1. Sa ano sigurado si Marta na mangyayari sa saiyang tugang? (Hilingon an ritrato sa itaas.)

GRABE an pagmundo ni Marta na dayupot na amigo asin disipulo ni Jesus. An tugang niya kayang si Lazaro nagadan. May makakapagian daw kan namamatian niya? Igwa. Inasigurar sa saiya ni Jesus: “Mabangon an saimong tugang.” Posibleng dai man kaiyan biyong nahali an kamunduan ni Marta; pero, nagtiwala siya sa sinabing iyan ni Jesus. Sinabi ni Marta: “Aram kong mabangon siya sa pagkabuhay liwat sa huring aldaw.” (Juan 11:20-24) Sigurado si Marta na mangyayari iyan sa maabot pang panahon. Dangan, naggibo si Jesus nin sarong milagro. Kan aldaw man sanang idto binuhay niya si Lazaro.

2. Taano ta gusto mong magkaigwa kan pagtubod na arog kan ki Marta?

² Mayo kitang dahilan para maglaom na magibo ngunyan si Jesus o an saiyang Ama nin arog kaiyan na milagro para sa sato. Pero, arog daw kakusog kan ki Marta an pagtubod mo na bubuhayon liwat an saimong mga mahal sa buhay pag-abot nin panahon? Tibaad nagadanan ka nin agom, ina, ama, o lolo asin lola. O tibaad grabe an kamunduan mo sa pagkagadan kan saimong aki. Gustong-gusto mong makugos asin makaulay an mga mahal mo sa buhay saka makipagngiritan sa sainda. Marahay na sana ta arog ki Marta, may makusog kitang  dahilan na makapagsabi, ‘Aram kong mabubuhay liwat an sakong mahal sa buhay pag-abot nin panahon.’ Pero dawa arog kaiyan, kapaki-pakinabang pa man giraray kun huhurop-hurupon kan lambang Kristiyano kun taano ta siguradong magkakaigwa nin pagkabuhay liwat.

3, 4. Paano puwedeng napakusog an kumbiksiyon ni Marta kan dai pa sana nahahaloy na ginibo ni Jesus?

³ Nakaistar si Marta harani sa Jerusalem kaya harayo an posibilidad na nahiling niya mismo an pagbuhay liwat ni Jesus sa aking lalaki nin sarong babaying balo harani sa Nain sa Galilea. Pero posibleng nabaretaan niya iyan. Kaagid man iyan kan pagbuhay ni Jesus sa aking babayi ni Jairo. Aram kan mga yaon kaidto sa harong kan daragita na gadan na ini. Pero kinaputan ni Jesus an kamot kan daragita asin nagsabi: “Nene, magbangon ka!” Asin nagbuhat man tulos an daragita. (Luc. 7:11-17; 8:41, 42, 49-55) Aram pareho ni Marta saka kan tugang niyang si Maria na kayang paumayan ni Jesus an mga may hilang. Huli kaiyan, naisip ninda na kun yaon lang kuta si Jesus, dai magagadan si Lazaro. Pero ngunyan na gadan na an namumutan na amigo ni Jesus, ano pa an malalauman ninda? Risahon na may sinambit si Marta dapit sa pagbuhay liwat ki Lazaro sa maabot na panahon, “sa huring aldaw.” Taano ta sigurado siyang marhay? Asin taano ta makakasigurado ka na magkakaigwa nin pagbuhay liwat sa maabot na panahon na puwedeng kaiba diyan an saimong mga mahal sa buhay?

⁴ May makusog kitang dahilan na magtubod. Mantang tinutukar ta an pira sa mga iyan, tibaad may marisa kang mga punto sa Tataramon nin Diyos na posibleng kaidto dai mo naisip na konektado palan sa saimong siguradong paglaom na mahiling giraray an mga mahal mo sa buhay.

5. Taano ta kumbinsido si Marta na bubuhayon liwat si Lazaro?

⁵ Risahon na an sinabi ni Marta bakong, ‘Naglalaom akong mabangon siya.’ Imbes an sinabi niya: “Aram kong mabangon siya.” Kumbinsido si Marta huli sa mga milagro na naaraman niya bago pa nagpuon an ministeryo ni Jesus. Posibleng naaraman niya an mga ini sa harong asin sa sinagoga kan siya hoben pa. Mapadapit digdi, tibaad maisip ta an tulong pagbuhay liwat na nakarekord sa ipinasabong na Kasuratan.

6. Anong pambihirang milagro an siguradong aram ni Marta?

⁶ An inot na pagbuhay liwat nangyari kan panahon na nakakagibo nin mga milagro si propeta Elias huli sa itinataong kapangyarihan nin Diyos. Kan an propeta nasa Sarepta, sarong banwaan sa Fenicia harani sa gilid nin dagat, may sarong pobreng babaying balo na nag-istimar sa saiya. Dangan pinangyari nin Diyos na dai sinda mawaran nin suplay nin harina asin lana tanganing magdanay sindang buhay kan saiyang aki. (1 Ha. 17:8-16) Pero pag-abot nin panahon, naghilang an aki niya asin nagadan. Tinabangan ni Elias an balo. Mantang kinakaputan an bangkay, namibi si Elias: ‘Jehova na sakuyang Diyos, ipinakikimahirak ko saimo na bumalik an [buhay] kan aking lalaking ini sa saiya.’ Asin talagang nangyari iyan! Dinangog nin Diyos si Elias, asin nabuhay an aki. Iyan an inot na pagbuhay liwat na nakarekord sa Bibliya. (Basahon an 1 Hade 17:17-24.) Siguradong aram ni Marta an pambihirang pangyayaring iyan.

7, 8. (a) Iistorya an ginibo ni Eliseo para maranga an sarong ina na nagadanan nin aki. (b) Ano an pinapatunayan dapit ki Jehova kan milagrong ginibo ni Eliseo?

⁷ An ikaduwang pagbuhay liwat na mababasa sa Bibliya ginibo kan kasalihid ni Elias na si propeta Eliseo. Sa siyudad nin Sunem, may sarong prominenteng Israelitang babayi na daing aki an nagpahiling nin pambihirang pagkamapag-istimar ki Eliseo. Paagi sa propeta, binalusan ni Jehova nin sarong aking lalaki an babaying ini asin an saiyang may edad nang agom. Pero pakalihis nin pirang taon, nagadan an aki. Isipa na sana an grabeng kamunduan kan saiyang ina. Tinugutan siya kan saiyang agom na  magpasiring ki Eliseo sa Bukid nin Carmel na mga 30 kilometros an rayo. Isinugo kan propeta an saiyang suruguon na si Gehazi na mag-inot na sa Sunem. Pero dai nabuhay ni Gehazi an aki. Dangan nag-abot na an nagmumundong ina saka si Eliseo.—2 Ha. 4:8-31.

⁸ Naglaog si Eliseo sa harong kun sain yaon an bangkay kan aki, dangan namibi siya. Milagrosong nabuhay an aki. Kan mahiling siya kan saiyang ina, ugmahon ining marhay! (Basahon an 2 Hade 4:32-37.) Posibleng nagirumduman niya an pamibi kan dating baog na si Hana kan ihatod na kaini si Samuel para maglingkod sa tabernakulo: ‘Si Jehova an minapahilig sa Lulubngan, asin siya an minapabangon.’ (1 Sam. 2:6) Literal na ibinangon nin Diyos sa kagadanan an aking lalaki sa Sunem, na nagpapatunay na may kakayahan Siyang bumuhay nin mga gadan.

9. Iistorya an ikatulong pagkabuhay liwat na nakarekord sa Bibliya.

⁹ Pero bako iyan an huring pambihirang pangyayari na kalabot si Eliseo. Naglingkod siya nin labing 50 taon bilang propeta, dangan ‘naghilang siya na saiyang ikinagadan.’ Paglihis nin panahon, tulang na sana an natada sa bangkay ni Eliseo. Sarong aldaw, may mga Israelita na igwang ilulubong na sarong lalaki. Dangan biglang may nahiling sindang paabot na mga tulisan. Dali-dali sindang nagdulag, kaya iinapon na sana ninda an bangkay sa lulubngan kun sain yaon an mga tulang ni Eliseo. Mababasa ta: ‘Kan makaduot su gadan sa mga tulang ni Eliseo, nabuhay iyan asin tuminindog.’ (2 Ha. 13:14, 20, 21) Isipa na sana an nagin epekto ki Marta kan mga istoryang iyan nin pagbuhay liwat! Paagi kaiyan, napatunayan niyang may kapangyarihan an Diyos na daugon an kagadanan. Isipon man an siguradong magigin epekto kaiyan sa saimo. Makukumbinsir ka kaiyan na an kapangyarihan nin Diyos makusugon asin daing sagkod.

10. Ano an ginibo ni Pedro sa sarong Kristiyanang nagadan?

¹⁰ Sa Kristiyanong Griegong Kasuratan, may mababasa man kitang mga pagbuhay liwat na ginibo kan mga representante nin Diyos. Halimbawa kaiyan an ginibo ni Jesus harani sa Nain asin duman sa harong ni Jairo. An saro pa iyo an pagbuhay ni Pedro sa Kristiyanang si Dorcas (Tabita). Nagduman si Pedro sa kuwarto na hinutadan kan bangkay asin namibi. Dangan sinabi niya: “Tabita, bangon!” Nabuhay tulos ini, asin “iinatubang [ni Pedro sa mga kapwa niya Kristiyano] an buhay nang si Tabita.” Nakakakumbinsir nanggad na ebidensiya iyan kaya “dakul an nagturubod sa Kagurangnan.” Makakapagpatotoo sinda sa mga tawo dapit sa Kagurangnan saka partikular na dapit sa kakayahan ni Jehova na magbuhay nin mga gadan.—Gibo 9:36-42.

11. Anong pangyayari an isinaysay ni Lucas dapit sa sarong hoben na lalaki, asin ano an nagin epekto kaiyan sa iba?

¹¹ Igwa man nin mga nakahiling mismo sa saro pang pagbuhay liwat. Yaon kaidto si apostol Pablo sa pagtiripon sa sarong kuwarto sa itaas sa siyudad nin Troas, na mahihiling ngunyan sa norteng-sulnupan na parte kan Turkey. Nagdiskurso si Pablo sagkod matanga. Sarong hoben, na an pangaran Eutico, an nagdadangog sa saiya mantang nakatukaw sa bintana. Pero nakaturog ini asin nahulog hali sa ikatulong eskalon. Posibleng an doktor na si Lucas an inot na nakaabot ki Eutico asin an nagdeklarar na bako sanang basta irido saka nadismayo si Eutico, kundi talagang gadan na ini! Nagbaba si Pablo asin kinugos an bangkay. Dangan napangalas an gabos kan sabihon niya: “Buhay siya.” Dakulaon nanggad an nagin epekto kaiyan sa mga nakahiling! Aram nindang nagadan an hoben, kaya “labi-labi an saindang kaugmahan” kan mahiling ninda mismong binuhay ini.—Gibo 20:7-12.

12, 13. Sigun sa napag-ulayan tang mga pagbuhay liwat, anong mga hapot an kaipuhan niyatong pag-isipan?

¹² An mga istoryang sinambit siguradong matao sa saindo nin kumpiyansa na arog kan ki Marta. Makakapagtiwala kita na an satong Diyos asin Paratao nin Buhay may kakayahan na magbuhay nin mga gadan. Pero interesanteng maaraman na sa kada pagbuhay liwat na iyan, yaon an sarong maimbod na lingkod nin Diyos, arog ni Elias, Jesus, asin Pedro. Kaya paano man idtong mga nagadan sa ibang peryodo nin panahon? Kun may mga panahon na dai nagbuhay nin gadan an Diyos, malalauman daw kan saiyang maimbod na mga lingkod na bubuhayon Niya sa maabot na panahon an mga gadan? Makakapagtiwala daw sinda arog ki Marta na nagsabi: “Aram kong [an sakong tugang] mabangon . . . sa pagkabuhay liwat sa huring aldaw”? Taano ta arog kaiyan kakusog an pagtitiwala niya diyan, asin taano ta makakapagtiwala ka man?

¹³ May nagkapirang istorya sa ipinasabong na Tataramon nin Diyos na nagpapahiling na aram kan maimbod na mga lingkod ni Jehova na magkakaigwa nin pagkabuhay liwat sa maabot na panahon. Pag-isipan an pira sa mga ini.

14. Ano an manunudan niyato sa istorya dapit ki Abraham kun manungod sa pagkabuhay liwat?

¹⁴ Pag-isipan an ipinagibo nin Diyos ki Abraham kun dapit ki Isaac, an haloy nang hinahalat na tagapagmana. Sinabi ni Jehova: ‘Ipag-iba mo an saimong aki, an bugtong mong aking si Isaac na namumutan mong marhay, asin idulot mo siya sako bilang atang na pigtututong.’ (Gen. 22:2, An Marahay na Bareta Biblia) Imahinara kun ano an namatian ni Abraham sa pagbuot na iyan. Nanuga si Jehova na bebendisyunan niya an gabos na nasyon paagi sa banhi ni Abraham. (Gen. 13:14-16; 18:18; Roma 4:17, 18 ) Saka, sinabi ni Jehova na maluwas an bendisyon ‘paagi ki Isaac.’ (Gen. 21:12) Pero paano mangyayari iyan kun gagadanon ni Abraham si Isaac para iatang? Pinasabngan si Pablo tanganing ipaliwanag na si Abraham nagtubod na kaya nin Diyos na ibangon si Isaac hali sa mga gadan. (Basahon an Hebreo 11:17-19.) Mayong sinasabi an Bibliya na inasahan ni Abraham, na kun masunod siya, bubuhayon liwat si Isaac pagkalihis sana nin pirang oras, nin sarong aldaw, o nin sarong semana. Dai kayang aramon ni Abraham kun nuarin bubuhayon an saiyang aki. Pero nagtiwala siya na bubuhayon liwat ni Jehova si Isaac.

15. Sa ano naglaom an patriyarkang si Job?

¹⁵ Nagtutubod man an patriyarkang si Job na magkakaigwa nin pagkabuhay liwat sa maabot na panahon. Naobserbaran niya na an kahoy pag pinutol, puwede pang magtubo giraray asin magin garo bagong tinanom. Kaso bakong arog kaiyan an tawo. (Job 14:7-12; 19:25-27) Pag nagadan an tawo, dai niya kayang buhayon liwat an saiyang sadiri. (2 Sam. 12:23; Sal. 89:48) Pero, dai kaiyan  buot sabihon na dai kaya nin Diyos na buhayon an tawo. Sa katunayan, nagtutubod si Job na gigirumdumon siya ni Jehova sa Saiyang itinalaan na panahon. (Basahon an Job 14:13-15.) Dai kayang aramon ni Job kun nuarin an panahon na iyan. Pero nagtiwala siya na gigirumdumon asin bubuhayon siya kan Saro na naglalang mismo kan buhay nin tawo asin na may kakayahan Siyang gibuhon iyan.

16. Anong nakakapakusog sa buot an sinabi nin sarong anghel ki Daniel?

¹⁶ Si Daniel an saro pang maimbod na lalaki na sinambit sa Hebreong Kasuratan. Naglingkod siya nin maimbod sa Diyos sa laog nin dakul na taon, asin tinabangan siya ni Jehova. Sa sarong pangyayari, inapod nin sarong mensaherong anghel si Daniel na ‘lalaking namumutan na gayo,’ asin sinabi na ‘mapasaiya an katuninungan’ asin ‘magpakakusog.’—Dan. 9:22, 23; 10:11, 18, 19.

17, 18. Anong panuga an itinao ki Daniel mapadapit sa saiyang puturo?

¹⁷ Haros 100 anyos na si Daniel asin nasa puro na kan saiyang buhay. Tibaad iniisip niya kun ano an mangyayari sa saiya sa ngapit. Mabubuhay daw liwat si Daniel? Siyempre! Sa katapusan kan libro nin Daniel, mababasa ta an garantiya sa saiya nin Diyos: “Kun para man sa saimo mismo, paduman ka sa katapusan asin magpahingalo ka.” (Dan. 12:13, NW) Aram kan may edad nang si Daniel na an tawong gadan mayo nang magigibo, asin “mayo nin gibo ni pagplano ni kaaraman ni kadunungan sa Lulubngan.” Pasiring na siya diyan. (Par. 9:10, NW) Pero bako iyan an magigin katapusan para sa saiya. Pinanugaan siya ni Jehova nin sarong marahayon na puturo.

¹⁸ Sinabi pa kan anghel ki Daniel: ‘Matindog ka para sa saimong [kabtang] sa katapusan kan mga aldaw.’ Mayo nin itinaong petsa o lawig nin panahon. Maabot an katapusan kan buhay ni Daniel asin mapahingalo siya sa kagadanan. Pero sa sinabi kan anghel na ‘matindog ka para sa saimong [kabtang]’ sa maabot na panahon, malinaw na makakamtan ni Daniel an ipinanugang pagkabuhay liwat—haloy na panahon pagkagadan niya. Mangyayari iyan sa ‘katapusan kan mga aldaw.’ Itrinadusir kan Jerusalem Bible an panugang iyan ki Daniel: “Mabangon ka para sa saimong kahirasan sa katapusan kan panahon.”

19, 20. (a) Ano an koneksiyon kan mga napag-ulayan niyato sa sinabi ni Marta ki Jesus? (b) Ano an sunod na pag-uulayan niyato?

¹⁹ Malinaw na may makusog na dahilan si Marta para magtubod na an saiyang maimbod na tugang na si Lazaro “mabangon . . . sa pagkabuhay liwat sa huring aldaw.” An panugang itinao ki Daniel saka an makusog na pagtitiwala na ipinahiling ni Marta sa simbag niya ki Jesus, siguradong makakatao man nin kumpiyansa sa mga Kristiyano ngunyan na magkakaigwa talaga nin pagkabuhay liwat.

²⁰ Pinatunayan kan totoong mga pangyayari kan suanoy na talagang posible an pagkabuhay liwat—na posibleng mabuhay giraray an mga gadan. Asin talagang naglalaom an mga lingkod nin Diyos kaidto na magkakaigwa nin pagkabuhay liwat sa maabot na panahon. Pero igwa daw nin patunay na talagang mangyayari an pagkabuhay liwat dawa haloy na iyan na ipinanuga? Kun igwa, saro pang dahilan iyan na maglaom arog ni Marta, na magkakaigwa nin pagkabuhay liwat. Pero nuarin iyan mangyayari? Pag-uulayan niyato an mga ini sa masunod na artikulo.