1. Ano an sinabi ni David manungod sa kapakumbabaan ni Jehova?

MASASABI daw talaga niyato na mapakumbaba si Jehova? Iyo. Sinabi minsan ni David: “Itinao mo sako an saimong kalasag nin kaligtasan, asin nagigin bantog ako huli kan saimong kapakumbabaan.” (2 Sam. 22:36, NWT; Sal. 18:35) Tibaad an nasa isip ni David iyo an aldaw na nagduman si propeta Samuel sa harong kan ama ni David para lahidan an sunod na hadi kan Israel. Si David an nguhod sa walong magturugang na lalaki; pero siya an pinili ni Jehova para magsalida ki Hading Saul.—1 Sam. 16:1, 10-13.

2. Ano an pag-uulayan ta sa artikulong ini?

² Siguradong mauyon si David sa sinabi kan sarong salmista na nagsabi manungod ki Jehova: “Minaduko siya tanganing an langit asin daga saiyang hilingon, hali sa alpog, an tawong hamak saiyang ibinabangon. Binubuhat niya an dukha . . . tanganing siya patukawon na mga respetadong tawo an kaibanan.” (Sal. 113:6-8, NWT) Sa artikulong ini, pag-uulayan ta nguna an pirang mahalagang leksiyon manungod sa kapakumbabaan paagi sa pagsiyasat sa mga pangyayari na diyan ipinahiling ni Jehova an kuwalidad na ini. Dangan aaramon ta kun ano an manunudan ta ki Hading Saul, propeta Daniel, asin ki Jesus manungod sa kuwalidad na kababaan nin buot.

3. Paano kita tinatratar ni Jehova, asin ano an ipinapahiling kaini?

³ Ipinapahiling ni Jehova na mapakumbaba siya paagi sa kun paano niya tinatratar an bakong perpektong mga tawo na nagsasamba sa saiya. Dai niya sana inaako an satong pagsamba kundi ibinibilang niya man kitang mga amigo niya. (Sal. 25:14) Si Jehova  mismo an naggibo nin paagi para magin posible na magin amigo niya kita. Itinao niya an saiyang Aki bilang atang para sa satong mga kasalan. Mahihirakon asin mapagmalasakit nanggad si Jehova!

4. Ano an itinao sa sato ni Jehova, asin taano?

⁴ Pag-isipan an saro pang kapahayagan kan kapakumbabaan ni Jehova. Bilang an Kaglalang, puwede man kutang dai niya na lang kita tinawan kan kakayahan na pumili kan klase nin buhay na gusto ta. Pero bakong arog kaiyan an ginibo niya. Linalang niya kita uyon sa saiyang ladawan asin tinawan kita kan kakayahan na gumibo nin sadiring desisyon. Dawa mga hamak na tawo lang kita, gusto niya na maglingkod kita sa saiya nin bilog na puso huling namumutan niyato siya asin aram ta na makikinabang kita sa pagsunod sa saiya. (Deut. 10:12; Isa. 48:17, 18) Dapat nanggad niyatong ipagpasalamat an kapahayagan na ini kan kapakumbabaan ni Jehova!

5. Paano kita tinutukduan ni Jehova na magin mapakumbaba? (Hilingon an ritrato sa cover.)

⁵ Tinutukduan kita ni Jehova na magin mapakumbaba paagi sa kun paano niya kita tinatratar. Si Jehova an pinakamadunong na Persona sa uniberso. Dawa arog kaiyan, andam siyang mag-ako nin mga suhestiyon hali sa iba. Halimbawa, tinugutan ni Jehova an saiyang Aki na tabangan siya sa paglalang sa gabos na bagay. (Tal. 8:27-30; Col. 1:15, 16) Asin dawa si Jehova an makakamhan sa gabos, nagdedelegar siya nin awtoridad sa iba. Halimbawa, ninombrahan niya si Jesus na magin Hadi kan Kahadian, asin tatawan Niya nin awtoridad an 144,000 na tawo na magigin kairibang tagapamahala ni Jesus. (Luc. 12:32) Siyempre, sinanay ni Jehova si Jesus kun paano magin Hadi asin Halangkaw na Saserdote. (Heb. 5:8, 9) Sinasanay niya man an kairibang mga tagapamahala ni Jesus, pero sa pagtao niya sa sainda kan asignasyon na ini, dai niya pinupurbaran na kontrulon an gabos na  detalye kan trabaho ninda. Imbes, nagtitiwala siya na gigibuhon ninda an saiyang kabutan.—Kap. 5:10.

6-7. Ano an manunudan ta sa satong Ama sa langit manungod sa pagdelegar nin awtoridad sa iba?

⁶ Kun an satong Ama sa langit—na dai nangangaipo nin tabang sa siisay pa man—nagdedelegar nin awtoridad sa iba, lalo na dapat kita! Halimbawa, ika daw payo nin pamilya o elder sa kongregasyon? Arugon an halimbawa ni Jehova paagi sa pagdelegar nin mga trabaho sa iba asin paglikay na kontrulon an lambang detalye kaiyan. Kun inaarog mo si Jehova, matatapos mo an trabaho asin kasabay kaiyan masasanay mo an iba asin matatabangan na magkaigwa nin kumpiyansa sa sadiri. (Isa. 41:10) Ano pa an manunudan ki Jehova kan mga tinawan niya nin awtoridad?

⁷ Ipinapahiling kan Bibliya na interesado si Jehova sa opinyon kan mga aki niyang anghel. (1 Ha. 22:19-22) Mga magurang, paano nindo maaarog an halimbawa ni Jehova? Pag angay, maghagad nin opinyon sa saindong mga aki kun paano gigibuhon an sarong trabaho. Asin kun ayos man an suhestiyon ninda, sunudon iyan.

8. Paano ipinahiling ni Jehova na mapasensiya siya ki Abraham asin Sara?

⁸ Mahihiling ta man an kapakumbabaan ni Jehova sa pagigin niyang mapasensiya. Halimbawa, mapasensiya si Jehova pag kinukuwestiyon kan mga lingkod niya an saiyang mga desisyon sa magalang na paagi. Nagdangog siya mantang sinasabi ni Abraham an mga iniisip kaini manungod sa desisyon na laglagon an Sodoma asin Gomora. (Gen. 18:22-33) Asin girumdumon kun paano trinatar ni Jehova an agom ni Abraham na si Sara. Dai nagkulog an buot niya o naanggot kan nagngirit si Sara sa saiyang panuga na magbabados ini dawa gurang na. (Gen. 18:10-14) Imbes, trinato niya si Sara nin may dignidad.

9. Ano an manunudan kan mga magurang asin mga elder sa halimbawa ni Jehova?

⁹ Mga magurang asin mga elder, ano an manunudan nindo sa halimbawa ni Jehova? Pag-isipan kun ano an ginigibo mo pag kinukuwestiyon kan mga nasa awtoridad mo an saimong mga desisyon. Itinatanos mo daw tulos sinda? O hinihinguwa mo daw na masabutan an opinyon ninda? Siguradong nakikinabang an mga pamilya asin kongregasyon pag inaarog si Jehova kan mga may awtoridad. Napag-ulayan na niyato kun ano an manunudan ta sa kapakumbabaan ni Jehova. Aramon ta na man kun ano an manunudan niyato sa mga halimbawa na nasa Tataramon nin Diyos kun manungod sa kababaan nin buot.

10. Paano ginagamit ni Jehova an halimbawa kan iba para tukduan kita?

¹⁰ Bilang satong “Kahuruhalangkawing Instruktor,” nagtatao si Jehova nin mga halimbawa sa saiyang Tataramon tanganing tukduan kita. (Isa. 30:20, 21) Makakanuod kita mantang hinuhurop-hurop ta an mga istorya sa Bibliya manungod sa mga tawong nagpahiling nin diyosnon na mga kuwalidad, kaiba na an kababaan nin buot. May manunudan man kita mantang sinisiyasat niyato an nangyari sa mga dai nakapahiling kan marahayon na mga kuwalidad na iyan.—Sal. 37:37; 1 Cor. 10:11.

11. Ano an manunudan ta sa maraot na halimbawa ni Saul?

¹¹ Pag-isipan an nangyari ki Hading Saul. Kan primero, may kababaan nin buot an hoben na si Saul. Aram niya an saiyang mga limitasyon asin nag-alangan pa ngani siyang mag-ako nin dagdag na responsabilidad. (1 Sam. 9:21; 10:20-22) Pero sa paglihis nin panahon, nagin pangahas si Saul. Nagpuon siyang magin arog kaiyan dai nahaloy pagkatapos niyang magin hadi. Sa sarong pagkakataon, nawaran siya nin pasensiya mantang  naghahalat ki propeta Samuel. Imbes na may kababaan nin buot na magtiwala na mahiro si Jehova alang-alang sa banwaan, nagdulot si Saul nin atang na pigtututong dawa bako man siyang awtorisadong gibuhon iyan. Bilang resulta, naiwara ni Saul an pag-uyon ni Jehova asin, pag-abot nin panahon, an pagkahadi niya. (1 Sam. 13:8-14) Sarong kadunungan kun isasaisip niyato an nagpapatanid na halimbawang ini asin lilikayan na magin pangahas.

12. Paano nagpahiling nin kababaan nin buot si Daniel?

¹² Pag-isipan naman an marahay na halimbawa ni propeta Daniel. Sa bilog na buhay ni Daniel, nagdanay siyang mapakumbabang lingkod nin Diyos na pirming naghahagad ki Jehova nin paggiya. Halimbawa, kan gamiton siya ni Jehova para ipaliwanag an pangaturugan ni Nabucodonosor, sinabi ni Daniel na bako sa saiya hali an paliwanag. Imbes, may kababaan nin buot niyang itinao ki Jehova an gabos na onra. (Dan. 2:26-28) Ano an leksiyon para sa sato? Kun nagagayunan an mga tugang sa satong mga pahayag o kun may magagayon kitang eksperyensiya sa ministeryo, dapat na itao niyato an gabos na onra ki Jehova. Dapat na mapakumbaba niyatong midbidon na dai niyato magigibo an mga bagay na ini kun mayo an tabang ni Jehova. (Fil. 4:13) Pag igwa kita kan kaisipan na iyan, inaarog ta man an marahayon na halimbawa ni Jesus. Taano man?

13. Ano an manunudan ta sa sinabi ni Jesus sa Juan 5:19, 30 manungod sa kababaan nin buot?

¹³ Dawa si Jesus an perpektong Aki nin Diyos, nanarig siya ki Jehova. (Basahon an Juan 5:19, 30.) Nungka niyang pinurbaran na kuanon an awtoridad kan saiyang Ama sa langit. Sinasabi sa sato kan Filipos 2:6 na “dai lamang [si Jesus] nag-isip na agawon an posisyon nin Diyos, an buot sabihon, na magin kapantay siya nin Diyos.” Bilang mapagpasakop na Aki, nasasabutan ni Jesus an saiyang mga limitasyon asin iginagalang niya an awtoridad kan saiyang Ama.

14. Kan hagadon sa saiya na gumibo nin sarong bagay na lampas sa awtoridad niya, ano an ginibo ni Jesus?

¹⁴ Pag-isipan kun ano an ginibo ni Jesus kan magdulok sa saiya an mga disipulong si Santiago asin Juan kaiba an saindang ina asin maghagad saiya nin sarong pribilehiyo na mayo siyang awtoridad na itao. Sinabi tulos ni Jesus na an saiyang Ama sa langit sana an makakapagdesisyon kun siisay an matukaw sa saiyang tuo asin sa saiyang wala sa Kahadian. (Mat. 20:20-23) Ipinahiling ni Jesus na kinokonsiderar niya an saiyang mga limitasyon. May kababaan siya nin buot. Nungka siyang naggibo nin ano  man na lampas sa awtoridad na itinao sa saiya ni Jehova. (Juan 12:49) Paano ta maaarog an marahayon na halimbawa ni Jesus?

15-16. Paano ta maiaaplikar an sadol kan Bibliya na nasa 1 Corinto 4:6?

¹⁵ Inaarog niyato an halimbawa ni Jesus nin kababaan nin buot paagi sa pag-aplikar kan sadol kan Bibliya na nasa 1 Corinto 4:6. Sinasabi kaiyan sa sato: “Dai maglampas sa mga bagay na nasusurat.” Kaya pag may maghagad sa sato nin sadol, dai ta nanggad gugustuhon na iinsistir an sadiri tang opinyon o basta sabihon an inot na maglaog sa isip ta. Imbes, tatabangan ta siya paagi sa mga sadol na nasa Bibliya asin sa satong mga publikasyon. Paagi kaiyan, minimidbid niyato an satong mga limitasyon. Asin may kababaan nin buot niyatong minimidbid na pirming mas marahay an “matanos na mga pagbuot” kan Makakamhan sa Gabos.—Kap. 15:3, 4.

¹⁶ Apuwera sa natatawan niyato nin onra si Jehova, may iba pa kitang mga dahilan para magpahiling nin kababaan nin buot. Pag-uulayan ta ngunyan kun paano an kapakumbabaan makakatabang sa sato na magin maugma asin magkaigwa nin marahay na relasyon sa iba.

17. Taano ta maugma an mga tawong mapakumbaba?

¹⁷ Pag kita mapakumbaba, mas maugma kita. Taano? Pag aram niyato an satong mga limitasyon, magigin mapagpasalamat kita asin maugma sa ano man na tabang na itinatao sa sato kan iba. Halimbawa, pag-isipan an sarong pangyayari kan paumayan ni Jesus an sampulong may leproso. Saro sana sa sainda an nagbalik para magpasalamat ki Jesus sa pagpaumay sa malalang hilang niya—sarong bagay na dai magigibo kan lalaki kun sa sadiri sana niya. An mapakumbabang lalaking ini nagpasalamat na marhay sa tabang na itinao sa saiya, asin pinamuraway niya an Diyos huli kaiyan.—Luc. 17:11-19.

18. Paano nakakatabang an kapakumbabaan na magkaigwa kita nin marahay na relasyon sa iba? (Roma 12:10)

 ¹⁸ Sa parati, an tawong mapakumbaba marahay an relasyon sa iba asin nagkakaigwa nin dayupot na mga amigo. Taano? Maugma niyang minimidbid na may marahayon na mga kuwalidad an iba asin pinagtitiwalaan niya sinda. An tawong mapakumbaba maugma pag mapanggana an iba sa ano man na asignasyon na itinatao sa sainda saka kinokomendaran asin tinatawan tulos sinda nin onra.—Basahon an Roma 12:10.

19. Ano an nagkapirang dahilan kaya dapat tang likayan an pride?

¹⁹ Sa kabaliktaran, an mga tawong mapalangkaw nadidipisilan na komendaran an iba, huling mas gusto kaya ninda na sinda an inuumaw. Posibleng marhay na ikumparar ninda an saindang sadiri sa iba asin makipagkumpetensiya. Imbes na sanayon an iba asin tawan sinda nin awtoridad, posibleng marhay na sabihon ninda, “Kun gusto mong magibo nin tama an sarong bagay”—sa paaging gusto ninda—“ika mismo an kaipuhan na gumibo kaiyan.” An tawong mapalangkaw sa parati ambisyoso asin maurihon. (Gal. 5:26) An arog kaiyan na mga tawo bihirang magkaigwa nin nagdadanay na mga amigo. Kun marisa niyato na problema ta an kapalangkawan o pride, dapat kitang udok na mamibi ki Jehova na tabangan kitang ‘baguhon an satong isip’ tanganing dai magin parte kan satong personalidad an maraot na ugaling ini.—Roma 12:2.

20. Taano ta dapat kitang magin mapakumbaba?

²⁰ Nagpapasalamat nanggad kita sa halimbawa ni Jehova! Nahihiling ta an saiyang kapakumbabaan sa pagtratar niya sa saiyang mga lingkod, asin gusto tang arugon siya. Dugang pa, gusto niyatong arugon an marahayon na mga halimbawa na nasa Bibliya manungod sa mga tawong mapakumbaba na nagkapribilehiyong maglakaw kaiba nin Diyos. Lugod na pirmi tang itao ki Jehova an onra asin kamurawayan na maninigo sa saiya. (Kap. 4:11) Dangan magigin kuwalipikado man kitang maglakaw kaiba kan satong Ama sa langit, huling namumutan niya an mga tawong mapakumbaba.