ARTIKULONG PAG-AADALAN 35
Igalang an Lugar kan Iba sa Laog kan Kongregasyon ni Jehova
“An mata dai puwedeng magsabi sa kamot, ‘Dai taka kaipuhan,’ asin siring man, an payo dai puwedeng magsabi sa mga bitis, ‘Dai ko kamo kaipuhan.’”—1 COR. 12:21.
KANTA 124 Danay na Maimbod
SUMARYO KAN PAG-AADALAN *
1. Ano an itinao ni Jehova sa lambang maimbod na lingkod niya?
MAMUMUTON na tinawan ni Jehova nin lugar sa saiyang kongregasyon an lambang maimbod na lingkod niya. Dawa magkakalain an satong papel, gabos kita mahalaga asin kaipuhan ta an lambang saro. Tinatabangan kita ni apostol Pablo na masabutan an importanteng leksiyon na ini. Paano?
2. Uyon sa Efeso 4:16, taano ta dapat na pahalagahan niyato an lambang saro asin magtinarabangan?
2 Arog kan sinasabi sa temang teksto kan artikulong ini, idinuon ni Pablo na mayo nin siisay man sa sato an puwedeng magsabi sa kapwa niyato lingkod ni Jehova “Dai taka kaipuhan.” (1 Cor. 12:21) Kun gusto niyatong magin matuninong an kongregasyon, dapat na pahalagahan ta an lambang saro asin magtinarabangan. (Basahon an Efeso 4:16.) Pag nagtitinarabangan kita na may pagkasararo, nag-uuswag an kongregasyon asin napapakusog sa pagkamuot.
3. Ano an pag-uulayan ta sa artikulong ini?
3 Ano an nagkapirang paagi na maipapahiling ta an satong paggalang sa mga kapwa niyato Kristiyano sa laog kan kongregasyon? Sa artikulong ini, pag-uulayan ta kun paano maipapahiling kan mga elder na iginagalang ninda an kapwa ninda mga elder. Dangan, pag-uulayan ta kun paano niyato gabos maipapahiling na pinapahalagahan ta an satong mga tugang na daing agom. Asin ultimo, manunudan ta kun paano niyato maipapahiling na iginagalang ta an mga tugang na dai pa gayong tatao magtaram kan satong lengguwahe.
MAGPAHILING NIN PAGGALANG SA MGA KAPWA ELDER
4. Anong sadol ni Pablo na nasa Roma 12:10 an dapat na sunudon kan mga elder?
4 An gabos na elder sa kongregasyon ninombrahan kan banal na espiritu ni Jehova. Pero, an lambang saro may magkakalain na balaog asin kakayahan. (1 Cor. 12:17, 18) An iba tibaad bagong nombrahan pa sana asin dai pa gayong eksperyensiyado. An iba tibaad limitado na an nagigibo huli sa paggurang asin hilang. Pero, mayo nin elder an dapat na mansayon an siisay man sa mga kapwa niya elder sa paaging garo niya man sana sinasabing “Dai taka kaipuhan.” Imbes, dapat na sunudon kan lambang elder an sadol ni Pablo na nasa Roma 12:10.—Basahon.
Ipinapahiling kan mga elder na iginagalang ninda an mga kapwa ninda elder paagi sa pagdangog na marhay sa sainda (Hilingon an parapo 5-6)
5. Paano ipinapahiling kan mga elder na iginagalang ninda an saindang mga kapwa elder asin taano ta mahalaga na gibuhon ninda iyan?
5 Ipinapahiling kan mga elder na iginagalang ninda an mga kapwa ninda elder paagi sa pagdangog na marhay sa sainda. Mahalagang marhay ini lalo na pag nagmimiting an mga elder bilang grupo para pag-ulayan an seryosong mga bagay. Taano? Pag-isipan an sinabi kan The Watchtower na Oktubre 1, 1988: “Mimidbidon kan mga elder na kaya ni Cristo, paagi kan banal na espiritu, na giyahan an isip nin siisay man na elder sa grupo nin kamagurangan tanganing itao an prinsipyo sa Bibliya na kinakaipuhan para maatubang an ano man na sitwasyon o makagibo nin ano man na importanteng desisyon. (Gibo 15:6-15) An banal na espiritu dai naghihiro sa saro sanang elder sa grupo.”
6. Paano an mga elder magtitinarabangan na may pagkasararo, asin paano nakikinabang an kongregasyon pag ginigibo ninda iyan?
6 An sarong elder na may paggalang sa mga kapwa niya elder dai gugustuhon na siya pirmi an inot na magtaram sa mga miting kan mga elder. Dai niya dinodominar an pag-uulay asin dai iniisip na pirming tama an opinyon niya. Imbes, sinasabi niya an saiyang opinyon sa mapakumbabang paagi. Nagdadangog siyang marhay sa mga sinasabi kan iba. An mas mahalaga, andam siyang magtao nin mga prinsipyo hali sa Kasuratan asin magsunod sa paggiya kan “maimbod asin mapagmansay na uripon.” (Mat. 24:45-47) Pag nag-uurulay an mga elder sa mamumuton asin may paggalang na paagi, mapapasainda an banal na espiritu nin Diyos, asin gigiyahan sinda kaiyan na makagibo nin mga desisyon na makakapakusog sa kongregasyon.—Sant. 3:17, 18.
MAGPAHILING NIN PAGGALANG SA MGA KRISTIYANONG DAING AGOM
7. Paano minansay ni Jesus an pagigin daing agom?
7 Kabtang kan kongregasyon ngunyan an mga may agom asin an mga pamilya. Pero, kabtang man kaiyan an dakul na brother asin sister na daing agom. Paano ta dapat mansayon an mga daing agom? Pag-isipan kun ano an pagmansay diyan ni Jesus. Durante kan saiyang ministeryo digdi sa daga, dai nag-agom si Jesus. Nagdanay siyang daing agom asin ipinokus an saiyang panahon asin atensiyon sa saiyang asignasyon. Nungkang itinukdo ni Jesus na kahagadan sa sarong Kristiyano na mag-agom o magdanay na daing agom. Dawa arog kaiyan, sinabi niya na pipilion kan pirang Kristiyano na dai mag-agom. (Mat. 19:11, 12) Nagpahiling si Jesus nin paggalang sa mga daing agom. Dai niya minansay na mas maluya sinda kisa sa iba o na may kulang sa buhay ninda.
8. Sigun sa 1 Corinto 7:7-9, ano an inenkaminar ni Pablo na pag-isipan kan mga Kristiyano?
8 Arog ni Jesus, nagdanay na daing agom si apostol Pablo durante kan saiyang ministeryo. Nungkang itinukdo ni Pablo na sala para sa sarong Kristiyano na mag-agom. Aram niya na personal na desisyon iyan. Pero, inenkaminar man giraray ni Pablo an mga Kristiyano na pag-isipan kun baga kaya nindang maglingkod ki Jehova na daing agom. (Basahon an 1 Corinto 7:7-9.) Kaya siguradong dai minenos ni Pablo an mga Kristiyanong daing agom. Sa katunayan, pinili niya an hoben na si Timoteo, na daing agom, tanganing mag-asikaso sa magagabat na asignasyon. * (Fil. 2:19-22) Kaya malinaw na sala kun ibabasar sana sa pagigin may agom o pagigin mayong agom nin sarong brother kun baga kuwalipikado siyang marhay o bakong gayo.—1 Cor. 7:32-35, 38.
9. Ano an masasabi ta manungod sa pag-agom asin pagigin daing agom?
9 Dai itinukdo ni Jesus o ni Pablo na an mga Kristiyano dapat na mag-agom o na magdanay na daing agom. Kaya, ano an masasabi ta manungod sa pag-agom asin pagigin daing agom? Magayon an sinasabi kan An Torrengbantayan na Oktubre 1, 2012: “An totoo, [an pagigin may agom o daing agom] ikakaladawan na balaog o regalo nin Diyos. . . . Dai minamansay ni Jehova [an pagigin daing agom] na dahilan nin kasusupgan o nin kamunduan.” Kaya, kaipuhan na igalang niyato an lugar kan mga brother asin sister na daing agom sa kongregasyon.
Bilang paggalang sa namamatian kan mga daing agom, ano an dapat tang likayan? (Hilingon an parapo 10)
10. Paano ta maipapahiling na iginagalang niyato an satong mga brother asin sister na daing agom?
10 Paano ta maipapahiling na iginagalang niyato an namamatian asin kamugtakan kan satong mga brother asin sister na daing agom? Marahay na isaisip niyato na may mga Kristiyanong daing agom na nagdesisyon na magdanay na daing agom. An ibang Kristiyanong daing agom gustong mag-agom, pero dai pa ninda nahahanap an tamang tawo. An iba tibaad nagadanan nin agom. Ano man an kamugtakan, angay daw na haputon kan mga tugang sa kongregasyon an sarong daing agom na Kristiyano kun taano ta dai pa siya nag-aagom o mag-alok na ireto siya? Siyempre, may mga Kristiyanong daing agom na tibaad maghagad nin arog kaiyan na tabang. Pero kun dai man, ano kaya sa hiling nindo an mamamatian kan satong mga brother asin sister na daing agom? (1 Tes. 4:11; 1 Tim. 5:13) Pag-ulayan ta an nagkapirang komento hali sa maimbod na mga brother asin sister na daing agom.
11-12. Paano niyato puwedeng mapaluya an buot kan satong mga tugang na daing agom?
11 Para sa sarong daing agom na paraataman nin sirkito na epektibong marhay sa saiyang asignasyon, dakul na pakinabang an pagigin daing agom. Pero sinabi niya na puwedeng magin nakakapaluya nin buot pag may mga tugang, na marahay man an intensiyon, an naghahapot saiya: “Taano ta dai ka pa nag-aagom?” Sinabi nin sarong brother na daing agom na naglilingkod sa sangang opisina: “Minsan ipinapamati kan mga tugang na dapat kahirakan an mga daing agom. Garo lugod nagigin pagabat an pagigin daing agom imbes na sarong regalo.”
12 Sarong sister na daing agom na naglilingkod sa Bethel an nagsabi: “May mga tugang na iniisip na gabos na daing agom naghahanap nin maaagom o na an kada pagtiripon-tipon pagkakataon para makahanap nin maaagom. Minsan, nagbiyahe ako sa sarong lugar sa nasyon mi huli sa sarong asignasyon. May pagtiripon kan bangging nag-abot ako. An sister na pigdadagusan ko nagsabi sako na igwang duwang brother sa kongregasyon na kaedad ko. Sinabi niya na dai niya man ako irinereto. Pero pakalaog-laog mi sa Kingdom Hall, binutong niya ako para ipabisto sa duwang brother. Siyempre, makasupog ’to sako saka sa duwang brother.”
13. Anong halimbawa an nakapakusog sa sarong sister na daing agom?
13 Sinabi nin saro pang sister na daing agom na naglilingkod sa Bethel: “May mga bisto akong maedad nang mga payunir na daing agom na balanse sa buhay, mapagsakripisyo, asin maugma sa paglilingkod ninda saka dakulang tabang sa kongregasyon. Timbang an pagmansay ninda sa pagigin daing agom. Dai ninda iniisip na nakakalabi sinda sa iba huling nagdanay sindang daing agom, o na may kulang sa buhay ninda dahil mayo sindang agom o pamilya.” Iyan an kagayunan pag nasa kongregasyon ka na diyan an gabos igwa nin paggalang saka pagpapahalaga sa lambang saro. Dai mo mamamatian na kinakahirakan ka o kinakaurihan, na binabaliwala ka o sobra-sobrang pinapahalagahan. Basta an aram mo namumutan ka ninda.
14. Paano ta maipapahiling na iginagalang ta an mga daing agom?
14 Magpapasalamat an satong mga brother asin sister na daing agom kun papahalagahan ta sinda huli sa saindang marahayon na mga kuwalidad, bako sa pagigin daing agom ninda. Imbes na kahirakan sinda, marahay na apresyaron ta an saindang kaimbudan. Bilang resulta, dai mamamatian kan satong mga tugang na daing agom na garo baga sinasabi ta sainda: “Dai ko kamo kaipuhan.” (1 Cor. 12:21) Imbes, mamamatian ninda na iginagalang ta sinda asin pinapahalagahan an saindang lugar sa laog kan kongregasyon.
MAGPAHILING NIN PAGGALANG SA MGA DAI PA GAYONG TATAO KAN SAINDONG LENGGUWAHE
15. Anong mga pagbabago an ginibo kan nagkapira para mapahiwas an saindang ministeryo?
15 Sa nag-agi pa sanang mga taon, ginibong pasuhan kan dakul na parahayag na mag-adal nin ibang lengguwahe para mapahiwas an saindang ministeryo. Nangangahulugan iyan na kaipuhan nindang gumibo nin mga pagbabago sa saindang buhay. Binayaan kan mga tugang na ini an kongregasyon na naggagamit kan saindang nagimatan na lengguwahe para maglingkod sa kongregasyon na iba an lengguwaheng itinataram asin kun sain dakul pang parahayag kan Kahadian an kaipuhan. (Gibo 16:9) Personal na desisyon ini kan mga Kristiyanong iyan tanganing mas lubos sindang makapaglingkod ki Jehova. Dawa tibaad mangaipo nin mga taon bago sinda magin mahusay sa bagong lengguwahe, dakul sindang naitatabang sa kongregasyon. An saindang marahayon na mga kuwalidad asin eksperyensiya nakakapakusog sa mga tugang sa kongregasyon. Pinapahalagahan nanggad niyato an mapagsakripisyong mga tugang na ini!
16. Sa ano ibinabasar kan mga elder an pag-ebalwar sa mga kuwalipikasyon kan mga brother na maglilingkod bilang mga elder asin ministeryal na lingkod?
16 Dai mag-aalangan an grupo nin kamagurangan na irekomendar an sarong brother na maglingkod bilang elder o ministeryal na lingkod huli sana ta dai pa ini gayong tatao kan lengguwaheng ginagamit kan kongregasyon. Eebalwaron kan mga elder an sarong brother basado sa maka-Kasuratan na mga kuwalipikasyon para sa mga elder asin ministeryal na mga lingkod asin bako sa kun gurano siya katibay magtaram kan lengguwahe kan lokal na kongregasyon.—1 Tim. 3:1-10, 12, 13; Tito 1:5-9.
17. Anong mga hapot an kaipuhan na pag-isipan kan mga pamilya na mabalyo sa ibang nasyon?
17 May mga Kristiyanong pamilya na nagbalyo sa ibang nasyon para dumulag huli sa masakit na sitwasyon sa saindang nasyon o tanganing maghanap nin trabaho. Kaya tibaad magklase na an mga aki ninda sa eskuwelahan na an ginagamit na lengguwahe iyo an panginot na lengguwahe kan linipatan nindang nasyon. Tibaad kaipuhan man na manudan kan mga magurang an panginot na lengguwaheng iyan para makahanap nin trabaho. Paano kun may kongregasyon o grupo sa lugar ninda na naggagamit kan nagimatan nindang lengguwahe? Sain na kongregasyon sinda dapat mag-asosyar? Sa kongregasyon daw na naggagamit kan panginot na lengguwahe kan linipatan nindang nasyon o sa kongregasyon na naggagamit kan nagimatan nindang lengguwahe?
18. Kauyon kan Galacia 6:5, paano niyato maipapahiling na iginagalang ta an desisyon kan payo nin pamilya?
18 Dapat na magdesisyon an payo nin pamilya kun sain na kongregasyon sinda maatender. Huling personal na bagay ini, dapat na pag-isipan niya kun ano an pinakaikakarahay kan saiyang pamilya. (Basahon an Galacia 6:5.) Kaipuhan niyatong igalang an desisyon kan payo nin pamilya. Ano man an magin desisyon niya, akuon niyato iyan asin i-welcome an pamilya bilang mahalagang kabtang kan satong kongregasyon.—Roma 15:7.
19. Ano an dapat na ipamibi asin pag-isipan na marhay kan mga payo nin pamilya?
19 Sa ibang mga sitwasyon, may mga pamilya na tibaad naglilingkod sa kongregasyon na naggagamit kan nagimatan na lengguwahe kan mga magurang, pero tibaad an mga aki dai pa gayong tatao kan lengguwaheng iyan. Kun an kongregasyon na iyan yaon sa lugar na an nasyonal na lengguwahe an itinataram, tibaad masakitan an mga aki na masabutan an mga pagtiripon asin dai mag-uswag sa espirituwal. Taano? Huling tibaad sa eskuwelahan, an nasyonal na lengguwahe an ginagamit asin bako an lengguwahe na nagimatan kan mga magurang ninda. Sa mga sitwasyon na iyan, dapat na ipamibi asin pag-isipan na marhay kan mga payo nin pamilya kun ano an kaipuhan nindang gibuhon para matabangan an mga aki ninda na mas maparani ki Jehova asin sa saiyang banwaan. Kakaipuhanon nindang tabangan an mga aki ninda na magin mahusay sa paggamit kan nagimatan nindang lengguwahe o magbalyo sa kongregasyon na naggagamit kan lengguwahe na malinaw na nasasabutan kan mga aki ninda. Ano man an magin desisyon kan payo nin pamilya, dapat na ipamati saiya asin sa saiyang pamilya kan kongregasyon na pinili niya na iginagalang asin pinapahalagahan sinda.
Paano niyato maipapahiling na pinapahalagahan ta an mga nag-aadal nin bagong lengguwahe? (Hilingon an parapo 20)
20. Paano ta maipapahiling na iginagalang ta an satong mga tugang na nag-aadal nin bagong lengguwahe?
20 Huli sa gabos na dahilan na napag-ulayan ta, sa dakul na kongregasyon, magkakaigwa nin mga brother asin sister na masasakitan sa pag-adal nin bagong lengguwahe. Tibaad magin dipisil para sainda na ipahayag an saindang iniisip. Pero, kun dai kita mapokus sa paagi ninda nin pagtaram kan bagong lengguwahe, mahihiling niyato an pagkamuot ninda ki Jehova asin an saindang pagmawot na paglingkudan siya. Kun naghihiling kita sa magagayon na kuwalidad na iyan, papahalagahan asin igagalang tang marhay an mga brother asin sister na ini. Dai kita masabi nin “Dai ko kamo kaipuhan” dahil lang ta bako sindang mahusay magtaram kan satong lengguwahe.
PINAPAHALAGAHAN KITANG MARHAY NI JEHOVA
21-22. Anong pambihirang pribilehiyo an igwa kita?
21 Tinawan kita ni Jehova nin pambihirang pribilehiyo na magkaigwa nin lugar sa saiyang kongregasyon. Kita man lalaki o babayi, may agom man o mayo, may edad man o hoben o matibay sa sarong lengguwahe o bako, mahalagang marhay kita ki Jehova asin sa lambang saro.—Roma 12:4, 5; Col. 3:10, 11.
22 Padagos lugod niyatong isabuhay an dakul na marahayon na leksiyon na nanudan ta sa ilustrasyon ni Pablo manungod sa hawak nin tawo. Kun gigibuhon niyato iyan, maghahanap kita nin mas dakul na paagi na pahalagahan na marhay an satong lugar asin an lugar kan iba sa kongregasyon ni Jehova.
KANTA 90 Pakusugon an Lambang Saro
^ par. 5 Iba-iba an pinaghalian kan mga lingkod ni Jehova asin magkakalain an papel ninda sa laog kan kongregasyon. Tatabangan kita kan artikulong ini na mahiling kun taano ta mahalaga na igalang ta an lambang miyembro kan pamilya ni Jehova.
^ par. 8 Dai kita sigurado kun baga nagdanay na daing agom si Timoteo.
