daing katapusan an mga tawo sa magayon na planeta na linalang niya. Pero kan magrebelde si Adan asin Eva sa saindang mamumuton na Ama, nagkasala  sinda kaya sinda asin an gabos na magigin gikan ninda magagadan pag-abot nin panahon. (Roma 5:12) Ano an ginibo ni Jehova? Sinabi niya tulos kun paano niya ililigtas an katawuhan. (Gen. 3:15) Matao si Jehova nin pantubos na magpapagin posible na mapatalingkas sa kasalan asin kagadanan an mga aki ni Adan asin Eva. Dangan matatawan niya na nin pagkakataon an lambang tawo na pilion na maglingkod sa Saiya asin magkamit nin buhay na daing katapusan.—Juan 3:16; Roma 6:23; basahon an 1 Corinto 15:21, 22.

4. Anong mga hapot an pag-uulayan niyato sa artikulong ini?

⁴ Dakul an puwedeng maihapot manungod sa panuga nin Diyos na buhayon an mga gadan. Halimbawa, paano daw kaya gigibuhon an pagkabuhay liwat? Mabibisto ta daw an mga mahal niyato sa buhay pag binuhay na liwat sinda? Sa anong mga paagi magtatao sa sato nin kaugmahan an pagkabuhay liwat? Asin paanong an paghurop-hurop sa pagkabuhay liwat makakatabang sa sato na urog na pahalagahan an pagkamuot, kadunungan, asin pagigin mapasensiya ni Jehova? Pag-ulayan niyato an lambang hapot na iyan.

5. Taano ta rasonableng asahan na an pagbuhay liwat gigibuhon sa organisado asin luway-luway na paagi?

⁵ Pag binuhay na liwat ni Jehova paagi kan saiyang Aki an minilyon na tawo, puwede niyatong asahan na bakong gabos sarabay na bubuhayon. Taano? Huling an biglang pagdakul kan populasyon sa daga posibleng marhay na magkawsa nin kariribukan. Asin dai lamang si Jehova magibo nin ano man sa bakong organisadong paagi. Aram niya na para magdanay an katuninungan, dapat na pagdanayon na areglado an mga bagay-bagay. (1 Cor. 14:33) Nagpahiling nin kadunungan asin pagigin mapasensiya an Diyos na Jehova kan nagtrabaho siya kaiba si Jesus para iandam an daga sa luway-luway na paagi bago lalangon an katawuhan.  Ipapahiling man ni Jesus an mga kuwalidad na iyan durante kan Sangribong Taon na Paghadi pag magtrabaho na siya kaiba an mga makakaligtas sa Armagedon mantang inaandam ninda an daga para sa mga bubuhayon liwat.

6. Sigun sa Gibo 24:15, sairisay an kaiba sa mga bubuhayon liwat ni Jehova?

⁶ An pinakamahalaga, an mga makakaligtas sa Armagedon kaipuhan na tukduan an mga binuhay liwat manungod sa Kahadian nin Diyos asin sa mga kahagadan ni Jehova. Taano? Huling an kadaklan sa mga bubuhayon liwat kabilang sa “mga bakong matanos.” (Basahon an Gibo 24:15.) Kaipuhan nindang gumibo nin dakul na pagbabago para makinabang sa pantubos ni Cristo. Isipa na sana an trabaho na kalabot sa pagtutukdo kan katotoohan manungod sa Diyos sa minilyon na tawo na mayo nin kaaraman manungod ki Jehova. Igwa daw nin matukdo sa lambang indibidwal, arog kan ginigibo ta sa mga tinutukduan niyato sa Bibliya ngunyan? An mga baguhan daw na ini iaasignar sa mga kongregasyon asin sasanayon na magtukdo sa mga bubuhayon liwat na kasunod ninda? Dai ta aram. Pero an aram ta iyo na sa pagtatapos kan Sangribong Taon na Paghadi ni Cristo, “an daga mapapano nanggad kan kaaraman manungod ki Jehova.” (Isa. 11:9, NWT) Igwa nanggad kita nin dakulon pero nakakaugmang mga gibuhon sa laog kan sangribong taon na iyan!

7. Taano ta makakamati nin pakikidamay an mga lingkod nin Diyos pag tinutukduan ninda an mga binuhay liwat?

⁷ Durante kan Sangribong Taon na Paghadi ni Cristo, an gabos na aki ni Jehova sa daga kaipuhan na gumibo nin mga pagbabago para mapaugma siya. Kaya gabos sinda makakamati nin tunay na pakikidamay mantang tinatabangan ninda an mga binuhay liwat na labanan an makasalan na mga tendensiya asin mamuhay kauyon kan mga pamantayan ni Jehova. (1 Ped. 3:8) Mayong duda na an mga binuhay liwat mapaparani sa mapakumbabang mga lingkod ni Jehova, na ‘naghihinguwa man para sa saindang kaligtasan.’—Fil. 2:12.

8. Taano ta rasonableng isipon na an mga masabat sa mga binuhay liwat mabibisto an saindang mga mahal sa buhay?

⁸ May nagkapirang dahilan kita para isipon na an mga masabat sa mga binuhay liwat mabibisto an saindang mga mahal sa buhay. Halimbawa, base sa mga ginibo kaidtong pagbuhay liwat, minalataw na bubuhayon liwat ni Jehova an mga tawo sa paaging an itsura, pagtaram, asin pag-iisip ninda kapareho kaidtong bago sinda magadan. Girumdumon na iinagid ni Jesus an kagadanan sa pagturog asin an pagkabuhay liwat sa pagmata. (Mat. 9:18, 24; Juan 11:11-13) Pagkamata niyato, an itsura saka an boses ta pareho man lang kan magturog kita, asin mayo man nagbago sa memorya ta. Pag-isipan an halimbawa ni Lazaro. Apat na aldaw na siyang gadan, kaya nagpupuon nang malapa an hawak niya. Pero kan binuhay na siya ni Jesus, nabisto tulos siya kan mga tugang niya, asin malinaw na nabisto man sinda ni Lazaro.—Juan 11:38-44; 12:1, 2.

9. Taano ta an mga binuhay liwat dai bubuhayon na may perpekto nang isip asin hawak?

⁹ Nanunuga si Jehova na mayo nin siisay man na nasa irarom kan pamamahala ni Cristo an masabi: “May hilang ako.” (Isa. 33:24, NWT; Roma 6:7) Kaya, an mga gadan bubuhayon liwat na may makusog na hawak. Alagad dai man tulos sinda magigin perpekto. Ta kun iyo, tibaad dai sinda mabisto kan mga mahal ninda sa buhay. Minalataw na an gabos na tawo luway-luway na magigin perpekto durante kan Sangribong Taon na Paghadi ni Cristo. Saka sana ibabalik ni Jesus an Kahadian sa saiyang Ama sa katapusan kan sangribong taon. Dangan lubos nang maisasagibo kan Kahadian an trabaho kaiyan, kaiba na an pagtabang sa katawuhan na magin perpekto.—1 Cor. 15:24-28; Kap. 20:1-3.

10. Ano an mamamatian mo huli sa pagkabuhay liwat?

¹⁰ Imahinara pag sinasabat mo na an binuhay liwat na mga mahal mo sa buhay. Mapapangirit ka daw o mapapahibi sa kaugmahan? Mapapakanta ka daw nin mga awit nin pag-umaw ki Jehova? Sarong bagay an sigurado, makakamati ka nin makusugon na pagkamuot sa saimong mapagmakulog na Ama asin sa saiyang bakong makasadiring Aki huli sa magayunon na regalo na pagkabuhay liwat.

11. Sigun sa sinabi ni Jesus na nasa Juan 5:28, 29, ano an maeeksperyensiyahan kan mga namumuhay kauyon kan matanos na mga pamantayan nin Diyos?

¹¹ Imahinara an kaugmahan kan mga binuhay liwat mantang hinuhuba ninda an lumang personalidad asin namumuhay kauyon kan matanos na mga pamantayan nin Diyos. An mga naggigibo kan mga pagbabagong ini makakaeksperyensiya kan pagkabuhay liwat para sa buhay. Pero an mga nagrerebelde sa Diyos dai tutugutan na rauton an katuninungan kan Paraiso.—Isa. 65:20; basahon an Juan 5:28, 29.

12. Sa anong paagi bebendisyunan ni Jehova an gabos na tawo sa daga?

¹² Sa irarom kan pamamahala kan Kahadian, mapapatunayan kan gabos na lingkod nin Diyos na totoo an sinasabi kan Talinhaga 10:22: “An bendisyon [ni Jehova] nakakapayaman, asin dai niya iyan dinadagdagan nin [kakulugan].” (An Marahay na Bareta Biblia) Sa tabang kan espiritu ni Jehova, an mga lingkod nin Diyos magigin mayaman sa espirituwal, an buot sabihon, urog sindang magigin arog ni Cristo asin luway-luway na magigin perpekto. (Juan 13:15-17; Efe. 4:23, 24) Sa kada aldaw, magigi sindang mas makusog asin mas marahay na tawo. Nakakaugmang buhay nanggad iyan! (Job 33:25) Pero paano makakatabang sa saimo ngunyan an paghurop-hurop sa pagkabuhay liwat?

13. Kauyon kan Salmo 139:1-4, paano pinapatunayan kan pagkabuhay liwat na midbid kitang marhay ni Jehova?

¹³ Arog kan napag-ulayan ta, sa pagkabuhay liwat, ibabalik ni Jehova sa mga tawo an memorya asin mga ugali ninda na iyo an minabilog sa saindang pagkatawo. Isipa na sana an buot sabihon kaiyan. Namumutan kang marhay ni Jehova kaya tinatandaan niya an gabos mong iniisip, namamatian, sinasabi, asin ginigibo. Kaya kun bubuhayon ka niya liwat, madali sana niyang maibabalik an saimong memorya, disposisyon, asin mga ugali. Aram ni Hading David kun gurano nanggad kainteresado si Jehova sa lambang saro sa sato. (Basahon an Salmo 139:1-4.) Ano an magigin epekto sa sato ngunyan kun aram niyato kun gurano kita kamidbid ni Jehova?

14. Ano an magigin epekto sa sato kan paghurop-hurop sa kun gurano kita kamidbid ni Jehova?

¹⁴ Pag hinuhurop-hurop ta kun gurano kita kamidbid ni Jehova, dai ta iyan dapat ikahadit. Taano? Girumdumon na nagmamalasakit na marhay sa sato si Jehova. Para sa saiya, mahalagang marhay asin daing kapareho an lambang saro sa sato. Maingat niyang tinatandaan an gabos na eksperyensiya niyato sa buhay na minabilog sa satong pagkatawo. Nakakaranga nanggad iyan! Nungka niyatong isipon na nagsosolo kita. Sa lambang minuto kan kada aldaw, kaibanan ta si Jehova asin naghahanap siya nin mga oportunidad na tabangan kita.—2 Cron. 16:9.

15. Paano pinapatunayan kan pagkabuhay liwat na madunong si Jehova?

¹⁵ Makusog na armas an kagadanan. Ginagamit iyan kan mga nasa kontrol ni Satanas para puwersahon an mga tawo na trayduron an saindang mga amigo o gumibo nin sarong bagay na aram nindang sala. Pero mayong epekto sa sato an armas na iyan. Aram niyato na gadanon man  kita kan mga kaiwal ta, bubuhayon kita liwat ni Jehova. (Kap. 2:10) Kumbinsido kita na mayong makakaraot sa makusog na relasyon ta ki Jehova. (Roma 8:35-39) Pambihirang kadunungan nanggad an ipinahiling ni Jehova sa pagtao niya sa sato kan paglaom na pagkabuhay liwat! Paagi kaiyan, hinahalian niya si Satanas kan saro sa pinakaepektibo kaining armas asin kasabay kaiyan tinatawan kita nin dai mararaot na kusog nin buot.

16. Ano an mga kaipuhan mong ihapot sa saimong sadiri, asin paano makakatabang sa saimo an simbag diyan na maaraman kun gurano kakusog kan pagtitiwala mo ki Jehova?

¹⁶ Kun tinatakot kang gadanon kan mga kaiwal ni Jehova, ipagkakatiwala mo daw sa saiya an saimong buhay? Paano mo iyan maaaraman? An sarong paagi iyo na ihapot mo sa saimong sadiri, ‘Ipinapahiling daw kan saradit na mga desisyon na ginigibo ko sa kada aldaw na nagtitiwala ako ki Jehova?’ (Luc. 16:10) An saro pang puwede mong ihapot iyo an, ‘Mahihiling daw sa istilo kan pamumuhay ko na nagtitiwala ako sa panuga ni Jehova na itatao niya an materyal na mga pangangaipo ko kun iinuton ko an saiyang Kahadian?’ (Mat. 6:31-33) Kun iyo an simbag mo sa mga hapot na iyan, ipinapahiling mo na nagtitiwala ka ki Jehova, asin magigin andam ka sa ano man na pagbalo na mag-abot sa saimo.—Tal. 3:5, 6.

17. (a) Paano ipinapahiling kan pagkabuhay liwat na mapasensiya si Jehova? (b) Paano niyato maipapahiling na pinapahalagahan ta an pagigin mapasensiya ni Jehova?

¹⁷ May espesipikong aldaw asin oras na itinalaan si Jehova kun nuarin niya tatapuson an lumang sistemang ini. (Mat. 24:36) Dai siya malalangkag asin mahiro bago an itinalaan na panahon na iyan. Gustong-gusto niya nang buhayon an mga gadan, pero mapasensiya siya. (Job 14:14, 15) Naghahalat siya na umabot an tamang panahon na buhayon niya sinda liwat. (Juan 5:28) May marahay kitang mga rason kun taano ta dapat niyatong pahalagahan an pagigin mapasensiya ni Jehova. Isipa na sana: Huli sa pagigin mapasensiya ni Jehova, dakul na tawo, kaiba na kita, an ‘nagkaigwa nin oportunidad na magsulsol.’ (2 Ped. 3:9) Gusto ni Jehova na magkaigwa kan oportunidad na mabuhay nin daing katapusan an pinakadakul na tawong posible. Kaya ipahiling ta na pinapahalagahan niyato an saiyang pagigin mapasensiya. Paano? Paagi sa maigot na paghanap sa mga “igwang pusong nasa tamang kamugtakan para sa buhay na daing katapusan” asin sa pagtabang sainda na mamutan si Jehova asin paglingkudan siya. (Gibo 13:48) Dangan arog niyato, makikinabang man sinda sa pagigin mapasensiya ni Jehova.

18. Taano ta dapat kitang magin mapasensiya sa iba?

 ¹⁸ Mapasensiyang mahalat si Jehova sagkod sa katapusan kan sangribong taon bago niya asahan satuya an pagkaperpekto. Sagkod sa panahon na iyan, andam si Jehova na patawadon an satong mga kasalan. Kaya siguradong may dahilan kita na magpokus sa marahay na mga kuwalidad kan iba asin magin mapasensiya sainda. Pag-isipan an halimbawa nin sarong sister na an agom nagpuon na magkaigwa nin malalang mga anxiety attack asin nagpundo na ining mag-atender sa mga pagtiripon. “Masakiton talaga iyan para sako,” an sabi niya. “Biglang nagbago an buhay mi, asin dai mi na magigibo an mga plano mi bilang pamilya.” Pero sa ibong kan gabos na iyan, nagin mapasensiya sa saiyang agom an mamumuton na agom na babaying ini. Nagtiwala siya ki Jehova asin dai nagsuko. Arog ni Jehova, dai siya nagpokus sa mga problema kundi nagpokus siya sa marahay na mga bagay manungod sa saiyang agom. Sinabi niya, “May magagayon na kuwalidad si agom, asin ginigibo niya an pinakamakakaya niya para luway-luway na magrahay.” Importante nanggad na magin mapasensiya kita sa satong mga kapamilya o sa mga kakongregasyon niyato na may inaagihan na masakit na mga problema!

19. Ano an dapat na determinado niyatong gibuhon?

¹⁹ Maugmang marhay si Jesus asin an mga anghel kan lalangon an daga. Pero imahinara an saindang kaugmahan pag mahiling na ninda an daga na pano nin mga tawong perpekto na namumutan si Jehova asin naglilingkod saiya. Imahinara an kaugmahan kan mga dinara sa langit hali sa daga para mamahala kaiba ni Cristo mantang nahihiling ninda na nakikinabang an katawuhan sa saindang mga gibo. (Kap. 4:4, 9-11; 5:9, 10) Asin imahinara an buhay pag nasalidahan na nin luha nin kaugmahan an mga luha nin kakulugan, asin pag mawara na an hilang, kamunduan, saka kagadanan. (Kap. 21:4) Sagkod na dai pa iyan nangyayari, magin determinado na arugon an saindong mamumuton, madunong, asin mapasensiyang Ama. Kun gigibuhon mo iyan, mapagdadanay mo an saimong kaugmahan ano man na pagbalo an atubangon mo. (Sant. 1:2-4) Nagpapasalamat nanggad kita sa panuga ni Jehova na magkakaigwa nin ‘pagkabuhay liwat’!—Gibo 24:15.