1. Ano an itinukdo saimo manungod sa satong Kaglalang?

KUN nagdakula ka sa pamilyang Saksi, posibleng marhay na nanudan mo an manungod ki Jehova sa amay na edad. Itinukdo saimo na siya an Kaglalang, na may magayon siyang personalidad, asin na may mamumuton siyang katuyuhan para sa katawuhan.—Gen. 1:1; Gibo 17:24-27.

2. Ano an paghiling kan nagkapirang tawo sa mga naniniwala na igwang Kaglalang?

² Pero dakul na tawo an dai naniniwala na may Diyos. Kaya lalo nang dai sinda naniniwala na siya an Kaglalang. Imbes, naniniwala sinda na basta na sana naglataw an buhay. Dangan, luway-luway na nagbago puon sa inaapod na simpleng mga porma nin buhay pasiring sa mas komplikado. An nagkapira sa mga indibidwal na ini halangkaw an inadalan. Tibaad hinihingako ninda na napatunayan na kan siyensiya na sala an Bibliya asin na an pagtubod na igwang Kaglalang para sana sa mga tawong ignorante, maluya, o madaling maloko.

3. Taano ta mahalaga na pakusugon ta an satong pagtubod?

³ An satong pagtubod daw na si Jehova iyo an satong mamumuton na Kaglalang mapapaluya kan mga paniniwala kan nagkapirang tawong halangkaw an inadalan? Nakadepende iyan lalo na sa kun taano ta naniniwala kita na si Jehova an Kaglalang. Iyan daw dahil ta sinabi iyan sato na paniwalaan ta o dahil ta nagtao kita nin panahon para siyasaton ta mismo an mga ebidensiya? (1 Cor. 3:12-15) Gurano man kita kahaloy nang Saksi ni Jehova, kaipuhan ta gabos na padagos na pakusugon an satong pagtubod. Kun gigibuhon ta iyan, dai kita mailalagalag ‘kan pilosopiya asin kan mapandaya pero daing saysay na mga ideya’ na itinutukdo kan mga tawo na kontra sa Tataramon nin Diyos. (Col. 2:8; Heb. 11:6) Para matabangan kita, pag-uulayan sa artikulong ini (1) kun taano ta dakul an dai naniniwala na igwang Kaglalang, (2) kun paano mo mapapakusog an saimong  pagtubod ki Jehova, an saimong Kaglalang, asin (3) kun paano mo padagos na mapapakusog an pagtubod na iyan.

4. Sigun sa Hebreo 11:1, sa ano nakabasar an totoong pagtubod?

⁴ May mga tawong nag-iisip na an pagkaigwa nin pagtubod nangangahulugan na paniniwala sa sarong bagay nin mayong patunay. Pero sigun sa Bibliya, bako iyan totoong pagtubod. (Basahon an Hebreo 11:1.) Risahon na an pagtubod sa mga bagay na totoo pero dai nahihiling, arog ki Jehova, Jesus, asin sa langitnon na Kahadian nakabasar sa nakakakumbinsir na ebidensiya. (Heb. 11:3) Manungod diyan, arog kaini an sinabi nin sarong Saksi na biochemist: “An samong pagtubod, bakong butang pagtubod na binabaliwala an mga katotoohan sa siyensiya.”

5. Taano ta dakul na tawo an naniniwala na an buhay nagpuon nin mayong Kaglalang?

⁵ Tibaad ihapot niyato, ‘Kun may nakakakumbinsir na ebidensiya na igwa nin Kaglalang, taano ta dakul na tawo an naniniwala na dai linalang nin Diyos an gabos na bagay na may buhay?’ An iba tibaad dai pa man lamang ninda nasiyasat an mga ebidensiya. Si Robert na saro nang Saksi ni Jehova ngunyan, nagsabi: “Dahil dai lamang sinambit sa eskuwelahan an manungod sa paglalang, inisip kong bako iyan totoo. Kan labi na akong 20 anyos, nakipag-ulay ako sa mga Saksi ni Jehova asin kaidto ko lang nadangog an lohikal asin nakakakumbinsir na mga eksplikasyon sa Bibliya apabor sa paglalang.” *—Hilingon an kahon na “ Pakiulay sa mga Magurang.”

6. Taano ta may mga dai naniniwala na igwa nin Kaglalang?

⁶ May mga dai naniniwala na igwa nin Kaglalang  huling sinasabi ninda na naniniwala sana sinda sa kun ano an nahihiling ninda. Pero siyempre, naniniwala pa man giraray sinda sa mga bagay na dai nahihiling, arog kan grabidad, na aram man nindang totoo. An klase nin pagtubod na sinambit sa Bibliya kalabot an ebidensiya para sa iba pang ‘mga bagay na talagang totoo pero dai nahihiling.’ (Heb. 11:1) Nangangaipo nin panahon asin paghihinguwa an pag-adal mismo niyato kan ebidensiya, asin dakul na tawo an mayo kan motibasyon na kaipuhan para gibuhon iyan. Kun dai pag-aadalan nin saro an ebidensiya, tibaad magkongklusyon siya na mayong Diyos.

7. An gabos daw na tawong may inadalan dai naniniwala na linalang nin Diyos an uniberso? Ipaliwanag.

⁷ Pagkatapos na pag-adalan an ebidensiya, may mga siyentista na nakumbinsir na linalang nin Diyos an uniberso. * Arog ni Robert, na sinambit kasubago, may mga tawo na inisip na lang na mayong Kaglalang dahil dai lamang itinukdo sa unibersidad  an manungod sa paglalang. Dawa arog kaiyan, dakul na siyentista an namidbid si Jehova asin namutan siya. Arog kan sa mga siyentistang ini, gabos kita kaipuhan na pakusugon an satong pagtubod sa Diyos, halangkaw man o bako an satong inadalan. Mayo nang iba pang puwedeng gumibo kaiyan para sato.

8-9. (a) Anong hapot an pag-uulayan ta ngunyan? (b) Paano ka makikinabang kun pag-aadalan mo an manungod sa paglalang?

⁸ Paano mo papakusugon an pagtubod mo sa Kaglalang? Pag-ulayan ta an apat na paagi.

⁹ Pag-adalan an mga linalang. Mapapakusog mo an saimong pagtubod sa Kaglalang paagi sa pag-obserbar sa mga hayop, pananom, asin mga bituon. (Sal. 19:1; Isa. 40:26) Mantang mas pinag-aadalan mo an mga bagay na iyan, mas lalo ka man na makukumbinsir na si Jehova an Kaglalang. Sa parati, igwa sa satong mga publikasyon nin mga artikulo na nagtatao nin mga detalye manungod sa mga linalang. Dai paglipasan an mga artikulong iyan dawa kun nasasakitan kang masabutan iyan na marhay. Makanuod sa mga iyan nin sagkod sa makakaya mo. Asin dai paglingawan na hilingon giraray sa satong website na jw.org an magagayon na video manungod sa mga linalang, na ipinahiling sa satong pangrehiyon na mga kumbensiyon sa nakaagi pa sanang mga taon.

10. Magtao nin halimbawa kun paano pinapatunayan kan mga linalang na igwang Kaglalang. (Roma 1:20)

¹⁰ Pag pinag-aadalan mo an mga linalang, tawan na marhay nin atensiyon kun ano an ihinahayag kan mga nanunudan mo manungod sa satong Kaglalang. (Basahon an Roma 1:20.) Halimbawa, tibaad maaraman mo na an satong aldaw, apuwera sa nagtatao iyan nin init na nagsusuportar sa buhay, nagluluwas man iyan nin nakakaraot na enerhiya na inaapod na ultraviolet rays. Kitang mga tawo, kaipuhan tang maprotektaran sa nakakaraot na enerhiyang iyan. Asin talagang protektado kita! Paano? An daga na satong istaran igwa nin sadiring pansagang—sarong layer nin ozone gas na nagpoprotektar sato sa nakakaraot na radyasyon na iyan. Mantang nagkukusog an ultraviolet rays hali sa aldaw, nagdadakul man an ozone gas. Ngunyan, bako daw na mauyon ka na may saro na nasa likod kaini asin na siguradong saro siyang mamumuton asin madunong na Kaglalang?

11. Sain ka makakahiling nin nakakapakusog sa pagtubod na mga impormasyon manungod sa mga linalang? (Hilingon an kahon na “ Mga Mapagkukuanan nin Nakakapakusog sa Pagtubod na Impormasyon.”)

¹¹ Makakahiling ka nin dakul na nakakapakusog sa pagtubod na impormasyon manungod sa mga linalang paagi sa paggamit kan Watch Tower Publications Index asin pag-research sa jw.org. Puwede kang magpuon sa mga artikulo asin mga video hali sa seryeng “May Nagdisenyo Daw Kaini?” Haralipot lang iyan asin nagtatao nin nagkapirang makangangalas na impormasyon manungod sa mga hayop asin iba pang mga linalang. Igwa man iyan nin mga halimbawa kun paano hinihinguwa kan mga siyentista na arugon an mga naoobserbaran ninda sa mga linalang.

12. Pag nag-aadal kita nin Bibliya, ano an nagkapirang bagay na dapat tang pag-isipan?

¹² Pag-adalan an Bibliya. An biochemist na sinambit kasubago dai naniniwala kan inot na igwang Kaglalang. Pero pag-abot nin panahon, nagtubod na siya. Sinabi niya: “An pagtubod ko dai lang nakabasar sa kun ano an pinag-adalan ko sa siyensiya. Nakabasar man iyan sa maingat na pag-adal ko kan Bibliya.” Tibaad igwa ka na nin tamang kaaraman manungod sa mga katukduan kan Bibliya. Dawa arog kaiyan, tanganing kumusog an pagtubod mo sa saimong Kaglalang, kaipuhan mong padagos na pag-adalan an Tataramon nin Diyos. (Jos. 1:8; Sal. 119:97) Halimbawa, pag-isipan an detalyadong pagkaladawan kan Bibliya sa mga pangyayari sa kasaysayan. Pag-isipan man an mga propesiya kaiyan asin an pagkauruyon kan mga laog kaiyan. An paggibo kaiyan makakapakusog  sa pagtubod mo na igwang sarong mamumuton asin madunong na Kaglalang na naggibo sato asin na ipinasabong niya an Bibliya. *—2 Tim. 3:14; 2 Ped. 1:21.

13. Ano an sarong halimbawa kan kadunungan na mahihiling sa Tataramon nin Diyos?

¹³ Pag nag-aadal kan Tataramon nin Diyos, risahon kun gurano kapaki-pakinabang an sadol kaiyan. Halimbawa, haloy nang ipinatanid kan Bibliya na an pagkamuot sa kuwarta nakakaraot asin na nagreresulta iyan sa “gulping mga kakulugan.” (1 Tim. 6:9, 10; Tal. 28:20; Mat. 6:24) Totoo pa daw sagkod ngunyan an patanid na iyan? Sinabi kan librong The Narcissism Epidemic: “Sa pangkagabsan, an materyalistikong mga tawo mas bakong maugma saka mas mamundo. Maski an mga tawo na gusto lang magkaigwa nin mas dakul na kuwarta bakong maugma; mas dakul man sindang problema sa salud.” Kaya kapaki-pakinabang nanggad na pinatanidan kita kan Bibliya na dai mamuot sa kuwarta! May naiisip ka daw na iba pang mga prinsipyo sa Bibliya na napatunayan mong kapaki-pakinabang? Mantang mas lalo tang napapahalagahan an sadol kan Bibliya, mas lalo man kitang magtitiwala sa dai nalulumang kadunungan na itinatao kan satong mamumuton na Kaglalang. (Sant. 1:5) Bilang resulta, mas magigin maugma an satong buhay.—Isa. 48:17, 18.

14. Ano an maitutukdo saimo manungod ki Jehova kan pag-adal mo sa Bibliya?

¹⁴ Mag-adal na may tamang katuyuhan—an mamidbid si Jehova. (Juan 17:3) Mantang pinag-aadalan mo an Kasuratan, maririsa mo na may nabibilog na sarong klarong personalidad—saro na kauyon kan mga kuwalidad na mahihiling sa mga linalang. Malinaw na mga kuwalidad ini nin sarong persona asin bakong resulta nin imahinasyon nin saro. (Ex. 34:6, 7; Sal. 145:8, 9) Mantang mas lalo mong namimidbid si Jehova, magtatalubo an pagtubod mo sa saiya, magrararom an pagkamuot mo sa saiya asin magigin mas makusog an pagigin mag-amigo nindo.

15. Paano ka makikinabang kun sasabihon mo sa iba an manungod sa saimong pagtubod?

¹⁵ Sabihon sa iba an manungod sa pagtubod mo sa Diyos. Mantang ginigibo mo iyan, magkukusog man an pagtubod mo. Pero paano kun an pinapatotoohan mo maghapot saimo manungod sa pag-eksister nin Diyos asin dai mo aram an isisimbag? Maghanap nin basado sa Kasuratan na simbag sa hapot na yaon sa saro sa mga publikasyon ta, dangan ihiras iyan saiya. (1 Ped. 3:15) Puwede ka man maghagad nin tabang sa sarong eksperyensiyadong kapwa Saksi. Akuon man o dai kan pinapatotoohan mo an mga simbag hali sa Bibliya, makikinabang ka sa ginibo mong pag-research. Lalong magkukusog an pagtubod mo. Bilang resulta, dai ka mapapaniwala kan salang mga paghihingako kan mga garo baga madunong asin may inadalan na nagsasabing mayong Kaglalang.

16. Ano an puwedeng mangyari kun dai ta padagos na papakusugon an satong pagtubod?

¹⁶ Gurano man kita kahaloy nang naglilingkod ki Jehova, dapat na padagos tang pakusugon an satong pagtubod saiya. Taano? Dahil kun dai kita mag-iingat, puwedeng lumuya an pagtubod ta. Tandaan na an pagtubod nakabase sa mga ebidensiya na an mga bagay na dai nahihiling talagang totoo. Puwede ta sanang madaling malingawan an mga bagay na dai ta nahihiling. Kaya an kawaran nin pagtubod, inapod ni Pablo na “an kasalan na madalion sanang minasabod sa sato.” (Heb. 12:1) Kun siring, paano ta malilikayan an siod na iyan?—2 Tes. 1:3.

17. Para padagos tang mapakusog an satong pagtubod, anong tabang an kaipuhan ta?

¹⁷ Inot, makimahirak ki Jehova na tawan ka kan saiyang banal na espiritu, asin parati iyan na gibuhon. Taano? Dahil an pagtubod sarong aspekto  kan bunga kan espiritu. (Gal. 5:22, 23) Dai kita magkakaigwa nin pagtubod sa satong Kaglalang asin na padagos na mapakusog iyan kun mayo an tabang kan saiyang banal na espiritu. Kun padagos tang hahagadon ki Jehova an saiyang banal na espiritu, itatao niya iyan sa sato. (Luc. 11:13) Puwede ta pa nganing espesipikong ipamibi: “Dagdagi an samong pagtubod.”—Luc. 17:5.

18. Sigun sa Salmo 1:2, 3, anong pribilehiyo an igwa kita ngunyan?

¹⁸ Saro pa, magin regular sa pag-adal mo kan Tataramon nin Diyos. (Basahon an Salmo 1:2, 3, NWT.) Kan isurat an salmong iyan, dikit na Israelita sana an igwa nin kumpletong kopya kan Katugunan nin Diyos. Dawa arog kaiyan, puwedeng magkaigwa nin kopya an hadi saka an mga saserdote, asin sa kada ikapitong taon, naggigibo nin mga areglo para tipunon an ‘mga lalaki, mga babayi, mga aki,’ saka an mga dayuhan na residente kan Israel para magdangog sa pagbasa kan Katugunan nin Diyos. (Deut. 31:10-12) Kan panahon ni Jesus, mahihiling sana an mga rolyo kan Kasuratan sa pipirang tawo saka sa mga sinagoga. Pero ngunyan, kadaklan na tawo makakabasa na kan Tataramon nin Diyos, porsiyon man o bilog. Pribilehiyo talaga iyan. Paano ta ipapahiling na pinapahalagahan ta an pribilehiyong iyan?

19. Ano an kaipuhan tang gibuhon para mapagdanay na makusog an satong pagtubod?

¹⁹ Maipapahiling ta na pinapahalagahan ta an pribilehiyo na igwa kita kan Tataramon nin Diyos paagi sa pagbasa kaiyan nin regular. Habo ta nanggad na gibuhon an satong personal na pag-adal pag may pagkakataon lang kita, na ginigibo iyan pag sa hiling ta may panahon kita. Paagi sa pagsunod na marhay sa sarong regular na rutina sa pag-adal, mapagdadanay tang makusog an satong pagtubod.

20. Ano an dapat na determinado tang gibuhon?

²⁰ Bakong arog kan “mga madunong saka may inadalan” sa kinaban na ini, igwa kita nin masarig na pagtubod na nakabasar sa Tataramon nin Diyos. (Mat. 11:25, 26) Dahil sa pag-adal ta kan Bibliya, aram ta kun taano ta nagrururo an mga kamugtakan sa daga asin kun ano an gigibuhon ni Jehova manungod diyan. Kaya lugod na magin determinado kita na pakusugon an satong pagtubod asin tabangan an pinakadakul na tawong posible na magkaigwa nin pagtubod sa satong Kaglalang. (1 Tim. 2:3, 4) Asin lugod na padagos tang antisiparon an panahon na an gabos na nabubuhay sa daga uumawon si Jehova asin sasabihon an mga tataramon na nasa Kapahayagan 4:11: “Angay ka, Jehova na samuyang Diyos, na mag-ako kan kamurawayan . . . huli ta linalang mo an gabos na bagay.”