ARTIKULONG PAG-AADALAN 33
Binabantayan ni Jehova an Saiyang mga Lingkod
“An mata ni Jehova nakabantay sa mga may pagkatakot sa saiya.”—SAL. 33:18.
KANTA 4 “Si Jehova an Sakuyang Pastor”
SUMARYO KAN PAG-AADALAN *
1. Taano ta hinagad ni Jesus ki Jehova na bantayan an saiyang mga parasunod?
KAN banggi bago magadan si Jesus, may espesyal siyang kahagadan sa saiyang Ama sa langit. Hinagad niya ki Jehova na bantayan an saiyang mga parasunod. (Juan 17:15, 20) Siyempre, pirming binabantayan ni Jehova an saiyang mga lingkod—inaataman niya sinda asin pinoprotektaran. Minsan siring, aram ni Jesus na mapapaatubang an saiyang mga parasunod sa daing kaagid na mga pagkontra ni Satanas. Aram man ni Jesus na kakaipuhanon ninda an tabang ni Jehova para makayanan an maringis na mga pag-atake kan Diyablo.
2. Sigun sa Salmo 33:18-20, taano ta dai kita dapat matakot pag napapaatubang sa kasakitan?
2 Grabeng panggigipit an ginigibo kan sistema ni Satanas sa tunay na mga Kristiyano ngunyan. Napapaatubang kita sa mga kasakitan na puwedeng makapadisganar sa sato asin makabalo pa ngani kan satong kaimbudan ki Jehova. Pero arog kan manunudan ta sa artikulong ini, mayo kita nin ano man na dapat na ikatakot. Binabantayan kita ni Jehova—nahihiling niya an mga kadipisilan na inaatubang ta, asin pirmi siyang andam na tabangan kita na atubangon an mga iyan. Siyasaton ta an duwang halimbawa sa Bibliya na nagpapahiling kun paano ‘binabantayan ni Jehova an mga may pagkatakot sa saiya.’—Basahon an Salmo 33:18-20.
PAG NAMAMATI TANG NAGSOSOLO KITA
3. Sa anong mga pagkakataon tibaad mamatian tang nagsosolo kita?
3 Dawa ngani kabilang kita sa dakulang pamilya nin mga parasamba, tibaad kun minsan mamatian ta na nagsosolo kita. Halimbawa, tibaad mamatian kan mga hoben na nagsosolo sinda pag ipinapaliwanag ninda an saindang mga tinutubod sa atubangan kan saindang mga kaklase sa eskuwelahan o pag nagbalyo sinda sa bagong kongregasyon. An iba sa sato tibaad namumundo o may pinaglalabanan na negatibong mga emosyon asin iniisip na kaipuhan tang atubangon nin solo an mga namamatian na iyan. Tibaad mag-alangan kita na sabihon sa iba an namamatian ta huling iniisip ta na tibaad dai ninda kita masasabutan. Asin kun minsan, tibaad iniisip pa ngani niyato kun igwa talagang nagmamakulog sa sato. Pag nakakamati kita na nagsosolo kita—ano man an dahilan kaiyan—puwedeng mamatian ta na mayo nang makakatabang sa sato asin mapurisaw kita. Habo nanggad ni Jehova na makamati kita nin arog kaiyan. Taano ta nasabi ta iyan?
4. Taano ta sinabi ni propeta Elias: “Ako na sana an natatada”?
4 Pag-isipan an halimbawa kan maimbod na si Elias. Labing 40 aldaw na siyang nagdudulag huling suminumpa si Jezebel na gagadanon siya. (1 Ha. 19:1-9) Kan nagsosolo siya sa sarong kuweba, nag-agrangay siya ki Jehova: “Ako na sana an [propeta na] natatada.” (1 Ha. 19:10) Igwa pa man nin ibang propeta sa daga; nagibo ni Obadias na iligtas an 100 na propeta sa paragadan na si Jezebel. (1 Ha. 18:7, 13) Kun siring, taano ta namati ni Elias na nagsosolo siya? Inisip niya daw na an mga propetang ilinigtas ni Obadias garadan na gabos? Namati niya daw na nagsosolo siya huling mayo nin nag-iba sa saiya sa paglilingkod ki Jehova, dawa pagkatapos kan nangyari sa Bukid nin Carmel kun sain pinatunayan ni Jehova na Siya an tunay na Diyos? Posible daw na namatian niyang mayo nin nakakasabot kun gurano kapeligroso an kamugtakan niya, o posible daw na inisip niya kun baga igwa nin siisay man na nagmamakulog sa saiya? Dai lubos na ipinaliwanag kan pagkasaysay kun ano an namatian ni Elias. Pero sigurado kita na nasabutan ni Jehova kun taano ta namati ni Elias na nagsosolo siya asin aram Niya nanggad kun paano Niya siya tatabangan.
Pag namamati tang nagsosolo kita, anong nakakarangang leksiyon an manunudan ta sa kun paano tinabangan ni Jehova si Elias? (Hilingon an parapo 5-6)
5. Paano inasigurar ni Jehova si Elias na dai siya nagsosolo?
5 Tinabangan ni Jehova si Elias sa nagkapirang paagi. Dinagka niya si Elias na magtaram. Duwang beses niyang hinapot si Elias: “Ano an ginigibo mo digdi?” (1 Ha. 19:9, 13) Sa kada pagkakataon, dinangog ni Jehova si Elias mantang sinasabi kaini an laog kan saiyang puso. Sinimbag ni Jehova si Elias paagi sa pagpamati kan Saiyang presensiya asin pagpahiling kan Saiyang makusog na kapangyarihan. Inasigurar niya man si Elias na dakul pa siyang kapwa parasamba. (1 Ha. 19:11, 12, 18) Mayong duda, naginhawahan si Elias kan masabi na niya an laog kan saiyang puso asin kan madangog niya an simbag ni Jehova. Tinawan ni Jehova si Elias nin nagkapirang mahalagang asignasyon. Sinabihan niya siya na lahidan si Hazael na magin hadi kan Siria, si Jehu na magin hadi kan Israel, asin si Eliseo na magin propeta. (1 Ha. 19:15, 16) Paagi sa pagtao ki Elias kan mga asignasyon na ini, tinabangan siya ni Jehova na makapagpokus sa positibong mga bagay. Tinawan man siya nin Diyos nin dayupot na kaiba-iba, si Eliseo. Paano ka mag-aako kan tabang ni Jehova pag namamati mo na nagsosolo ka?
6. Ano an puwede mong ipamibi pag namamati mo na nagsosolo ka? (Salmo 62:8)
6 Dinadagka ka ni Jehova na mamibi sa saiya. Aram niya an inaagihan mo, asin inaasigurar ka niya na dadangugon niya an mga pamibi mo ano man na oras. (1 Tes. 5:17) Nauugma siya na dangugon an saiyang mga parasamba. (Tal. 15:8) Ano an puwede mong ipamibi pag namamati mo na nagsosolo ka? Sabihon mo ki Jehova an nasa laog kan saimong puso, arog kan ginibo ni Elias. (Basahon an Salmo 62:8.) Sabihon mo saiya an mga ikinakahadit mo asin an epekto kaiyan sa saimo. Hagadon ki Jehova na tabangan kang mapangganahan an mga namamatian mo. Halimbawa, kun pagmati mo nagsosolo ka asin natatakot na magpatotoo sa eskuwelahan, hagadon ki Jehova an kusog na kaipuhan mo para magpatotoo. Puwede pa nganing hagadon mo sa saiya na tawan ka nin kadunungan para mataktika mong maipaliwanag an mga tinutubod mo. (Luc. 21:14, 15) Kun may pinaglalabanan kang negatibong mga emosyon, hagadon ki Jehova na tabangan kang ipakipag-ulay iyan sa sarong maygurang na Kristiyano. Puwede mong hagadon ki Jehova na tabangan an tugang na iyan na masabutan an namamatian mo. Sabihon ki Jehova an laog kan puso mo, hilingon kun paano niya sisimbagon an mga pamibi mo, asin akuon an tabang kan iba. Kun gigibuhon mo iyan, dai mo gayong mamamati na nagsosolo ka.
Naghahanap ka daw nin mga paagi para pahiwason an saimong ministeryo asin makaibanan an iba sa gibuhon na iyan? (Hilingon an parapo 7)
7. Ano an manunudan mo sa halimbawa ni Mauricio?
7 Gabos kita tinawan ni Jehova nin mahalagang gibuhon. Makakasigurado ka na nahihiling asin pinapahalagahan niya an gabos na ginigibo mong paghihinguwa para maisagibo an saimong mga asignasyon sa kongregasyon asin sa ministeryo. (Sal. 110:3) Paano makakatabang sa saimo an pagigin sibot sa gibuhon na ini pag namamati mo na nagsosolo ka? Pag-isipan an halimbawa kan hoben na si Mauricio. * Dai nahaloy pagkabawtismo ki Mauricio, an saro sa pinakadayupot na amigo niya luway-luway na binayaan an katotoohan. “Kan mahiling ko siya na luway-luway na binabayaan si Jehova, nawara an kumpiyansa ko sa sadiri,” an sabi ni Mauricio. “Inisip ko kun baga mauutob ko an sakong pagdusay asin magdadanay na kabtang kan pamilya ni Jehova. Pagmati ko nagsosolo ako saka mayo nin siisay man na makakasabot sa namamati ko.” Ano an nakatabang ki Mauricio? “Pinahiwas ko an sakong ministeryo,” an sabi niya. “Nakatabang iyan sa sako na dai magparapokus sa sadiri ko asin sa negatibong mga namamati ko. Nagin maugma ako asin dai nang gayo namamati na nagsosolo ako mantang naglilingkod kaiba kan mga tugang sa ministeryo.” Iyo, dawa pag dai ta aktuwal na nakakaibanan an mga kapagtubod sa paghuhulit, napapakusog kita na makaibanan sinda sa mga aktibidad arog kan pagpapatotoo paagi sa surat asin sa telepono. Ano pa an nakatabang ki Mauricio? Sinabi niya pa: “Nagin sibot man ako sa kongregasyon. Ginibo ko an pinakamakakaya ko para pag-andaman asin maipresentar an mga asignasyon ko sa kongregasyon bilang estudyante. Paagi sa mga asignasyon na ini, namati ko na pinapahalagahan ako ni Jehova asin kan iba.”
PAG NAGAGABATAN NA KITANG MARHAY HULI SA GRABENG MGA PAGBALO
8. Paano puwedeng makaapektar sa sato an grabeng mga pagbalo?
8 Inaasahan ta na mapapaatubang kita sa mga pagbalo sa huring mga aldaw na ini. (2 Tim. 3:1) Pero, tibaad ikabigla pa man giraray niyato an pag-abot kaiyan o an klase nin pagbalo na nag-abot. Tibaad bigla kitang magkaproblema sa pinansiyal, magkaigwa nin malalang hilang, o magadanan nin mahal sa buhay. Sa arog kaiyan na mga panahon, tibaad mapurisaw kita asin magabatan na marhay, lalong-lalo na kun garo baga surunod-sunod na nag-aabot an mga pagbalo o sarabay pa ngani. Pero, tandaan na binabantayan kita ni Jehova, asin sa tabang niya maaatubang niyato an ano man na pagbalo nin may kumpiyansa.
9. Isaysay an mga pagbalo na inagihan ni Job.
9 Pag-isipan kun paano tinabangan ni Jehova an maimbod na si Job. Sa laog nin halipot sanang panahon, nagkapirang grabeng pagbalo an inagihan niya. Sa saro sanang aldaw, naaraman ni Job an manungod sa madahas asin nakakabiglang mga pangyayari—hinarabon an saiyang ataman na mga hayop, ginaradan an saiyang mga suruguon, asin an mas nakakamundo, nagkagaradan an saiyang namumutan na mga aki. (Job 1:13-19) Dai nahaloy, mantang grabe pa an pagmundo ni Job, nagkaigwa siya nin makulog na hilang na nakakaraot nin itsura. (Job 2:7) Grabe nanggad an kamugtakan ni Job kaya nakapagsabi siya: “Nauuyam ako sa buhay ko; habo ko nang mabuhay pa.”—Job 7:16.
Tanganing asiguraron si Job na namumutan Niya ini asin aatamanon, nakipag-ulay si Jehova sa saiya manungod sa dakul na paagi na inaataman Niya an Saiyang mga linalang (Hilingon an parapo 10)
10. Paano itinao ni Jehova an kaipuhan ni Job para matagalan an mga pagbalo sa saiya? (Hilingon an ritrato sa cover.)
10 Binabantayan ni Jehova si Job. Huling namumutan ni Jehova si Job, itinao Niya an kaipuhan kaini para mapangganang matagalan an mga pagbalo. Nakipag-ulay si Jehova ki Job asin ipinagirumdom Niya digdi an Saiyang daing limite na kadunungan asin an Saiyang mamumuton na pag-ataman sa Saiyang mga linalang. Nagtaram siya manungod sa dakul na makangangalas na mga hayop. (Job 38:1, 2; 39:9, 13, 19, 27; 40:15; 41:1, 2) Ginamit man ni Jehova an maimbod na hoben na si Elihu tanganing pakusugon asin rangahon si Job. Inasigurar siya ni Elihu na pirming binabalusan ni Jehova an Saiyang mga parasamba huli sa saindang pakatagal. Pero pinahiro man ni Jehova si Elihu na tawan si Job nin mamumuton na konseho. Tinabangan ni Elihu si Job na dai pagparaisipon an sadiri niya paagi sa pagpagirumdom digdi kun gurano kita kasadit kumpara ki Jehova, an Kaglalang kan uniberso. (Job 37:14) Tinawan man ni Jehova nin asignasyon si Job; kaipuhan niyang ipamibi an saiyang tulong kairiba na nagkasala. (Job 42:8-10) Paano kita sinusuportaran ni Jehova ngunyan pag nag-aagi kita nin masakit na mga pagbalo?
11. Paano kita rinaranga kan Bibliya pag may inaagihan kitang mga pagbalo?
11 Dai direktang nakikipag-ulay sato si Jehova arog kan ginibo niya ki Job, pero nakikipag-ulay Siya sa satuya paagi sa Saiyang Tataramon, an Bibliya. (Roma 15:4) Rinaranga niya kita paagi sa pagtao sato nin paglaom para sa maabot na panahon. Pag-isipan an pira sana sa mga sinasabi sa Bibliya na puwedeng makaranga sato pag may inaagihan kitang mga pagbalo. Sa Kasuratan, inaasigurar kita ni Jehova na mayo nin ano man na bagay—kaiba na diyan an grabeng mga pagbalo—an “makakayang isuway kita sa [saiyang] pagkamuot.” (Roma 8:38, 39) Inaasigurar niya man kita na “harani [siya] sa gabos na nag-aapod sa saiya” sa pamibi. (Sal. 145:18) Sinasabi sa sato ni Jehova na kun magsasarig kita sa saiya, matatagalan ta an ano man na pagbalo asin magigin maugma pa man giraray kita dawa nagsasakit. (1 Cor. 10:13; Sant. 1:2, 12) Pinapagirumdom man kita kan Tataramon nin Diyos na an satong mga pagbalo temporaryo asin halipot sana kun ikukumparar sa daing katapusan na bendisyon na itatao niya sa sato. (2 Cor. 4:16-18) Tinatawan kita ni Jehova nin siguradong paglaom na hahalion niya an pinakadahilan kan gabos tang pagbalo—si Satanas na Diyablo asin an gabos na nagsusunod sa saiyang maraot na dalan. (Sal. 37:10) May natuom ka na daw na nakakarangang mga teksto sa Bibliya na makakatabang sa saimo na tagalan an maabot na mga pagbalo?
12. Ano an inaasahan ni Jehova na gigibuhon ta para lubos kitang makinabang sa saiyang Tataramon?
12 Inaasahan ni Jehova na matagama kita nin panahon para regular na pag-adalan an Bibliya asin hurop-hurupon an satong binabasa. Pag inaaplikar ta an satong nanunudan, mas nagkukusog an satong pagtubod asin mas nagigin harani kita sa satong Ama sa langit. Bilang resulta, nagkakaigwa kita nin kusog na tagalan an mga pagbalo. Itinatao man ni Jehova an saiyang banal na espiritu sa mga nagsasarig sa saiyang Tataramon. Asin an espiritung iyan puwedeng magtao sa sato kan “puwersa na urog kisa sa ordinaryo” para tagalan an ano man na pagbalo.—2 Cor. 4:7-10.
13. Paano an espirituwal na kakanon na itinatao kan “maimbod asin mapagmansay na uripon” nakakatabang sa sato na tagalan an mga pagbalo?
13 Sa tabang ni Jehova, an “maimbod asin mapagmansay na uripon” nagpoprodusir nin kadakul na artikulo, video, asin musika na makakatabang sa sato para magkaigwa nin makusog na pagtubod asin magdanay na mapagbantay sa espirituwal. (Mat. 24:45) Kaipuhan tang lubos na aprobetsaran an siring kaiyan na napapanahon na mga probisyon. Dai pa sana nahahaloy, sarong sister na taga Estados Unidos an nagpahayag kan saiyang pasasalamat para sa gabos na espirituwal na kakanon na iyan. Sinabi niya: “Sa 40 taon kong paglilingkod ki Jehova, pauruutrong nabalo an sakong integridad.” Napaatubang siya sa grabeng mga pagbalo—an saiyang lolo nagadan huli sa burat na drayber, an saiyang mga magurang nagadan huli sa malalang hilang, asin duwang beses siyang nagkakanser. Ano an nakatabang sa saiya na magtagal? Ipinaliwanag niya: “Pirmi akong inaataman ni Jehova. An espirituwal na kakanon na itinatao niya paagi sa maimbod asin mapagmansay na uripon nakatabang sa sako na magtagal. Huli kaiyan, masasabi ko an arog kan sinabi ni Job: ‘Sagkod na magadan ako, papagdanayon ko an sakuyang integridad!’”—Job 27:5.
Paano kita magigin bendisyon sa iba sa kongregasyon? (Hilingon an parapo 14)
14. Paano ginagamit ni Jehova an satong mga tugang tanganing tabangan kita sa panahon nin mga pagbalo? (1 Tesalonica 4:9)
14 Sinanay ni Jehova an saiyang mga lingkod na kamutan asin rangahon an lambang saro sa masakit na mga kamugtakan. (2 Cor. 1:3, 4; basahon an 1 Tesalonica 4:9.) Bilang pag-arog ki Elihu, an satong mga tugang gustong-gustong tabangan kita na magdanay na maimbod pag nag-aagi kita nin mga kasakitan. (Gibo 14:22) Halimbawa, pag-isipan kun paano pinakusog asin tinabangan si Diane kan saiyang kongregasyon para magdanay siyang makusog sa espirituwal kan magkaigwa nin malalang hilang an saiyang agom. Sinabi niya: “Masakiton idto. Pero namati mi an makusog asin mamumuton na mga takyag ni Jehova sa masakiton na mga bulan na idto. Dakul an ginibo kan samong kongregasyon para tabangan kami. An saindang mga pagbisita, pag-apod, asin mga kugos nakatabang sa samo para magtagal. Dahil dai ako nagmamaneho, sinigurado kan mga tugang na makaatender ako sa mga pagtiripon asin makaiba sa paglilingkod sa langtad pag puwede ako.” Dakulaon na bendisyon nanggad na magin kabtang kan arog kaiyan kamamumuton na espirituwal na pamilya!
NAGPAPASALAMAT SA MAMUMUTON NA PAG-ATAMAN NI JEHOVA
15. Taano ta kumbinsido kita na makakayanan ta an kasakitan?
15 Gabos kita mapapaatubang sa pagbalo. Pero, arog kan nanudan ta, dai ta nanggad iyan aatubangon nin solo. Siring sa sarong mamumuton na ama, pirmi kitang binabantayan ni Jehova. Kaibanan ta siya, andam na dangugon an mga pakiulay ta para sa tabang asin gustong-gustong tabangan kita. (Isa. 43:2) Kumbinsido kita na makakayanan ta an mga kasakitan huling abunda niyang itinatao an gabos na kaipuhan ta para makatagal. Itinao niya sa sato an regalong pamibi, an Bibliya, an abundang espirituwal na kakanon, asin an mamumuton na mga tugang para tabangan kita sa mga panahon na kaipuhan ta iyan.
16. Paano kita magdadanay sa mamumuton na pag-ataman ni Jehova?
16 Nagpapasalamat nanggad kita na igwa kita nin Ama sa langit na nagbabantay sa sato! “An puso ta nag-uugma huli sa saiya.” (Sal. 33:21) Maipapahiling ta ki Jehova na inaapresyar niyato an saiyang mamumuton na pag-ataman paagi sa pag-aprobetsar sa gabos na probisyon niya para tabangan kita. Kaipuhan ta man na gibuhon an satong kabtang para magdanay kita sa pangangataman nin Diyos. Sa ibang pagtaram, kun padagos tang gigibuhon an pinakamakakaya ta para sunudon si Jehova asin gibuhon an tama sa paghiling niya, babantayan niya kita sagkod lamang!—1 Ped. 3:12.
KANTA 30 Sakuyang Ama, Sakuyang Diyos Asin Katuod
^ Kaipuhan ta an tabang ni Jehova para makayanan an mga kasakitan na inaatubang ta ngunyan. Inaasigurar kita kan artikulong ini na binabantayan ni Jehova an saiyang mga lingkod. Tinatawan niya nin atensiyon an mga kadipisilan na inaatubang kan lambang saro sa sato, asin itinatao niya an tabang na kaipuhan niyato para makayanan ta an mga iyan.
^ Sinalidahan an nagkapirang pangaran.