1. Taano ta mahalagang marhay na lakdang an pagpabawtismo? (Hilingon an ritrato sa itaas.)

KADA taon, ribo-ribong tinutukduan sa Bibliya an nagpapabawtismo. An dakul sa sainda mga hoben—mga tin-edyer asin patin-edyer pa sana. An iba sa sainda nagdakula sa pamilyang Saksi. Saro ka daw sa sainda? Kun iyo, dapat kang komendaran. An bawtismo sarong kahagadan sa mga Kristiyano, asin mahalagang lakdang iyan para maligtas kita.—Mat. 28:19, 20; 1 Ped. 3:21.

2. Taano ta dai kita dapat matakot na magdusay ki Jehova?

² Pag an saro nagpabawtismo, dakul na bendisyon an nagigin bukas para sa saiya. Pero may kaiba iyan na responsabilidad. Sa anong paagi? Kan aldaw na bawtismuhan ka, nagsimbag ka nin iyo sa hapot na, “Basado sa atang ni Jesu-Cristo, pinagsulsulan mo na daw an saimong mga kasalan asin idinusay an saimong sadiri ki Jehova para gibuhon an saiyang kabutan?” An pagpabawtismo simbolo kan saimong pagdusay. Iyan sarong sagradong panuga ki Jehova na mamumutan mo siya asin na iinuton mo sa saimong buhay an paggibo kan saiyang kabutan. Seryosong panuga iyan. Mabasol ka daw na ginibo mo iyan? Dai lamang!  Bako nanggad sala an desisyon mong ipagkatiwala sa kamot ni Jehova an saimong buhay. Isipa na sana kun bako iyan an pinili mo! An mga tawong dai naglilingkod ki Jehova nasa irarom kan pamamahala ni Satanas. Daing pakilabot an Diyablo sa kaligtasan mo. Sa katunayan, mauugma pa ngani siya kun dai mo makamtan an buhay na daing katapusan huling kuminampi ka sa saiya asin isinikwal mo an soberaniya ni Jehova.

3. Anong mga bendisyon an nakakamtan mo huli sa pagdusay mo ki Jehova?

³ Huling nagdusay ka asin nagpabawtismo bilang Kristiyano imbes na magkampi ki Satanas, isip-isipa an mga bendisyon na nakakamtan mo. Ngunyan na itinao mo na an saimong buhay ki Jehova, mas may kumpiyansa mo nang masasabi: ‘Si Jehova nasa [kampi] ko; dai ako matatakot. Ano an magigibo sa sako nin tawo?’ (Sal. 118:6) Mayo nang ibang mas dakulang pribilehiyo kisa sa pagigin nasa kampi nin Diyos asin inuuyunan niya.

4, 5. (a) Taano ta masasabing personal na responsabilidad an pagdusay? (b) Anong mga kadipisilan an napapaatubang bako sana sa mga hoben?

⁴ An saimong relasyon ki Jehova bilang bawtisadong Kristiyano bakong arog sa sarong postpaid plan nin cell phone na an mga magurang mo an bahalang magbayad. Ngunyan, responsabilidad mo na an sadiri mong kaligtasan, dawa nasa poder ka pa kan saimong mga magurang. Taano ta importante na isaisip mo iyan? Huling dai mo pirming masisigurado kun anong mga kadipisilan an puwedeng mapaatubang sa saimo. Halimbawa, kun nabawtismuhan ka bago ka magin tin-edyer, siguradong makakaeksperyensiya ka nin bagong mga pagmati saka problema kun ika magtin-edyer na. Sarong tin-edyer na babayi an nagsabi: “Sa parati, dai man mabasol an sarong aki sa pagigin Saksi ni Jehova huli sana ta dai siya natawan nin birthday cake sa eskuwelahan. Pero pakalihis nin pirang taon na diyan nagigin mas makusog an pagmawot na makipag-sex, kaipuhan niyang magin biyong kumbinsido na an pagsunod sa mga pagbuot ni Jehova pirming iyo an pinakamarahay na desisyon.”

⁵ Siyempre, bako sanang mga hoben an napapaatubang sa bagong mga kadipisilan. Dawa an mga adulto nang nabawtismuhan napapaatubang man sa dai inaasahan na mga pagbalo sa saindang pagtubod. Puwedeng may koneksiyon iyan sa relasyon nin mag-agom, problema sa salud, o sa trabaho. An totoo, ano man an satong edad, an lambang saro sa sato mapapaatubang sa mga sitwasyon na kaipuhan niyatong ipahiling na maimbod kita ki Jehova.—Sant. 1:12-14.

6. (a) Paano mo maipapahiling na inuutob mo an saimong pagdusay ano man an mangyari? (b) Ano an manunudan ta sa Filipos 4:11-13?

⁶ Tanganing magdanay kang maimbod sa ano man na sitwasyon, makakatabang kun pirmi mong tatandaan na nanuga ka ki Jehova na uutubon mo an saimong pagdusay ano man an mangyari. Buot sabihon kaiyan, nanuga ka sa Soberano kan uniberso na padagos kang maglilingkod sa saiya dawa pa pumundo sa paglilingkod an mga amigo mo o mga magurang mo. (Sal. 27:10) Sa gabos na sitwasyon, pirming hagadon ki Jehova an kusog na kaipuhan tanganing mautob mo an saimong pagdusay.—Basahon an Filipos 4:11-13.

7. Ano an buot sabihon kan maghinguwa para sa kaligtasan na “ipinapahiling an hararom na paggalang asin pagkatakot”?

⁷ Gusto ni Jehova na magin amigo ka niya. Pero kaipuhan mong maghinguwa para magdanay na amigo ni Jehova asin tanganing makamtan mo an saimong kaligtasan. Sa katunayan, an Filipos 2:12 nagsasabi: “Padagos kamong maghinguwa para sa saindong kaligtasan, na ipinapahiling an hararom na paggalang asin pagkatakot.” Ipinaparisa kan mga tataramon na iyan na kaipuhan mong pag-isipan na marhay kun paano ka magdadanay na harani asin maimbod ki Jehova sa ibong nin ano man na kadipisilan. Dai dapat magin sobra an tiwala mo sa sadiri. Tandaan na may mga dai nagdanay na maimbod dawa haloy na sindang lingkod nin Diyos. Kaya, ano an mga puwede  mong gibuhon tanganing makamtan mo an saimong kaligtasan?

8. Ano an kaiba sa personal na pag-adal, asin taano ta mahalaga iyan?

⁸ Para magin amigo ni Jehova, kaipuhan niyatong magdangog asin makipag-ulay sa saiya. An personal na pag-adal kan Bibliya iyo an panginot na paagi na nagdadangog kita ki Jehova. Kaiba diyan an pagkua nin kaaraman paagi sa pagbasa asin paghurop-hurop sa Tataramon nin Diyos asin sa mga publikasyon na basado sa Bibliya. Mantang ginigibo mo iyan, tandaan na an pag-adal nin Bibliya bako lang basta pagtuom nin mga impormasyon arog kan ginigibo mo para makapasar sa exam sa eskuwelahan. An epektibong pag-adal garo sarong pagbiyahe na diyan puwede kang maghanap asin makadiskubre nin bagong mga aspekto kan personalidad ni Jehova. Makakatabang ini sa saimo na maparani sa Diyos, dangan marani man siya sa saimo.—Sant. 4:8.

9. Anong mga pantabang an ginagamit mo sa saimong personal na pag-adal?

⁹ Nagtatao an organisasyon ni Jehova nin dakul na pantabang para magkaigwa ka nin epektibong programa sa pag-adal. Halimbawa, makakatabang sa saimo an “Bible Study Activities” na mahihiling sa seksiyon na “Teenagers” sa jw.org tanganing manudan mo an praktikal na mga leksiyon sa mga istorya sa Bibliya. Mahihiling man sa jw.org an mga giya sa pag-adal na “What Does the Bible Really Teach?” na makakatabang sa saimo na kumusog an kumbiksiyon mo sa saimong mga tinutubod. Makakatabang an mga giya sa pag-adal na iyan kun paano ipapaliwanag sa iba an saimong mga tinutubod. May iba pang ideya sa pag-adal na mahihiling sa artikulong “Ang mga Kabataan ay Nagtatanong . . . Paano Ko Gagawing Kawili-wili ang Pagbabasa ng Bibliya?” sa Abril 2009 na isyu kan Gumising! Mahalagang marhay an pag-adal asin paghurop-hurop tanganing makamtan mo an saimong kaligtasan.—Basahon an Salmo 119:105.

10. Taano ta mahalagang marhay para sa sarong bawtisadong Kristiyano an pagpamibi?

¹⁰ Kun an personal na pag-adal sarong paagi na nagdadangog kita ki Jehova, an pagpamibi sarong paagi na kita nakikipag-ulay sa saiya. Dai dapat isipon nin sarong Kristiyano na an pagpamibi sarong daing saysay na ritwal o na iyan sarong ‘pampasuwerte’ tanganing magin mapanggana sa sarong bagay. Imbes, an pamibi sarong tunay na komunikasyon sa satong Kaglalang. Gustong magdangog  ni Jehova sa sasabihon mo. (Basahon an Filipos 4:6.) Pag nakakaeksperyensiya ka nin ano man na kahaditan, an madunong na sadol kan Bibliya iyo na “ipasa mo ki Jehova an pagabat na nasa saimo.” (Sal. 55:22, NW) Naniniwala ka daw na talagang epektibo iyan? Minilyon na brother asin sister an makakapagsabi sa saimo na talagang nakatabang iyan sa sainda. Asin makakatabang man iyan sa saimo!

11. Taano ta dapat na pirmi kang magpasalamat ki Jehova?

¹¹ Bako lang paghagad nin tabang ki Jehova an puwede mong sabihon sa pamibi. Sinasabi kan Bibliya: “Ipahiling nindo na mapagpasalamat kamo.” (Col. 3:15) Kun minsan, tibaad an pigpaparaisip ta na sana iyo an mga problema ta kaya dai na niyato naririsa an dakul na bendisyon na igwa kita. Purbaran ini: Kada aldaw, mag-isip nin kisiyera tulong bagay na ipinagpapasalamat mo. Dangan pasalamatan si Jehova sa mga bendisyon na iyan. Si Abigail, sarong tin-edyer na nabawtismuhan sa edad na 12, nagsabi: “Para sako mayo nang ibang mas maninigo tang pasalamatan sa bilog na uniberso kundi si Jehova. Dapat ta siyang pasalamatan sa lambang pagkakataon huli sa mga regalong itinatao niya sa sato. Minsan may nadangog akong sarong marahayon na pagirumdom: Kun pagmata ta sa aga an yaon sa sato iyo sana an mga bagay na ipinagpasalamat ta ngunyan ki Jehova, pira na lang an yaon sato?” *

12, 13. Taano ta mahalaga na isip-isipon kun paano mo personal na nanamitan an karahayan ni Jehova?

¹² Si Hading David, na pirang beses na ilinigtas ni Jehova sa dakul na masakit na sitwasyon, sinambit an mga tataramon na ini sa kanta: ‘Namitan nindo asin hilingon nindo ta marahayon si Jehova; maugma an tawo na nagsasarig diyan sa saiya.’ (Sal. 34:8) Idinuduon kan bersikulong iyan an kahalagahan nin personal na eksperyensiya. Pag nagbabasa ka nin Bibliya saka kan satong mga publikasyon asin pag nag-aatender ka sa Kristiyanong mga pagtiripon, nakakadangog ka nin nakakapakusog na mga eksperyensiya kun paano tinabangan nin Diyos an iba na magdanay na maimbod. Pero mantang nagkukusog an saimong espirituwalidad, kaipuhan mong mahiling kun paano ka mismo tinatabangan ni Jehova. Paano mo personal na nanamitan an karahayan ni Jehova?

¹³ Nananamitan kan gabos na Kristiyano an karahayan ni Jehova sa sarong espesyal na paagi. Inimbitaran niya kita na rumani sa saiya asin sa saiyang Aki. Sinabi ni Jesus: “Mayo nin tawong makakadulok sa sako apuwera sana kun irani siya kan Ama na nagsugo sa sako.” (Juan 6:44) Namamatian mo daw na irinani ka ni Jehova sa saiya? Puwedeng magrason an sarong hoben, ‘An mga magurang ko an irinani ni Jehova sa saiya; nagsunod man sana ako.’ Pero kan idinusay mo na an saimong sadiri ki Jehova asin nagpabawtismo, ipinahiling mo na igwa ka nin espesyal na relasyon sa saiya. Ngunyan talagang midbid ka na niya. Sinisigurado sa sato kan Bibliya: “Kun an saro namumuot sa Diyos, midbid niya siya.” (1 Cor. 8:3) Kaya pirming pahalagahan na marhay an kabtang na itinao sa saimo ni Jehova sa saiyang organisasyon.

14, 15. Paano makakapakusog sa saimong pagtubod an ministeryo?

¹⁴ Mananamitan mo man an karahayan ni Jehova pag naeeksperyensiyahan mo an tabang niya mantang sinasabi mo sa iba an dapit sa pagtubod mo. Puwede mong gibuhon iyan sa ministeryo pati man sa eskuwelahan. Nasasakitan an iba na magpatotoo sa saindang mga kaklase asin posibleng aram mo na an dahilan. Dai mo kaya aram kun ano an magigin reaksiyon ninda. Lalo nang masakit pag an kaulay mo sarong dakulang grupo kisa sa saro sanang kaklase. Ano an makakatabang?

¹⁵ Inot, pag-isipan kun taano ta kumbinsido ka sa saimong mga tinutubod. Igwa daw sa saindong  lengguwahe kan mga giya sa pag-adal na mahihiling sa jw.org? Kun dai ka sigurado, magtao nin panahon para hanapon iyan. Dinisenyo iyan tanganing tabangan kang pag-isipan an saimong mga tinutubod, kun taano ta pinaniniwalaan mo iyan, asin kun paano mo iyan ipapaliwanag sa iba. Kun makusog an saimong kumbiksiyon asin kun preparado kang marhay, mapapahiro ka kaiyan na magpatotoo para sa ngaran ni Jehova.—Jer. 20:8, 9.

16. Ano an puwedeng makatabang sa saimo kun nag-aalangan kang ipakipag-ulay an mga tinutubod mo?

¹⁶ Pero dawa nag-andam ka, tibaad mag-alangan ka pa man giraray na sabihon sa iba an dapit sa mga tinutubod mo. Sarong 18 anyos na sister na nabawtismuhan kan siya 13 anyos an nagsabi: “Aram ko kun ano an mga tinutubod ko, pero kun minsan nasasakitan ako kun paano iyan sasabihon.” Ano an ginibo niya? “Hinihinguwa kong magtaram sa natural saka relaks na paagi,” an sabi niya. “Kun an mga kaklase ko ngani dai nag-aalangan na iistorya an dapit sa mga ginigibo ninda, dapat arog man ako kaiyan. Kaya pasimple lang akong masambit nin sarong bagay, arog nin, ‘May tinutukduan ako sa Bibliya kan sarong aldaw, tapos . . . ’ Dangan mapadagos na ako sa pag-istorya. Dawa bako man talagang dapit mismo sa Bibliya an iniistorya ko, sa parati nagkakainteres an iba kun ano an ginigibo ko pag nagtutukdo nin Bibliya. Kun minsan, naghaharapot sinda sako dapit diyan. Mantang mas parati kong ginagamit an paaging ini, nagigin mas madali na iyan sako. Asin kada magibo ko iyan, ugmahon ako!”

17. Paano an pagmansay mo sa saimong pagtubod makakatabang sa pakikipag-ulay mo sa iba?

¹⁷ Kun igagalang mo asin papahilingan nin personal na interes an iba, mas posibleng marhay na iyan man an gigibuhon ninda sa saimo. “Takot ako pirmi kaidto na kun ilalaog ko sa urulay an Bibliya, iisipon na kan mga tawo na panatiko ako.” Iyan an sabi kan 17 anyos na si Olivia na nabawtismuhan bago magtin-edyer. Pero binago niya an saiyang kaisipan. Imbes na pagparaisipon an mga ikinakatakot niya, ini an inisip niya: “Dakul na hoben an mayo lamang nin aram dapit sa mga Saksi ni Jehova. Kita sana an mga Saksing midbid ninda. Kaya an paghiro ta puwedeng makaapekto sa magigin reaksiyon ninda. Paano kun nasusupog kita o natatakot o nasasakitan na sabihon an dapit sa satong pagtubod, o paano kun pignenerbiyos kita pag nagtataram na? Kun arog kaiyan, tibaad isipon nindang ikinakasupog ta kun siisay talaga kita. Puwede pa nganing dai kita ninda irespeto ta bako kitang confident sa sinasabi ta. Pero kun relaks sana kita pag nagtataram saka nagpapahiling na kumbinsido kita sa satong mga tinutubod, na ginigibo iyan na normal na parte kan pag-uulay, mas posibleng marhay na igagalang ninda kita.”

18. Ano an kalabot sa paghihinguwa para sa saimong kaligtasan?

¹⁸ Nahiling niyato na seryosong responsabilidad an saimong paghihinguwa para sa saimong kaligtasan. Tanganing magibo iyan, kaipuhan mong basahon asin hurop-hurupon an Tataramon nin Diyos, mamibi ki Jehova, asin isip-isipon an mga bendisyon na itinatao sa saimo ni Jehova. Kun gigibuhon mo an mga iyan, mapapakusog an saimong kumpiyansa na katuod mo si Jehova. Iyan an magpapahiro sa saimo na magpatotoo dapit sa saimong mga tinutubod.—Basahon an Salmo 73:28.

19. Taano ta sulit an mga paghihinguwa mo para sa saimong kaligtasan?

¹⁹ Sinabi ni Jesus: “Kun an siisay man gustong magsunod sa sako, talikdan niya an saiyang sadiri saka pasanon an saiyang hariging pasakitan asin padagos siyang sumunod sa sako.” (Mat. 16:24) Malinaw na an pagigin disipulo—kaiba an pagdusay asin pagpabawtismo—obligasyon mo bilang sarong Kristiyano. Iyo, nagdadara iyan nin kadakul na bendisyon ngunyan, asin buhay na daing katapusan sa maabot na bagong kinaban nin Diyos. Kaya lugod na padagos kang maghinguwa para sa saimong kaligtasan!