1-2. Sigun sa Salmo 34:8, paano ta maaaraman an manungod sa karahayan ni Jehova?

IMAHINARON na inalukan ka nin kakanon na dai mo pa lamang nanamitan. May maaaraman ka manungod sa kakanon na iyan paagi sa paghiling kaiyan, pagparong, paghanap kan resipe kaiyan, o paghapot sa iba kan masasabi ninda. Pero maaaraman mo sana kun baga talagang magugustuhan mo iyan pag ninamitan mo mismo iyan.

² May maaaraman kita manungod sa karahayan ni Jehova paagi sa pagbasa sa Bibliya saka sa satong mga publikasyon asin paagi sa pagdangog sa mga sinasabi kan iba manungod sa mga bendisyon na inako ninda hali ki Jehova. Pero talagang masasabutan lang niyato kun gurano karahay si Jehova pag ‘ninamitan’ ta mismo an saiyang karahayan. (Basahon an Salmo 34:8, NWT.) Halimbawa, ini an sarong paagi na magigibo ta iyan. Tibaad gusto tang maglaog sa sarong klase nin bilog na panahon na ministeryo, pero tanganing maabot an pasuhan na iyan, kakaipuhanon tang pasimplehon an satuyang buhay. Posibleng parati ta nang nababasa an panuga ni Jesus na kun iinuton niyato an intereses kan Kahadian, itatao ni Jehova an mga bagay na talagang kaipuhan ta. (Mat. 6:33) Pero dai pa man talaga niyato naeksperyensiyahan na mangyari sa sato mismo an panugang iyan. Dawa arog kaiyan, huli sa pagtubod ta sa panuga ni Jesus, binawasan ta an satong mga gastos, nagbawas kita nin oras sa satong paghanapbuhay, asin nagpokus kita sa satong ministeryo. Mantang ginigibo ta iyan, naaaraman ta mismo sa naeeksperyensiyahan niyato na talagang itinatao ni Jehova an mga pangangaipo ta. Personal niyatong ‘nananamitan’ an karahayan ni Jehova.

3. Kauyon kan sinasabi sa Salmo 16:1, 2, siisay an nag-aako kan karahayan ni Jehova?

³ Si Jehova ‘marahayon sa gabos,’ dawa duman sa mga dai nakakamidbid sa saiya. (Sal. 145:9; Mat. 5:45) Pero lalo nang nag-aako nin dakul na bendisyon hali ki Jehova idtong mga namumuot sa saiya  asin naglilingkod sa saiya nin bilog nindang kalag. (Basahon an Salmo 16:1, 2, NWT.) Hilinga an pira sana sa mga paagi na nakikinabang kita sa karahayan ni Jehova.

4. Paano ipinapahiling ni Jehova an saiyang karahayan sa mga nagpupuon nang rumani sa saiya?

⁴ Sa kada pagkakataon na inaaplikar ta an nanunudan niyato hali ki Jehova, nahihiling ta an marahay na mga epekto kaiyan sa satong buhay. Mantang namimidbid asin namumutan ta na siya, tinabangan niya kitang mahali an mga kaisipan asin mga gibo na huli kaiyan kita dating suway sa saiya. (Col. 1:21) Asin kan idusay ta an satuyang sadiri ki Jehova asin nagpabawtismo, lalo ta pang naeksperyensiyahan an saiyang karahayan huling tinawan niya kita nin sarong malinig na konsiyensiya asin inako niya kita na magin dayupot na amigo niya.—1 Ped. 3:21.

5. Paano ta naeeksperyensiyahan sa satong ministeryo an karahayan ni Jehova?

⁵ Padagos tang naeeksperyensiyahan an karahayan ni Jehova mantang nakikikabtang kita sa ministeryo. Masusupgon ka daw? Arog kaiyan an dakul na lingkod ni Jehova. Bago ka nagin saro sa mga lingkod ni Jehova, tibaad naisip mong dai mo nanggad magigibong magtuktok sa pinto nin sarong estranghero asin maghulit sa saiya kan mensaheng dai gusto nin dakul. Pero ngunyan, regular mo nang ginigibo iyan. Saro pa, sa tabang ni Jehova, na-enjoy mo na an paghuhulit! Namati mo an pag-alalay sa saimo ni Jehova sa manlain-lain na paagi. Tinabangan ka niya na magdanay na kalmado pag an kaulay mo saro na nagkokontra. Tinabangan ka man niya na magirumduman an teksto na eksakto sa kamugtakan kan sarong interesadong kagharong. Asin tinawan ka niya nin kusog na magpadagos sa ibong kan kawaran nin interes kan mga tawo sa teritoryo nindo.—Jer. 20:7-9.

6. Taano ta masasabing pruweba kan karahayan ni Jehova an pagsasanay na itinatao niya?

⁶ Ipinapahiling man ni Jehova sa sato an karahayan niya paagi sa pagsasanay sa sato para sa ministeryo. (Juan 6:45) Sa satuyang pagtiripon sa tahaw kan semana, nagdadangog kita sa pinag-isipan na marhay na sampol na mga pakikipag-ulay, asin dinadagka kita na gamiton an mga iyan sa ministeryo. Sa primero, tibaad mag-alangan kitang purbaran an sarong bagong pamamaagi, pero pag ginibo ta iyan, mahihiling tang epektibo palan sa satuyang teritoryo an bagong pamamaaging iyan. Dinadagka man kita sa satuyang mga pagtiripon asin mga kumbensiyon na makikabtang sa mga paagi nin pagmiministeryo na dai ta pa lamang napurbaran. Sa giraray, nangangahulugan iyan na babayaan ta an mga dati ta nang kinatudan. Pero pag ginibo ta iyan, tinatawan ta si Jehova nin dahilan para bendisyunan kita. Pag-ulayan ta an nagkapira sa mga bendisyon na aakuon ta pag pinurbaran ta an bagong mga paagi para maitao ki Jehova an satuyang pinakamakakaya, ano man an satuyang kamugtakan. Dangan tutukaron ta man an mga lakdang tanganing mapahiwas ta an satuyang ministeryo.

7. Anong bendisyon an maaako ta pag hininguwa tang pahiwason an satong ministeryo?

⁷ Mas mapaparani kita ki Jehova. Pag-isipan an halimbawa nin sarong elder na si Samuel, * na naglilingkod sa Colombia kaiba kan saiyang agom. Maugma an mag-agom na ini sa pagpapayunir ninda sa saindang kongregasyon, pero gusto nindang pahiwason an saindang ministeryo paagi sa pagtabang sa sarong kongregasyon na mas dakula an pangangaipo. Tanganing maabot an pasuhan na iyan, kinaipuhan nindang gumibo nin nagkapirang pagsasakripisyo. “Inaplikar mi an Mateo 6:33 saka nagpundo kami sa pagbakal nin mga bagay na dai mi man kaipuhan,” an sabi ni Samuel. “Pero an pinakamasakit gibuhon iyo an bayaan an samuyang apartment. Arog kaidto an gusto ming harong, saka tapos mi nang hulugan iyan.” Nahiling kan mag-agom na ini na sa saindang bagong teritoryo, kaya nindang mabuhay dawa an  kuwarta ninda anom na dobleng mas diit kisa dati nindang income. Sabi ni Samuel, “Nahiling mi kun paano kami giniyahan ni Jehova sa ginibo ming mga lakdang asin kun paano niya sinimbag an samong mga pamibi. Aram ming nauugma siya samuya, asin mati mi an pagpadangat niya samo sa mga paaging dai mi pa naeksperyensiyahan kaidto.” Mapapahiwas mo daw an saimong ministeryo? Kun iyo, makakasigurado ka na mas mapaparani ka ki Jehova asin aatamanon ka niya.—Sal. 18:25.

8. Ano an nanudan mo sa sinabi ni Ivan asin Viktoria?

⁸ Magigin maugma kita sa satong paglilingkod. Mangnuha an sinabi ni Ivan asin Viktoria, sarong mag-agom na naglilingkod bilang payunir sa Kyrgyzstan. Pinagdanay nindang simple an saindang buhay tanganing makapagboluntaryo sinda sa ano man na asignasyon, kaiba na an mga proyekto sa pagtugdok. An sabi ni Ivan: “Talagang itinatao mi an bilog ming makakaya sa kada proyekto. Dawa pagal kami pagkatapos kan aldaw, tuninong an isip mi saka maugma, huling aram mi na ginamit mi an samuyang kusog sa gibuhon na pang-Kahadian. Ugmahon man kami ta dakul kaming nagin amigo saka magagayon na eksperyensiya.”—Mar. 10:29, 30.

9. Para mapahiwas an saiyang ministeryo, ano an ginibo nin sarong sister na nasa masakit na kamugtakan, asin ano an nagin resulta?

⁹ Magigin maugma kita sa paglilingkod ki Jehova dawa nasa masakit kitang mga kamugtakan. Halimbawa si Mirreh, sarong may edad nang biyuda sa West Africa, nagretiro na sa saiyang pagigin doktor dangan nagpayunir. Grabe an rayuma ni Mirreh kaya sarong oras lang an kaya niya sa pagpapatotoo sa harong-harong. Pero mas dakul na oras an kaya niya sa pagpapatotoo sa publiko. Dakul siyang nagin pagdalaw liwat saka pag-adal sa Bibliya, na an nagkapira kinakaulay niya sa telepono. Ano an nagpahiro ki Mirreh na gumibo nin urog pang paglilingkod? “Namumutan kong marhay si Jehova saka si Cristo Jesus. Asin parati akong namimibi ki Jehova na tabangan ako na magibo an pinakamakakaya ko sa paglilingkod sa saiya.”—Mat. 22:36, 37.

10. Arog kan ipinapahiling sa 1 Pedro 5:10, ano an inaako hali ki Jehova kaidtong mga naggigibo nin urog pang paglilingkod?

¹⁰ Mag-aako kita nin dagdag na pagsasanay hali ki Jehova. Napatunayan ini ni Kenny, sarong payunir na naglilingkod sa Mauritius. Kan manudan niya an katotoohan, nagpundo siya sa kolehiyo, nabawtismuhan, asin naglaog siya sa bilog na panahon na paglilingkod. “Hininguwa kong arugon an sabuot ni propeta Isaias, na nagsabi: ‘Uya ako! Sugua ako!’” (Isa. 6:8) Nakapagboluntaryo si Kenny sa dakul na proyekto sa pagtugdok, asin nagtabang man siya na maitradusir sa sadiri niyang lengguwahe an mga publikasyon na basado sa Bibliya. “Nag-ako ako nin pagsasanay na nagtukdo sa sako kan mga kakayahan na kaipuhan ko para maisagibo ko an mga asignasyon ko,” an sabi ni Kenny. Pero bako lang mga teknikal na impormasyon an naaraman niya. Idinugang niya, “Naaraman ko an mga limitasyon ko saka an mga kuwalidad na kaipuhan kong pauswagon tanganing magin mas marahay na lingkod ni Jehova.” (Basahon an 1 Pedro 5:10.) Taano ta dai pag-isipan an saimong kamugtakan asin hilingon kun baga may magigibo kang mga pagbabago tanganing mag-ako ka nin dagdag na pagsasanay hali ki Jehova?

11. Anong mga paghihinguwa an ginibo kan mga sister sa South Korea tanganing makapaghulit sinda, asin ano an nagin resulta? (Hilingon an ritrato sa cover.)

¹¹ Dawa an mga eksperyensiyado nang mga Saksi nakikinabang man sa pagsasanay pag pinupurbaran ninda an sarong bagong paagi nin paghuhulit. Sa panahon kan COVID-19 na pandemya, an mga elder sa sarong kongregasyon sa South Korea nagsurat: “An nagkapira na dating nag-iisip na dai sinda makakapaghulit sa langtad dahil sa problema ninda sa salud nagigibo na iyan ngunyan paagi sa videoconferencing. Tulong sister na labi nang 80 anyos an pinag-adalan na gamiton an bagong teknolohiya, asin nakikikabtang na sinda sa siring na areglo nin paghuhulit nin haros aroaldaw.”  (Sal. 92:14, 15) Gusto mo daw na pahiwason an saimong ministeryo asin mas manamitan pa an karahayan ni Jehova? Pag-isipan an nagkapirang lakdang na makakatabang sa saimo na magibo iyan.

12. Ano an ipinanuga ni Jehova sa mga nagsasarig sa saiya?

¹² Makanuod na magsarig ki Jehova. Nanunuga siya na tatawan niya kita nin dakul na bendisyon kun magtitiwala kita sa saiya asin itatao an satuyang pinakamakakaya. (Mal. 3:10) Naeksperyensiyahan nin sarong sister sa Colombia na an pangaran Fabiola na inutob ni Jehova sa saiya an panugang ini. Gusto niyang magin regular payunir pagkatapos tulos niyang mabawtismuhan. Pero sa suweldo niya nakadepende an agom niya saka tulong aki. Kaya kan kuwalipikado na siyang magretiro, udok sa puso siyang namibi ki Jehova para sa tabang. Dangan sinabi niya: “Sa parati, haluyon an proseso bago ka magkapensiyon. Pero su sako, naaprubaran saro sanang bulan pagkaaplay ko kaiyan. Garo ngani ’to milagro!” Pakalihis nin duwang bulan, nag-aplay siya bilang payunir. Labing 70 anyos na siya ngunyan, asin labi nang 20 taon siyang nagpapayunir. Sa mga panahon na iyan, walo na an nabawtismuhan sa mga tinabangan niya. An sabi niya: “Nakakamati ako nin pangluluya minsan, pero tinatabangan ako ni Jehova na masunod an iskedyul ko aroaldaw.”

13-14. Kiisay na mga halimbawa an makakatabang sa sato na magtiwala ki Jehova asin gumibo nin urog pang paglilingkod?

¹³ Makanuod sa mga halimbawa kaidtong mga nagsarig ki Jehova. Sa Bibliya, igwa nin dakul na halimbawa nin mga indibidwal na nagmaigot sa saindang paglilingkod ki Jehova. Sa dakul na  pagkakataon, an mga lingkod na idto ni Jehova kinaipuhan ngunang gumibo nin inot na lakdang bago sinda nag-ako nin espesyal na mga bendisyon hali ki Jehova. Halimbawa, saka lang binendisyunan ni Jehova si Abraham pagkatapos niyang bayaan an saiyang harong—“maski ngani dai niya aram kun sain siya maduman.” (Heb. 11:8) Saka lang nag-ako nin sarong espesyal na bendisyon si Jacob pagkatapos niyang makipaggumulan sa anghel. (Gen. 32:24-30) Kan palaog na sa Dagang Panuga an nasyon nin Israel, saka lang nakabalyo an banwaan pagkatapos na magtungtong kan mga saserdote sa Salog nin Jordan na makusog an sulog.—Jos. 3:14-16.

¹⁴ May manunudan ka man sa mga halimbawa kan mga Saksi sa ngunyan na nagsarig ki Jehova asin naggibo nin urog pang paglilingkod. Halimbawa, sarong brother na an pangaran Payton saka an agom niyang si Diana an nauugmang magbasa manungod sa mga tugang na pinahiwas an paglilingkod ninda ki Jehova, arog kan yaon sa seryeng “Gikan sa Buot na Iprinesentar an Saindang Sadiri.” * An sabi ni Payton: “Pag binabasa mi an mga eksperyensiya ninda, garo man sana kami naghihiling sa sarong nagkakakan nin masiram na kakanon. Mantang mas pighihiling mi siya, mas lalo man kaming naeengganyar na ‘namitan asin hilingon na marahay si Jehova.’” Pag-abot nin panahon, si Payton asin Diana naglingkod sa lugar kun sain mas dakula an pangangaipo. Nabasa mo na an seryeng ini? Asin nahiling mo na daw an mga video na Pagpapatotoo sa Hararayong Teritoryo—Australia asin Pagpapatotoo sa Hararayong Teritoryo—Ireland na yaon sa jw.org? Makakatabang an mga ini para makahanap ka nin mga paagi tanganing mapahiwas mo an saimong paglilingkod.

15. Paano makakatabang sa sato an tamang kairiba?

¹⁵ Pumili nin tamang kairiba. Mas magigin pasil sa sato na purbaran an sarong bagong kakanon kun an mga kairiba ta iyo idtong mga nasisiraman sa kakanon na iyan. Kaagid kaiyan, kun nakikiiba kita sa mga iniinot sa saindang buhay an paglilingkod ki Jehova, posibleng marhay na mahanap man kita nin mga paagi tanganing pahiwason an satong paglilingkod sa Diyos. Napatunayan ini nin sarong mag-agom na si Kent saka Veronica. “Pinakusog kami kan mga amigo mi saka pamilya na purbaran an bagong mga paagi nin paglilingkod,” an sabi ni Kent. “Narealisar mi na sa pakikiiba mi sa mga tawong iniinot an Kahadian, nagkakumpiyansa kaming purbaran an sarong bagong paagi nin paglilingkod.” Naglilingkod ngunyan sa Serbia si Kent asin Veronica bilang mga espesyal payunir.

16. Arog kan ipinapahiling sa ilustrasyon ni Jesus sa Lucas 12:16-21, taano ta dapat kitang magin andam na gumibo nin mga pagsasakripisyo?

¹⁶ Gumibo nin mga pagsasakripisyo para ki Jehova. Dai man niyato kaipuhan bayaan an gabos na bagay na ikinakaugma ta tanganing mapaugma si Jehova. (Par. 5:19, 20) Pero kun dai kita naghihinguwa na gumibo nin urog pang paglilingkod sa Diyos tangani sanang malikayan tang gumibo nin personal na mga pagsasakripisyo, mapapasala kita arog kan lalaki sa ilustrasyon ni Jesus na nagmaigot para magin komportable an buhay pero binaliwala an Diyos. (Basahon an Lucas 12:16-21.) Sarong brother na an pangaran Christian na nakaistar sa France an nagsabi, “Dai mi ni agom naitatao ki Jehova an pinakamakakaya ming oras saka kusog.” Nagdesisyon siya asin an agom niya na magpayunir. Pero tanganing maabot an pasuhan na iyan, kaipuhan nindang mag-resign sa saindang mga trabaho. Tanganing masuportaran an sadiri, nagpundar sinda nin sadit na negosyo nin paglimpya nin harong o opisina, asin nanudan nindang magin kontento sa kakadikit. Sulit daw an saindang pagsasakripisyo? An sabi ni Christian, “Ugmahon kami sa mas mabungang ministeryo mi ngunyan asin na mahiling na nakakanuod manungod ki Jehova an mga Bible study mi saka mga dinadalaw liwat.”

17. Ano an puwedeng makapugol sa sato na purbaran an sarong bagong paagi nin paghuhulit?

 ¹⁷ Magin andam na purbaran an bagong mga paagi nin paghuhulit. (Gibo 17:16, 17; 20:20, 21) Kinaipuhan ni Shirley, sarong payunir sa Estados Unidos, na ibagay an saiyang paagi nin paghuhulit sa panahon kan COVID-19 na pandemya. Sa primero, nagduduwa-duwa siyang purbaran an pagpapatotoo paagi sa telepono. Pero pagkatapos na mag-ako siya nin pagsasanay sa panahon kan dalaw kan paraataman nin sirkito, pinunan niyang regular na makikabtang sa arog kaining paagi nin pagpapatotoo. An sabi niya: “Kan inot, nakakatakot, pero ngunyan talagang nae-enjoy ko na iyan. Mas dakul kaming nakakaulay kisa kan naghaharong-harong kami!”

18. Ano an makakatabang sa sato na maatubang an masakit na mga kamugtakan mantang hinihinguwa tang pahiwason an satong ministeryo?

¹⁸ Gumibo nin pasuhan asin humiro. Pag napapaatubang kita sa masakit na mga kamugtakan, namimibi kita asin ginigibo ta an satong pinakamakakaya na gamiton an satong kakayahan na mag-isip tanganing magkaigwa kitang plano nin gigibuhon. (Tal. 3:21) Si Sonia, na naglilingkod bilang regular payunir sa sarong Romany-language group sa Europa, nagsabi: “Gusto kong isinusurat sa papel an mga pasuhan ko, tapos ilinalaag ko an papel na iyan sa lugar kun sain madali ko iyan na mahiling. Sa sakuyang tukador, igwa akong drowing nin sarong nagsangang-dalan. Pag magibo ako nin desisyon, hinihiling ko an nagsangang-dalan na iyan asin iniisip kun baga an desisyon ko makakatabang na maabot an pasuhan ko o dai.” Hinihinguwa ni Sonia na pirming magin positibo an pagmansay sa masakit na mga kamugtakan na inaatubang niya. “An lambang bagong kamugtakan,” an sabi niya, “puwedeng magin siring sa sarong lanob na makakaulang sa sako o sa sarong tulay na makakatabang sa sako na makabalyo—nakadepende iyan sa kun paano ko iyan mamansayon.”

19. Ano an determinado niyatong gibuhon?

¹⁹ Binebendisyunan kita ni Jehova sa dakul na paagi. Maipapahiling niyato na talagang pinapahalagahan ta an mga bendisyon na iyan paagi sa paggibo kan satong pinakamakakaya na tawan siya nin pag-umaw. (Heb. 13:15) Kaiba na diyan an paghanap ta nin bagong mga paagi na mapahiwas an satuyang ministeryo na huli kaiyan mag-aako kita nin dagdag na mga bendisyon. Sa kada aldaw, maghanap kita nin mga paagi na ‘manamitan asin mahiling na marahay si Jehova.’ Dangan magigin arog kita ni Jesus na nagsabi: “An sakuyang kakanon iyo na gibuhon an kabutan niya na nagsugo sa sako asin na tapuson an saiyang gibuhon.”—Juan 4:34.