1. Sigun sa 1 Tesalonica 5:11, sa anong gibuhon kita gabos nakikikabtang?

 AN SAINDO daw na kongregasyon nakapagtugdok o nakapag-renovate na nin Kingdom Hall? Kun iyo, siguradong nagigirumduman mo an inot mong pag-atender diyan. Nagpapasalamat kang marhay ki Jehova. An totoo, tibaad haros mapahibi ka sa sobrang kaugmahan kaya dai ka na gayo makakanta kan magpuon na an pagtiripon. An satong masarig na mga Kingdom Hall nagtatao nin kaumawan ki Jehova. Pero nagtatao kita nin mas urog pang kaumawan sa saiya pag nakikikabtang kita sa saro pang klase nin pagtugdok. Kalabot sa gibuhon na iyan an sarong bagay na mas mahalaga kisa sa literal na mga edipisyo. Kalabot diyan an mga tawo na nagpapasiring sa mga lugar na iyan nin pagsamba. Si apostol Pablo naggamit nin tataramon na puwede man mangahulugan na “pagtugdok” tanganing magtao kan ideya nin pagpakusog sa iba, arog kan mababasa sa 1 Tesalonica 5:11, an satong temang teksto.—Basahon.

2. Ano an pag-uulayan ta sa artikulong ini?

² Si apostol Pablo sarong marahayon na halimbawa nin saro na aram kun paano paparigunon an saiyang mga kapagtubod. Igwa siya nin empatiya sa sainda. Sa artikulong ini pag-uulayan ta kun paano niya tinabangan an saiyang mga tugang (1) na tagalan an mga pagbalo, (2) na magin mapagpatuninong sa lambang saro, asin (3) na pakusugon an saindang pagtubod ki Jehova. Aramon ta kun paano ta siya maaarog tanganing paagi kaiyan maparigon ta man an satuyang mga tugang ngunyan.—1 Cor. 11:1.

3. Anong balanseng pagmansay igwa si Pablo?

³ Namutan na marhay ni Pablo an saiyang mga tugang. Siya mismo nag-agi nin mga kasakitan; kaya, makakapahiling siya nin pagmalasakit asin empatiya sa mga kapagtubod pag nag-aagi sinda nin mga pagbalo. May panahon kaidto na natikapo si Pablo kaya kinaipuhan  niyang maghanap nin trabaho tanganing suportaran an saiyang sadiri saka an mga kairiba niya. (Gibo 20:34) An hanapbuhay niya iyo an paggibo nin tolda. Kan mag-abot siya sa Corinto, kan primero nagtrabaho siya kaiba ni Aquila asin Priscila na mga paragibo man nin tolda. Pero “kada sabbath” naghuhulit siya sa mga Judio saka mga Griego. Dangan kan mag-abot si Silas asin Timoteo, “ginamit ni Pablo an bilog niyang panahon sa paghuhulit kan mensahe.” (Gibo 18:2-5) Nungkang nalingawan ni Pablo an panginot na katuyuhan niya sa buhay, an paglingkudan si Jehova. Huli sa marahay na halimbawa ni Pablo nin kahigusan, nagibo niyang pakusugon an saiyang mga tugang. Pinagirumdom niya sinda na dai pagtugutan an mga problema sa buhay asin an pangangaipo na sustentuhan an pamilya na magin dahilan para mapabayaan ninda “an mas importanteng mga bagay”—an gabos na aspekto kan pagsamba ki Jehova.—Fil. 1:10.

4. Paano tinabangan ni Pablo asin Timoteo an mga kapagtubod para makayanan an persekusyon?

⁴ Dai nahaloy pagkatapos na maestablisar an kongregasyon sa Tesalonica, napaatubang an baguhan na mga Kristiyano sa grabeng pagkontra. Kan an sarong grupo nin madahas na mga parakontra dai nakua si Pablo asin Silas, ginuyod ninda “an nagkapira sa mga tugang saka dinara an mga ini sa mga tagapamahala kan siyudad,” na nagkukururahaw: “Sinda nagkokontra sa mga pagbuot ni Cesar.” (Gibo 17:6, 7) Naiimahinar mo daw an grabeng takot na namatian kan baguhan na mga Kristiyano kan maaraman ninda na nagin puntirya sinda nin pagkontra kan mga lalaki kan siyudad? Puwede kutanang nabawasan an saindang kaigutan sa paglilingkod ki Jehova, pero habo ni Pablo na mangyari iyan. Dawa ngani kinaipuhan niya asin ni Silas na humali, sinigurado ninda na maaataman na marhay an bagong kongregasyon. Pinagirumdom ni Pablo an mga taga Tesalonica: “Isinugo mi si Timoteo, na satuyang tugang . . . , para parigunon kamo asin rangahon kamo mapadapit sa saindong pagtubod tanganing dai matanyog kan mga kasakitan na ini an pagtubod nin siisay man.” (1 Tes. 3:2, 3) Posibleng marhay na nakaeksperyensiya mismo nin persekusyon si Timoteo sa ginikanan niyang banwaan na Listra. Nahiling niya kun paano pinakusog ni Pablo an mga tugang diyan. Huling nahiling ni Timoteo an resulta kan tabang ni Jehova, maaasigurar niya an baguhan na mga tugang niya na magigin marahay man an kamugtakan ninda.—Gibo 14:8, 19-22; Heb. 12:2.

5. Paano nakinabang an brother na si Bryant sa tabang kan sarong elder?

⁵ Sa ano pang paagi pinakusog ni Pablo an saiyang mga kapagtubod? Sa pagbalik giraray ni Pablo asin Bernabe sa Listra, Iconio, saka Antioquia, “nagnombra sinda nin kamagurangan sa lambang kongregasyon.” (Gibo 14:21-23) An ninombrahan na mga lalaking idto siguradong nagin gikanan nin karangahan sa mga kongregasyon, arog kan mga elder ngunyan. Risahon an sinabi kan brother na si Bryant: “Kan 15 anyos na ako,” an sabi niya, “binayaan kami kan sakong ama asin natiwalag an sakong ina. Pagmati ko pinabayaan ako, saka pinangluyahan ako nin buot.” Ano an nakatabang ki Bryant para matagalan an masakit na panahon na iyan? Sinabi niya: “Nakikipag-ulay sako si Kuya Tony, na sarong elder, sa mga pagtiripon saka sa iba pang mga pagkakataon. Iniistorya niya sako an mga eksperyensiya kan mga nag-agi nin pagbalo pero maugma pa man giraray. Pigsambit niya sako an sinasabi kan Salmo 27:10 saka parati niyang iniistorya an manungod ki Hezekias, na maimbod na naglingkod dawa ngani an saiyang ama bakong marahay na halimbawa.” Ano an nagin epekto ki Bryant kan praktikal na tabang na ini? “Dahil sa pagpakusog sako ni Kuya Tony,” an sabi ni Bryant, “pag-abot nin panahon pinunan ko an nakakaugmang paglilingkod nin bilog na panahon.” Mga elder, magin alisto sa pagtabang sa mga arog ni Bryant na tibaad nangangaipo nin “marahay na tataramon” na nakakapakusog.—Tal. 12:25.

6. Paano ginamit ni Pablo an mga istorya nin buhay para pakusugon an saiyang mga tugang?

 ⁶ Pinagirumdom ni Pablo an mga kapwa niya parasamba na paagi sa itinataong kusog ni Jehova, sarong ‘dakulang panganuron nin mga saksi’ an nakatagal nin mga kasakitan. (Heb. 12:1) Nasabutan ni Pablo na an mga istorya nin buhay kan mga lingkod nin Diyos kan nakaagi na mapangganang natagalan an gabos na klase nin kasakitan makakatabang sa saiyang mga tugang na magkaigwa nin kusog nin buot asin magdanay na nakapokus sa “siyudad kan buhay na Diyos.” (Heb. 12:22) Totoo man iyan ngunyan. Siisay an dai napapakusog pag nababasa an manungod sa kun paano tinabangan ni Jehova si Gideon, Barak, David, Samuel, asin dakul na iba pa? (Heb. 11:32-35) Asin kumusta man an mga halimbawa nin pagtubod sa presenteng panahon? Sa world headquarters, parati kitang nakakaresibi nin mga surat hali sa mga tugang na napakusog an pagtubod pagkatapos nindang mabasa an istorya nin buhay kan saro sa maimbod na mga lingkod ni Jehova sa presenteng panahon.

7. Ano an manunudan mo sa sadol ni Pablo na yaon sa Roma 14:19-21?

⁷ Napapakusog ta an satong mga tugang pag hinihinguwa ta paagi sa tataramon asin gibo na mapagdanay an katuninungan sa kongregasyon. Dai ta tinutugutan na magkabaranga kita dahil sa magkakalain na opinyon. Asin dai ta ipinipirit an satong mga deretso sa mga sitwasyon na mayo man nin nababalgang prinsipyo sa Kasuratan. Pag-isipan an sarong halimbawa. An kongregasyon sa Roma kompuwesto nin mga Kristiyanong Judio saka Hentil. Kan an Katugunan ni Moises halion na, an mga parasamba ni Jehova dai na obligadong sunudon an mga pagbabawal kaiyan sa pagkakan kan nagkapirang kakanon. (Mar. 7:19) Puon kan panahon na iyan, para sa nagkapirang mga Kristiyanong Judio libre na sindang magkakan kan gabos na klase nin kakanon. Pero para sa ibang Kristiyanong Judio, bakong tama na gibuhon iyan. Nagkabaranga an kongregasyon dahil sa isyung iyan. Idinuon ni Pablo an kahalagahan na mapagdanay an katuninungan asin sinabi niya: “Pinakamarahay nang dai kumakan nin karne o uminom nin arak o gumibo nin ano man na makakapasingkog sa saimong tugang.” (Basahon an Roma 14:19-21.) Sa siring, tinabangan ni Pablo an mga kapagtubod niya na masabutan na an arog kaiyan na dai pagkakauruyon makakadanyar nanggad sa mga indibidwal asin sa bilog na kongregasyon. Andam man siyang baguhon an saiya mismong paggawi para dai makapasingkog sa iba. (1 Cor. 9:19-22) Mapapakusog ta man an iba asin mapapagdanay an katuninungan kun dai ta ginigibong isyu an mga bagay na nakadepende sa personal na kagustuhan.

8. Ano an ginibo ni Pablo kan mameligrong maraot an katuninungan kan kongregasyon huli sa sarong mahalagang isyu?

⁸ Nagtao si Pablo nin marahay na halimbawa sa pagpadanay nin katuninungan sa mga dai nagkakauyon manungod sa mahalagang mga bagay. Halimbawa, an nagkapira sa inot na siglong kongregasyon nag-insistir na an nakumbertir na mga Hentil dapat na magpaturi, tibaad para malikayan an pagkritika kan mga Judio. (Gal. 6:12) Dai nanggad uyon si Pablo sa kaisipan na iyan, pero imbes na iinsistir na siya dapat an masunod, mapakumbaba niyang iinatubang an isyung iyan sa mga apostol asin kamagurangan sa Jerusalem. (Gibo 15:1, 2) Bilang resulta, an ginibo ni Pablo nakatabang sa mga Kristiyanong idto na mapagdanay an kaugmahan asin katuninungan sa laog kan kongregasyon.—Gibo 15:30, 31.

9. Paano ta maarog an halimbawa ni Pablo?

⁹ Kun magkaigwa nin grabeng dai pagkauruyon, sinusuportaran ta an katuninungan paagi sa paghagad nin paggiya sa mga ninombrahan ni Jehova na mangataman sa kongregasyon. Sa parati, an basado sa Bibliyang mga paggiya makukua sa satong mga publikasyon o sa mga guideline na itinatao kan organisasyon. Kun mapokus kita  sa pagsunod sa mga instruksiyon na iyan imbes na ipirit an satong personal na mga opinyon, makakakontribwir kita sa katuninungan kan kongregasyon.

10. Ano pa an ginibo ni Pablo para suportaran an katuninungan sa kongregasyon?

¹⁰ Sinuportaran ni Pablo an katuninungan paagi sa pagpokus sa positibong mga kuwalidad kan saiyang mga tugang, bako sa negatibong mga ugali ninda. Halimbawa, sa pagtatapos kan surat ni Pablo sa mga taga Roma, dakul na tawo an sinambit niya sa pangaran asin kadaklan sa sainda may idinagdag siyang positibong komento o personal na detalye manungod sa sainda. Puwede tang arugon si Pablo; dai mag-alangan na sambiton an mararahay na kuwalidad kan satong mga tugang. Pag ginigibo ta iyan, tinatawan ta an satong mga tugang nin dagdag na dahilan para magin dayupot sa lambang saro, asin huli kaiyan nagigin marigon an kongregasyon huli sa pagkamuot.

11. Paano ta maibabalik an katuninungan pag nagkaigwa nin dai pagkasinarabutan?

¹¹ Kun minsan, maski an maygurang na mga Kristiyano tibaad dai magkauyon o magdiskutiran. Nangyari iyan ki Pablo asin sa dayupot niyang amigo na si Bernabe. Dai nanggad nagkauyon an duwa kun baga iiiba ninda si Marcos sa saindang sunod na biyahe sa pagmimisyonero. “Nagkainitan” an duwa, asin huli kaiyan nagsuwayan sinda. (Gibo 15:37-39) Pero naibalik ni Pablo, Bernabe, asin Marcos an marahay na relasyon ninda, na nagpapahiling na pinahalagahan ninda an katuninungan saka pagkasararo kan kongregasyon. Kan huri, may marahay na mga sinabi si Pablo manungod ki Bernabe asin Marcos. (1 Cor. 9:6; Col. 4:10) Arog ninda, kaipuhan ta man na ayuson an ano man na tibaad dai pagkasinarabutan niyato asin kan ibang mga tugang sa kongregasyon, dangan padagos kitang magpokus sa saindang marahay na mga kuwalidad. Paagi kaiyan, masusuportaran niyato an katuninungan asin pagkasararo.—Efe. 4:3.

12. Ano an nagkapira sa mga kadipisilan na inaatubang kan satong mga tugang?

¹² Napaparigon ta an satong mga tugang pag pinapakusog ta an saindang pagtubod ki Jehova. An iba sa sainda tinutuya kan bakong kapagtubod na mga kapamilya o kan mga katrabaho o mga kaeskuwela. An iba igwa nin malalang hilang o tibaad nasasakitan na mahali an kulog nin buot. An iba man haloy nang bawtisadong Kristiyano asin haluyon nang hinahalat na matapos an sistemang ini nin mga bagay. An mga sitwasyon na ini puwedeng magin pagbalo sa pagtubod kan mga Kristiyano ngunyan. Napaatubang man sa arog kaiyan na mga problema an mga miyembro kan inot na siglong kongregasyon. Ano an ginibo ni Pablo para pakusugon an saiyang mga tugang?

13. Paano tinabangan ni Pablo an mga tinutuya huli sa saindang mga tinutubod?

¹³ Ginamit ni Pablo an Kasuratan tanganing parigunon an pagtubod kan saiyang mga tugang. Halimbawa, tibaad dai aram kan mga Kristiyanong Judio an sasabihon sa bakong kapagtubod na mga kapamilya na naghihingakong an Judaismo nakakalabi sa Kristiyanismo. Siguradong an surat ni Pablo sa mga Hebreo nakapakusog na marhay sa mga Kristiyanong idto. (Heb. 1:5, 6; 2:2, 3; 9:24, 25) Magagamit ninda an mapuwersang mga pangangatanusan niya para mapasilensiyo an mga nagkokontra sa sainda. Sa ngunyan, matatabangan ta an satong mga kapagtubod na napapaatubang sa pagtuya na gamiton an satong mga publikasyon na basado sa Bibliya para ipaliwanag an mga dahilan kan saindang paninindugan. Asin kun an satong mga hoben tinutuya huling nagtutubod sinda sa paglalang, matatabangan ta sinda na makakua nin mga impormasyon sa mga brosyur na Linalang daw an Buhay? asin The Origin of Life—Five Questions Worth Asking para ipahiling kun taano ta nagtutubod sinda na linalang an buhay.

14. Dawa ngani sibot si Pablo sa paghuhulit asin pagtutukdo, ano an ginibo niya?

 ¹⁴ Tinabangan ni Pablo an saiyang mga tugang na ipahiling an pagkamuot paagi sa “marahay na mga gibo.” (Heb. 10:24) Tinabangan niya an saiyang mga tugang bako sana paagi sa tataramon kundi pati man sa gibo. Halimbawa, kan an mga kapagtubod niya sa Judea mapaatubang sa tiggutom, nagtabang si Pablo sa pagdistribwir nin ayuda sa sainda. (Gibo 11:27-30) Sa katunayan, dawa sibot si Pablo sa paghuhulit asin pagtutukdo, pirmi siyang naghahanap nin mga paagi tanganing tabangan an mga nangangaipo sa materyal. (Gal. 2:10) Sa paggibo kaiyan, naparigon niya an pagtitiwala kan saiyang mga kapagtubod na aatamanon sinda ni Jehova. Sa ngunyan, pag ginagamit ta an satong panahon, kusog, asin kakayahan para tumabang sa pag-ayuda, pinaparigon ta man an pagtubod kan satong mga tugang. Magigibo ta man iyan pag regular kitang nagdodonar para sa pambilog na kinaban na gibuhon. Sa mga ini asin sa iba pang mga paagi, natatabangan ta an satong mga tugang na magtiwala na nungka sindang papabayaan ni Jehova.

15-16. Paano ta dapat trataron an mga nagluya an pagtubod?

¹⁵ Dai sinukuan ni Pablo an mga nagluya an pagtubod. Nagmalasakit siya sa sainda asin nagtaram sa sainda sa mamumuton asin positibong paagi. (Heb. 6:9; 10:39) Halimbawa, sa bilog niyang surat sa mga Hebreo, parati niyang ginagamit an mga tataramon na “kita,” “sato,” asin “ta,” na paagi kaiyan ipinapahiling niya na kaipuhan niya man na iaplikar an sadol na itinao niya. (Heb. 2:1, 3) Arog ni Pablo, dai ta man sinusukuan an mga nagluya an pagtubod. Imbes, pinaparigon ta sinda paagi sa pagpahiling nin tunay na interes sa sainda. Paagi kaiyan, pinapatunayan tang namumutan ta sinda. Asin kun mamumuton asin mabuot an paagi ta nin pagtaram, lalong magigin nakakapakusog an satong mga tataramon.

¹⁶ Siniyerto ni Pablo sa saiyang mga tugang na aram ni Jehova an saindang marahay na mga gibo. (Heb. 10:32-34) Magigibo ta man an kaagid  kaiyan pag tinatabangan ta an sarong kapagtubod na nagluya an pagtubod. Puwede tang ipaistorya sa saiya kun paano niya nasumpungan an katotoohan o dagkahon siya na girumdumon an mga pangyayari na diyan namatian niya an suporta ni Jehova. Puwede tang gamiton an oportunidad na iyan tanganing siyertuhon sa saiya na dai linilingawan ni Jehova an mga ipinahiling niyang pagkamuot asin na dai Niya siya papabayaan sa maabot na panahon. (Heb. 6:10; 13:5, 6) An arog kaining mga pag-uulay puwedeng makapakusog sa pagmawot kan namumutan tang mga tugang na ini na magpadagos sa paglilingkod sa Saiya.

17. Anong mga kakayahan an puwede niyatong padagos na pauswagon?

¹⁷ Kun paanong an sarong trabahador sa konstruksiyon nagigin mas mahusay sa paglihis nin panahon, kita man puwedeng magin mas epektibo sa pagparigon sa lambang saro. Matatabangan ta an iba na magkaigwa nin kusog na tagalan an mga pagbalo paagi sa pag-istorya sa sainda kan mga halimbawa kan mga nakatagal kan nakaagi. Masusuportaran ta an katuninungan paagi sa pagsambit kan mararahay na kuwalidad na nahihiling ta sa iba, pagpadanay nin katuninungan pag namemeligro iyan na maraot, asin pagbalik kan katuninungan pag nagkaigwa nin dai pagkakauruyon. Asin padagos tang mapaparigon an pagtubod kan satong mga tugang paagi sa pakikipag-ulay sa sainda kan mahalagang mga katotoohan sa Bibliya, pagtao sa sainda nin praktikal na tabang, asin pagsuporta sa siisay man na nangluya sa espirituwal.

18. Ano an determinado mong gibuhon?

¹⁸ An mga nagtatrabaho sa teokratikong mga proyekto nin pagtugdok nakakamati nin kaugmahan asin pagkakontento. Makakamati kita nin kaugmahan asin pagkakontento pag nagtatabang kita sa espirituwal na gibuhon na pagtugdok sa kongregasyon. Bakong arog nin literal na mga edipisyo na pag-abot nin panahon mararaot, an mga resulta kan satong gibuhon puwedeng magdanay sagkod sa panahon na daing sagkod! Lugod na magin determinado kita na “padagos na pakusugon asin parigunon an lambang saro.”—1 Tes. 5:11.